Kapitulo 11

Ang Imong Ngalan Anaa ba sa Basahon sa Kinabuhi?

SARDIS

1. Unsa ang espirituwal nga kahimtang sa kongregasyon sa Sardis, ug unsay pangbukas nga mga pulong ni Jesus sa iyang mensahe?

 MGA 50 kilometros habagatan sa modernong Akhisar (Tiatira) mao ang nahimutangan sa sunod nga kongregasyon nga nakadawat ug mensahe gikan sa hinimayang Jesus: ang Sardis. Sa ikaunom nga siglo sa wala pa ang atong Komong Panahon, kining siyudara mao ang magarbohong kaulohan sa karaang gingharian sa Lydia ug ang pinuy-anan sa bahandianon kaayo nga si Haring Croesus. Sa adlaw ni Juan, kini nakaagi ug kalisod, ug ang kanhing himaya niini ilalom ni Croesus nahanaw na. Sa susama, ang Kristohanong kongregasyon didto kabos sa espirituwal. Sa unang higayon, dili komendasyon ang pangbukas nga mga pulong ni Jesus sa iyang mensahe. Hinunoa, siya nag-ingon: “Ug ngadto sa manulonda sa kongregasyon sa Sardis isulat kini: Mao kini ang mga butang nga ginaingon sa nakabaton sa pito ka espiritu sa Diyos ug sa pito ka bituon, ‘Nahibalo ako sa imong mga buhat, nga ikaw nagbaton sa ngalan nga ikaw buhi, apan ikaw patay.’”—Pinadayag 3:1.

2. (a) Unsay kahulogan alang sa mga Kristohanon sa Sardis nga si Jesus nakabaton sa “pito ka espiritu”? (b) Unsay reputasyon sa kongregasyon sa Sardis, apan unsay tinuod nga kahimtang niini?

² Nganong gipaila ni Jesus ang iyang kaugalingon  ingong ang usa nga “nakabaton sa pito ka espiritu”? Tungod kay ang maong mga espiritu nagsimbolo sa balaang espiritu ni Jehova nga bug-os nga nag-agos. Sa ulahi, si Juan naghubit usab niini ingong “pito ka mata,” nga nagpakita sa molapos nga panan-aw nga gihatag sa balaang espiritu sa Diyos kang Jesus. (Pinadayag 5:6) Sa ingon, siya may katakos sa pagtukib ug pag-atiman sa bisan unsang situwasyon nga lagmit motungha. (Mateo 10:26; 1 Corinto 4:5) Ang kongregasyon sa Sardis ilado nga buhi ug aktibo. Apan nakita ni Jesus nga kini patay sa espirituwal. Dayag nga kadaghanan sa mga membro niini nawad-ag interes, sama sa ilang kahimtang una pa sila nahimong mga Kristohanon.—Itandi ang Efeso 2:1-3; Hebreohanon 5:11-14.

3. (a) Nganong kinahanglan gayod nga hinumdoman sa “manulonda sa kongregasyon sa Sardis” nga si Jesus nakabaton sa “pito ka bituon”? (b) Unsang bug-at nga tambag ang gihatag ni Jesus sa kongregasyon sa Sardis?

³ Si Jesus nagpahinumdom usab sa “manulonda sa kongregasyon sa Sardis” nga Siya ang usa nga nakabaton sa “pito ka bituon.” Siyay nagkupot sa maong mga ansiyano sa kongregasyon diha sa iyang tuong kamot, tungod kay may awtoridad siya sa pagtultol kanila diha sa ilang buluhaton ingong magbalantay. Angay nga interesado sila nga ‘makaila gayod sa dagway sa ilang panon.’ (Proverbio 27:23) Busa, sila angayng mamati pag-ayo sa sunod nga mga pulong ni Jesus: “Magmabinantayon, ug lig-ona ang mga butang nga nahibilin nga hapit nang mamatay, kay wala ko makaplagi ang imong mga buhat nga nahimo sa bug-os atubangan sa akong Diyos. Busa, magpadayon sa paghinumdom sa imong nadawat ug sa imong nadungog, ug magpadayon sa pagtuman niini, ug maghinulsol. Tino nga gawas lamang kon ikaw momata, ako moanha ingon sa usa ka kawatan, ug dili mo gayod mahibaloan kon unsang taknaa ako moanha kanimo.”—Pinadayag 3:2, 3.

