[Langgam; o, lagmit, Gamayng Langgam].

Asawa ni Moises. Nahibalag ni Zipora si Moises sa usa ka atabay, sa dihang siya ug ang iyang unom ka igsoong babaye nagpainom sa mga karnero sa ilang amahan. Sa dihang nangabot ang pipila ka magbalantay ug, ingon sa ilang nabatasan, misulay sa pagpapahawa sa mga babaye, gitabangan ni Moises ang mga babaye, ug gani gipainom pa niya ang mga karnero. Tungod niini nga kalulot giimbitar siya ngadto sa balay ni Zipora, ug sa kataposan ang iyang saserdoteng amahan nga si Jetro naghatag kaniya sa kaminyoon ngadto kang Moises. (Ex 2:16-21) Si Zipora nanganak ug duha ka anak nga lalaki kang Moises​—si Gersom ug Eliezer.​—Ex 2:22; 18:​3, 4.

Sa dihang gipadala ni Jehova si Moises balik sa Ehipto, si Zipora ug ang ilang duha ka anak nga lalaki mikuyog kaniya. Diha sa dalan may usa ka seryoso kaayong panghitabo, ug ang dili tin-aw nga asoy labot niini nag-ingon: “Karon nahitabo didto sa dalan sa balay-abotanan nga si Jehova [“manulonda ni Jehova,” LXX] nakahibalag kaniya ug nagpadayon pagpangitag paagi sa pagpatay kaniya. Sa kataposan si Zipora nagkuhag santik ug nagputol sa yamis sa iyang anak nga lalaki ug kini iyang gipadapat sa iyang mga tiil ug miingon: ‘Tungod kay ikaw usa ka pamanhonon sa dugo alang kanako.’ Busa siya nagpalingkawas kaniya. Niadtong tungora si Zipora miingon: ‘Usa ka pamanhonon sa dugo,’ tungod sa pagtuli.”​—Ex 4:24-26.

Ang mga eskolar naghatag ug daghang interpretasyon labot niini nga asoy, ug ang pipila niini gilakip diha sa modernong mga hubad sa Bibliya. (Tan-awa ang CC, JB, Kx, La, NE, RS, ingon man ang Aleman nga Zürcher Bibel, ang Kinatsila nga Bover-Cantera ug ang Pranses nga Crampon, Lienart, ug Segond nga mga bersiyon.) Ang maong mga interpretasyon misulay sa pagtubag sa mga pangutana kon kinabuhi ba ni Moises o sa bata ang nameligro, kon sa tiil ba ni Moises o sa tiil sa bata o sa tiil sa manulonda nga gipadapat ni Zipora ang yamis. Gisulayan usab nila ang paghatag ug mga opinyon kon nganong si Zipora miingon (ug kon kinsa ang iyang giingnan), “Ikaw usa ka pamanhonon sa dugo alang kanako.”

Lagmit nga kinabuhi sa bata ang nameligro tungod sa giingon sa balaod labot sa pagtuli sa Genesis 17:14; nga gituli ni Zipora ang bata tungod kay siya nahibalo sa gikinahanglan aron sa pagtul-id sa mga butang; nga iyang gipadapat ang yamis ngadto sa tiil sa manulonda nga naghulga sa kinabuhi sa bata aron ipasundayag ang iyang pagsunod sa balaod ni Jehova; nga si Zipora namulong ngadto kang Jehova pinaagi sa iyang hawas nga manulonda sa dihang siya mituaw, “Ikaw usa ka pamanhonon sa dugo alang kanako,” nga nagbuhat niana aron ipakita ang iyang pagdawat sa posisyon ingong asawa diha sa pakigsaad sa pagtuli uban kang Jehova ingong bana.​—Tan-awa ang Jer 31:32.

Apan walay paagi aron tinong matubag sa Kasulatan ang maong mga pangutana. Ang literal nga kahulogan sa karaang Hebreohanon labot niini nga asoy nahimong dili tin-aw tungod sa mga idiom nga gigamit halos 3,500 na ka tuig kanhi. Mao nga ang literal nga mga hubad (NW, Ro, Yg) ug ang uban (AS, KJ, Da, Dy, JP, Mo, Le), lakip ang karaang Gregong Septuagint, dili tin-aw niining mga butanga.

Lagmit nga mipauli si Zipora aron duawon ang iyang mga ginikanan, tungod kay human sa Pagpanggula, si Zipora ug ang iyang duha ka anak nga lalaki mikuyog man kang Jetro balik kang Moises didto sa kampo sa kamingawan. (Ex 18:1-6) Ang pag-abot ni Zipora didto dayag nga nakaaghat kang Miriam nga igsoong babaye ni Moises nga mangabugho, ug si Miriam (uban ni Aaron) migamit sa pagka-Cusihanon ni Zipora ingong pasangil sa ilang pagreklamo batok kang Moises. (Num 12:1) Kini wala magpakita nga si Zipora namatay na ug si Moises nagminyo pag-usab sa usa ka babayeng Etiopianhon, nga sagad gilalisan, kay bisan tuod ang “Cusihanon” kasagarang gigamit sa pagtumong sa mga Etiopianhon, kini mahimong mag-apil usab niadtong gikan sa Arabia.​—Tan-awa ang CUS Num. 2; CUSIHANON.