[Heb., rim·mahʹ, toh·le·ʽahʹ o toh·laʹʽath; Gr., skoʹlex].

Ang apuyos sa usa ka insekto human mapusa. Usahay ang terminong “ulod” nagtumong ilabina sa apuyos sa langaw nga makaplagan diha sa nadunot nga mga utanon o sa hugaw sa hayop ug sa buhing mga tisyu. Ang buhi o nadunot nga butang nagtaganag kainit alang sa pagpusa sa mga itlog ug usab ingong pagkaon alang sa mga ulod. Sa ubang mga  kahimtang ang gihisgotan mao ang mga ulod nga mokaon ug mga tanom.​—Deu 28:39; Jon 4:7.

Ang apuyos sa langaw o ulod walay mga tiil, yagpis, naggulotgulot, nga kon tan-awon walay ulo. Apan, mahitungod sa ulo, ang The Smithsonian Series (Tomo 5, p. 343) nag-ingon: “Ang pagamay nga tumoy sa lawas niini mao ang tumoy sa ulo, apan ang tinuod nga ulo sa ulod misuksok sa lawas. Diha sa buho nga gisuksokan sa ulo, nga nagsilbing baba sa ulod, may duha ka samag kuyamoy nga misiwil, ug kini nga mga kuyamoy maoy nagsilbing apapangig ug mga kamot sa ulod.”

Gipunting sa Kasulatan nga ang ubang mga ulod mokaon ug patay nga organikong materya. (Job 7:5; 17:14; 21:26; 24:20; Isa 14:11) Ang milagrosong mana, kon tipigan sa mga Israelinhon hangtod sa pagkabuntag sa sunod nga adlaw, mangalisbo ug uloron, gawas sa mana nga tipigan sa ikaunom nga adlaw ug igahin alang sa Igpapahulay. (Ex 16:​20, 24) Sa paghisgot sa “ulod” may kalabotan sa Gehenna, dayag nga ang gipasabot ni Jesus mao ang basurahan sa gawas sa siyudad sa Jerusalem diin ut-oton sa kalayo ang mga basura ug diin kutkoton sa mga apuyos o ulod ang mga nadunot nga mga butang nga anaa sa haduol, apan dili kadtong anaa sa kalayo.​—Mar 9:48; itandi ang Isa 66:24; tan-awa ang GEHENNA.

Ang terminong “ulod” gigamit usab diha sa masambingayong paagi. Matamayong gihisgotan ni Bildad ang tawo ingong usa ka ulod (Job 25:6), ug gitagna nga ang Mesiyas pagaisipon nga kaulawan ug tinamay, sama sa usa ka ulod. (Sal 22:6) Gihisgotan ni Jehova nga Diyos ang Israel ingong usa ka ulod, usa ka timawa ug makaluluoy nga linalang, nga walay mahimo batok sa mga lumalabay. Apan si Jehova nagpasalig sa mga Israelinhon sa iyang tabang ug nagdasig kanila nga dili mahadlok.​—Isa 41:14.