Ang Hebreohanong pulong nga deyohʹ, nga makita lamang sa Jeremias 36:​18, lagmit maoy usa ka hinulam nga pulong nga Ehiptohanon. Sa Kristohanon Gregong Kasulatan, ang pulong nga meʹlan makita lamang sa tulo ka higayon (2Co 3:3; 2Ju 12; 3Ju 13) ug mao ang neuter nga porma sa masculine adjective nga meʹlas, nga nagkahulogang “itom.”​—Mat 5:36; Pin 6:​5, 12.

Kasagaran, ang mga tinta maoy gama gikan sa substansiya nga igbubulok nga isagol sa sangkap nga adunay tagok, papilit, o barnis nga nagsilbing igpatapot nga pluwido aron magpabilin ang kolor diha sa gisulatan niini. Ang labing karaan nga mga pormula sa tinta, ug ang labing karaan nga mga espesimen nga nakaplagan, nagpakita nga ang substansiya nga igbubulok maoy itom tungod kay daghan kinig karbon, mahimong kini anuos nga gikuha gikan sa pagsunog ug lana o kahoy, o kaha mga dugmok nga uling gikan sa sinunog nga hayop o mga tanom. Ang mga substansiya nga igbubulok sa pulang mga tinta maoy mga iron oxide. Adunay pipila ka tintura (tincture) nga gigamit usab sa mga tawo kanhi. Si Josephus nag-ingon nga ang kopya sa Balaod nga gipadala ngadto kang Ptolemy Philadelphus gisulat sa mga letra nga bulawan ug kolor. (Jewish Antiquities, XII, 89 [ii, 11]) Kon ang mga duga o mga tina gikan sa mga tanom mao ang gigamit ingong mga tinta, dugay na kining nawala tungod sa pagkadaling mapapas niini.

Aron makapatunghag dekalidad nga mga tinta, dakong panahon ang gikinahanglan aron mapino ug masagol ang mga substansiya nga igbubulok diha sa mga sambog niini. Unya ang mga tinta sagad nga tipigan ingong pinaugang mga hinulma o mga bareta, nga bas-on ug diyutay sa eskriba samtang iyang ipahid ang iyang brutsa o tangbo diha niini.

Ang mga tinta nga gama sa mga Insek dugay nang nailhan ingong luto kaayog bulok ug modurar sa taas kaayong panahon. Ang mga dokumento nga gisulat ginamit ang pipila niini nga mga tinta mahimong ihumol sa tubig sulod sa ubay-ubayng semana nga dili mapapas ang tinta. Sa laing bahin, adunay gihimo usab nga mga tinta nga daling mapapas kon gamitan ug basa nga espongha o panapton. Kini lagmit mao ang pasukaranan sa pag-ingon ni Jehova sa simbolikanhon nga paagi, “Ang bisan kinsa nga nakasala batok kanako, ako siyang papason gikan sa akong basahon.”​—Ex 32:33; tan-awa usab ang Num 5:23; Sal 109:​13, 14.