Ang tuig human sa matag siklo sa pito ka 7-ka-tuig nga mga yugto, nga nagsugod sa dihang ang Israel misulod sa Yutang Saad. Ang Hebreohanong pulong nga yoh·velʹ (o, yo·velʹ) nagkahulogang “sungay sa laking karnero,” ug kini nagtumong sa pagpatingog sa budyong nga sungay sa laking karnero sa panahon sa ika-50 nga tuig aron imantala ang kagawasan sa tibuok yuta.​—Lev 25:​9, 10, ftn sa Rbi8; tan-awa ang SUNGAY, BUDYONG.

Sugod sa panahon sa pagsulod sa Yutang Saad, ang nasod sa Israel moihap ug unom ka tuig nga sulod nianang panahona ang yuta pugsan, tikaron, ug anihan; apan ang ikapito nga tuig maoy usa ka tuig nga igpapahulay, nga sulod nianang tuiga ang yuta papahulayon. Sa ikapito nga tuig walay himoon nga pagpugas ni pagpul-ong. Bisan ang mga bunga gikan sa mga lugas nga nahulog sa panahon sa pag-ani sa milabayng tuig dili mahimong anihon, ug ang mga ubas dili pagapupoon gikan sa wala pul-ongi nga mga paras. Ang lugas ug prutas nga mitubo rag iya mahimong kaonon sa tag-iya, sa iyang mga ulipon, sa sinuholang mga mamumuo, sa langyawng mga pumoluyo, ug sa mga kabos. Ang binuhing mga hayop ug ihalas nga mga mananap gitugotan usab sa pagkaon niini. (Lev 25:​2-7; Ex 23:​10, 11) Pito niining pito-ka-tuig nga mga yugto (7 × 7 = 49) ang palabyon, ug ang mosunod nga tuig, ang ika-50, maoy tuig sa Tinghugyaw.

Ang Tinghugyaw adunay mga kinaiyahan nga sama sa tuig nga igpapahulay. Ang yuta papahulayon na usab sa bug-os. Pareho ang mga regulasyon nga gipadapat bahin sa abot sa yuta. (Lev 25:8-12) Kini nagkahulogan nga ang abot sa ika-48 nga tuig sa matag 50-ka-tuig nga siklo mao ang pangunang tinubdan sa pagkaon alang nianang tuiga ug sa mosunod nga kapin ug diyutay sa duha ka tuig, hangtod sa pag-ani sa ika-51 nga tuig, o sa tuig human sa Tinghugyaw. Ang linaing panalangin ni Jehova sa ikaunom nga tuig mopatunghag abot nga igo sa pagtaganag pagkaon sa tibuok tuig nga Igpapahulay. (Lev 25:20-22) Sa susama, ang Diyos nagtaganag dagaya ug igong ani sa ika-48 nga tuig aron matagan-an ang nasod alang sa tibuok tuig nga Igpapahulay, sa Tinghugyaw nga mosunod, ug sa mosunod pa nga tuig hangtod sa ting-ani, kon tumanon sa mga Hudiyo ang iyang Balaod.

Ang Tinghugyaw sa usa ka diwa maoy usa ka tibuok tuig nga pista, usa ka tuig sa kagawasan. Ang pagsunod niana magpasundayag sa pagtuo sa Israel sa ilang Diyos nga si Jehova ug maoy usa ka panahon sa pagpasalamat ug kalipay sa iyang mga tagana.

