Ang Manggugubat-Hari Makadaog sa Armagedon
Kapitulo 39
Ang Manggugubat-Hari Makadaog sa Armagedon
Panan-awon 13—Pinadayag 19:11-21
Ulohan: Si Jesus ang manguna sa kasundalohan sa langit sa paglaglag sa sistema sa mga butang ni Satanas
Panahon sa katumanan: Human malaglag ang Dakong Babilonya
1. Unsa ang Armagedon, ug unsang mga hitabo ang mosangko niini?
ARMAGEDON—usa ka makahadlok nga pulong alang sa daghan! Apan alang sa mga nahigugma sa pagkamatarong, kini mao ang adlaw nga dugay nang gipaabot sa dihang si Jehova magpatuman sa pangataposang paghukom diha sa kanasoran. Dili kini gubat sa mga tawo kondili kini ang “gubat sa dakong adlaw sa Diyos nga Labing Gamhanan”—ang adlaw nga iyang panimaslan ang mga magmamando sa yuta. (Pinadayag 16:14, 16; Ezequiel 25:17) Sa pagkalaglag sa Dakong Babilonya, nagsugod na ang dakong kasakitan. Unya, kay giaghat ni Satanas, ang sanag-pulang bulok nga mapintas nga mananap ug ang napulo ka sungay niini moatake sa katawhan ni Jehova. Ang Yawa, kay labi pang napungot kay sukad masukad sa samag-babayeng organisasyon sa Diyos, determinadong mogamit sa mga tawo nga iyang nalimbongan sa pagpakiggubat batok sa mga nahibilin sa iyang binhi hangtod sa kataposan. (Pinadayag 12:17) Kini ang kataposang higayon ni Satanas!
2. Kinsa si Gog sa Magog, ug sa unsang paagi gimaniobra siya ni Jehova aron atakehon ang Iyang katawhan?
2 Ang mabangisong pag-atake sa Yawa tin-aw nga gihubit diha sa Ezequiel kapitulo 38. Ang gipaubos nga si Satanas gitawag dinha ug “Gog sa yuta sa Magog.” Ibutang ni Jehova ang masambingayong mga taga diha sa mga apapangig ni Gog, nga bitaron siya ug ang iyang daghang puwersa militar aron moatake. Unsaon niya paghimo kini? Pinaagi sa pagpakita kang Gog nga ang Iyang mga Saksi maoy walay-panalipod nga katawhan nga “gitigom gikan sa kanasoran, usa nga nagapanigom ug bahandi ug katigayonan, kadtong mga nagpuyo sa kinapusoran sa yuta.” Sila samag anaa sa sentro sa entablado sa yuta ingon nga bugtong katawhan nga nagdumili sa pagsimba sa mapintas nga mananap ug sa larawan niini. Naaligutgot si Gog tungod sa ilang espirituwal nga kalig-on ug kauswagan. Busa si Gog ug ang iyang daghang puwersa militar, apil ang mapintas nga mananap nga may napulo ka sungay nga gikan sa dagat, modasdas aron manglaglag. Hinuon, dili sama sa Dakong Babilonya, ang hinlong katawhan sa Diyos adunay panalipod sa Diyos!—Ezequiel 38:1, 4, 11, 12, 15; Pinadayag 13:1.
3. Sa unsang paagi hiposon ni Jehova ang mga puwersang militar ni Gog?
3 Sa unsang paagi hiposon ni Jehova si Gog ug ang iyang tibuok panon? Pamati! “‘Tawgon ko ang usa ka espada batok kaniya sa akong tibuok bukirong rehiyon,’ mao ang giingon sa Soberanong Ginoong Jehova. ‘Ang espada sa matag usa modangat batok sa kaugalingon niyang igsoon.’” Apan bisan ang nukleyar o ang naandang mga armas dili mapuslan sa maong gubat, kay si Jehova nagpahayag: “Pagahukman ko siya, uban ang kamatay ug uban ang dugo; ug usa ka kusog nga bunok sa ulan ug mga ulan nga yelo, kalayo ug asupre akong ipaulan nganha kaniya ug sa iyang mga pundok ug sa daghang katawhan nga uban kaniya. Ug ako magapadako gayod sa akong kaugalingon ug magabalaan sa akong kaugalingon ug magapaila sa akong kaugalingon atubangan sa mga mata sa daghang kanasoran; ug sila makaila gayod nga ako mao si Jehova.”—Ezequiel 38:21-23; 39:11; itandi ang Josue 10:8-14; Maghuhukom 7:19-22; 2 Cronicas 20:15, 22-24; Job 38:22, 23.
