Anaa niini nga bahin sa lawas sa tawo ug sa hayop ang sistema sa paghilis ug ang ubang mga organo sa lawas. Sa pipila ka hayop ang tiyan adunay upat ka seksiyon. Ubos sa Balaod, ang usa ka tawo nga naghalad ug inihaw nga hayop kinahanglang maghatag sa tiyan (Heb., qe·vahʹ) ngadto sa saserdote.​—Deu 18:3.

 Gawas nga gigamit sa pagtumong sa tibuok tiyan (Huk 3:​21, 22; Pr 13:25), ang Hebreohanong pulong nga beʹten gigamit sa ubay-ubayng mga higayon maylabot sa pagkaporma sa bata sulod sa lawas sa inahan niini. (Gen 25:​23, 24; Job 1:21; Sal 127:3; Ecc 11:5; Isa 44:2; Os 9:11) Ang mga anak maoy bunga sa tagoangkan, nga anaa sa tiyan. Apan ang laing Hebreohanong pulong, ang reʹchem (o raʹcham), sa espesipiko nagtumong sa tagoangkan, ingon sa makita sa Job 31:15: “Dili ba ang Usa nga nagbuhat kanako diha sa tiyan nagbuhat kaniya, ug dili ba Usa ra ang nag-andam kanamo diha sa tagoangkan?”​—Tan-awa usab ang Gen 49:25; Sal 22:10; Pr 30:16.

Ang Hebreohanong pulong nga beʹten (tiyan o tiyantiyan) gigamit usab ingong termino sa arkitektura diha sa 1 Hari 7:​20, nga nagtumong sa nagtuybo, nagbugdo nga butang.

Diha sa Kristohanon Gregong Kasulatan ang pulong nga koi·liʹa nagkahulogang usa ka “lungag” ug gihubad sa lainlaing paagi ingong “tiyan” (1Co 6:​13, Int; Flp 3:19), “tagoangkan” (Luc 1:​15, 41), “tinai” (Mat 15:17), ug “kinasulorang bahin” (Ju 7:38), sumala sa konteksto. Sa ubang mga higayon diin gigamit ang Hebreohanong pulong nga gihubad nga “kahiladmang mga bahin,” dayag nga kini naglakip sa tiyan. (Jon 1:17) Ang “tiyan” gigamit usab sa Kristohanon Gregong Kasulatan diha sa Roma 16:18 ug 1 Corinto 6:13. Si apostol Pablo nagsugyot nga si Timoteo moinom ug diyutayng bino para sa iyang tiyan (Gr., stoʹma·khos).​—1Ti 5:23.

Ang “tiyan” gigamit nga mahulagwayon sa pagtumong sa unodnong gana, o tinguha (Rom 16:18; Flp 3:19), ug ingong usa ka tinubdan sa mga pulong ug argumento. (Job 15:2; 32:​18, 19) Sa dihang anaa sa sulod sa tiyan sa isda, gitandi kini ni Jonas ngadto sa Sheol sa dihang siya miingon, “Gikan sa tiyan sa Sheol ako nagpakitabang,” tungod kay siya sama sa patay na gawas kon si Jehova magluwas kaniya sa milagrosong paagi.​—Jon 2:2; tan-awa ang TINAI; TAGOANGKAN.