4. Sa unsang paagi ang mga pulong ni Pedro motabang sa kongregasyon sa Sardis sa ‘pagpalig-on sa mga butang nga nahibilin’?

⁴ Kinahanglang hinumdoman sa mga ansiyano sa Sardis ang kalipay nga ilang gibati sa sinugdan sa dihang sila nakakat-on sa kamatuoran ug ang mga panalangin nga ilang nadawat kaniadto. Apan karon sila patay sa espirituwal nga kalihokan. Ang ilang lampara sa kongregasyon nagakaawop tungod sa kakulang sa mga buhat sa pagtuo. Pipila ka tuig una pa niana, gisulatan ni apostol Pedro ang mga kongregasyon sa Asia (lagmit apil ang Sardis) sa pagpalig-on sa ilang apresasyon alang sa mahimayaon nga maayong balita nga gidawat sa mga Kristohanon ug gimantala “uban sa balaang espiritu nga gipadala gikan sa langit”—nga gisimbolohan sa pito ka espiritu sa panan-awon ni Juan. Gipahinumdoman usab ni Pedro ang maong mga Kristohanon sa Asia nga sila sakop sa ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron kaylap nilang ipahayag ang mga kahamili sa usa nga nagtawag kanila gikan sa kangitngit ngadto sa iyang katingalahang kahayag.’ (1 Pedro 1:12, 25; 2:9) Ang pagpalandong sa maong espirituwal nga mga kamatuoran motabang sa kongregasyon sa Sardis sa paghinulsol ug sa ‘pagpalig-on sa mga butang nga nahibilin.’—Itandi ang 2 Pedro 3:9.

5. (a) Unsay nahitabo sa apresasyon sa mga Kristohanon sa Sardis? (b) Unsay mahitabo kon ang mga Kristohanon sa Sardis dili motuman sa tambag ni Jesus?

⁵ Nianang higayona, ang ilang apresasyon ug gugma sa kamatuoran nahisamag kalayo nga nagkaawop na. Pipila ka baga na lang ang padayon nga nagsiga. Si Jesus nagdasig kanila sa paghuyop sa maong baga, sa pagpasiga sa kalayo, sa paghinulsol sa ilang mga sala nga resulta sa ilang pagpasagad, aron ang ilang kongregasyon mabuhi na usab sa espirituwal. (Itandi ang 2 Timoteo 1:6, 7.) Kay kon dili, ang kongregasyon sa Sardis maabtan unya nga dili andam sa dihang si Jesus kalit lang nga moabot—“ingon sa usa ka kawatan”—sa pagpatuman sa paghukom.—Mateo 24:43, 44.

Moabot “Ingon sa Usa ka Kawatan”

6. Sa unsang paagi si Jesus miabot “ingon sa usa ka kawatan” sa 1918, ug unsay iyang naabtan nga kahimtang niadtong nag-angkon nga iyang mga sumusunod?