Ang Usa nga Ginganlag “Matinumanon ug Matuod”
4. Sa unsang paagi gihubit ni Juan si Jesu-Kristo nga andam na sa pagpakiggubat?
4 Si Jehova magpagula ug usa ka espada. Kinsa may mogamit sa maong espada? Sa pagbasag balik sa Pinadayag, atong makita ang tubag diha sa laing makapahinam nga panan-awon. Nakita ni Juan nga ang mga langit nabuksan ug nadayag ang makalilisang kaayong butang —si Jesu-Kristo mismo nga andam na sa pagpakiggubat! Si Juan nagtug-an kanato: “Ug nakita ko ang langit nga nabuksan, ug, tan-awa! usa ka puting kabayo. Ug ang nagsakay niini gitawag nga Matinumanon ug Matuod, ug siya naghukom ug nakiggubat diha sa pagkamatarong. Ang iyang mga mata sama sa nagdilaab nga kalayo, ug sa iyang ulo dihay daghang diadema.”—Pinadayag 19:11, 12a.
5, 6. Unsay gipasabot sa (a) “puting kabayo”? (b) ngalang “Matinumanon ug Matuod”? (c) mga mata nga sama sa “nagdilaab nga kalayo”? (d) “daghang diadema”?
5 Sama sa mas unang panan-awon bahin sa upat ka magkakabayo, kining “puting kabayo” maoy haom nga simbolo sa matarong nga pagpakiggubat. (Pinadayag 6:2) Ug kinsa bay mas matarong sa mga anak sa Diyos kay niining gamhanang Manggugubat? Kay “gitawag nga Matinumanon ug Matuod,” siya mao gayod “ang matinumanon ug matuod nga saksi,” si Jesu-Kristo. (Pinadayag 3:14) Siya makiggubat aron ipatuman ang matarong nga mga paghukom ni Jehova. Busa, siya nagtuman sa iyang katungdanan ingong tinudlo ni Jehova nga Maghuhukom, ang “Diyos nga Gamhanan.” (Isaias 9:6) Ang iyang mga mata maoy makalilisang, sama sa “nagdilaab nga kalayo,” nga nagapanan-aw sa nagsingabot nga kalayonhong kalaglagan sa iyang mga kaaway.
6 Gipurongpurongan ug mga diadema ang ulo niining maong Manggugubat-Hari. Ang mapintas nga mananap nga nakita ni Juan nga migula gikan sa dagat may napulo ka diadema, nga naghulagway sa temporaryong pagmando niini sa yuta. (Pinadayag 13:1) Hinuon, si Jesus adunay “daghang diadema.” Ang iyang mahimayaong pagmando dili hitupngan, sanglit siya maoy “Hari sa mga nagmando ingong mga hari ug Ginoo sa mga nagmando ingong mga ginoo.”—1 Timoteo 6:15.
7. Unsa ang nahisulat nga ngalan nga nabatonan ni Jesus?
7 Ang paghubit ni Juan nagpadayon: “Siya adunay [nahisulat nga] ngalan nga walay usa nga nahibalo gawas sa iyang kaugalingon.” (Pinadayag 19:12b) Ang Bibliya naghisgot na sa Anak sa Diyos pinaagi sa mga ngalan sama sa Jesus, Emmanuel, ug Miguel. Apan kining wala isulting “ngalan” maorag nagsimbolo sa katungdanan ug mga pribilehiyo nga gipahimuslan ni Jesus sulod sa adlaw sa Ginoo. (Itandi ang Pinadayag 2:17.) Si Isaias, nga naghubit kang Jesus sukad sa 1914, nag-ingon: “Ang iyang ngalan pagatawgon nga Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait.” (Isaias 9:6) Gilangkit ni apostol Pablo ang ngalan ni Jesus sa Iyang tag-as kaayong mga pribilehiyo sa pag-alagad sa dihang siya misulat: “Ang Diyos nagbayaw [kang Jesus] ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan, aron nga sa ngalan ni Jesus moluhod ang tanang tuhod.”—Filipos 2:9, 10.
8. Nganong si Jesus lamang ang mahibalo sa ngalan nga nahisulat, ug kang kinsa niya ipaambit ang pipila sa iyang hamiling mga pribilehiyo?
