Usa ka hulpa taliwala sa mga pangpang, bungtod, o mga bukid. Si Jehova nga Diyos maoy tukmang hatagan ug pasidungog sa pagkaugmad sa mga topograpiya sa yuta, lakip ang daghang mga walog niini. (Sal 104:8) Sa Kasulatan, ang pipila gitawag lamang ug mga walog. (Jos 8:11; 1Sa 13:18) Ang uban maoy “mga patag sa walog,” ang ubos nga mga dapit taliwala sa mga bukid ug mga bungtod. (Deu 11:11; tan-awa ang KAPATAGAN, YUTA, UMA.) Dihay “bul-oganang mga walog” usab, nga usahay permanenteng agosan ug mga sapa apan sagad mobul-og ang tubig panahon sa ting-ulan. (Deu 8:7; tan-awa ang BUL-OGANANG WALOG.) Ang pipila ka hubad migamit ug “(mga) dal-og” o “(mga) walog” kon ang gihisgotan maoy “ubos nga patag (o ubos nga kapatagan)” (Gen 14:3; 1Cr 12:15), ug “dal-og” o “ubos nga yuta (o ubos nga kayutaan)” alang sa “Sepela,” ang bungtoron nga ubos nga yuta tali sa kapatagan daplin sa baybayon sa Filistia ug sa bukirong mga dapit sa sentral nga Palestina.​—Deu 1:7; 1Ha 10:27.

Lakip sa iladong mga walog nga gihisgotan sa Kasulatan mao ang Walog sa Moab “sa atubangan sa Bet-peor” (Deu 3:29; 34:6) ug ang Walog sa Asin (2Sa 8:13), ingon man ang mga walog sa Hinnom (Neh 11:30), Ipta-el (Jos 19:14), Zeboim (1Sa 13:18), ug Zepata (2Cr 14:10). Ang ‘mga patag sa walog’ sa rekord sa Kasulatan naglakip sa mga walog sa Sinar (Gen 11:2), Jerico (Deu 34:3), Mizpe (Jos 11:8), Lebanon (Jos 12:7), Ono (Neh 6:2), ug Megido (2Cr 35:22; Zac 12:11).

Mahulagwayon ug Matagnaong Paggamit. Ang usa ka mangiob nga walog, o lugot, nga may mga gahong ug mapintas nga mga mananap maoy peligroso alang sa panon sa mga hayop, ilabina sa magabii, kon walay mag-atiman nga usa ka maayong magbalantay. Bisan tuod nakaatubang ug susamang kapeligrohan tungod sa nagkalainlaing mga katalagman, si David mibatig kasegurohan sa pagkasayod nga si Jehova mao ang iyang Magbalantay. Busa, siya nakaingon: “Bisan kon magalakaw ako sa walog sa mabagang kangiob, ako walay kahadlokan nga daotan.”​—Sal 23:​1, 4.

“Ang pahayag sa walog sa panan-awon” dayag nga nagtumong sa karaang Jerusalem. Bisan tuod may igoigong gihabogon, ang siyudad maoy sama sa usa ka “walog” kay kini gilibotan sa mas habog nga kabukiran.​—Isa 22:​1, 5.

Dayag nga pinaagi sa paghawan sa tanang babag nga anaa sa dalan sa dihang namalik ang iyang katawhan gikan sa pagkadestiyero sa Babilonya, si Jehova, sa ingon, ‘nagpataas sa matag walog,’ ‘nagpatag sa mga bungtod ug bukid,’ ug naghimo sa ‘gansangong yuta nga usa ka patag sa walog’ alang kanila. (Isa 40:4) Sa pagpaingon didto, ang nahibiling mga Hudiyo wala mag-antos sa kauhaw. Ang mga pulong ni Jehova pinaagi ni Isaias natuman: “Sa hawan nga mga bungtod ako magbukas ug mga suba, ug taliwala sa kapatagan sa walog, mga tubod.”​—Isa 41:18; itandi ang Isa 35:​6, 7, 10; 43:19-21; 48:​20, 21.