[gikan sa lintunganayng pulong nga nagkahulogang “magpakamatarong”].

1. Usa ka saserdote nga iladong kauban ni Haring David. Si Zadok maoy usa ka kaliwat ni Aaron pinaagi sa hataas nga saserdotehanong linya ni Eleasar. (1Cr 6:3-8, 50-53) Gitawag usab siya nga usa ka tigpatin-aw sa panan-awon. (2Sa 15:27) Si Zadok, ingong usa ka batan-ong lalaki nga may dakong kaisog, maoy usa sa mga pangulo sa mga tribo nga mipaluyo sa pagkahari ni David. (1Cr 12:​27, 28) Sukad niadtong panahona siya nagmaunongon kang David.​—2Sa 8:​15, 17; 20:25; 1Cr 18:16.

Si Zadok ug Abiatar (sa dihang hisgotan gani silang duha, unang nganlan si Zadok, tingali tungod kay siya usa usab ka manalagna) miuban sa arka sa pakigsaad sa dihang si David nagsugo nga dad-on kini ngadto sa Jerusalem, ug human niadto si Zadok nagpadayon sa pag-alagad sulod sa usa ka panahon didto sa Gabaon diin nahimutang ang tabernakulo. (1Cr 15:​11, 14; 16:39) Sa dihang mirebelde si Absalom, gidala ni Zadok ug sa mga Levihanon ang Arka samtang mikuyog sila kang David sa iyang pagkalagiw gikan sa Jerusalem, apan gipabalik sila ni David ngadto sa siyudad, ug gitudlo si Zadok ug ang uban pa ingong iyang mga espiya. (2Sa 15:23-29, 35, 36; 17:​15, 16; 18:19-27) Sa dihang natapos ang pagrebelde, si Zadok ug Abiatar nakatabang ug dako kang David aron siya dawaton sa Jerusalem nga may pag-uyon. (2Sa 19:11-14) Sa ulahing bahin sa iyang paghari, sa dihang giorganisar ni David ang buluhaton sa mga Levihanon alang sa templo, si Zadok ug Ahimelek nga anak nga lalaki ni Abiatar mitabang kaniya.​—1Cr 24:​3, 6, 30, 31.

Dili sama kang Abiatar, si Zadok wala mopaluyo kang Adonias sa iyang pagsulay sa pag-ilog sa trono; tungod niini gitudlo ni David si Zadok nga maoy magdihog kang Solomon ingong hari. (1Ha 1:​7, 8, 26, 32-46) Sa panahon sa paghari ni Saul ug David, si Zadok nag-alagad ingong kaubang saserdote lamang, apan tungod sa iyang pagkamaunongon nga lahi ra kaayo sa mapalingpaling nga pagkamaunongon sa Hataas nga Saserdoteng si Abiatar, si Solomon nagpalagpot kang Abiatar gikan sa Jerusalem ug naghimo kang Zadok nga hataas nga saserdote. Kini nagtuman sa tagna ni Jehova nga gipamulong batok sa balay ni Eli. (1Ha 2:​26, 27, 35) Ang ulahing pagtala kang “Zadok ug Abiatar” sa 1 Hari 4:4 lagmit may makasaysayanhong hinungdan. Si Josephus miingon nga si Zadok mao ang unang hataas nga saserdote sa templo ni Solomon.  (Jewish Antiquities, X, 152 [viii, 6]) Sa 1 Cronicas 27:​16, 17, si Zadok gitala ingong pangulo sa balay ni Aaron. Ang Bibliya nagtagana ug pasukaranan sa pagsubay sa linya sa kaliwat ni Zadok nga naghupot sa katungdanan sa hataas nga saserdote hangtod sa panahon ni Dario nga Persianhon (lagmit si Dario II). (1Ha 4:2; 1Cr 6:8-15; 2Cr 31:10; Neh 12:22) Ang mga saserdote nga nakita diha sa templo sa panan-awon ni Ezequiel maoy “mga anak nga lalaki ni Zadok.”​—Eze 40:46; 43:19; 44:15; 48:11.

2. Apohang lalaki sa banay sa inahan ni Haring Jotam sa Juda.​—2Ha 15:​32, 33; 2Cr 27:1.

3. Usa ka kaliwat ni Aaron pinaagi sa Num. 1 diha sa linya sa hataas nga saserdote, ug usa ka katigulangan sa “batid nga magkokopya” nga si Esdras.​—1Cr 6:​3, 8, 12, 13; 9:11; Esd 7:1-6; Neh 11:11.

4. Usa sa mga nagtukod pag-usab sa paril sa Jerusalem human sa pagkadestiyero; anak nga lalaki ni Baana. (Neh 3:4) Siya o kaha ang usa ka hawas sa usa ka banay nga may samang ngalan ang milagda pinaagig timbre sa nasodnong pakigsaad nga gihikay wala madugay human niadto.​—Neh 9:38; 10:​1, 14, 21.

5. Lain pang tawo nga mitabang sa pagtukod pag-usab sa paril sa Jerusalem; anak nga lalaki o kaliwat ni Imer, kinsa lagmit sakop sa saserdotehanong banay.​—Neh 3:29.

6. Usa ka magkokopya kinsa duyog ni Selemias ug Pedaia gihimo ni Nehemias nga tinugyanan sa Levihanong mga tipiganan. (Neh 13:13) Tingali mao ra usab ang Num. 5.

7. Usa ka katigulangan sa amaama ni Jesus nga si Jose human sa pagkadestiyero.​—Mat 1:14.