⁶ Ang pasidaan ni Jesus nga siya moabot “ingon sa usa ka kawatan” aplikado gihapon sa modernong mga panahon. Kini linain nga mapadapat sa mga Kristohanon nga nagkinabuhi sa adlaw sa Ginoo. Wala madugay human sa 1914, ang tagna ni Malaquias natuman: “‘Sa hinanali moabot sa Iyang templo ang matuod nga Ginoo, nga inyong gipangita, ug ang mensahero sa pakigsaad nga inyong gikahimut-an. Tan-awa! Siya moabot gayod,’ miingon si Jehova sa mga panon.” (Malaquias 3:1; Pinadayag 1:10) Ingong “mensahero sa pakigsaad,” si Jesus miabot sa pagsusi ug paghukom sa mga nag-angkon nga iyang mga sumusunod.  (1 Pedro 4:17) Niadtong panahona, sa 1918, ang Kakristiyanohan nalangkit sa pag-ulag dugo sa Gubat sa Kalibotan I ug sila patay gayod sa espirituwal nga pagkasulti. Bisan ang matuod nga mga Kristohanon, kinsa madasigon nga nagwali sa wala pa ang gubat, nagduka sa espirituwal. Ang pipila sa ilang prominenteng mga ansiyano gibilanggo, ug ang kalihokan sa pagwali halos nahunong. Sa dihang ang maong mga Kristohanon gipukaw sa espiritu ni Jehova sa tuig nga misunod, dili tanan ang nakaandam. Ang uban, sama sa buangbuang nga mga ulay sa sambingay ni Jesus, wala masangkapi sa espirituwal alang sa pribilehiyo sa pag-alagad kang Jehova. Bisan pa niana, makalilipay nga daghan, sama sa maalamong mga ulay, ang nagpatalinghog sa pasidaan ni Jesus: “Busa, magpadayon sa pagbantay tungod kay wala kamo mahibalo sa adlaw ni sa takna.”—Mateo 25:1-13.

7. Nganong ang mga Kristohanon karon kinahanglang magpadayon sa pagtukaw?

⁷ Ang panginahanglan nga magmaalisto ang usa ka Kristohanon wala matapos sa unang bahin sa adlaw sa Ginoo. Sa iyang dakong tagna mahitungod sa “ilhanan sa dihang kining tanang butang gitakdang modangat sa kataposan,” si Jesus mihatag ug kusganong pasidaan: “Mahitungod nianang adlawa o taknaa walay nahibalo . . . Magpadayon sa pagtan-aw, magpadayon sa pagtukaw, kay wala kamo mahibalo kon kanus-a ang tinudlong panahon. Apan ang ginasulti ko kaninyo ginasulti ko sa tanan, Magpadayon sa pagbantay.” (Marcos 13:4, 32, 33, 37) Oo, hangtod karong taknaa mismo, ang matag usa kanato, dinihogan man o iya sa dakong panon, kinahanglang magpabiling alisto ug makigbisog aron dili mahikatulog sa espirituwal. Sa dihang ang adlaw ni Jehova moabot “sama sa kawatan sa kagabhion,” hinaot nga kita maabtang nagmata aron makadawat kita ug paborableng paghukom.—1 Tesalonica 5:2, 3; Lucas 21:34-36; Pinadayag 7:9.

8. Sa unsang paagi ang Juan nga matang karon nagdasig sa katawhan sa Diyos sa pagpabiling buhi sa espirituwal?

⁸ Karon, ang Juan nga matang mismo nagmata sa pagdasig sa katawhan sa Diyos sa pagpabiling buhi sa espirituwal. Tungod niini, sila naghikay ug espesyal nga mga tigom sa tibuok yuta nga himoon daghang beses matag tuig. Sa di pa dugayng tuig, ang nanambong sa 2,981 ka distritong mga kombensiyon mikabat ug 10,953,744, ug 122,701 ka bag-ong magtutuo ang nabawtismohan. Sa kapin na sa usa ka gatos ka tuig, gigamit sa Juan nga matang ang magasing Bantayanang Torre sa pagmantala sa ngalan ug katuyoan ni Jehova. Agig sanong sa mapait nga mga paglutos panahon sa duha ka gubat sa kalibotan, gipukaw sa Ang Bantayanang Torre ang kadasig sa mga Saksi ni Jehova pinaagi sa pagpatik ug mga artikulo sama sa “Bulahan ang Walay Kahadlok” (1919), “Usa ka Panawag sa Paglihok” (1925), ug “Kapildihan sa Paglutos” (1942).

9. (a) Unsay kinahanglang ipangutana sa tanang Kristohanon sa ilang kaugalingon? (b) Unsang pagdasig ang gihatag sa Ang Bantayanang Torre?

