[Maayo si Jah].

1. Katigulangan sa pipila ka namalik nga mga destiyero nga dili makasubay sa ilang Israelinhong talaan sa kagikan.​—Esd 2:​1, 59, 60; Neh 7:​61, 62.

2. Usa ka kaaway ni Nehemias. Si Tobias maoy “alagad,” lagmit usa ka opisyal ubos sa pagmando sa hari sa Persia. (Neh 2:19) Siya ug ang iyang anak nga lalaking si Jehohanan naminyo ug Hudiyong mga babaye, ug si Tobias paryente usab sa Hataas nga Saserdoteng si Eliasib. Kini nakapabentaha kang Tobias aron mapahuyang ang awtoridad ni Nehemias, kay daghang Hudiyo ang nagtamod ug nagsultig maayong mga butang bahin kang Tobias.​—Neh 6:17-19; 13:4.

Sa dihang si Nehemias miabot sa Jerusalem, si Tobias ug ang iyang mga kauban wala mahimuot sa masanag nga palaaboton sa Israel. (Neh 2:​9, 10) Sa sinugdan sila nagyubit ug nagbiaybiay lamang sa mga Hudiyo (Neh 2:19; 4:3), apan sa dihang ang pagtukod pag-usab sa paril nagmauswagon, sila nangasuko pag-ayo. Apan ang nagkalainlaing mga panagkunsabo​—ang tinguha sa pagpatay sa mga Hudiyo (Neh 4:7-9, 11, 14, 15), ug ang pagsulay nga mapasipad-an ni Nehemias ang pagkabalaan sa templo (Neh 6:​1, 10-13)​—napakyas tanan. Bisan human na matukod ang mga paril, si Tobias misulay sa paghadlok kang Nehemias pinaagi sa pakigsinulatay sa iyang mga dumadapig sa Jerusalem. (Neh 6:16-19) Busa, husto lamang nga si Nehemias naghangyo kang Jehova sa paghinumdom sa daghang daotang mga buhat ni Tobias ug sa iyang mga kaabin. (Neh 6:14) Sa ikaduhang pag-abot ni Nehemias gikan sa Babilonya, sa dihang iyang nakita ang usa ka lawak-kan-anan diha sa sawang sa templo nga gibuhat alang kang Tobias, dihadiha iyang gisalibay sa gawas ang mga butang ni Tobias.​—Neh 13:4-9.