8 Ang mga pribilehiyo ni Jesus maoy talagsaon. Gawas kang Jehova mismo, si Jesus lamang ang makasabot kon unsay kahulogan sa paghupot nianang hataas nga katungdanan. (Itandi ang Mateo 11:27.) Busa, sa tanang linalang sa Diyos, si Jesus lamang ang bug-os makapabili niining ngalana. Hinuon, gipaambit ni Jesus sa iyang pangasaw-onon ang pipila niining mga pribilehiyoa. Busa kini ang iyang gisaad: “Siya nga magmadaogon . . . isulat ko diha kaniya . . . ang akong bag-ong ngalan.”—Pinadayag 3:12.
9. Unsay gipasabot nga (a) si Jesus ‘nagsul-ob ug panggawas nga besti nga nawisikan sa dugo’? (b) si Jesus gitawag nga “Ang Pulong sa Diyos”?
9 Si Juan nagdugang: “Ug siya nagsul-ob ug panggawas nga besti nga giwisikan ug dugo, ug ginganlan siyag Ang Pulong sa Diyos.” (Pinadayag 19:13) Kang kinsang “dugo” kini? Mahimong kini mao ang dugo ni Jesus, nga giula alang sa katawhan. (Pinadayag 1:5) Apan, niining tekstoha, kini mas lagmit nagtumong sa dugo sa iyang mga kaaway nga moagas sa dihang ang mga paghukom ni Jehova ipatuman diha kanila. Makahinumdom kita sa mas unang panan-awon diin ang kaparasan sa yuta giani ug gitamaktamakan diha sa dakong pug-anan sa bino sa kasuko sa Diyos hangtod ang dugo ‘misangko sa mga busal sa mga kabayo’—nga nagpasabot sa dakong kadaogan sa Diyos batok sa iyang mga kaaway. (Pinadayag 14:18-20) Mao man usab, ang dugo nga nawisik sa panggawas nga besti ni Jesus nagpamatuod nga ang iyang kadaogan maoy di-malalis ug bug-os. (Itandi ang Isaias 63:1-6.) Si Juan naghisgot na usab karon nga si Jesus gitawag sa usa ka ngalan. Niining panahona kini maoy ilado kaayong ngalan—“Ang Pulong sa Diyos”—nga nagpaila niining Manggugubat-Hari ingong Pangulong Tigpamaba ni Jehova ug Manlalaban sa kamatuoran.—Juan 1:1; Pinadayag 1:1.
Kaubang mga Manggugubat ni Jesus
10, 11. (a) Sa unsang paagi gipakita ni Juan nga si Jesus dili mag-inusara sa pagpakiggubat? (b) Unsay gipasabot sa puti nga kolor sa mga kabayo ug nga ang mga magkakabayo nagsul-ob ug “puti, hinlo, pino nga lino”? (c) Kinsay naglangkob sa langitnong “mga panon”?
10 Si Jesus dili mag-inusara sa pagpakigbugno niining gubata. Si Juan nagtug-an kanato: “Dugang pa, ang mga panon nga didto sa langit nagsunod kaniya nga nagsakay sa puting mga kabayo, ug sila nagsul-ob ug puti, hinlo, pino nga lino.” (Pinadayag 19:14) Ang ‘puti’ nga kolor sa mga kabayo nagpasabot sa matarong nga pagpakiggubat. Ang “pino nga lino” haom alang sa mga magkakabayo sa Hari, ug ang magilakon, puting kahinlo niini nagpasabot sa putli, matarong nga baroganan atubangan ni Jehova. Nan, kinsay naglangkob niining maong “mga panon”? Walay duhaduha nga ang balaang mga manulonda nalakip kanila. Si Miguel ug ang iyang mga manulonda nagtambog kang Satanas ug sa iyang mga demonyo gikan sa langit sa sinugdang bahin sa adlaw sa Ginoo. (Pinadayag 12:7-9) Dugang pa, “ang tanang manulonda” mag-alagad kang Jesus samtang siya maglingkod sa iyang mahimayaong trono ug maghukom sa kanasoran ug sa katawhan sa yuta. (Mateo 25:31, 32) Segurado, sa mahukmanong gubat, sa dihang ipatuman ang pang-ultimang mga paghukom sa Diyos, si Jesus ubanan na usab sa iyang mga manulonda.