⁹ Sama sa Sardis, hinungdanon nga ang tanang Kristohanon sa mga kongregasyon karon magpadayon sa pagsusi sa ilang kaugalingon. Kinahanglang pangutan-on nato kanunay ang atong kaugalingon: Ang ato bang ‘mga buhat atong nahimo sa bug-os’ atubangan sa atong Diyos? Nga dili maghukom sa uban, kita ba sa personal nag-ugmad sa espiritu sa pagsakripisyo sa kaugalingon ug naningkamot sa paghatag ug bug-os-kalag nga pag-alagad sa Diyos? Maylabot niini, ang magasing Bantayanang Torre naghatag ug pagdasig pinaagi sa paghisgot ug mga topiko sama sa “Padayong Pamatud-i Kon Unsa Kamo sa Inyong Kaugalingon” ug “Pagkinabuhi nga Dili na Alang sa Atong Kaugalingon.” a Pinaagi niining Kasulatanhong tabang, atong susihon ang atong kinasulorang pagkatawo samtang kita naningkamot sa paglakaw nga mapaubsanon ug mainampoon nga may integridad atubangan ni Jehova.—Salmo 26:1-3; 139:23, 24.

“Pipila ka Ngalan”

10. Unsang makapadasig nga butang ang namatikdan ni Jesus sa kongregasyon sa Sardis, ug sa unsang paagi kini angayng mag-apektar kanato?

¹⁰ Ang sunod nga mga pulong ni Jesus sa kongregasyon sa Sardis makapadasig kaayo. Siya nag-ingon: “Bisan pa niana, ikaw adunay pipila ka ngalan sa Sardis nga wala maghugaw sa ilang panggawas nga mga besti, ug sila magalakaw uban kanako nga magbesti ug puti, tungod kay sila takos man niini. Siya nga magmadaogon pagasul-oban ug maputing panggawas nga mga besti; ug dili ko gayod papason ang iyang ngalan gikan sa basahon sa kinabuhi, hinuon pagailhon ko ang iyang ngalan atubangan  sa akong Amahan ug atubangan sa iyang mga manulonda.” (Pinadayag 3:4, 5) Dili ba kining mga pulonga nagpukaw kanato ug nagpalig-on sa atong determinasyon nga magmatinumanon? Tungod sa pagpasagad sa lawas sa mga ansiyano, ang usa ka kongregasyon sa katibuk-an mahimong mahinanok sa pagkatulog sa espirituwal. Apan, ang pipila ka indibiduwal sa sulod niini tingali maisogong maningkamot sa paghupot sa ilang Kristohanong ilhanan nga putli ug walay mantsa ug busa padayon nga nakahupot ug maayong ngalan uban kang Jehova.—Proverbio 22:1.

11, 12. (a) Bisan sa panahon sa dakong apostasya, sa unsang paagi ang uban nahimong sama sa ‘pipila ka [matinumanong] mga ngalan’ sa Sardis? (b) Unsang kahupayan ang nabatonan sa samag-trigo nga mga Kristohanon sa adlaw sa Ginoo?

¹¹ Oo, ang “panggawas nga mga besti” nagtumong sa matarong nga ilhanan sa usa ka tawo ingong usa ka Kristohanon. (Itandi ang Pinadayag 16:15; 19:8.) Tino nga nalipay si Jesus sa pagkakita nga bisan pa sa kawalay-interes sa kadaghanan, ang “pipila ka ngalan,” ang pipila ka dinihogang mga Kristohanon sa Sardis, nakahupot gihapon niining maong ilhanan. Sa samang paagi, latas sa daghang siglo sa dakong apostasya, sa dihang ang nag-angkong mga Kristohanon nahimong bahin sa Dakong Babilonya, ang tibuok-kalibotang imperyo sa bakak nga relihiyon, dayag nga dunay pipila ka indibiduwal nga naningkamot sa pagbuhat sa kabubut-on ni Jehova bisan pa sa dagkong mga kababagan. Sila mga matarong sama sa trigo nga natabonan sa daghang sekta nga mga bunglayon.—Pinadayag 17:3-6; Mateo 13:24-29.

