Kapitulo 43

Ang Magilakong Siyudad

Panan-awon 16​—Pinadayag 21:9–22:5

Ulohan: Kahubitan sa Bag-ong Jerusalem

Panahon sa katumanan: Human sa dakong kasakitan ug pagtambog kang Satanas sa kahiladman

1, 2. (a) Diin dad-a si Juan sa usa ka manulonda aron makita ang Bag-ong Jerusalem, ug unsang kalainan ang atong mamatikdan dinhi? (b) Nganong kini ang hingpit nga sangkoanan sa Pinadayag?

 USA ka manulonda ang nagdala kang Juan ngadto sa usa ka kamingawan aron ipakita kaniya ang Dakong Babilonya. Karon ang usa ka manulonda gikan sa samang pundok sa mga manulonda nagdala kang Juan sa usa ka habog nga bukid. Pagkalahi sa iyang nakita! Aniay usa ka siyudad nga dili mahugaw ug imoral sama sa Babilonyanhong bigaon, kondili Bag-ong Jerusalem—putli, espirituwal, balaan—ug kini nanaog gikan sa langit mismo.—Pinadayag 17:1, 5.

² Bisan ang yutan-ong Jerusalem wala makabatog himaya nga sama niini sukad masukad. Si Juan nagtug-an kanato: “Ug miabot ang usa sa pito ka manulonda nga may pito ka panaksan nga puno sa kataposang pito ka hampak, ug siya nakigsulti kanako ug miingon: ‘Umari ka, ipakita ko kanimo ang pangasaw-onon, ang asawa sa Kordero.’ Busa gidala niya ako diha sa gahom sa espiritu ngadto sa usa ka dako ug habog nga bukid, ug gipakita niya kanako ang balaang siyudad nga Jerusalem nga nanaog gikan sa langit gikan sa Diyos ug may himaya sa Diyos.” (Pinadayag 21:9-11a) Gikan sa bantaawng bahin nianang habog nga bukid, gisud-ong ni Juan ang matahom nga siyudad ug ang tanang nindot nga bahin niini. Ang matinuohong mga tawo maikagong naghulat sa pag-abot niini sukad pa gayod sa pagkahulog sa tawo sa sala ug kamatayon. Sa kataposan miabot na gayod kini! (Roma 8:19; 1 Corinto 15:22, 23; Hebreohanon 11:39, 40) Kini ang matahom kaayong espirituwal nga siyudad, nga gilangkoban sa 144,000 ka maunongong mga  maghuhupot sa integridad, nga magilakon tungod sa pagkabalaan niini ug nagbanaag sa himaya mismo ni Jehova. Kini mao ang hingpit nga sangkoanan sa Pinadayag!

3. Sa unsang paagi gihubit ni Juan ang katahom sa Bag-ong Jerusalem?

³ Makapahingangha gayod ang katahom sa Bag-ong Jerusalem: “Ang kasidlak niini ingon sa usa ka batong bililhon kaayo, ingon sa usa ka batong haspe nga naggilakgilak nga sama katin-aw sa kristal. Kini may dako ug habog nga paril ug may napulog-duha ka ganghaan, ug diha sa mga ganghaan may napulog-duha ka manulonda, ug nahisulat ang mga ngalan sa napulog-duha ka tribo sa mga anak ni Israel. Sa sidlakan may tulo ka ganghaan, ug sa amihanan tulo ka ganghaan, ug sa habagatan tulo ka ganghaan, ug sa kasadpan tulo ka ganghaan. Ang paril sa siyudad usab may napulog-duha ka patukoranang bato, ug diha niana ang napulog-duha ka ngalan sa napulog-duha ka apostoles sa Kordero.” (Pinadayag 21:11b-14) Pagkahaom nga ang unang impresyon nga girekord ni Juan mao ang magilakong kadan-ag! Kay nagdan-ag sa katahom ingon nga bag-ong pangasaw-onon, ang Bag-ong Jerusalem angayang konsorte ni Kristo. Dili mokurapkurap ang kamagilakon niini, ingon nga haom sa usa ka linalang sa “Amahan sa langitnong mga kahayag.”—Santiago 1:17.

4. Unsay nagpaila nga ang Bag-ong Jerusalem dili mao ang unodnong nasod sa Israel?

⁴ Ang 12 ka ganghaan niini nasulatan sa mga ngalan sa 12 ka tribo sa Israel. Busa, kining simbolikong siyudad gilangkoban sa 144,000, kinsa gitimbrehan “gikan sa matag tribo sa mga anak nga lalaki ni Israel.” (Pinadayag 7:4-8) Uyon niini, ang patukoranang mga bato nasulatan sa mga ngalan sa 12 ka apostoles sa Kordero. Oo, ang Bag-ong Jerusalem dili mao ang unodnong nasod sa Israel nga gitukod diha sa 12 ka anak nga lalaki ni Jacob. Kini mao ang espirituwal nga Israel, nga gitukod ibabaw sa patukoranan sa “mga apostoles ug mga manalagna.”—Efeso 2:20.