Sa ikanapulo nga adlaw sa ikapitong bulan (sa bulan sa Tisri), sa Adlaw sa Pagtabon-sa-Sala, nga ang budyong (shoh·pharʹ, o sho·pharʹ, usa ka bawog nga sungay sa hayop) patingogon, sa pagmantala ug kagawasan sa tibuok yuta. Kini nagkahulogan ug kagawasan alang sa Hebreohanong mga ulipon, nga ang kadaghanan kanila nagbaligya sa ilang kaugalingon tungod sa utang. Ang maong pagpagawas sagad himoon pag-abot sa ikapitong tuig sa  pagkaulipon (Ex 21:2), apan ang Tinghugyaw naghatag ug kagawasan bisan niadtong wala pa makasilbi ug unom ka tuig. Ang tanang panulondong yuta nga nabaligya (sagad tungod sa mga pinansiyal nga kapit-os) iuli, ug ang matag tawo mopauli sa iyang banay ug sa iyang gipanag-iya nga panulondon. Walay banay nga magpabiling kabos hangtod sa hangtod. Ang matag banay makabaton ug dungog ug pagtamod. Bisan ang tawo nga nagwaldas sa iyang kabtangan dili mawad-an hangtod sa hangtod sa iyang panulondon alang sa iyang kaliwatan. Kon buot hunahunaon, ang yuta sa pagkatinuod iya ni Jehova, ug ang mga Israelinhon maoy langyawng mga pumoluyo ug mga lalin sa panglantaw ni Jehova. (Lev 25:​23, 24) Kon ang nasod mosunod sa mga balaod sa Diyos, nan, sumala sa iyang giingon, “Angay nga walay mahimong kabos sa imong taliwala.”​—Lev 25:8-10, 13; Deu 15:​4, 5.

Tungod sa balaod sa Tinghugyaw, walay yuta nga mabaligya hangtod sa hangtod. Gilatid sa Diyos nga kon ang usa ka tawo magbaligya ug yuta nga iyang napanunod, ang presyo sa pagbaligya kinahanglang ipasukad sa nahibiling mga tuig hangtod sa Tinghugyaw. Mao usab kana ang kantidad nga ibayad sa dihang ang yutang napanunod lukaton sa tag-iya niini. Busa, ang bayad sa pagbaligya sa yuta sa pagkatinuod maoy bayad lamang sa paggamit sa yuta ug sa abot niini sulod sa nahibiling mga tuig hangtod sa tuig sa Tinghugyaw. (Lev 25:​15, 16, 23-28) Kini nga lagda mapadapat sa mga balay diha sa dili-pinarilang kabalangayan, nga giisip ingong kapatagan; apan ang mga balay diha sa pinarilang mga siyudad wala ilakip sa mga propiedad nga iuli sa panahon sa Tinghugyaw. Walay labot niini ang mga balay sa mga Levihanon, nga ang gipanag-iya mao lamang ang mga balay ug mga sibsibanan sa palibot sa mga siyudad sa mga Levihanon. Ang ilang mga balay ibalik kanila sa panahon sa Tinghugyaw; ang sibsibanan sa mga siyudad sa mga Levihanon dili ibaligya.​—Lev 25:29-34.

Ang talagsaong probisyon sa tuig sa Tinghugyaw mas mapabilhan pa kon tagdon sa usa dili lamang ang mga kaayohan niini ngadto sa indibiduwal nga Israelinhon kondili ilabina ang epekto niini sa nasod sa katibuk-an. Sa dihang ang kahikayan sa Tinghugyaw sundon sa hustong paagi, sa tuig sa Tinghugyaw ang nasod mapasig-uli ngadto sa bug-os ug nahiangay nga teokratikanhong kahimtang nga gilaraw ug giestablisar sa Diyos sa sinugdan. Ang kagamhanan anaa sa maayong kahimtang. Lig-on kanunay ang ekonomiya sa nasod, ug kini wala gayoy utang. (Deu 15:6) Tungod sa Tinghugyaw wala mokubos ang bili sa yuta ug usab nalikayan ang dakong utang diha sa sulod sa nasod ingon man ang sangpotanan niini nga mao ang taphawng pag-uswag nga magdalag implasyon o pagtaas sa bili sa mga palaliton, pagkunhod sa panalapi, ug pagkaunlod sa negosyo.