¹² Si Jesus nagsaad nga siya magauban niining samag-trigo nga mga Kristohanon “sa tanang adlaw hangtod sa kataposan sa sistema sa mga butang.” Siya nakaila kon kinsa sila ug kon unsang maayong ngalan ang ilang nahimo alang sa ilang kaugalingon. (Mateo 28:20; Ecclesiastes 7:1) Handurawa ang kalipay niining “pipila” ka matinumanon nga buhi pa sa pagsugod sa adlaw sa Ginoo! Sila gilain sa kataposan gikan sa patay-sa-espirituwal nga Kakristiyanohan ug gitigom diha sa usa ka matarong nga kongregasyon sama sa kongregasyon sa Smirna.—Mateo 13:40-43.

13. Unsang mga panalangin ang naghulat sa dinihogang mga Kristohanon nga wala “maghugaw sa ilang panggawas nga mga besti”?

¹³ Ang mga taga-Sardis nga nagmatinumanon hangtod sa kataposan ug wala maghugaw sa ilang Kristohanong ilhanan nakatagamtam sa katumanan sa usa ka makalilipay nga paglaom. Human matukod ang Mesiyanikong Gingharian ni Jesus niadtong 1914, sila gibanhaw ngadto sa espirituhanong kinabuhi ug ingong mga mananaog sila gisul-oban ug puti nga panggawas nga mga besti ingong simbolo sa ilang walay-buling, walay-mantsa nga pagkamatarong. Kay naglakaw diha sa hiktin nga dalan padulong sa  kinabuhi, ilang matagamtam ang usa ka dumalayong ganti.—Mateo 7:14; tan-awa usab ang Pinadayag 6:9-11.

Anaa sa Basahon sa Kinabuhi Hangtod sa Hangtod!

14. Unsa ang “basahon sa kinabuhi,” ug kang kinsang mga ngalan ang nasulat diha niana?

¹⁴ Unsa ang “basahon sa kinabuhi,” ug kang kinsang mga ngalan ang magpabilin diha niana? Ang basahon, o linukot nga basahon, sa kinabuhi nagtumong sa rekord sa mga alagad ni Jehova nga makadawat ug ganti nga kinabuhing walay kataposan. (Malaquias 3:16) Ang Pinadayag espesipikong naghisgot bahin sa mga ngalan sa dinihogang mga Kristohanon. Apan ang mga ngalan sa makadawat ug kinabuhing walay kataposan sa yuta nasulat usab diha niana. Dugang pa, ang mga ngalan mahimong “papason” nianang basahona. (Exodo 32:32, 33) Bisan pa niana, kadtong sakop sa Juan nga matang kansang mga ngalan nagpabilin diha sa basahon sa kinabuhi hangtod sa ilang kamatayon makadawat ug imortal nga kinabuhi sa langit. (Pinadayag 2:10) Mao kining mga ngalana ang ilhon ni Jesus atubangan sa iyang Amahan ug atubangan sa Iyang mga manulonda. Pagkaanindot niana nga ganti!

15. Unsay himoon sa mga membro sa dakong panon aron ang ilang mga ngalan dili na mapala gikan sa basahon sa kinabuhi?

¹⁵ Ang dakong panon, kansang mga ngalan nahisulat usab sa basahon sa kinabuhi, mogula nga buhi sa dakong kasakitan. Pinaagi sa pagpasundayag ug pagtuo sulod sa Milenyong Pagmando ni Jesus ug panahon sa kataposang pagsulay nga mosunod, sila pagagantihan ug kinabuhing walay kataposan sa Paraiso sa yuta. (Daniel 12:1; Pinadayag 7:9, 14; 20:15; 21:4) Nianang panahona ang ilang mga ngalan dili na mapala gikan sa basahon sa kinabuhi. Kay nahibalo kon unsay gipresentar sa balaang espiritu, dili ka ba mosanong nga madasigon sa balikbalik nga awhag ni Jesus: “Ang adunay igdulungog magpatalinghog sa ginaingon sa espiritu ngadto sa mga kongregasyon”?—Pinadayag 3:6.

[Footnote]

[Mga Pangutana sa Pagtuon]

[Hulagway sa panid 57]

Hinaot nga ang imong ngalan magpabilin diha sa basahon sa kinabuhi