Sumala sa Grego ug Romanhong mitolohiya, si Castor ug Pollux maoy kaluhang mga anak nga lalaki ni Leda ug sa diyos nga si Zeus (Jupiter), busa gitawag nga Dioscuri, o “Mga Anak nga Lalaki ni Zeus.” Gawas pa niana, sila giisip nga mga tigpanalipod sa mga marinero, nga makaluwas sa mga tripulante nga nameligro diha sa dagat. Gituohan nga kini nga mga bathala magpakita sa panahon sa mga bagyo ingong St. Elmo’s fire (Santelmo). Ang sakayan sa Alejandria nga gisakyan sa binilanggo nga si Pablo gikan sa Malta paingon sa Puteoli samtang nagpaingon sa Roma may dagway sa “Mga Anak nga Lalaki ni Zeus.” Lagmit nga ang larawan o simbolo ug ang ngalan ni Castor gibutang diha sa usa ka kilid sa dulong sa sakayan ug ang samang hulad ug ngalan ni Pollux diha sa pikas kilid.​—Buh 28:11.