Lig-ong mga lanot sa tisyu nga nagkonektar sa mga bukog o nagsuportar sa mga organo sa lawas. Ang nagkalainlaing modernong mga hubad sa Bibliya naghubad sa Gregong pulong nga syn·deʹsmon (usa ka porma sa synʹde·smos) sa Colosas 2:19 ingong “mga ugat sa mga lutahan” (ED; NE; NW; RS), samtang ang uban naghubad niini ingong “mga ugat” (Fn; Mo), “nahiusang mga kaugatan” (Ro), o ingong “mga kaugatan” lamang (MBB; NCV). Ang synʹde·smos nagkahulogan nga “kanang nagbugkos, bugkos sa panaghiusa, nagpatapot” ug gigamit alang sa mga ugat o mga ugat sa lutahan. (A Greek-English Lexicon, ni H. G. Liddell ug R. Scott, girebisar ni H. Jones, Oxford, 1968, p. 1701) Kining pareho nga Gregong termino mao ang gigamit diha sa mga ekspresyong “bugkos sa pagkadili-matarong” (Buh 8:23), “nagahiusang bugkos sa pakigdait” (Efe 4:3), ug “hingpit nga bugkos sa panaghiusa” (Col 3:14).

Sa pagpasidaan batok sa “pakaaron-ingnon nga pagpaubos” sa tawong nangangkon lamang ingong Kristohanon, si Pablo miingon: “Siya wala mangupot pag-ayo sa ulo, sa usa nga gikan kaniya ang tibuok nga lawas, nga ginatagan-an ug takdo nga gidugtong pinaagi sa mga lutahan niini ug sa mga ugat sa mga lutahan [syn·deʹsmon], nagatubo sa tinuboan nga gihatag sa Diyos.” (Col 2:​18, 19) Dinhi ang dinihogan nga Kristohanong kongregasyon gipakasama sa usa ka lawas nga adunay ulo. Ang mga bahin sa lawas nagtambayayongay sa usag usa tungod kay giingon man nga kini “takdo nga gidugtong pinaagi sa mga lutahan niini ug sa mga ugat sa mga lutahan,” busa sa mahulagwayong paagi gigamit ni Pablo ang “mga ugat sa mga lutahan” maylabot sa espirituwal nga lawas ni Kristo diin si Jesus mao ang ulo niini. Ingong ang ulo, si Jesus nagtagana sa mga bahin sa lawas kon unsay ilang gikinahanglan pinaagi sa “mga lutahan ug sa mga ugat sa mga lutahan,” nga mao, ang mga paagi ug mga kahikayan alang sa pagtagana sa espirituwal nga pagkaon maingon man usab sa komunikasyon ug koordinasyon. (Itandi ang 1Co 12:12-30; Ju 15:4-10.) Sa literal nga tawhanong lawas, ang matag bahin adunay gikaamot alang sa mahapsay nga paglihok ug pagtubo niini, sa pagdawat sa sustansiya ug direksiyon ug ingon man sa pagpasa niini ngadto sa ubang mga bahin sa lawas. Kini susama usab maylabot sa kongregasyon nga mao ang lawas ni Kristo.