Usa ka Gregong Kristohanon nga naghago uban ni apostol Pablo. Sa dihang mitungha ang isyu bahin sa pagtuli didto sa Antioquia (mga 49 K.P.), mopatim-aw nga si Tito miuban kang Pablo ug Bernabe ngadto sa Jerusalem. (Buh 15:​1, 2; Gal 2:1-3) Sa mga 55 K.P., si Tito nagsakripisyo sa pag-alagad sa kongregasyon sa Corinto, nga gipadala ngadto sa Corinto ni apostol Pablo aron motabang sa pagpangolekta alang sa mga kabos nga mga igsoon sa Judea ug tingali usab aron mahibaloan ang reaksiyon sa kongregasyon sa unang sulat ni Pablo ngadto kanila. (2Co 2:13; 8:1-6; 12:​17, 18) Human niadto, sa dihang nahibalag ni Tito ang apostol didto sa Macedonia, nakahatag siya ug maayong taho bahin sa kongregasyon sa Corinto nga nakapahupay ug nakapalipay kang Pablo. Naugmad ni Tito ang dakong pagmahal alang sa mga Kristohanon sa Corinto tungod sa ilang pagkamasinugtanon ug tungod kay ang ilang dalayegong tinamdan nahimong tinubdan sa pagdasig ug kalipay kaniya.​—2Co 7:​6, 7, 13-15.

Sanglit gisugdan ni Tito ang pagpangolekta sa amot, buot ni Pablo nga iyang taposon ang buluhaton ug girekomendar si Tito ngadto sa kongregasyon sa Corinto ingong “usa ka mag-aambit uban kanako ug isigkamagbubuhat alang sa inyong kaayohan.” Kay interesado gayod sa kaayohan sa mga taga-Corinto, ug nadasig sa apostol sa pagbuhat niini, si Tito kinabubut-on nga mibiya paingon sa Corinto.​—2Co 8:​6, 16, 17, 23.

Human mapagawas si Pablo gikan sa iyang unang pagkabilanggo sa Roma, si Tito ug Timoteo lagmit miduyog kaniya sa ministeryo. Samtang didto sa Creta (lagmit tali sa 61 ug 64 K.P.), gibilin ni Pablo si Tito didto aron “magtul-id sa mga butang nga depektoso ug magtudlo ug mga ansiyano sa matag siyudad.” (Tit 1:​4, 5) Lagmit nga kini maoy usa ka temporaryong asaynment, kay si Pablo naghangyo kang Tito sa pagpaningkamot nga makaduyog kaniya sa Nicopolis.​—Tit 3:12.

Sulod sa panahon sa ikaduhang pagkabilanggo ni Pablo sa Roma (mga 65 K.P.), si Tito, lagmit ubos sa pagtultol sa apostol o sa iyang pagtugot, mibiya paingon sa Dalmacia.​—2Ti 4:10; tan-awa ang DALMACIA.