1. Usa sa pito ka anak nga lalaki ni Japet.​—Gen 10:2; 1Cr 1:5.

2. Usa ka katawhan o usa ka yuta nga kasagarang gihisgotan uban sa ngalang Mesek, ang ngalan sa laing anak nga lalaki ni Japet. Ang Tubal, lakip ang Javan ug Mesek, nakignegosyo sa Tiro, nga nagbaligya ug mga ulipon ug mga butang nga hinimo sa tumbaga. (Eze 27:13) Sa awit sa pagbangotan ni Ezequiel alang sa Ehipto, ang Tubal gilakip sa mga “dili-tinuli” nga kauban sa mga Ehiptohanon nga mohigda sa Sheol, tungod sa kalisang nga ilang gipahinabo. (Eze 32:​26, 27) Ang  katawhan sa Tubal gilakip usab niadtong nakighiusa kang “Gog sa yuta sa Magog” kinsa gitawag nga “ang pangulong hepe sa Mesek ug sa Tubal” ug kinsa midasdas gikan sa “kinalay-ang mga bahin sa amihanan” aron sa paghimog mabangis nga pag-atake batok sa katawhan ni Jehova. (Eze 38:​2, 3; 39:​1, 2; tan-awa ang GOG Num. 2.) Sa laing tagna miingon si Jehova nga siya magpadalag mga sinugo aron sa pagmantala sa iyang himaya ngadto sa Tubal, Javan, ug sa ubang kayutaan.​—Isa 66:19.

Busa ang Tubal nahimutang sa A sa Israel apan dili kaayo layo nga dili maabot sa pamatigayon sa Tiro sa Fenicia. Giisip sa kadaghanang eskolar nga kining ngalana nagtumong sa mao ra usab nga katawhang Tabali diha sa Asiryanhong mga inskripsiyon, diin ang Tabali ug Musku (dayag ang Mesek) parehong gihisgotan. (Ancient Near Eastern Texts, giedit ni J. Pritchard, 1974, p. 284) Pipila ka siglo sa ulahi, parehong gitala usab kini ni Herodotus (III, 94) ingong ang Tibareni ug Moschi. Pinasukad niini, ang yuta sa Tubal giisip nga nahimutang (tingali sa kapanahonan sa Asirya) sa AS sa Cilicia sa sidlakang Asia Minor. Ang pagkaadunay mga minahan sa tumbaga niini nga rehiyon mohaom sa asoy sa Bibliya.