5. Unsay gipasabot sa “dako ug habog nga paril” sa Bag-ong Jerusalem ug sa pagbutang ug mga manulonda sa matag entrada?

⁵ Ang simbolikong siyudad may dako kaayong paril. Sa karaang mga panahon, ang mga paril sa siyudad gitukod ingong depensa batok sa mga kaaway. Ang “dako ug habog nga paril” sa Bag-ong Jerusalem nagpakita nga kini malig-on sa espirituwal. Si bisan kinsa nga kaaway sa pagkamatarong, mahugaw o malimbongon, dili gayod makasulod. (Pinadayag 21:27) Apan niadtong gitugotang mosulod, ang pagsulod niining matahom nga siyudad maoy sama sa pagsulod sa Paraiso. (Pinadayag 2:7) Human pagawsa si Adan, gibutangan ug mga kerubin ang atubangan sa orihinal nga Paraiso aron dili makasulod ang mahugaw nga mga tawo. (Genesis 3:24) Sa susama, gibutangan ug mga manulonda ang matag entrada sa balaang siyudad sa Jerusalem aron panalipdan ang espirituwal nga kahimtang sa siyudad. Sa pagkamatuod, sa kataposang mga adlaw, ang mga manulonda nagbantay sa kongregasyon sa dinihogang mga Kristohanon, nga nahimong Bag-ong Jerusalem, batok sa Babilonyanhong kahugawan.—Mateo 13:41.

Pagsukod sa Siyudad

6. (a) Sa unsang paagi gihubit ni Juan ang pagsukod sa siyudad, ug unsay gipasabot sa maong pagsukod? (b) Unsay katin-awan nga ang gigamit nga sukod maoy “sumala sa sukod sa tawo, ug mao usab sa manulonda”? (Tan-awa ang potnot.)

⁶ Si Juan nagpadayon sa iyang saysay: “Karon ang nakigsulti kanako nagkupot ug sukdanan nga tangbo nga bulawan, aron iyang isukod sa siyudad ug sa mga ganghaan niini ug sa paril niini. Ug ang siyudad nahimutang nga kuwadrado, ug ang iyang gitas-on sama sa iyang gilapdon. Ug iyang gisukod ang siyudad pinaagi sa tangbo, napulog-duha ka libo ka estadio; parehas ang iyang gitas-on ug gilapdon ug gihabogon. Dugang pa, iyang gisukod ang paril niini, usa ka gatos ug kap-atag-upat ka maniko, sumala sa sukod sa tawo, ug mao usab sa manulonda.” (Pinadayag 21:15-17) Sa dihang gisukod ang sangtuwaryo sa templo, kadto maoy garantiya nga mamatuman ang mga katuyoan ni Jehova maylabot niini. (Pinadayag 11:1) Karon, ang pagsukod sa manulonda sa Bag-ong Jerusalem nagpakita nga ang mga katuyoan ni Jehova maylabot niining mahimayaong siyudad dili gayod mausob. a

7. Unsay talagsaon bahin sa mga sukod sa siyudad?

⁷ Pagkatalagsaong siyudad! Usa ka hingpit nga cube o kubo nga ang perimetro maoy 12,000 ka estadio (mga 2,220 ka kilometro), nga gilibotag paril nga 144 ka maniko, o 64 ka metro, ang gihabogon. Walay literal nga siyudad ang adunay ingon nga mga sukod. Kana mosakop ug teritoryo nga ang gidak-on halos 14 ka pilo sa modernong Israel, ug kini moabot ug halos 560 ka kilometro ngadto sa wanang! Ang Pinadayag gihatag  nga gigamit ang mga simbolo. Busa, unsay gitug-an kanato sa mga sukod sa langitnong Bag-ong Jerusalem?

8. Unsay gipasabot nga (a) ang mga paril sa siyudad may gihabogon nga 144 ka maniko? (b) ang sukod sa siyudad maoy 12,000 ka estadio? (c) ang porma sa siyudad maoy hingpit nga kubo?

⁸ Ang 144 ka maniko nga gihabogon sa mga paril magpahinumdom kanato nga ang siyudad gilangkoban sa 144,000 ka sinagop sa espirituwal nga mga anak sa Diyos. Ang numerong 12 nga makita sa sukod sa siyudad nga 12,000 ka estadio—nga parehas ang gitas-on, gilapdon, ug gihabogon—gigamit nga masambingayon sa organisasyonal nga mga kahikayan diha sa mga tagna sa Bibliya. Busa, ang Bag-ong Jerusalem maoy organisasyonal nga kahikayan nga adunay maayo kaayong disenyo aron molampos ang dumalayong katuyoan sa Diyos. Ang Bag-ong Jerusalem, uban ni Haring Jesu-Kristo, mao ang organisasyon sa Gingharian ni Jehova. Unya anaa ang porma sa siyudad: hingpit nga kubo. Sa templo ni Solomon, ang Labing Balaan, nga didtoy simbolikong hawas sa presensiya ni Jehova, maoy hingpit nga kubo. (1 Hari 6:19, 20) Nan, pagkahaom nga ang Bag-ong Jerusalem, nga gidan-agan sa himaya ni Jehova mismo, maoy usa ka hingpit, dako nga kubo! Ang tanang sukod niini maoy hingpit nga pagkabalanse. Kini maoy siyudad nga walay kahiwian o depekto.—Pinadayag 21:22.