11 May uban pa nga nalangkit. Sa pagpadala sa iyang mensahe ngadto sa kongregasyon sa Tiatira, si Jesus misaad: “Kaniya nga magmadaogon ug magatuman sa akong mga buhat hangtod sa kataposan ihatag ko kaniya ang awtoridad ibabaw sa kanasoran, ug siya magabantay sa katawhan pinaagig olisi nga puthaw aron sila mangadugmok sama sa kulonon nga mga sudlanan, ingon sa nadawat ko gikan sa akong Amahan.” (Pinadayag 2:26, 27) Walay duhaduha nga pag-abot sa panahon, ang mga igsoon ni Kristo nga atua na sa langit aduna unyay bahin sa pagbantay sa katawhan ug sa kanasoran pinaagi nianang olisi nga puthaw.
12. (a) Ang mga alagad sa Diyos sa yuta makigbahin ba sa pagpakiggubat sa Armagedon? (b) Sa unsang paagi ang katawhan ni Jehova sa yuta malangkit sa Armagedon?
12 Apan, komosta man ang mga alagad sa Diyos dinhi sa yuta? Ang Juan nga matang dili aktibong makigbahin sa pagpakiggubat sa Armagedon; ni ang maunongong mga kaubanan niini, kadtong mga katawhang gikan sa tanang kanasoran nga nagganayan ngadto sa espirituwal nga balay ni Jehova sa pagsimba. Ang maong malinawong katawhan nagsalsal na sa mga espada nga mga punta sa daro. (Isaias 2:2-4) Bisan pa niana, sila nalangkit pag-ayo! Sumala sa atong nasayran na, ang daw walay-panalipod nga katawhan ni Jehova mao ang mapintasong atakehon ni Gog ug sa tibuok niyang panon. Kana ang timailhan aron ang Manggugubat-Hari ni Jehova, nga suportado sa mga panon sa langit, mosugod sa pagpakiggubat hangtod mangalaglag ang maong mga nasod. (Ezequiel 39:6, 7, 11; itandi ang Daniel 11:44–12:1.) Ingong mga tumatan-aw, ang katawhan sa Diyos sa yuta magmaikagon gayod. Ang Armagedon magpasabot sa ilang kaluwasan, ug sila mabuhing walay kataposan ingon nga mga saksing-nakakita sa dakong gubat alang sa kabayawan ni Jehova.
13. Nganong nahibalo kita nga ang mga Saksi ni Jehova dili supak sa tanang kagamhanan?
13 Nagkahulogan ba kini nga ang mga Saksi ni Jehova supak sa tanang kagamhanan? Wala gayod! Sila nagsunod sa tambag ni apostol Pablo: “Magpasakop ang tanang kalag sa labaw nga mga awtoridad.” Nahibalo sila nga samtang kining sistemaha karon naglungtad pa, kanang “labaw nga mga awtoridad” naglungtad tungod kay gitugotan sa Diyos aron mapatunhay ang kahusay sa tawhanong katilingban. Busa, ang mga Saksi ni Jehova mobayad sa ilang mga buhis, motuman sa mga balaod, motahod sa mga ordinansa sa trapiko, magparehistro, ug uban pa. (Roma 13:1, 6, 7) Dugang pa, sila mosunod sa mga prinsipyo sa Bibliya sa pagkamatinud-anon ug pagkadili-limbongan; sa pagpakitag gugma sa silingan; sa pagtukod ug malig-on, maayog moral nga pamilya; ug sa pagbansay sa ilang mga anak aron mahimong sulondang mga lungsoranon. Niining paagiha sila nagbayad dili lamang sa ‘mga butang ni Cesar kang Cesar, apan sa mga butang sa Diyos ngadto sa Diyos.’ (Lucas 20:25; 1 Pedro 2:13-17) Sanglit gipadayag sa Pulong sa Diyos nga temporaryo lamang ang mga gahom sa mga gobyerno niining kalibotana, ang mga Saksi ni Jehova nangandam karon alang sa mas tugob nga kinabuhi, ang tinuod nga kinabuhi, nga sa dili madugay matagamtam ubos sa pagmando sa Gingharian ni Kristo. (1 Timoteo 6:17-19) Bisan pag dili sila makigbahin sa pagpukan sa mga gahom niining kalibotana, ang mga Saksi mobatig kalisang ug kahingangha maylabot sa paghukom nga hapit nang ipatuman ni Jehova sa Armagedon sumala sa giingon sa inspiradong Pulong sa Diyos, ang Balaang Bibliya.—Isaias 26:20, 21; Hebreohanon 12:28, 29.
Ngadto sa Pangataposang Gubat!
