Sa dihang ang mga Israelinhon miokupar sa Canaan, ang matag banay gihatagag usa ka luna sa yuta, ug ang maong mga yuta gibutangan ug mga mohon, o mga timaan sa utlanan. Ang Bibliya wala maghubit niini nga mga timaan apan lagmit nga kini maoy mga poste, bato, o mga tudling diha sa yuta. Ang Hebreohanong pulong alang sa “timaan sa utlanan” (gevulʹ) maoy sama ra nianang sa “utlanan” ug “teritoryo.” (Gen 10:19; 47:21) Ang pipila ka timaan sa utlanan didto sa Palestina adunay mga inskripsiyon ingong ilhanan. Ang makuting mga inskripsiyon makita diha sa mga mohon o mga batong utlanan didto sa Ehipto ug Mesopotamia. Pananglitan, ang usa ka kinulitan nga batong utlanan ni Nabucodonosor I nakaplagan didto sa Nippur.

Ang balaod ni Jehova nagdili sa pag-atras o pagsibog sa mga timaan sa utlanan. (Deu 19:14; tan-awa usab ang Pr 22:28.) Ngani, tinunglo ang usa nga mag-atras sa “timaan sa utlanan sa iyang isigkatawo.” (Deu 27:17) Sanglit ang mga tag-iyag yuta  kasagarang mag-agad sa abot sa ilang mga luna sa yuta, ang pagsibog sa timaan sa utlanan magkahulogan ug paghikaw sa laing tawo sa bahin sa iyang kahinguhaan. Ang pagbuhat niini maoy katumbas sa pagpangawat ug ingon niana ang paglantaw niini sa karaang kapanahonan. (Job 24:2) Apan dihay mga tawong walay prinsipyo nga sad-an sa maong mga pag-abuso, ug ang mga prinsipe sa Juda sa panahon ni Oseas gipakasama niadtong nag-irog sa usa ka utlanan.​—Os 5:10.

Si Jehova mahunahunaon sa mga babayeng balo ug sa mga bata nga ilo-sa-amahan. Busa giingon nga siya magalumpag sa balay sa mga nagabayaw sa ilang kaugalingon, “apan siya magapiho sa utlanan sa babayeng balo.” (Pr 15:25) Dugang pa, ang Proverbio 23:​10, 11 nagpahayag: “Ayaw isibog ang utlanan sa dugay na kanhi, ug ayaw pagsulod sa uma sa mga bata nga ilo-sa-amahan. Kay ang ilang Manunubos kusganon; iyang labanan ang ilang kawsa batok kanimo.”