Ang Hebreohanong termino nga kis·seʼʹ sa panguna nagkahulogang “lingkoranan” (1Sa 4:13; 2Ha 4:10) o lingkoranan nga halangdon kaayo nga sama sa usa ka “trono” (1Ha 22:10). Kini nagtumong dili lamang ngadto sa mga lingkoranan sa nagamandong mga monarko (1Ha 2:19; Neh 3:7; Est 3:1; Eze 26:16), ni kini nagtumong lamang sa usa ka lingkoranan nga may taas nga sandiganan ug mga patonganan sa bukton. Pananglitan, si Eli, samtang didto sa ganghaan sa Shilo, natikay-ang gikan sa iyang kis·seʼʹ, lagmit nga usa ka lingkoranan nga walay sandiganan. (1Sa 4:​13, 18) Ang Gregong termino nga throʹnos kasagarang nagtumong sa usa ka habog nga lingkoranan, nga may sandiganan, mga patonganan sa bukton, ug tumbanan sa tiil.

Ang Isaias 14:9 nagpadayag nga ang mga trono kasagarang gigamit sa mga monarko, ug ang Bibliya sa espesipiko naghisgot sa mga trono sa Ehipto (Gen 41:40; Ex 11:5; 12:29), Asirya (Jon 3:6), Babilonya (Isa 14:​4, 13; Dan 5:20), Persia (Est 1:2; 5:1), ug Moab (Huk 3:​17, 20). Ang mga arkeologo nagtuo nga ilang nakaplagan ang mga trono nga gigamit sa mga magmamando o sa ilang mga luyoluyo nga nagmando diha niini nga mga gahom, gawas sa Moab. Didto sa Megido, nakaplagan ang usa ka palid nga garing nga gituohang naghulagway sa usa ka Canaanhong trono ug tumbanan sa tiil. Kasagaran, kini nga mga trono sa mga dili-Israelinhon adunay mga sandiganan ug mga patonganan sa bukton, nga napuno sa mga kinulit o dayandayan. Ang usa ka naglungtad pa nga trono sa mga Ehiptohanon maoy gama sa kahoy nga gihaklapan ug bulawan, samtang ang usa ka trono sa mga Asiryanhon maoy sinalsal nga puthaw nga may mga kinulit nga ginama sa garing. Mopatim-awng ang trono naandang gipahiluna diha sa usa ka bantawan, o habog nga plataporma, ug sagad adunay usa ka tumbanan sa tiil.

Ang bugtong trono sa usa ka magmamando sa Israel nga gihubit nga detalyado mao ang trono nga gihimo ni Solomon. (1Ha 10:18-20; 2Cr 9:17-19) Mopatim-awng kini nahimutang diha sa “Portiko sa Trono,” usa sa mga tinukod nga nagbarog sa ibabaw sa Bukid sa Moria sa Jerusalem. (1Ha 7:7) Kadto maoy ‘usa ka dakong trono nga garing nga hinaklapan ug dalisay nga bulawan nga may lingin nga atop sa likod niini ug mga patonganan sa bukton.’ Bisan tuod ang garing lagmit mao ang pangunang materyales niini nga harianong lingkoranan, ang paagi sa paghimo nga gisunod sa katibuk-an didto sa templo daw nagpakita nga kini maoy ginama sa kahoy, nga hinaklapan ug dalisay nga bulawan ug gidayandayanan pag-ayo ug hinaklap nga mga palid nga garing. Alang sa nagtan-aw, ang maong trono daw sa katibuk-an hinimo sa garing ug bulawan. Human hisgoti ang unom ka ang-ang paingon sa trono, ang rekord nagpadayon: “Duha ka leyon nagbarog tupad sa mga patonganan sa bukton. Ug dihay napulog-duha ka leyon nga nagbarog sa isigkakilid sa unom ka ang-ang.” (2Cr 9:​17-19) Haom ang paggamit ug leyon dinhi ingong simbolo sa nagamandong awtoridad. (Gen 49:​9, 10; Pin 5:5) Ang 12 ka leyon mopatim-awng katumbas sa 12 ka tribo sa Israel, nga lagmit nagsimbolo sa ilang pagpasakop ug pagpaluyo sa magmamando nga naglingkod niini nga trono. Usa ka tumbanan sa tiil nga ginama sa bulawan ang gitaod nganha sa trono. Sumala sa pagkahubit niini, kining garing-ug-bulawan nga trono​—sa kahalangdon niini, nga may atop ug halangdong mga leyon diha sa atubangan​—milabaw kay sa bisan unsang trono nianang panahona, nadiskobrehan man kini sa mga arkeologo, gihulagway diha sa mga monyumento, o kaha gilarawan diha sa mga inskripsiyon. Sumala sa matinud-anong pagpaniid sa tigtala sa kasaysayan: “Walay laing gingharian ang nakahimo ug sama gayod niini.”​—2Cr 9:19.