Bililhong mga Materyales nga Gigamit sa Pagtukod

9. Sa unsang paagi gihubit ni Juan ang mga materyales nga gigamit sa pagtukod sa siyudad?

⁹ Si Juan nagpadayon sa iyang paghubit: “Karon ang paril niini hinimog haspe, ug ang siyudad lunsayng bulawan nga sama sa tin-aw nga bildo. Ang mga patukoranan sa paril sa siyudad gidayandayanan sa tanang matang sa bililhong bato: ang unang patukoranan haspe, ang ikaduha sapiro, ang ikatulo kalsidonya, ang ikaupat esmeralda, ang ikalima sardonika, ang ikaunom sardio, ang ikapito krisolito, ang ikawalo berilo, ang ikasiyam topasyo, ang ikanapulo krisopraso, ang ikanapulog-usa hasinto, ang ikanapulog-duha amatista. Dugang pa, ang napulog-duha ka ganghaan hinimo sa napulog-duha ka perlas; matag usa sa mga ganghaan hinimog usa ka buok perlas. Ug ang halapad nga dalan sa siyudad lunsayng bulawan, ingon sa tin-aw nga bildo.”—Pinadayag 21:18-21.

10. Unsay gipasabot nga ang siyudad gitukod nga gigamit ang haspe, bulawan, ug “tanang matang sa bililhong bato”?

¹⁰ Ang materyales nga gigamit sa pagtukod sa siyudad nindot kaayo. Imbes sa ordinaryo, yutan-ong materyales nga igtutukod sama sa yutang-kulonon o bato, ang gigamit mao ang haspe, lunsayng bulawan, ug “tanang matang sa bililhong bato.” Haom kaayo kining naghulagway sa langitnong mga materyales nga igtutukod! Walay mas matahom pa kay niini. Ang karaang arka sa pakigsaad gihaklapan ug lunsayng bulawan, ug diha sa  Bibliya ang bulawan kasagarang nagsimbolo sa mga butang nga maayo ug bililhon. (Exodo 25:11; Proverbio 25:11; Isaias 60:6, 17) Apan ang tibuok nga Bag-ong Jerusalem, ug bisan ang halapad nga dalan niini, maoy hinimo sa “lunsayng bulawan, ingon sa tin-aw nga bildo,” nga naghulagway sa katahom ug pagkabililhon nga dili mahanduraw.

11. Unsay magtino nga ang mga maglangkob sa Bag-ong Jerusalem magdan-ag tungod sa kinalabwang kaputli sa espirituwal?

¹¹ Walay tawhanong tunawanan ang makapatunghag ingon ka lunsay nga bulawan. Apan si Jehova maoy Batid nga Tigdalisay. Siya naglingkod “ingong usa ka tigdalisay ug tighinlo sa plata,” ug siya mag-ulay sa matag usa nga matinumanong mga membro sa espirituwal nga Israel “sama sa bulawan ug sama sa plata,” nga magwagtang sa tanang kahugawan gikan kanila. Ang mga indibiduwal lamang nga tinuod nga nalunsay ug nahinloan ang maglangkob sa kataposan sa Bag-ong Jerusalem, ug niining paagiha tukoron ni Jehova ang siyudad nga gigamit ang buhing mga materyales nga igtutukod nga nagdan-ag tungod sa kinalabwang kaputli sa espirituwal.—Malaquias 3:3, 4.

12. Unsay gipasabot nga (a) ang mga patukoranan sa siyudad gidayandayanan ug 12 ka bililhong mga bato? (b) ang mga ganghaan sa siyudad maoy mga perlas?

¹² Bisan ang mga patukoranan sa siyudad matahom, kay gidayandayanan man ug 12 ka bililhong mga bato. Kini magpahinumdom sa karaang Hudiyong hataas nga saserdote, nga sa seremonyal nga mga adlaw nagsul-ob ug epod nga gidayandayanan ug 12 ka nagkadaiyang bililhong mga bato nga susama sa gihubit dinhi. (Exodo 28:15-21) Seguradong kini dili lang nagkaatol! Hinunoa, kini nagpasiugda sa saserdotehanong katungdanan sa Bag-ong Jerusalem diin si Jesus, ang dakong Hataas nga Saserdote, mao ang “lampara.” (Pinadayag 20:6; 21:23; Hebreohanon 8:1) Dugang pa, ang mga benepisyo sa ministeryo ni Jesus ingong hataas nga saserdote ipaabot sa katawhan pinaagi sa Bag-ong Jerusalem. (Pinadayag 22:1, 2) Ang 12 ka ganghaan sa siyudad, nga ang matag usa maoy matahom kaayong perlas, magpahinumdom sa sambingay ni Jesus nga nagtandi sa Gingharian ngadto sa bililhon kaayong perlas. Ang tanan nga mosulod agi sa maong mga ganghaan nakapakita nag tinuod nga pagpabili sa espirituwal nga mga butang.—Mateo 13:45, 46; itandi ang Job 28:12, 17, 18.

Usa ka Hayag nga Siyudad

13. Unsay sunod nga giingon ni Juan mahitungod sa Bag-ong Jerusalem, ug nganong ang siyudad wala magkinahanglan ug literal nga templo?

