1. Usa ka anak nga lalaki ni Zera ug apo ni Juda.​—1Cr 2:​4, 6.

2. Ang Simeonhong pangulo nga anak nga lalaki ni Salu. Siya ang nagdala kang Cozbi nga babayeng Midianhon ngadto sa kampo sa Israel ug nakighilawas kaniya diha sa iyang kaugalingong tolda. Tungod niini, si Zimri ug Cozbi gipatay ni Pinehas nga may pag-uyon ni Jehova. Kining dihadihang aksiyon nagpahunong sa hampak nga nakapatay na sa libolibo ka sad-ang mga Israelinhon.​—Num 25:6-8, 14-18.

3. Ikalimang hari sa napulo-ka-tribong gingharian sa Israel. Si Zimri nagmando sa Tirza sulod sa pito ka adlaw niadtong mga 951 W.K.P. Siya maoy pangulo kanhi sa katunga sa mga karo nga ubos sa pagmando ni Haring Elah, apan sa dihang ang kasundalohan didto sa Gibeton, ug si Haring Elah nagpabilin, si Zimri nagpatay kaniya ug sa tanang nahibilin sa balay ni Baasa ug naghimo sa iyang kaugalingon nga hari. Mubo ra kaayo ang iyang pagmando tungod kay ang kasundalohan naghimo kang Omri ingong hari ug siya gilayon mipauli aron palikosan ang Tirza, nga tungod niana si Zimri nagsunog sa balay sa hari ibabaw kaniya. Si Zimri nailhan sa pagbuhat kon unsay daotan sa mga mata ni Jehova. (1Ha 16:​3, 4, 9-20) Ang kataposang mga pulong ni Jezebel nagpahinumdom sa mga sangpotanan nga midangat kang Zimri. Samtang si Jehu madaogong nagsakay paingon sa Jezreel, si Jezebel nagbiaybiay gikan sa bentana: “Maayo ba ang tanan kang Zimri nga nagpatay sa iyang ginoo?”​—2Ha 9:​30, 31.

4. Usa ka kaliwat ni Saul ug Jonatan. (1Cr 8:33-36; 9:42) Gituohan nga lagmit siya mao ra ang Num. 3; ang katarongan mao nga dunay posibilidad nga kini nga Zimri (Num. 3) naningkamot sa pagbawi sa pagkahari ingong usa ka membro sa panimalay ni Saul.

5. Mopatim-aw nga usa kini ka dapit nga wala mahibaloi ang nahimutangan; may mga panahon nga kini gilangkit sa anak nga lalaki ni Abraham nga si Zimran, apan kini walay lig-ong basehanan.​—Jer 25:25; Gen 25:​1, 2.