[gikan sa Akadianhon, nga nagkahulogang “Binhi (Kaliwat) sa Babel”].

Unang gobernador sa nahibalik nga mga Hudiyo (Hag 2:21); usa ka kaliwat ni Haring David ug katigulangan ni Jesu-Kristo; lagmit ang anak nga lalaki mismo ni Pedaia apan legal nga giisip nga anak nga lalaki ni Sealtiel. (1Cr 3:19; Mat 1:​12, 13; Luc 3:27; tan-awa ang TALAAN SA KAGIKAN NI JESU-KRISTO [Ang mga Problema sa Asoy ni Mateo Bahin sa Talaan sa Kagikan ni Jesus].) Ang talaan sa kagikan diha sa 1 Cronicas (3:​19, 20) nagngalan sa pito ka anak nga lalaki ni Zorobabel (si Mesulam, Hananias, Hasuba, Ohel, Berekias, Hasadias, Jusab-hesed) ug sa usa ka anak nga babaye (si Selomit). Ang opisyal o Babilonyanhong ngalan ni Zorobabel mopatim-aw nga Sesbazar.​—Esd 1:​8, 11; 5:​14, 16; itandi ang Esd 3:8.

Human makagawas gikan sa pagkadestiyero sa Babilonya niadtong 537 W.K.P., si Zorobabel nanguna sa usa ka pundok sa mga Hudiyong nahibilin balik sa Jerusalem ug sa Juda. (Esd 2:​1, 2; Neh 7:​6, 7; 12:1; MAPA, Tomo 2, p. 332) Ingong gobernador nga gitudlo ni Haring Ciro, si Zorobabel gipiyalan sa sagradong mga sudlanan nga bulawan ug plata nga gikuha ni Nabucodonosor gikan sa templo mga katuigan una pa niana. (Esd 5:​14, 15) Sa Jerusalem, ang halaran sa templo gitukod sa ikapitong bulan (Etanim, o Tisri, Septiyembre-Oktubre), ubos sa pagdumala ni Zorobabel ug sa Hataas nga Saserdoteng si Jesua (Esd 3:​1, 2), ug sa ikaduhang tuig sa ikaduhang bulan (Ziv, o Iyyar, Abril-Mayo, sa 536 W.K.P.), nagsugod ang aktuwal nga pagtukod sa templo. (Esd 3:8) Kay nahibalo sa dili maayong motibo sa mga dili-Hudiyo nga mihangyo nga makigbahin sa buluhatong pagpanukod pag-usab, si Zorobabel, Jesua, ug ang mga pangulo sa mga balay sa mga amahan miingon: “Kamo walay labot kanamo sa pagtukod ug usa ka balay alang sa among Diyos, kay kami sa tingob magtukod alang kang Jehova nga Diyos sa Israel, ingon sa gisugo kanamo ni Haring Ciro nga hari sa Persia.”​—Esd 4:1-3.

Apan, kining mga dili-Hudiyo nagpadayon sa pagpaluya sa mga magtutukod sa templo ug sa kataposan (niadtong 522 W.K.P.) milampos sa pagpahinabog opisyal nga pagbando sa buluhaton. Duha ka tuig sa ulahi, nga gidasig sa mga manalagnang si Haggeo ug Zacarias, si Zorobabel ug Jesua (Josue) maisogong nagpadayon sa pagtukod sa templo bisan pa sa pagbando. (Esd 4:​23, 24; 5:​1, 2; Hag 1:​1, 12, 14; Zac 1:1) Human niadto ang usa ka pagsusi sa mga rekord sa Persia nagbindikar sa legalidad sa ilang buluhaton. (Esd 6:1-12) Sa tibuok panahon sa pagtukod, ang mga manalagnang si Haggeo ug Zacarias nagpadayon sa pagdasig kang Zorobabel, nga nagpalig-on kaniya alang sa buluhaton ug nagpasalig kaniya sa pag-uyon sa Diyos. (Hag 2:2-4, 21-23; Zac 4:6-10) Sa kataposan (niadtong 515 W.K.P.) ang templo nahuman. (Esd 6:13-15) Sa panahon usab sa pagkagobernador ni Zorobabel naatiman ang mga panginahanglan sa mga Levihanon, sa ingon ang mga mag-aawit ug ang mga magbalantay-sa-ganghaan nakadawat sa ilang bahin “sumala sa gikinahanglan adlaw-adlaw.”​—Neh 12:47.