14. Unsay gisimbolohan sa “mahait, taas nga espada” nga nagagula gikan sa baba ni Jesus?
14 Pinasukad sa unsang awtoridad nga taposon ni Jesus ang iyang pagpangdaog? Si Juan nagpahibalo kanato: “Ug gikan sa iyang baba nagagula ang usa ka mahait, taas nga espada, aron iyang itigbas sa kanasoran, ug iyang pagabantayan sila pinaagi sa olisi nga puthaw.” (Pinadayag 19:15a) Kanang “mahait, taas nga espada” naghawas sa hinatag-sa-Diyos nga awtoridad ni Jesus sa paghatag sa mga mando nga laglagon ang tanang dili mosuportar sa Gingharian sa Diyos. (Pinadayag 1:16; 2:16) Kining tin-aw nga simbolismo maoy katumbas sa mga pulong ni Isaias: “Iyang [si Jehova] gihimo ang akong baba nga sama sa usa ka mahait nga espada. Sa anino sa iyang kamot iya akong gitagoan. Ug siya inanayng naghimo kanako nga usa ka pinasinaw nga pana.” (Isaias 49:2) Si Isaias naglandong dinhi kang Jesus, kinsa nagmantala sa mga paghukom sa Diyos ug nagpatuman niana, nga samag naggamit ug dili-masipyat nga pana.
15. Niining tungora, kinsa na unyay nayagyag ug nahukman nga mahimong timailhan sa pagsugod sa unsa?
15 Niining tungora, si Jesus nakalihok na sa pagtuman sa mga pulong ni Pablo: “Unya, sa pagkatinuod, ang malinapason mapadayag, nga pagapatyon sa Ginoong Jesus pinaagi sa espiritu sa iyang baba ug pagawagtangon pinaagi sa pagpadayag sa iyang presensiya.” Oo, ang presensiya (Grego, pa·rou·siʹa) ni Jesus gipasundayag na sukad sa 1914 pinaagi sa pagyagyag ug paghukom sa tawo sa kalapasan, ang klero sa Kakristiyanohan. Ang maong presensiya tatawng mapadayag pa sa dihang ang napulo ka sungay sa sanag-pulang bulok nga mapintas nga mananap magpatuman sa maong paghukom ug maglaglag sa Kakristiyanohan, kauban sa nahibiling bahin sa Dakong Babilonya. (2 Tesalonica 2:1-3, 8) Kana mao na unya ang sinugdanan sa dakong kasakitan! Human niana, iliso ni Jesus ang iyang pagtagad sa nahibilin pang bahin sa organisasyon ni Satanas, nga uyon sa tagna: “Iyang pagahampakon ang yuta pinaagi sa olisi sa iyang baba; ug pinaagi sa espiritu sa iyang mga ngabil iyang patyon ang daotan.”—Isaias 11:4.
16. Sa unsang paagi gihubit sa Mga Salmo ug ni Jeremias ang papel sa tinudlong Manggugubat-Hari ni Jehova?
16 Ang Manggugubat-Hari, ingong tinudlo ni Jehova, magpaila sa kalainan tali sa mga makalabang-buhi ug sa mga mamatay. Si Jehova, nga matagnaong nagsulti niining maong Anak sa Diyos, nag-ingon: “Imong dugmokon sila [mga magmamando sa yuta] pinaagi sa setro nga puthaw, imong pulpogon sila ingon sa usa ka sudlanan sa magkukulon.” Ug nianang hiwing mga lider sa kagamhanan ug sa ilang mga batabata, si Jeremias nag-ingon: “Tiyabaw, kamong mga magbalantay, ug panagtuaw kamo! Ug pangligid, kamong mga halangdon sa panon, tungod kay ang mga adlaw sa pag-ihaw kaninyo ug sa pagpatibulaag kaninyo nabug-os na, ug kamo mahulog gayod sama sa usa ka maanindot nga sudlanan!” Bisan pag maayo kaayong tan-awon ang maong mga magmamando alang sa daotang kalibotan, ang usa ka paghapak sa setro nga puthaw sa Hari magdugmok kanila, nga samag magpulpog sa nindot nga sudlanan. Kini sumala gayod unya sa gitagna ni David maylabot kang Ginoong Jesus: “Ang olisi sa imong kusog ipadala ni Jehova gikan sa Zion, nga magaingon: ‘Magapangdaog ka taliwala sa imong mga kaaway.’ Si Jehova sa imong tuong kamot magadugmok sa mga hari sa adlaw sa iyang kasuko. Siya magapahamtang ug paghukom taliwala sa kanasoran; iyang ipahinabo nga molukop ang mga patayng lawas.”—Salmo 2:9, 12; 83:17, 18; 110:1, 2, 5, 6; Jeremias 25:34.
