[Gr., he·dyʹo·smon].

Usa ka humot kaayong hilba nga kas-a lamang hisgoti diha sa Kasulatan sa dihang gisaway ang mga eskriba ug mga Pariseo tungod sa ilang sobrang pagtagad sa paghatag ug ikapulo sa yerbabuyna, samtang nagsalikway sa mas bug-at nga mga butang sa Balaod. (Mat 23:23; Luc 11:42) Ubay-ubayng matang sa yerbabuyna ang makaplagan sa Palestina ug Sirya, ug ang horsemint (Mentha longifolia) mao ang labing komon. Lagmit nga ang Gregong pulong nga he·dyʹo·smon (sa literal, humot) wala lamang magtumong sa usa ka partikular nga matang kondili naglakip sa nailhang lainlaing matang sa yerbabuyna.

Ang mga lindog sa yerbabuyna kuwadrado, ug ang mga dahon motubo nga tinagurha, tagsa diha sa isigkakilid sa lindog. Ang gagmay, asulon-puti o rosason-puti nga mga bulak nagpungpong, nga napormang bulagbulag nga mga pungpong sa mga bulak o talinis nga mga pungpong diha sa tumoy sa lindog niini. Sukad pa sa karaang kapanahonan ang yerbabuyna gigamit na sa medisina ug ingong panakot sa pagkaon; tungod kini sa humot nga lana nga anaa sa mga dahon ug sa mga lindog niini nga tanom.