[gikan sa Aramaiko, nagkahulogang “Kaluha”].

Kini nga apostol ni Jesu-Kristo gitawag ug “Ang Kaluha,” o Didymous. (Mat 10:3; Mar 3:18; Luc 6:15; Ju 11:​16, ftn sa Rbi8) Mopatim-aw nga siya daw mahinaykon sa pagpahayag sa iyang mga pagbati o sa pagbutyag sa iyang mga pagduhaduha. Hinuon, sa dihang nawala na ang iyang mga pagduhaduha, si Tomas wala magpanuko sa pagpakita sa iyang pagtuo.

Sa dihang gisugyot ni Jesus nga mobalik sila sa Judea aron iyang pukawon si Lazaro gikan sa kamatayon, si Tomas miingon: “Mangadto usab kita, aron mamatay kita uban kaniya.” (Ju 11:16) Sanglit dili pa dugay una pa niini nga ang mga Judeanhon nagtinguha sa pagpatay kang Jesus (Ju 11:​7, 8), tingali anaa sa hunahuna ni Tomas ang pagdasig sa ubang mga tinun-an sa pagkuyog kang Jesus bisan pag mosangpot kini sa ilang pagduyog kang Lazaro o kang Jesus diha sa kamatayon.

Si Tomas nagpakitag pagduhaduha ingong tubag sa giingon ni Jesus bahin sa iyang pagbiya aron sa pag-andam ug dapit alang sa mga apostoles, nga nag-ingon: “Ginoo, wala kami mahibalo kon asa ka moadto. Unsaon man namo pagkahibalo sa dalan?” (Ju 14:2-6) Mao man usab, human makadungog sa pagkabanhaw ni Jesus, si Tomas miingon: “Gawas kon makita ko sa iyang mga kamot ang inagian sa mga lansang ug ikatuslok ang akong tudlo sa inagian sa mga lansang ug ikatuslok ang akong kamot sa iyang kilid, dili gayod ako motuo.” Walo ka adlaw sa ulahi nabatonan ni Tomas ang kahigayonan sa pagbuhat niini sa dihang si Jesus nagpakita na usab ngadto sa mga tinun-an. Apan wala hisgoti kon niining higayona si Tomas aktuwal ba nga mihikap sa mga samad. Bisan pa niana siya nakombinsir ug mipatugbaw: “Ginoo ko ug Diyos ko!” Dayon si Kristo sa malumong paagi nagbadlong kaniya, nga nag-ingon: “Malipayon kadtong wala makakita apan nagtuo.”​—Ju 20:24-29.