Ang balaod sa Tinghugyaw, kon sundon, magtipig sa nasod gikan sa pagkahugno ngadto sa makapasubong kahimtang nga atong nakita karon sa daghang kayutaan, diin adunay duha lamang ka matang sa tawo, ang dato kaayo ug ang kabos kaayo. Ang mga kaayohan nga napahimuslan sa matag indibiduwal nagpalig-on sa nasod, kay walay usa nga mahimong kabos ug dili produktibo tungod sa dili-maayong kahimtang sa ekonomiya, apan ang tanan makatampo sa ilang mga kahibalo ug mga abilidad alang sa kaayohan sa nasod. Tungod sa pagpanalangin ni Jehova sa abot sa yuta ug sa pagtaganag edukasyon, ang Israel, sa dihang magmasinugtanon, makapahimulos sa hingpit nga kagamhanan ug sa kauswagan nga ikatagana lamang sa tinuod nga teokrasya.​—Isa 33:22.

Ang Balaod gibasa ngadto sa katawhan sa panahon sa mga tuig nga Igpapahulay, ilabina panahon sa Pista sa mga Balongbalong, o sa Pagpanghipos sa mga Abot. (Deu 31:10-12) Sa ingon sila mahimong mas suod ngadto kang Jehova ug makahupot sa ilang kagawasan. Si Jehova nagpasidaan sa mga Israelinhon nga sila makaagom ug katalagman kon sila dili magmasinugtanon ug kanunayng maglapas sa iyang mga balaod (nga naglakip sa mga balaod bahin sa mga tuig nga Igpapahulay ug sa Tinghugyaw).​—Lev 26:27-45.

Sugod sa mga tuig sa pagsulod sa mga Israelinhon ngadto sa Yutang Saad, ang una nilang tuig sa Tinghugyaw nagsugod sa Tisri sa 1424 W.K.P. (Lev 25:2-4, 8-10) Tali sa panahon sa pagsulod sa Yutang Saad niadtong 1473 W.K.P. ug sa pagkapukan sa Jerusalem niadtong 607 W.K.P., ang mga Israelinhon obligado sa pagsaulog ug 17 ka Tinghugyaw. Apan usa ka makapasubong rekord sa ilang kasaysayan nga sila wala magpabili kang Jehova ingong ilang Hari. Sila sa kataposan milapas sa iyang mga sugo, lakip na ang mga balaod sa Igpapahulay, ug nawad-an sa mga panalangin nga iyang gitagana alang kanila. Ang ilang kapakyasan nagdalag kaulawan sa Diyos atubangan sa mga nasod sa kalibotan ug nakababag kanila sa pagpahimulos sa mga kaayohan sa iyang teokratikanhong kagamhanan.​—2Cr 36:​20, 21.

Simbolikong Kahulogan. Adunay mga paghisgot sa kahikayan sa Tinghugyaw diha sa Kristohanon Gregong Kasulatan. Si Jesu-Kristo miingon nga siya mianhi aron sa “pagwali sa kagawasan ngadto sa mga binihag.” (Luc 4:​16-18) Siya sa ulahi miingon labot sa kagawasan gikan sa pagkaulipon sa kasal-anan: “Kon ang Anak magpagawas kaninyo, kamo tinuod nga mahigawas.” (Ju 8:36) Sanglit ang dinihogan sa espiritung mga Kristohanon  gipahayag man nga matarong alang sa kinabuhi ug gipanganak ingong mga anak sa Diyos sugod sa Pentekostes sa 33 K.P., tungod niana si apostol Pablo makasulat: “Ang balaod nianang espiritu nga naghatag ug kinabuhi nga nahiusa kang Kristo Jesus nagpagawas na kaninyo gikan sa balaod sa sala ug sa kamatayon.” (Rom 8:2) Sa panahon sa Usa ka Libo ka Tuig nga Paghari ni Kristo, ang uban usab, ingon sa gipakita sa Roma 8:​19-21, “ipagawas gikan sa pagkaulipon sa pagkadunot” ug, human makapamatuod sa ilang pagkamaunongon kang Jehova ilalom sa pagsulay, “makabaton sa mahimayaong kagawasan sa mga anak sa Diyos.” Sila mapagawas gikan sa napanunod nga sala ug gikan sa kamatayon nga maoy sangpotanan niana. Ang pagpiyal sa yuta ibalik ngadto sa matuod nga mga magsisimba, nga atimanon sumala sa orihinal nga katuyoan ni Jehova alang sa katawhan.​—Pin 21:4; Gen 1:28; Isa 65:​21-25.