Kini nga lutahan sa bitiis hinungdanon sa pagsuportar sa lawas. Busa, ang nangurog o huyang nga mga tuhod nagpasabot ug kaluya; ug ang nagpingkiay nga mga tuhod nagpasabot ug kahadlok.​—Job 4:4; Sal 109:24; Isa 35:3; Dan 5:6; Heb 12:12.

Ang tanan gawas sa 300 sa 10,000 ka tawo ni Gideon miinom nga nagluhod, dayag nga ang ilang mga nawong gidapat sa tubig. Niini nga posisyon sila dili mahimong alerto ug andam kon adunay kalit nga pag-atake. Mas gusto nilang tagbawon ang ilang kauhaw inay nga kabalak-an ang situwasyon nga ilang giatubang. Sa laing bahin, ang 300 nagpabiling nagbarog, nga naghakop sa tubig ug nag-inom niini diha sa ilang mga kamot, alerto, mabinantayon, andam. Busa ang 9,700 ka dili-mabinantayon gipapauli.​—Huk 7:​3, 5-8.

Sa mahulagwayong paagi, ang usa ka bata nga gikaingong ‘natawo diha sa mga tuhod’ sa usa ka tawo gawas sa inahan, ug sa ingon nakapahimulos sa pag-uyon ug pag-atiman niana nga tawo, giila nga anak o kaliwat niana nga tawo, sama sa anak ni Bilha nga giisip nga anak ni Raquel.​—Gen 30:​3-6; itandi ang Gen 50:23.

Gisaad ni Jehova ang pagpasig-uli sa iyang katawhan ug gipakasama sila sa mga anak sa Zion, o Jerusalem, kinsa ‘pagahapohapon diha sa mga tuhod,’ nga mao, atimanon pag-ayo, ibalik sa pinaboran nga kahimtang.​—Isa 66:​12, 13.

Pagluhod. Ang Hebreohanong pulong alang sa “pagluhod” (ba·rakhʹ) lagmit adunay samang lintunganayng pulong alang sa “panalangin,” nga tingali nagpasabot nga adunay mga panahon nga ang mga panalangin gihatag ngadto sa mga tawo samtang sila nagluhod.

Samtang mangamuyo ug pabor. Ang usa ka tawo mahimong moluhod agig pagtahod o aron mangamuyo ug pabor, sama sa gibuhat sa usa ka “pangulo sa kalim-an” nga naghawas kang Haring Ahazias nga miluhod atubangan kang Elias aron mangaliyupo alang sa iyang kinabuhi ug nianang sa iyang mga kauban. (2Ha 1:​13, 14) Ang usa ka sanlahon nagluhod sa dihang nangaliyupo kang Jesus nga hinloan siya.​—Mar 1:40-42; usab ang 10:17-22.

Sa dihang mag-ampo. Ang matuod nga mga magsisimba sagad magluhod sa dihang mag-ampo sa Diyos, kay kini nga posisyon maoy haom nga pagpaila sa ilang pagpaubos. (Esd 9:5; Buh 9:​36, 40; 21:3-6) Si Solomon miluhod atubangan sa kongregasyon sa Israel sa dihang siya nag-ampo panahon sa pagpahinungod sa templo. (2Cr 6:13) Bisag dihay usa ka harianong mando nga sulod sa 30 ka adlaw ang mga pangaliya angayng himoon lamang ngadto kang Haring Dario, si Daniel miluhod samtang nag-ampo ngadto kang Jehova katulo sa usa ka adlaw, nga nagbuhat niini samtang ang mga bentana sa iyang lawak-sa-atop inablihan paingon sa Jerusalem. (Dan 6:6-11) Si Jesu-Kristo mismo naghatag ug panig-ingnan sa pag-ampo nga magluhod ngadto kang Jehova. Sa tanaman sa Getsemane niadtong gabii nga siya giluiban, si Jesus “miluhod ug nag-ampo.”​—Luc 22:41.

Ang mga magsisimba sa bakak nga relihiyon miluhod atubangan sa mga idolo sa ilang mga diyos. Apan sa adlaw ni Elias diha pay 7,000 ka matinumanong mga tawo sa Israel, nga ‘ang tanang tuhod wala moluhod kang Baal.’​—1Ha 19:18; Rom 11:4.

Pagyukbo o pag-ila sa hataas nga katungdanan. Ang pagluhod mahimong magpasabot ug pagyukbo o pag-ila sa hataas nga posisyon sa usa nga labaw. Ang mga sundalo miluhod atubangan kang Jesus ug miyukbo kaniya, apan ilang  gibuhat kana ingong pagbiaybiay.​—Mat 27:27-31; Mar 15:16-20.

Si Jehova naghatag sa matinumanon nga nabanhawng si Jesu-Kristo ug usa ka labaw nga katungdanan ug usa ka ngalan nga labaw pa sa tanang ubang ngalan, “aron nga sa ngalan ni Jesus moluhod ang tanang tuhod nilang anaa sa langit ug nilang anaa sa yuta ug nilang anaa ilalom sa yuta.” Ang tanan nga makabaton ug kinabuhi kinahanglang moluhod sa pagsimba kang Jehova diha sa ngalan ni Jesu-Kristo ug ilhon siya ingong Ginoo alang sa kahimayaan sa Diyos. Kini naglakip “nilang anaa ilalom sa yuta,” nga tin-awng nagpakita nga kadtong pagabanhawon gikan sa lubnganan kinahanglang mobuhat usab niini.​—Flp 2:9-11; Ju 5:​28, 29; Efe 1:​9, 10.

Sa panguna, ang pag-ila sa pagkalabaw ug pagkasoberano ni Jehova gikinahanglan alang niadtong nagtinguha sa pag-uyon sa Diyos. Si Jehova miingon: “Pinaagi sa akong kaugalingon ako nanumpa . . . aron kanako ang tanang tuhod moluhod.” (Isa 45:23; Rom 14:10-12) Busa, tukma nga ang salmista masibotong nag-awhag sa isigka-Israelinhon: “Oh dali kamo, mosimba kita ug moyukbo; moluhod kita sa atubangan ni Jehova nga atong Magbubuhat.”​—Sal 95:6; tan-awa ang POSTURA UG MGA LIHOK.