Ang nahulog nga gagmayng linginon nga mga yelo, o mibagtok nga ulan. Ang mga paghisgot sa Bibliya bahin sa pagkamalaglagon sa ulan nga yelo napamatud-an pinaagi sa kon unsay nahitabo sa lainlaing dapit sa yuta sa dili pa dugayng katuigan. Niadtong 1985, usa ka bagyo sa ulan nga yelo ang nakapatay ug kapin sa 20 ka tawo ug nakaangol ug 300 didto sa Brazil. Ang grabeng bagyo nga inubanag kilat ug dalugdog makamugnag mga ulan nga yelo nga sama kadako sa mga itlog o gani sama kadako sa buongon. Ang dako kaayong ulan nga yelo nga napunitan human sa usa ka bagyo didto sa Kansas (T.B.A.) niadtong Septiyembre 3, 1970, misukod ug mga 15 sm (6 pul.) ang diyametro. Ang dagkong mga ulan nga yelo mahulog sa gikusgon nga mga 160 km/oras (100 mko). Ang ulan nga yelo ilabinang makapahinabog perdisyon sa mga pananom, usahay ang kadaot nga ipahinabo sa usa lamang ka pag-ulan ug mga yelo mokabat ug milyones dolyares.

Gigamit ni Jehova. Ang ulan nga yelo maoy usa sa mga puwersa nga usahay gigamit ni Jehova aron sa pagpalampos sa iyang pulong ug sa pagpasundayag sa iyang dakong gahom. (Sal 148:​1, 8; Isa 30:30) Ang unang natalang panghitabo labot niini mao ang ikapitong hampak nga gipadangat sa karaang Ehipto, usa ka malaglagong ulan nga yelo nga nagdaot sa katanoman, nagbalibali sa mga kahoy, ug nagpatay sa mga tawo ug mga mananap nga didto sa kaumahan apan wala makaapektar sa mga Israelinhon didto sa Gosen. (Ex 9:18-26; Sal 78:​47, 48; 105:​32, 33) Sa ulahi, sa dihang ang mga Israelinhon, ubos sa pagpangulo ni Josue didto sa Yutang Saad, mitabang sa mga Gabaonhon nga gihulga sa nag-alyansang lima ka hari sa mga Amorihanon, si Jehova migamit ug dagkong ulan nga mga yelo batok sa misulong nga mga Amorihanon. Niadtong higayona, mas daghan ang namatay tungod sa mga ulan nga yelo kay sa pagpakiggubat sa Israel.​—Jos 10:3-7, 11.

Simbolikanhon. Hinunoa, si Jehova wala magpahigawas sa dili-matinumanong Israel gikan sa malaglagong ulan nga yelo. (Hag 2:17) Dugang pa, pinaagi sa iyang manalagnang si Isaias, iyang gitagna nga pukanon sa mga Asiryanhon ang napulo-ka-tribong gingharian, nga nagtandi sa mananakop nga Asiryanhong kasundalohan sa “inubanan-ug-dalugdog nga bagyo sa ulan nga yelo.” (Isa 28:​1, 2) Sa susama ang mga Babilonyanhon, sama sa ulan nga yelo, magapapha sa “dalangpanan nga bakak” sa Juda, nga mao, ang pagpakig-alyansa sa Juda uban sa Ehipto alang sa militaryong tabang.​—Isa 28:​14, 17; 31:1-3.

Sa basahon sa Pinadayag, gihisgotan ang ulan nga yelo may kalabotan sa una sa pito ka manulonda nga may mga trompeta nga naghuyop sa iyang trompeta, ug labot sa pagbukas sa sangtuwaryo sa langitnong templo sa Diyos. (Pin 8:​2, 7; 11:19) Dayon, sa pagbubo sa ikapitong panaksan sa kasuko sa Diyos, ang simbolikong mga ulan nga yelo nga may gibug-aton nga mga usa ka talanton (20.4 kg; 45 lb) nangahulog diha sa daotang mga tawo.​—Pin 16:​1, 17, 21.

‘Alang sa adlaw sa gubat.’ Sa pagpakigsulti kang Job gikan sa unos, si Jehova naghisgot nga iyang gireserba ang mga balay-tipiganan sa ulan nga yelo alang sa “adlaw sa panag-away ug sa gubat.” (Job 38:​1, 22, 23) Busa, haom nga gihisgotan ang ulan nga yelo nga lakip sa mga elemento nga gamiton batok sa mga misulong nga kasundalohan ni “Gog.”​—Eze 38:​18, 22.