¹³ Sa panahon ni Solomon, nagbantaaw sa Jerusalem ang usa ka templo nga natukod sa kinahabogang  bahin sa siyudad didto sa Bukid sa Moria dapit sa amihanan. Apan unsay ikasulti bahin sa Bag-ong Jerusalem? Si Juan nag-ingon: “Ug wala akoy nakitang templo diha niini, kay ang Labing Gamhanang Diyos nga si Jehova mao man ang templo niini, mao man usab ang Kordero. Ug ang siyudad wala magkinahanglan sa adlaw ni sa bulan nga modan-ag niini, kay ang himaya sa Diyos nagdan-ag niini, ug ang lampara niini mao ang Kordero.” (Pinadayag 21:22, 23) Sa pagkamatuod, dili kinahanglan nga magtukod ug literal nga templo dinhi. Ang karaang Hudiyohanong templo maoy usa lamang ka sumbanan, ug ang katinuoran sa maong sumbanan, ang dakong espirituwal nga templo, naglungtad na sukad sa pagdihog ni Jehova kang Jesus ingong Hataas nga Saserdote niadtong 29 K.P. (Mateo 3:16, 17; Hebreohanon 9:11, 12, 23, 24) Ang usa ka templo nagkinahanglan usab ug saserdotehanong matang sa pagtanyag ug mga halad kang Jehova alang sa katawhan. Apan silang tanan nga bahin sa Bag-ong Jerusalem maoy mga saserdote. (Pinadayag 20:6) Ug ang dakong halad, ang hingpit nga tawhanong kinabuhi ni Jesus, kas-a lang gihalad. (Hebreohanon 9:27, 28) Dugang pa, si Jehova personal nga maduolan sa matag usa nga nagpuyo sa siyudad.

14. (a) Nganong ang Bag-ong Jerusalem wala magkinahanglan sa adlaw ug sa bulan sa pagdan-ag niini? (b) Unsay gitagna ni Isaias bahin sa unibersohanong organisasyon ni Jehova, ug sa unsang paagi ang Bag-ong Jerusalem nalangkit niini?

¹⁴ Sa dihang ang himaya ni Jehova miagi kang Moises didto sa Bukid sa Sinai, ang nawong ni Moises nahimong sulaw kaayo nga kini iyang gitabonan aron dili masulawan ang iyang kaubang mga Israelinhon. (Exodo 34:4-7, 29, 30, 33) Nan, mahanduraw mo ba ang kasulaw sa usa ka siyudad nga permanenteng gidan-agan sa himaya ni Jehova? Walay gabii sa maong siyudad. Kini wala magkinahanglag literal nga adlaw o bulan. Walay kataposan ang kahayag niini. (Itandi ang 1 Timoteo 6:16.) Gidigo ang Bag-ong Jerusalem nianang matanga sa masilakong kadan-ag. Sa pagkamatuod, kining pangasaw-onon ug ang Pamanhonong Hari niini nahimong kaulohan sa unibersohanong organisasyon ni Jehova—ang iyang “babaye,” “ang Jerusalem sa itaas”—nga bahin niana si Isaias mitagna: “Alang kanimo ang adlaw dili na maoy kahayag sa maadlaw, ug alang sa kasanag ang bulan dili na mohatag kanimog kahayag. Ug kanimo si Jehova mahimo gayod nga kahayag nga mohangtod sa panahong walay tino, ug ang imong Diyos imong katahom. Dili na mosalop ang imong adlaw, ni moawop ang imong bulan; kay si Jehova alang kanimo mahimong kahayag nga mohangtod sa panahong walay tino, ug  ang mga adlaw sa imong pagbangotan matapos na.”—Isaias 60:1, 19, 20; Galacia 4:26.

Usa ka Kahayag Alang sa mga Nasod

15. Unsang mga pulong sa Pinadayag bahin sa Bag-ong Jerusalem ang susama sa tagna ni Isaias?

¹⁵ Kining maong tagna nag-ingon usab: “Ug [ang] mga nasod tinong manganha sa imong kahayag, ug [ang] mga hari nganha sa kasanag sa imong pagsidlak.” (Isaias 60:3) Ang Pinadayag nagpakita nga kining mga pulonga maglakip sa Bag-ong Jerusalem: “Ug ang kanasoran managlakaw pinaagi sa kahayag niini, ug ang mga hari sa yuta managdala sa ilang himaya ngadto niini. Ug ang mga ganghaan niini dili gayod pagasirhan sa maadlaw, kay wala may gabii didto. Ug ilang pagadad-on ang himaya ug ang dungog sa kanasoran ngadto niini.”—Pinadayag 21:24-26.

16. Kinsa ang “kanasoran” nga magalakaw pinaagi sa kahayag sa Bag-ong Jerusalem?

¹⁶ Kinsa kining “kanasoran” nga managlakaw pinaagi sa kahayag sa Bag-ong Jerusalem? Sila maoy mga tawo, nga kanhi bahin sa mga nasod niining daotang kalibotan, nga miduol sa kahayag nga gidan-ag pinaagi niining mahimayaong langitnong siyudad. Nanguna kanila mao ang dakong panon, nga nakagula na gikan sa “tanang kanasoran ug mga tribo ug katawhan ug mga pinulongan” ug nagsimba sa Diyos sa adlaw ug gabii kauban sa Juan nga matang. (Pinadayag 7:9, 15) Human manaog ang Bag-ong Jerusalem gikan sa langit ug human gamita ni Jesus ang mga yawi sa kamatayon ug sa Hades aron pagbanhaw sa mga patay, kuyogan silag milyonmilyon pa, nga kanhi naggikan sa “kanasoran,” nga nakakat-on sa paghigugma kang Jehova ug sa iyang Anak, ang samag-Kordero nga Bana sa Bag-ong Jerusalem.—Pinadayag 1:18.

