Ang Hebreohanong termino nga dohdh, nga usahay gihubad nga “uyoan” o ‘igsoong lalaki sa amahan’ (Lev 10:4; 20:20; 25:49; Num 36:11; 1Sa 10:14-16; 14:50; Est 2:​7, 15; Jer 32:7-9, 12; Am 6:10), mas lapad pa kaayo ug kapadapatan kay sa Cebuanong pulong nga “uyoan.” Dili lang kini mapadapat ngadto sa usa ka paryente, nga kasagaran ang igsoong lalaki sa amahan, kondili mahimong magtumong usab (diha sa singular o plural) sa “gugma” (Pr 7:18), sa mga pahayag sa pagmahal o sa gugma (Aw 1:​2, 4; Eze 16:8; 23:17), ug sa usa ka minahal o hinigugma (Aw 1:​14, 16; Isa 5:1). Apan ang konteksto o ang ubang nalangkit nga mga kasulatan sagad maoy magtino kon unsa nga relasyon sa pamilya ang gitumong sa Hebreohanong pulong nga dohdh. Pananglitan, ang dohdh gigamit sa paghubit sa relasyon ni Haring Jehoiakin kang Haring Zedekias. Sanglit si Zedekias mao ang igsoong lalaki ni Jehoiakim nga amahan ni Jehoiakin, ang pulong nga dohdh niini nga kahimtang dayag nga nagtumong sa usa ka uyoan, o sa usa ka igsoong lalaki sa amahan. (2Ha 24:​6, 15, 17; 1Cr 3:15) Ang usa ka lahing relasyon sa pamilya gihubit diha sa 1 Cronicas 27:​32, diin ang magtatambag nga si Jonatan gikaingong dohdh ni David. Ang 2 Samuel 21:21 ug 1 Cronicas 20:7 nagpailang si Jonatan maoy anak nga lalaki sa igsoon ni David nga si Simei. Busa, ang gipunting nga dohdh ni David mao gayod ang pag-umangkon ni David ug dili ang iyang uyoan.

Ang feminine nga porma sa dohdh gigamit sa pagtumong sa iyaan sa usa ka tawo. (Ex 6:20; Lev 18:14; 20:20) Sa Hebreohanon, ang usa ka uyoan sa kaliwat sa inahan gitawag nga ‘igsoong lalaki sa inahan.’​—Gen 29:10.

“Ang anak nga lalaki sa igsoong babaye ni Pablo” nagbutyag kang Pablo ug dayon ngadto sa Romanong komandante sa Jerusalem bahin sa plano nga gilaraw batok sa kinabuhi sa iyang uyoan.​—Buh 23:16-22.