Usa ka bato nga dili kaayo mahalon, dili-sihag, ug mahimong masuphan, nga may nagkadaiyang bulok nga ang uban lusparon nga asul ug ang uban lagomon nga berde o susama niini. Ang komposisyon niini maoy hydrous phosphate sa aluminum nga may diyutayng sagol nga tumbaga (ang gigikanan sa asul nga bulok) ug puthaw (ang gigikanan sa berde nga bulok). Sa dihang ang asul nga mga bato mainitan o maladlad sa lainlaing matang sa klima, kini mahimong berde, nga usahay mahitabo sa dihang ang bato mawad-an sa kinaiyanhong kaumog niini sa paglabay sa panahon. Kini tingali ang hinungdan sa pagkapopular sa mga berdeng bato nga turquesa sa karaang mga panahon. Gigamit sa unang mga Ehiptohanon ang turquesa ingong alahas, ug kini makita didto sa Peninsula sa Sinai ingong mga bugon diha sa pulang sandstone.

Ang turquesa sayon nga kulitan kay usa kini ka humokong bato. Ang hataas nga saserdoteng si Aaron nagsul-ob ug kinulitan nga turquesang bato  diha sa iyang “tabon sa dughan sa paghukom.” Gikulit diha niana ang ngalan sa usa sa 12 ka tribo sa Israel, ug kini gipahimutang nga una sa ikaduhang laray sa mga bato diha sa tabon sa dughan. (Ex 28:​2, 15, 18, 21; 39:11) Ang mahulagwayong “tabon” nga gisul-ob sa hari sa Tiro gihulagway ingong gidayandayanan ug turquesa lakip sa uban pang matang sa bililhong bato. (Eze 28:​12, 13) Ang Edom mao ang “magpapatigayon” ug turquesa alang sa Tiro, mao nga andam ibaylo sa Tiro ang pipila sa iyang mga tinigom nga mga bahandi alang niini.​—Eze 27:​2, 16.