17. Kinsa “ang mga hari sa yuta” nga ‘magdala sa ilang himaya’ ngadto sa Bag-ong Jerusalem?

¹⁷ Nan, kinsa “ang mga hari sa yuta” nga ‘magdala sa ilang himaya ngadto niini’? Sila dili ang literal nga mga hari sa yuta ingong usa ka grupo, kay sila mangalaglag sa pagpakiggubat batok sa Gingharian sa Diyos sa Armagedon. (Pinadayag 16:14, 16; 19:17, 18) Ang maong mga hari mao ba ang pipila nga tag-as ug katungdanan sa kanasoran nga mahimong bahin sa dakong panon, o sila ba mao ang gibanhaw nga mga hari nga magpasakop sa Gingharian sa Diyos sa bag-ong kalibotan? (Mateo 12:42) Dili gayod, kay sa dakong bahin, ang himaya sa maong mga hari maoy kalibotanon ug dugay nang nahanaw. Nan, “ang mga hari sa yuta” nga nagdala sa ilang himaya ngadto sa Bag-ong Jerusalem mao gayod ang 144,000, nga “gipalit . . . gikan sa matag tribo ug pinulongan ug katawhan ug nasod” aron magmando ingong mga hari uban sa Kordero, si Jesu-Kristo. (Pinadayag 5:9, 10; 22:5) Pagadad-on nila ang ilang hinatag-sa-Diyos nga himaya ngadto sa siyudad aron madugangan ang kadan-ag niini.

18. (a) Kinsa ang dili pasudlon sa Bag-ong Jerusalem? (b) Kinsa lamang ang pasudlon sa siyudad?

¹⁸ Si Juan nagpadayon: “Apan ang bisan unsa nga dili sagrado ug si bisan kinsa nga padayong nagbuhat ug dulumtanang butang ug bakak dili gayod makasulod niini; sila lamang nga nahisulat sa linukot nga basahon sa kinabuhi nga iya sa Kordero.” (Pinadayag 21:27) Walay si bisan kinsa nga namantsahan sa sistema sa mga butang ni Satanas ang mahimong bahin sa Bag-ong Jerusalem. Bisan pag permanenteng bukas ang mga ganghaan niini, ang “nagbuhat ug dulumtanang butang ug bakak” dili gayod pasudlon. Walay mga apostata nianang siyudara ni mga membro sa Dakong Babilonya. Ug kon may mosulay sa pagpasipala sa maong siyudad pinaagi sa paghugaw sa umaabot nga mga membro niini samtang ania pa sila sa yuta, ang ilang mga paningkamot mawalay kapuslanan. (Mateo 13:41-43) ‘Ang mga nahisulat lamang sa linukot nga basahon sa kinabuhi nga iya sa Kordero,’ nga 144,000, ang sa kataposan makasulod sa Bag-ong Jerusalem. b—Pinadayag 13:8; Daniel 12:3.

Ang Suba sa Tubig sa Kinabuhi

19. (a) Sa unsang paagi gihubit ni Juan ang Bag-ong Jerusalem nga nagpaagos ug mga panalangin ngadto sa katawhan? (b) Kanus-a nag-agos ang “suba sa tubig sa kinabuhi,” ug sa unsang paagi nahibalo kita niana?

¹⁹ Ang magilakong Bag-ong Jerusalem mopaagos ug talagsaong mga panalangin ngadto sa katawhan sa yuta. Mao kini ang sunod nga nahibaloan ni Juan: “Ug iyang gipakita kanako ang usa ka suba sa tubig sa kinabuhi, ingon katin-aw sa kristal, nga nagaagos gikan sa trono sa Diyos ug sa Kordero latas sa taliwala sa halapad nga dalan niini.” (Pinadayag 22:1, 2a) Kanus-a nag-agos kini nga “suba”? Sanglit kini nag-agos “gikan sa trono sa Diyos ug sa Kordero,” kini nag-agos na human mosugod ang adlaw sa Ginoo niadtong  1914. Kadto maoy sa panahon nga ang talagsaong hitabo gimantala pinaagi sa paghuyop sa ikapitong trompeta ug sa dakong pahibalo: “Ania na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo.” (Pinadayag 11:15; 12:10) Panahon sa kataposan, ang espiritu ug ang pangasaw-onon nagdapit sa mga tawong mahiligon sa pagkamatarong sa pag-inom nga walay bayad sa tubig sa kinabuhi. Ang tubig gikan niining subaa padayong mabatonan nianang matanga sa mga tawo hangtod sa kataposan niining sistema sa mga butang ug, human niana, ngadto sa bag-ong kalibotan, sa dihang ang Bag-ong Jerusalem ‘manaog gikan sa langit gikan sa Diyos.’—Pinadayag 21:2.

20. Unsay nagpaila nga ang tubig sa kinabuhi mabatonan na?

²⁰ Dili kini ang unang higayon nga ang nagahatag-kinabuhi nga tubig gitanyag ngadto sa katawhan. Sa dinhi siya sa yuta, si Jesus naghisgot mahitungod sa tubig nga naghatag ug kinabuhing walay kataposan. (Juan 4:10-14; 7:37, 38) Dugang pa, si Juan hapit nang makadungog sa mahigugmaong imbitasyon: “Ang espiritu ug ang pangasaw-onon nagpadayon sa pag-ingon: ‘Umari ka!’ Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” (Pinadayag 22:17) Kining imbitasyona ginapalanog bisan karon, nga nagpaila nga ang tubig sa kinabuhi mabatonan na. Apan sa bag-ong kalibotan, ang maong mga tubig moagos gikan sa trono sa Diyos ug latas sa Bag-ong Jerusalem nga samag tinuod nga suba.

