Usa ka butang nga gigamit sa paghimo ug marka (kasagaran diha sa yutang-kulonon o sa talo) nga nagpaila sa pagkatag-iya, pagkatinuod, o sa kasabotan. Ang karaang mga timbre maoy usa ka piraso sa gahing materyales (bato, garing, o kahoy) nga may mga letra nga gikulit o mga disenyo nga binali. Kini gigama nga lainlain ug mga porma, lakip ang mga kono (cone), kuwadrado, silindro, pormag bakukang, ug pormag mga ulo sa hayop. (Mahitungod sa igtitimbre nga mga singsing, tan-awa ang SINGSING.) Kadtong pormag silindro sagad may gitas-ong tali sa 2 ug 4 sm (0.75 hangtod sa 1.5 pul.). Sa dihang ang usa ka silindro nga may kinulit palibot niini iligid sa basa nga yutang-kulonon, kini mopatunghag permanenteng marka diha sa linilok. Sagad ang silindro nga mga timbre lungagan sa isigkatumoy ug busa mahimong bitayon diha sa usa ka kordon.

Ang relihiyosong mga simbolo, ingon man ang mga tanom, hayop, ug yanong mga talan-awon, maoy lakip sa mga butang nga gilarawan diha sa mga timbre sa Ehipto ug Mesopotamia. Makita sa Babilonyanhong Timbre sa “Pagtental” (British Museum) ang usa ka kahoy nga may usa ka lalaki nga naglingkod sa usa ka kiliran ug sa usa ka babaye sa pikas kiliran, ug sa likod sa babaye makita ang usa ka mituyhakaw nga halas. Sagad nga ang mga timbre adunay ngalan sa tag-iya ug sa iyang posisyon. Pananglitan, ang usa ka timbre nga nakaplagan sa Palestina mabasa, “Iya ni Shema, ang ministro ni Jeroboam.”​—The Biblical World, giedit ni C. Pfeiffer, 1966, p. 515.

Ang mga marka sa timbre mahimong magpaila sa pagkatag-iya o sa pagkatinuod sa usa ka butang ug pinaagi niini dili mahilabtan ang mga dokumento o ang ubang mga butang nga gitimbrehan, lakip ang mga puntil, pultahan, ug mga lubnganan. (Job 14:17; Dan 6:17; Mat 27:66) Sa dihang ang manalagnang si Jeremias mipalit ug yuta, gitimbrehan ang kopya sa sulat-kalig-onan nga may mga pirma sa mga saksi, apan ang ikaduhang kopya gipabiling binuksan. Tingali ang pagtimbre gihimo pinaagi sa pagpilo nga sirado sa sulat-kalig-onan, paghigot niini ug usa ka kordon, ug pagbutang ug talo o ubang humok nga substansiya diha sa kordon ug pagmarka sa humok nga materyal pinaagig timbre. Kon sa ulahi adunay mokuwestiyon kon tukma ba ang binuksan nga kopya, ang sulat-kalig-onan nga gitimbrehan sa atubangan sa mga saksi mahimong ipakita. (Jer 32:10-14, 44) Ang usa ka tawo nga piyalan sa timbre sa hari makapakanaog ug opisyal nga mga mando, kay ang marka sa timbre nga iyang itimbre maoy magpabalido sa mga mando. (1Ha 21:8; Est 3:​10, 12; 8:​2, 8, 10) Ang pagbutang ug timbre diha sa usa ka dokumento nagpaila sa pagdawat sa mga kondisyon nga anaa niana. (Neh 9:38; 10:1) Nakaplagan ang daghang karaang mga gunitanan sa banga nga may mga marka sa timbre diha niana. Ang pipila niini nga mga marka sa timbre nagpaila sa tag-iya sa mga banga ug sa mga sulod niini; ang uban niini nagpadayag sa gidaghanon o sa kalidad sa mga sulod.

Mahulagwayong Paggamit. Ang aktuwal nga paggamit sa mga timbre nagtaganag pasukaranan alang sa ubay-ubayng mahulagwayong mga ekspresyon nga makaplagan sa Bibliya. Gitagna nga ang Mesiyas ‘magtimbre sa panan-awon ug sa manalagna.’ Kini tungod kay, pinaagi sa pagtuman sa mga tagna, ang Mesiyas magtimbre niini  ingong tinuod ug inspirado sa Diyos. (Dan 9:24; itandi ang Ju 3:33.) Ingong ilhanan sa pagpanag-iya, si Abraham gituli ug kini nagsilbing usa ka “timbre” sa pagkamatarong nga iyang nabatonan. (Rom 4:11) Sanglit si apostol Pablo nakatabang sa daghang Kristohanon sa Corinto nga mahimong mga magtutuo, sila nagsilbing usa ka timbre nga nagkompirmar sa pagkatinuod sa iyang pagkaapostol. (1Co 9:​1, 2) Ang unang-siglong mga Kristohanon gihisgotan ingong “gitimbrehan” pinaagi sa balaang espiritu, nga maoy usa ka pasiunang ilhanan sa ilang langitnong panulondon. (Efe 1:​13, 14; 4:30) Ang timbre nagpaila nga sila iya sa Diyos (2Co 1:​21, 22) ug nagpakita nga sila sa pagkatinuod nahilinya alang sa langitnong kinabuhi. Ang basahon sa Pinadayag nagpakita sa gidaghanon nga sa kataposan gitimbrehan ingong 144,000.​—Pin 7:2-4; 9:4.

Ang Bibliya naghisgot bahin sa butang nga sirado, tinago, o sekreto ingong gitimbrehan. Ang matagnaong mga mensahe “gitimbrehan” sulod sa panahon nga kini dili masabtan. (Dan 12:​4, 9; Pin 5:1; 22:10; itandi ang Isa 8:16; 29:11.) Ug giingon nga si Jehova ‘nagbutang ug tabon o timbre palibot sa mga bituon,’ nga dayag nga nagkahulogang iyang gitagoan sila gikan sa panan-aw pinaagi sa mga panganod.​—Job 9:7.