1. Usa ka kamingawan nga giagian sa mga Israelinhon sa ilang pagpanaw paingon sa Canaan; lahi sa Kamingawan sa Sin. (Num 33:​11, 36) Sa ikaduhang  tuig human mobiya ang Israel sa Ehipto, 12 ka Israelinhon ang nangespiya sa Yutang Saad, nga nagsugod sa Kamingawan sa Zin. Nianang panahona ang mga Israelinhon nagkampo sa Kades. (Num 13:​21, 26) Sa ulahi, human maglatagaw sa kamingawan sa daghang katuigan, ang mga Israelinhon miabot sa Kades sa Kamingawan sa Zin sa ikaduhang higayon. Kini nga dapit sa Kamingawan sa Zin maoy awaaw, wala mapugsi ug binhi, walay mga igos, paras, granada, ug tubig. (Num 20:1-5; itandi ang Num 20:28; 33:38; Deu 1:3.) Maylabot sa tubig sa Meriba didto sa Kades sa Kamingawan sa Zin, si Moises ug Aaron napakyas sa pagbalaan kang Jehova atubangan sa katawhan ug nawad-an sa pribilehiyo nga makasulod sa Yutang Saad.​—Num 27:12-14; Deu 32:​50, 51.

Ang Kamingawan sa Zin maoy “tupad sa Edom” (sa K mismo sa Edom) ug nahimutang sa HS nga tumoy sa gipahat nga teritoryo sa Juda. (Num 34:3; Jos 15:1) Sanglit ang Kades nahimutang sa kamingawan sa Zin ug sa Paran (Num 13:26; 20:1), lagmit nga kini maoy magkasikbit nga mga rehiyon sa kamingawan, o tingali ang Zin maoy bahin sa mas dakong Kamingawan sa Paran.

2. Diha sa duha ka teksto ang “Zin” makita nga wala ang terminong “kamingawan.” Lagmit nga gitumong dinhi ang usa ka lungsod nga sa pagkakaron wala pa mahibaloi diha sa H sa Juda taliwala sa tungasanan sa Akrabim ug Kades-barnea ug ang ngalan sa naglibot nga kamingawan gipasukad niini. O lagmit kini nagtumong sa Kamingawan sa Zin mismo.​—Num 34:4; Jos 15:3.