21. Unsay gisimbolohan sa “suba sa tubig sa kinabuhi,” ug sa unsang paagi ang panan-awon ni Ezequiel bahin niining subaa makatabang kanato nga mahibalo niana?

²¹ Unsa ba kining “suba sa tubig sa kinabuhi”? Ang literal nga tubig maoy hinungdanong elemento alang sa kinabuhi. Bisan pag walay pagkaon, ang tawo mabuhig pipila ka semana, apan kon walay tubig siya mamatay sa mga usa ka semana. Ang tubig usa usab ka galamiton sa paghinlo ug hinungdanon sa kahimsog. Busa, ang tubig sa kinabuhi nagsimbolo gayod sa butang nga kinahanglanon sa kinabuhi ug kahimsog sa katawhan. Ang manalagnang si Ezequiel gipakitaan usab ug usa ka panan-awon niining “suba sa tubig sa kinabuhi,” ug sa iyang panan-awon, ang suba nag-agos gikan sa templo ug mipaingon sa Patayng Dagat. Dayon, pagkadakong milagro! Kanang walay kinabuhi, natuhop sa kemikal nga tubig nahimong tab-ang nga napuno sa mga isda! (Ezequiel 47:1-12) Oo, ang suba diha sa panan-awon nakapabuhi sa butang nga kanhi patay na, nga nagpamatuod nga ang suba sa tubig sa kinabuhi naghulagway sa tagana sa Diyos pinaagi kang Jesu-Kristo aron ang “patay” nga tawhanong banay mapasig-uli sa hingpit nga tawhanong kinabuhi. Kining subaa ‘matin-aw sama sa kristal,’ nga nagpakita sa kaputli ug kabalaan sa mga tagana sa Diyos. Dili kini sama sa namantsahan-sa-dugo, makamatay nga “mga tubig” sa Kakristiyanohan.—Pinadayag 8:10, 11.

22. (a) Diin naggikan ang suba, ug nganong haom kini? (b) Unsay nalangkit sa tubig sa kinabuhi, ug unsay nalakip niining simbolikong suba?

²² Ang suba naggikan sa “trono sa Diyos ug sa Kordero.” Haom kini, sanglit ang pasikaranan sa nagahatag-kinabuhi nga mga tagana ni Jehova mao ang halad lukat, ug kini gitagana tungod kay ‘gihigugma pag-ayo ni Jehova ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.’ (Juan 3:16) Ang tubig sa kinabuhi naglangkit usab sa Pulong sa Diyos, nga gihisgotan ingong tubig diha sa Bibliya. (Efeso 5:26) Apan, ang suba sa tubig sa kinabuhi naglakip dili lamang sa kamatuoran kondili sa tanang ubang tagana usab ni Jehova, nga gipasukad sa halad ni Jesus, aron mabawi ang masinugtanong mga tawo gikan sa sala ug kamatayon ug mahatagan sila ug kinabuhing walay kataposan.—Juan 1:29; 1 Juan 2:1, 2.

23. (a) Nganong haom nga ang suba sa tubig sa kinabuhi moagos taliwala sa halapad nga dalan sa Bag-ong Jerusalem? (b) Unsang saad sa Diyos kang Abraham ang mamatuman sa dihang ang tubig sa kinabuhi dagayang modagayday?

²³ Sulod sa Usa ka Libo ka Tuig nga Pagmando, ang mga benepisyo sa lukat ipadapat sa bug-os pinaagi sa pag-alagad ni Jesus ingong saserdote ug sa iyang 144,000 ka luyoluyong mga saserdote. Nan, haom nga ang suba sa tubig sa kinabuhi moagos taliwala sa halapad nga dalan sa Bag-ong Jerusalem. Kini gilangkoban sa espirituwal nga Israel, nga uban kang Jesus maoy naglangkob sa matuod nga binhi ni Abraham. (Galacia 3:16, 29) Busa, sa dihang ang tubig sa kinabuhi dagayang modagayday taliwala sa halapad nga dalan sa simbolikong siyudad, “ang tanang nasod sa yuta”  makabatog bug-os nga kahigayonan sa pagpanalangin sa ilang kaugalingon pinaagi sa binhi ni Abraham. Ang saad ni Jehova kang Abraham bug-os nang matuman.—Genesis 22:17, 18.

Mga Kahoy sa Kinabuhi

24. Unsay nakita karon ni Juan sa masigkadaplin sa suba sa tubig sa kinabuhi, ug unsay gihulagwayan niini?

²⁴ Sa panan-awon ni Ezequiel, ang suba mibul-og pa gani, ug nakita sa manalagna nga sa masigkadaplin niini nanubo ang tanang matang sa mamungang mga kahoy. (Ezequiel 47:12) Apan unsay nakita ni Juan? Kini: “Ug sa masigkadaplin sa suba dihay mga kahoy sa kinabuhi nga nagapatungha ug napulog-duha ka abot nga bunga, nga nagapamunga matag bulan. Ug ang mga dahon sa mga kahoy maoy tambal alang sa kanasoran.” (Pinadayag 22:2b) Kining “mga kahoy sa kinabuhi” naghulagway usab gayod sa usa ka bahin sa tagana ni Jehova nga maghatag ug kinabuhing walay kataposan sa masinugtanong katawhan.