Mahulagwayong Paggamit. Ang “trono” sa mahulagwayong paagi nagpasabot sa usa ka sentro sa nagamandong awtoridad (1Ha 2:12; 16:11) o sa awtoridad ug soberanya mismo sa hari (Gen 41:40; 1Cr 17:14; Sal 89:44); sa usa ka  nagamandong kagamhanan o harianong administrasyon (2Sa 14:9); sa soberanong paggahom ibabaw sa usa ka teritoryo (2Sa 3:10); ug sa usa ka dungganong posisyon (1Sa 2:​7, 8; 2Ha 25:28).

Unsa ang “trono ni Jehova”?

Si Jehova, ang usa nga bisan “ang langit sa mga langit” dili makaigo, dili kinahanglang molingkod sa usa ka literal nga trono o lingkoranan. (1Ha 8:27) Apan, iyang gihulagway ang iyang harianong awtoridad ug soberanya ngadto sa usa ka trono. Ang pipila sa mga alagad sa Diyos nakapribilehiyo sa pagkakita ug usa ka panan-awon bahin sa iyang trono. (1Ha 22:19; Isa 6:1; Eze 1:26-28; Dan 7:9; Pin 4:1-3) Ang Mga Salmo naghubit sa trono ni Jehova, sa iyang kahalangdon o gahom, sa iyang posisyon ingong Supremong Maghuhukom, nga natukod diha sa pagkamatarong ug hustisya “sukad pa kanhi.”​—Sal 89:14; 93:2; 97:2.

Gipaabot ni Jehova ang iyang trono nganhi sa yuta sa tipikal, espesipiko nga paagi diha sa iyang pagpakiglabot sa mga anak sa Israel. Sanglit ang usa nga nagmando sa Israel maoy “usa ka hari nga pagapilion ni Jehova nga imong Diyos,” kinsa magmando diha sa ngalan ni Jehova ibabaw sa katawhan ni Jehova ug sumala sa balaod ni Jehova, ang iyang trono sa pagkatinuod maoy “trono ni Jehova.”​—Deu 17:14-18; 1Cr 29:23.

Gawas nga siya nailhan ingong hari pinaagi sa harianong linya ni Juda, si Jehova naentrono sa Israel sa lain usab nga diwa. Sumala sa gipahayag ni Jeremias: “Anaa ang mahimayaong trono sa kahitas-an sukad sa sinugdan; mao kini ang dapit sa atong sangtuwaryo.” (Jer 17:12) Si Jehova gihisgotan ingong “naglingkod ibabaw sa mga kerubin” nga anaa ibabaw sa tabon sa pagpasig-uli sa arka sa pagpamatuod sulod sa sangtuwaryo. (Ex 25:22; 1Sa 4:4) Ang presensiya sa Diyos gisimbolohan sa usa ka panganod nga giingong nagpatunghag milagrosong kahayag nga gitawag sa ulahi sa Hudiyong mga magsusulat nga Shekhi·nahʹ. (Lev 16:2) Bisan tuod si Jeremias nagtagna nga wala nay arka sa pakigsaad sa dihang ang Israel ipasig-uli na gikan sa Babilonya, kini wala magpasabot nga si Jehova dili na molingkod sa iyang trono diha sa iyang sentro sa pagsimba. Sumala sa Iyang giingon: “Nianang panahona sila magtawag sa Jerusalem nga trono ni Jehova.” (Jer 3:​16, 17) Ang mga tagna ni Ezequiel bahin sa pagpasig-uli nahiuyon niini, kay sa iyang panan-awon bahin sa templo ni Jehova diin walay nakitang arka sa pakigsaad, siya gisultihan: ‘Anak sa tawo, kini nga templo mao ang dapit sa akong trono.’​—Eze 43:7.

