[Heb., sheʹrets].

Ang lintunganayng pulong nga gigikanan niini nga termino nagkahulogang “modagsang” o “dagsangan.” (Gen 8:17; Ex 8:3) Kini nga nombre mopatim-awng gipadapat ngadto sa gagmayng mga linalang nga magpanon. (Ex 8:3; Sal 105:30; itandi ang Ex 1:7.) Kini unang makaplagan sa Genesis 1:20 sa dihang mitungha sa unang higayon ang buhing mga kalag sa ikalimang adlaw sa paglalang sa dihang ang katubigan gidagsangan sa buhing mga kalag. Ang Lunop naglaglag sa ‘tigpanon nga mga linalang’ sa yuta nga diha sa gawas sa arka.​—Gen 7:21.

Ang balaod mahitungod sa mahinlo ug mahugaw nga mga butang nagpakita nga ang maong termino mahimong ipadapat sa mga linalang sa tubig (Lev 11:10); pak-an nga mga linalang, lakip ang mga kabog ug mga insekto (Lev 11:19-23; Deu 14:19); mga linalang sa kamad-an, lakip ang mga ilaga, mga tabili, mga kamelyon (Lev 11:29-31); ingon man sa mga linalang nga nagakamang pinaagi sa ilang “tiyan” ug mga linalang nga daghan ug tiil (Lev 11:41-44). Daghan, apan dili tanan niini ang “mahugaw” ingong pagkaon ubos sa Balaod.