25. Unsang dagayang tagana ang gihimo ni Jehova alang sa masanongong katawhan sa tibuok-yutang Paraiso?

²⁵ Pagkadagaya sa tagana nga gihimo ni Jehova alang sa masanongong katawhan! Sila dili lamang makainom sa makapapreskong tubig kondili sila makapupo usab ug nagkalainlaing matang sa way-hunong nga makapasustentong mga bunga nianang mga kahoya. Kon nakontento lang unta ang atong unang mga ginikanan sa susamang “tilinguhaon” nga tagana didto sa Paraiso sa Eden! (Genesis 2:9) Apan ania na karon ang tibuok-yutang Paraiso, ug si Jehova nagtagana pa ganig “tambal alang sa kanasoran” pinaagi sa mga dahon nianang simbolikong mga kahoy. c Kay mas maayo pa kay sa bisan unsang medisina, gikan man sa mga tanom o sa laing tinubdan nga gigamit karon, ang makapahupayng paggamit nianang simbolikong mga dahon mopadangat sa matinuohong katawhan ngadto sa espirituwal ug pisikal nga kahingpitan.

26. Unsay mahimong malakip sa mga kahoy sa kinabuhi, ug ngano?

²⁶ Ang maong mga kahoy, nga natubigan pag-ayo sa suba, mahimong maglakip sa 144,000 ka membro sa asawa sa Kordero. Samtang dinhi sa yuta, sila usab miinom sa tagana sa Diyos alang sa kinabuhi pinaagi ni Jesu-Kristo. Makaiikag, kining inanak-sa-espiritung mga igsoon ni Jesus matagnaong gitawag ug “dagkong kahoy sa pagkamatarong.” (Isaias 61:1-3; Pinadayag 21:6) Sila nakapatungha nag daghang espirituwal nga mga bunga alang sa kadayeganan ni Jehova. (Mateo 21:43) Ug sulod sa Usa ka Libo ka Tuig nga Pagmando, sila makigbahin sa paghatag sa mga tagana sa lukat nga magsilbing “tambal alang sa kanasoran” gikan sa sala ug kamatayon.—Itandi ang 1 Juan 1:7.

Wala Nay Gabii

27. Unsang dugang mga panalangin ang gihisgotan ni Juan alang niadtong makapribilehiyo sa pagsulod sa Bag-ong Jerusalem, ug nganong giingon nga “wala na unyay bisan unsang tunglo”?

²⁷ Seguradong wala nay mas talagsaon pang pribilehiyo kay sa pagsulod ngadto sa Bag-ong Jerusalem! Hunahunaa lamang—silang kanhi timawa, dili-hingpit nga mga tawo mosunod kang Jesus sa langit aron mahimong bahin sa maong mahimayaong kahikayan! (Juan 14:2) Si Juan naghatag ug pipila ka ideya sa mga panalangin nga ilang matagamtam, nga nag-ingon: “Ug didto wala na unyay bisan unsang tunglo. Apan ang trono sa Diyos ug sa Kordero maanaa sa siyudad, ug ang iyang mga ulipon maghatag kaniya ug sagradong pag-alagad; ug ilang makita ang iyang nawong, ug ang iyang ngalan maanaa sa ilang mga agtang.” (Pinadayag 22:3, 4) Sa dihang ang Israelinhong mga saserdote nahimong hiwi, ilang naagoman ang tunglo ni Jehova. (Malaquias 2:2) Ang walay-pagtuo nga “balay” sa Jerusalem gipahayag ni Jesus nga biniyaan. (Mateo 23:37-39) Apan sa Bag-ong Jerusalem, “wala na unyay bisan unsang tunglo.” (Itandi ang Zacarias 14:11.) Ang tanang molupyo niini nasulayan na sa kalayo sa mga pagsulay dinhi sa yuta, ug kay nakadaog na, sila ‘magsul-ob sa pagkadili-madunoton ug pagkawalay-kamatayon.’ Si Jehova nahibalo, ingon nga siya nahibalo kang Jesus, nga sila dili gayod mobulag sa pagtuo. (1 Corinto 15:53, 57) Dugang pa, “ang trono sa Diyos ug sa Kordero” atua unya didto, nga nagpalig-on sa puwesto sa siyudad hangtod sa hangtod.

28. Nganong ang ngalan sa Diyos nahisulat diha sa agtang sa mga membro sa Bag-ong Jerusalem, ug unsang makapahinam nga palaaboton ang anaa sa ilang unahan?

²⁸ Sama kang Juan mismo, ang tanang umaabot nga mga membro nianang langitnong siyudad maoy “mga ulipon” sa Diyos. Sa ingon niana, ang ngalan sa Diyos tataw nga nahisulat sa ilang agtang, nga nagpaila nga siya ang ilang Tag-iya. (Pinadayag 1:1; 3:12) Ilang isipon nga dako kaayong  pribilehiyo ang paghatag kaniya ug sagradong pag-alagad ingong bahin sa Bag-ong Jerusalem. Samtang si Jesus dinhi sa yuta, siya mihimog makapahinam nga saad ngadto sa maong umaabot nga mga magmamando, nga nag-ingon: “Malipayon ang mga putli sa kasingkasing, sanglit sila makakita sa Diyos.” (Mateo 5:8) Pagkamalipayon niining mga ulipona nga aktuwal nga makakita ug makasimba kang Jehova sa personal!

