Usa ka humok ug tambok nga tisyu nga anaa sa sulod nga mga bahin sa kadaghanang kabukogan. Adunay duha ka matang sa uyok o utok sa bukog, ang dalag ug pula. Sa mga hamtong, ang taas, linginong mga bukog maoy puno sa dalag, o nagpondo, nga uyok nga sa kadaghanan maoy tambok, ug ang lapad nga kabukogan sa ulo, sa mga gusok, sa dughan, ug sa balat-ang adunay pula, o aktibo, nga uyok. Ang pula nga uyok hinungdanon sa paggama ug dugo. Kini magpatungha sa nagdalag-oksiheno nga mga pulang corpuscle sa dugo, sa hinungdanong mga sangkap nga pangpatang-on sa dugo nga gitawag ug mga platelet, ug sa dakong porsiyento sa mga puting corpuscle, nga sagad nagsilbing mga sundalo sa pagsanta sa impeksiyon. Ingong sangkap sa lawas nga tiggamag dugo, ang uyok hinungdanon kaayo alang sa kahimsog ug kabaskog sa usa ka tawo. Busa, tukma ang paghulagway ni Job (21:24) sa tawo nga himsog ug piskay ingong usa kansang uyok sa kabukogan ‘nag-umog.’

Lagmit nga ang uyok o utok sa bukog sa hayop gikaon sa mga Israelinhon. (Itandi ang Miq 3:​2, 3.) Kini sustansiyado kaayo, nga tugob sa protina, tambok, ug iron. Busa, ang bangkete ni Jehova alang sa tanang katawhan haom nga maglakip sa simbolikong “mantikaon kaayo nga pagkaon nga puno sa utok sa bukog.”​—Isa 25:6.

Sa Hebreohanon 4:12 ang “pulong sa Diyos” gitandi sa usa ka hinagiban nga mas hait pa sa espada nga duhay-sulab ug makatugkad sa mga hunahuna ug mga motibo sa usa ka tawo, modulot, ingnon ta, hangtod sa uyok, ang kinailadman nga bahin sa kabukogan.