Sa sinugdan kini mao ang kuta sa mga Jebusihanon nga sa ulahi gitawag ug “Siyudad ni David.” (1Ha 8:1; 1Cr 11:5) Human mailog ang Bukid sa Zion, gitukod ni David ang iyang harianong pinuy-anan didto. (2Sa 5:​6, 7, 9; tan-awa ang DAVID, SIYUDAD NI.) Ang mga pulong ni Jehova naghisgot maylabot sa pagmando ni David gikan sa Zion ingong dinihogan sa Diyos: “Ako, ako mismo, nagpahimutang sa akong hari ibabaw sa Zion, ang akong bukid nga balaan.” (Sal 2:6) Ang Zion nahimong balaan gayod nga bukid alang kang Jehova sa dihang gipabalhin ni David ang sagradong Arka didto. (2Sa 6:17) Sa ulahi, ang ngalang “Zion” naglakip sa dapit sa templo didto sa Bukid sa Moria (diin didto gibalhin ang Arka sa panahon sa paghari ni Solomon) ug ang termino, sa pagkatinuod, gipadapat sa tibuok siyudad sa Jerusalem. (Itandi ang Isa 1:8; 8:18; tan-awa ang BUKID SA PANAGKATIGOM.) Sanglit ang Arka nalangkit sa presensiya ni Jehova (Ex 25:22; Lev 16:2) ug tungod kay ang Zion maoy usa ka simbolo sa langitnong mga katinuoran, ang Zion gihisgotan ingong dapit nga gipuy-an sa Diyos (Sal 9:11; 74:2; 76:2; 78:68; 132:​13, 14; 135:21) ug ang dapit diin maggikan ang tabang, panalangin, ug kaluwasan.​—Sal 14:7; 20:2; 50:2; 53:6; 134:3.

Tungod sa pagkadili-matinumanon ngadto kaniya, gitugotan ni Jehova ang mga Babilonyanhon sa paglaglag sa Zion, o Jerusalem. (Lam 2:​1, 4, 6, 8, 10, 13) Sa ulahi, ingong katumanan sa tagna, gipasig-uli ni Jehova ang usa ka nahibilin sa iyang naghinulsol nga katawhan ngadto sa Zion, o Jerusalem. (Isa 35:10; 51:3; 52:1-8; Jer 50:​4, 5, 28; 51:​10, 24, 35) Kini nagpaposible alang kang Jesu-Kristo sa pag-adto sa Jerusalem sakay sa usa ka nating asno ug nagpaila sa iyang kaugalingon ingong hari sa Zion, sa ingon nagtuman sa tagna ni Zacarias. (Zac 9:9; Mat 21:5; Ju 12:15) Usa ka nahibilin lamang ang paborableng misanong, samtang ang relihiyosong mga lider misalikway kang Jesus ingong hari ug nagtinguha sa iyang kamatayon. Kini nagkahulogan ug katalagman alang sa yutan-ong Jerusalem, o Zion, ug sa pagsalikway niini sa Diyos.​—Mat 21:33-46.

Sanglit si Jesus gisalikway sa yutan-ong Jerusalem, dili mahimong didto gipahimutang ni Jehova ang iyang Anak ingong “usa ka sinulayang bato, ang bililhong pamag-ang sa usa ka seguradong patukoranan.” (Isa 28:16; Rom 9:​32, 33; 1Pe 2:6) Hinunoa, kini maoy didto sa Zion nga labot niini ang Hebreohanong mga Kristohanon gisultihan: “Apan kamo nakaduol sa Bukid sa Zion ug sa siyudad sa buhing Diyos, ang langitnong Jerusalem, ug sa tinagpulo ka libo nga manulonda, sa katibuk-ang katigoman, ug sa kongregasyon sa mga panganay nga natala sa mga langit, ug sa Diyos nga Maghuhukom sa tanan, ug sa espirituwal nga mga kinabuhi sa mga matarong nga nahimong hingpit, ug kang Jesus nga tigpataliwala sa bag-ong pakigsaad.” (Heb 12:22-24) Dayag nga dinhi niining langitnong Bukid sa Zion nga ang Kordero, si Kristo Jesus, nagbarog uban sa 144,000 nga gipalit gikan sa yuta.​—Pin 14:1-3; tan-awa ang JERUSALEM; BAG-ONG JERUSALEM.