29. Nganong si Juan nag-ingon nga “wala na unyay gabii” sa langitnong Bag-ong Jerusalem?

²⁹ Si Juan nagpadayon: “Dugang pa, wala na unyay gabii, ug sila dili na magkinahanglan ug kahayag sa lampara ni magkinahanglan sila ug kahayag sa adlaw, tungod kay si Jehova nga Diyos maghatag kanila ug kahayag.” (Pinadayag 22:5a) Ang karaang Jerusalem, sama sa ubang siyudad sa yuta, nagsalig sa adlaw alang sa kahayag sa maadlaw ug sa bulan ug sa artipisyal nga kahayag sa magabii. Apan sa langitnong Bag-ong Jerusalem, ang maong kahayag dili na kinahanglanon. Si Jehova mismo ang magdan-ag sa siyudad. Ang “gabii” mahimong gamiton usab sa mahulagwayong diwa, nga nagtumong sa kalisdanan o sa pagkanahimulag kang Jehova. (Miqueas 3:6; Juan 9:4; Roma 13:11, 12) Wala gayoy ingon niana nga matang sa gabii diha sa mahimayaon, madan-agong presensiya sa labing gamhanang Diyos.

30. Sa unsang paagi gitiklopan ni Juan ang matahom kaayong panan-awon, ug unsay gipasalig kanato sa Pinadayag?

³⁰ Gitiklopan ni Juan kining matahom kaayong panan-awon pinaagi sa pag-ingon bahin niining mga ulipona sa Diyos: “Ug sila magamando ingong mga hari hangtod sa kahangtoran.” (Pinadayag 22:5b) Tinuod, pagkatapos sa usa ka libo ka tuig, ang mga benepisyo sa lukat bug-os nang napadapat, ug si Jesus magtanyag sa nahingpit nang tawhanong rasa ngadto sa iyang Amahan. (1 Corinto 15:25-28) Kon unsay anaa sa hunahuna ni Jehova alang kang Jesus ug sa 144,000 human niana, wala kita mahibalo. Apan ang Pinadayag nagpasalig kanato nga ang ilang talagsaon nga sagradong pag-alagad kang Jehova magpadayon hangtod sa hangtod.

Malipayong Sangkoanan sa Pinadayag

31. (a) Unsang sangkoanan ang gipaila sa panan-awon bahin sa Bag-ong Jerusalem? (b) Unsay himoon sa Bag-ong Jerusalem alang sa ubang matinumanong mga tawo?

³¹ Ang katumanan niining panan-awona bahin sa Bag-ong Jerusalem, nga pangasaw-onon sa Kordero, mao ang malipayong sangkoanan nga gipunting sa Pinadayag, ug haom gayod kana. Ang tanang Kristohanon nga mga kauban ni Juan sa unang siglo nga maoy unang gipunting sa maong basahon naghinamhinam sa pagsulod sa maong siyudad ingong imortal nga espiritung mga kaubang magmamando ni Jesu-Kristo. Ang nahibilin sa dinihogang mga Kristohanon nga buhi pa karon sa yuta nagbaton ug samang paglaom. Busa ang Pinadayag nagapadulong sa hingpit nga sangkoanan niini, samtang ang nakompletong pangasaw-onon mahiusa na sa Kordero. Sunod, pinaagi sa Bag-ong Jerusalem, ang mga benepisyo sa halad lukat ni Jesus ipadapat ngadto sa katawhan, mao nga sa kataposan ang tanang matinumanon makabaton ug kinabuhing walay kataposan. Niining paagiha ang pangasaw-onon, ang Bag-ong Jerusalem, ingon nga maunongong katabang sa iyang Pamanhonong Hari, makigbahin sa pagtukod ug usa ka matarong nga bag-ong yuta hangtod sa hangtod—nga ang tanan maoy alang sa kahimayaan sa atong Soberanong Ginoong Jehova.—Mateo 20:28; Juan 10:10, 16; Roma 16:27.

32, 33. Unsay atong nakat-onan gikan sa Pinadayag, ug unsay angay natong kinasingkasing nga pagsanong?

³² Nan, pagkadakong kalipay ang atong bation, samtang nagkaduol na kita sa kataposan sa atong paghisgot sa basahong Pinadayag! Atong nasabtan nga ang pangataposang mga paningkamot ni Satanas ug sa iyang binhi napakyas gayod ug ang matarong nga mga paghukom ni Jehova natuman sa bug-os. Ang Dakong Babilonya kinahanglang mahanaw hangtod sa hangtod, nga sundan sa tanang ubang daotan kaayong mga elemento sa kalibotan ni Satanas. Si Satanas mismo ug ang iyang mga demonyo itambog sa kahiladman ug sa ulahi pagalaglagon. Ang Bag-ong Jerusalem magmando uban kang Kristo gikan sa mga langit samtang himoon ang pagpamanhaw ug paghukom, ug ang nahingpit nga katawhan sa kataposan makatagamtam nag walay-kataposang kinabuhi sa Paraisong yuta. Pagkatin-aw ang paghulagway sa Pinadayag niining tanang butang! Makapalig-on gayod kini sa atong determinasyon sa ‘pagpahayag niining walay kataposang maayong balita ingong makapalipay nga balita ngadto sa matag nasod ug tribo ug pinulongan ug katawhan’ sa yuta karon! (Pinadayag 14:6, 7) Bug-os ka bang nakigbahin niining dakong buluhaton?

³³ Uban ang mapasalamaton kaayong kasingkasing, atong tagdon ang paniklop nga mga pulong sa Pinadayag.

[Mga footnote]

[Mga Pangutana sa Pagtuon]