Human isalibay ngadto sa templo sa nagbasol nga si Judas ang suhol sa pagbudhi nga 30 ka pirasong plata (kon siklo, $66), gigamit sa pangulong mga saserdote ang salapi sa pagpalit sa “yuta sa magkukulon aron lubngan sa mga estranyo.” (Mat 27:3-10) Ang yuta nailhan nga Akeldama, o “Yuta sa Dugo.” (Buh 1:​18, 19; tan-awa ang AKELDAMA.) Sukad niadtong ikaupat nga siglo K.P. kini nga yuta gituohan nga mao ang usa ka dapit diha sa H nga bakilid sa Walog sa Hinnom, sa dili pa kini moabot sa Walog sa Kidron.

Ang ekspresyon nga “yuta sa magkukulon” wala sa tino magpakita kon ang yuta gipanag-iya ba lamang sa usa ka magkukulon o kaha gitawag kini sa maong ngalan tungod kay dihay panahon sa kasaysayan niini nga didto gihimo sa mga magkukulon ang ilang mga produkto. Apan, kining ulahing panglantaw daw makataronganon kon eksakto kining gituohan nga dapit. Duol kini sa Ganghaan sa mga Tipak sa Kulon (o “Ganghaan sa mga  Magkukulon,” sumala ni J. Simons sa iyang nota o footnote sa Jerusalem in the Old Testament, Leiden, 1952, p. 230; “Ganghaan sa mga Tapok sa Abo” sa Nehemias), nga gihisgotan sa Jeremias 19:​1, 2. (Itandi ang Jer 18:2.) Ang mabatonang yutang-kulonon diha sa palibot niini nga dapit. Dugang pa, ang paggama ug kulonong mga kasangkapan nagkinahanglan ug maayong suplay sa tubig, ug ang maong dapit duol ra sa tubod sa En-rogel ug sa Linaw sa Siloam ingon man usab tingali sa tubig sa Walog sa Hinnom panahon sa tingtugnaw.