Ang supremong diyos sa daghag-diyos nga mga Grego, nga katumbas kang Jupiter sa mga Romano. Si Zeus maoy usa ka diyos sa kalangitan ug giisip nga nagkontrolar sa kahanginan, kapanganoran, ulan, ug dalugdog, nga naggamit sa iyang gahom ibabaw niining mga puwersa sa kinaiyahan alang sa malaglagon ug sa mapuslanong katuyoan. Ang karaang magbabalak nga si Homer (The Iliad, VIII, 1-25) naghubit kang Zeus ingong mas gamhanan kay sa gahom sa tanang ubang mga diyos. Bisan pa niana, si Zeus wala isipa ingong supremo sa bug-os nga diwa apan usahay gipakita ingong biktima sa pagpanglimbong ug mipahiuyon sa kabubut-on sa Kapalaran ug sa Dulnganan.

Gawas pa sa pag-asoy sa mga hitabo sa iyang pagkahimugso, pagkabata, ug sa paghupot sa trono, ang mga leyenda pangunang naghisgot sa daghang seksuwal nga pagpakigrelasyon ni Zeus. Ang mitolohikanhong mga asoy naghisgot sa iyang pagtental sa mga diyosa ug sa yutan-ong mga babaye ug sa iyang pagkahimong amahan sa daghang anak sa gawas. Sa kasukwahi, giasoy nga si Zeus nagpatay kang Iasion (usa ka mortal) tungod kay kini nakighilawas sa diyosa nga si Demeter. Gawas nga naduhigan sa hilabihang pagkamaluibon ni Zeus, ang kaminyoon ni Zeus ug Hera gisamok sa uban pang mga suliran. Gikaingon nga si Zeus naglagot pag-ayo sa walay puas nga pagpangasaba sa iyang asawa nga si Hera nga tungod niana dihay panahon nga iyang gireklamo kini pag-ayo atubangan sa nagkatigom nga mga bathala.

Dihay panahon nga ang putling pagsimba ni Jehova grabeng gisupak sa pagsimba sa bakak nga diyos nga si Zeus. Tungod sa tinguha ni Haring Antiochus IV (Epiphanes) nga hanawon ang relihiyon sa mga Hudiyo, iyang gimando nga ang templo didto sa Jerusalem panamastamasan ug ipahinungod pag-usab ngadto kang Zeus sa Olympus. Tan-awa ang Apokripal nga basahon sa 2 Macabeo 6:​1, 2.

Sa unang siglo K.P., sa dihang nakita sa mga molupyo sa Listra nga giayo ni Pablo ang usa ka tawong bakol, ilang giisip si Pablo ug Bernabe ingong mga diyos, nga nagtuo nga si Pablo mao si Hermes ug si Bernabe mao si Zeus. Ang saserdote ni Zeus nagdala pa gani ug mga torong baka ug mga girnalda aron motanyag ug mga halad uban sa katawhan. (Buh 14:8-13) Duha ka karaang mga inskripsiyon nga nadiskobrehan niadtong 1909 didto sa palibot sa Listra nagpamatuod sa pagsimba niining duha ka diyos diha sa maong siyudad. Usa sa mga inskripsiyon naghisgot sa “mga saserdote ni Zeus,” ug ang lain naghisgot kang “Hermes nga Labing Bantogan” ug kang “Zeus nga diyos-adlaw.”​—The International Standard Bible Encyclopaedia, giedit ni J. Orr, 1960, Tomo III, p. 1944.

Ang sakayan nga milawig gikan sa pulo sa Malta nga gisakyan ni Pablo ingong binilanggo adunay dagway sa “Mga Anak nga Lalaki ni Zeus,” nga mao, ang kaluhang managsoon nga si Castor ug Pollux.​—Buh 28:11.