Nakigsaad si Jehova nga ang trono sa binhi ni David “mohangtod sa panahong walay tino.” (1Cr 17:11-14) Sa pagpahibalo sa katumanan niini nga saad, ang manulondang si Gabriel miingon kang Maria: “Ihatag [kang Jesus] ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Luc 1:​32, 33) Dili lamang si Jesus adunay panulondon nga usa ka yutan-ong dominyo kondili siya makaambit usab sa unibersohanong trono ni Jehova. (Pin 3:21; Isa 66:1) Si Jesus misaad usab sa pagpaambit sa iyang trono sa harianong awtoridad uban sa tanan kinsa, sama sa iyang matinumanong mga apostoles, anaa sa bag-ong pakigsaad uban sa iyang Amahan ug kinsa magdaog sa kalibotan sama kang Jesus. Busa sila sab molingkod sa trono uban ni Jesus.​—Mat 19:28; Luc 22:​20, 28-30; Pin 3:21.

Kaharmonya sa tagna ni Jehova pinaagi ni Zacarias nga ang tawo nga ginganlag “Turok,” ang magtutukod sa umalabot nga templo alang kang Jehova, “mahimong saserdote sa iyang trono,” si Pablo nag-asoy bahin kang Jesus: “Aduna kitay ingon nga hataas nga saserdote [sama kang Melquisedek, nga usa ka hari-saserdote], ug siya naglingkod na sa tuong kamot sa trono sa Halangdon didto sa mga langit.” (Zac 6:11-13; Heb 8:1) Gawas kang Kristo Jesus, nakita ni Juan ang tibuok espirituwal nga balay o sangtuwaryo sa Diyos, ang matinumanong Kristohanon nga kongregasyon, nga naentrono ingong mga hari-saserdote nga magmando sulod sa usa ka libo ka tuig.​—Pin 20:​4, 6; 1Pe 2:5.

Sumala sa gitagna sa Salmo 45:​6, ug gipadapat ni Pablo diha sa Hebreohanon 1:​8, ang trono ni Jesus, ang iyang katungdanan o awtoridad ingong soberano, naggikan kang Jehova: “Ang Diyos maoy imong trono hangtod sa kahangtoran.” Sa laing bahin, ang Yawa usab naghatag ug awtoridad aron mogahom ang iyang mga organisasyon, sumala sa gipasiugda sa Pinadayag 13:​1, 2, maylabot sa ‘mapintas nga mananap nga migula gikan sa dagat’: “Gihatag sa dragon ngadto sa mananap ang iyang gahom ug ang iyang trono ug ang dakong awtoridad.” Sa dihang si Satanas mitanyag sa susamang gahom ug awtoridad ngadto kang Jesu-Kristo, ang iyang kondisyon bugti niini mao: “Kon ikaw mohimog usa ka buhat sa pagsimba sa atubangan ko, maimo kining tanan.” (Luc 4:5-7) Sa susamang paagi, ang kondisyon sa paghatag ug usa ka trono o awtoridad ngadto sa “mapintas nga mananap” mao gayod ang pag-alagad niini kang Satanas.

Sa paghisgot sa posisyon ni Jesus ingong Batid nga Magbubuhat sa Diyos, gihisgotan ni Pablo nga pinaagi kang Kristo gilalang ang “mga trono.”  Kini nga termino mopatim-awng nagtumong sa mga nahuptang awtoridad, makita man o dili-makita, sulod sa administratibong kahikayan sa Diyos.​—Col 1:16.