17. (a) Sa unsang paagi gihubit ni Juan ang paagi sa paglaglag sa Manggugubat-Hari? (b) Iasoy ang pipila ka tagna nga nagpakita kon unsa ka malaglagon unya ang adlaw sa kasuko sa Diyos alang sa kanasoran.
17 Kining gamhanang Manggugubat-Hari makita na usab sa sunod nga esena sa panan-awon: “Iyang tamaktamakan usab ang pug-anan sa bino sa kasuko sa kapungot sa Diyos nga Labing Gamhanan.” (Pinadayag 19:15b) Sa usa ka nag-unang panan-awon, nakita na ni Juan ang pagtamaktamak sa “pug-anan sa bino sa kasuko sa Diyos.” (Pinadayag 14:18-20) Si Isaias naghubit usab sa usa ka panglaglag nga pug-anan sa bino, ug ang ubang mga manalagna nagtug-an kon unsa ka malaglagon ang adlaw sa kasuko sa Diyos alang sa tanang kanasoran.—Isaias 24:1-6; 63:1-4; Jeremias 25:30-33; Daniel 2:44; Sofonias 3:8; Zacarias 14:3, 12, 13; Pinadayag 6:15-17.
18. Unsay gibutyag sa manalagnang si Joel maylabot sa paghukom ni Jehova sa tanang kanasoran?
18 Gilangkit sa manalagnang si Joel ang usa ka pug-anan sa bino sa pag-abot ni Jehova aron “hukman ang tanang kanasoran sa palibot.” Ug si Jehova ang mohatag sa mando, sa walay duhaduha ngadto sa Iyang kaubang Maghuhukom, si Jesus, ug sa iyang langitnong kasundalohan: “Ihagbas ninyo ang galab, kay ang alanihon hinog na. Umari kamo, kanaog, kay ang mga pug-anan sa bino napuno na. Ang pasong sa pug-anan nagaawas; kay ang ilang pagkadaotan dagaya. Mga panon sa katawhan, mga panon sa katawhan atua sa ubos nga patag sa desisyon, kay ang adlaw ni Jehova haduol na sa ubos nga patag sa desisyon. Ang adlaw ug ang bulan mongitngit, ug ang mga bituon mapagngan sa ilang kahayag. Ug gikan sa Zion si Jehova mongulob, ug gikan sa Jerusalem iyang ipatugbaw ang iyang tingog. Ug ang langit ug ang yuta mauyog gayod; apan si Jehova mahimong dalangpanan sa iyang katawhan, ug usa ka kuta alang sa mga anak sa Israel. Ug kamo makaila gayod nga ako mao si Jehova nga inyong Diyos.”—Joel 3:12-17.
19. (a) Sa unsang paagi tubagon ang pangutana sa 1 Pedro 4:17? (b) Unsang ngalana ang nahisulat sa panggawas nga besti ni Jesus, ug nganong haom kini?
19 Sa pagkatinuod, kana unya maoy usa ka adlaw sa kalaglagan alang sa dili-masinugtanong kanasoran ug katawhan apan usa ka adlaw sa kahupayan alang sa tanan nga naghimo kang Jehova ug sa iyang Manggugubat-Hari nga ilang dalangpanan! (2 Tesalonica 1:6-9) Ang paghukom nga nagsugod sa balay sa Diyos niadtong 1918 nakaabot na sa sangkoanan niini, nga magtubag sa pangutana sa 1 Pedro 4:17: “Unsa man kahay dangatan unya niadtong dili-masinugtanon sa maayong balita sa Diyos?” Ang mahimayaong Mananaog nakatapos na sa pagtamaktamak sa pug-anan sa bino, nga nagpasundayag nga siya ang Usa nga binayaw, nga mahitungod kaniya si Juan nag-ingon: “Ug diha sa iyang panggawas nga besti, bisan diha sa iyang paa, siya may ngalan nga nahisulat, Hari sa mga hari ug Ginoo sa mga ginoo.” (Pinadayag 19:16) Napamatud-an na nga siya mas gamhanan gayod kaayo kay ni bisan kinsang magmamando sa yuta, ni bisan kinsang tawhanong hari o ginoo. Kinalabwan gayod ang iyang dignidad ug katahom. Siya nagdasdas “sa kawsa sa kamatuoran ug sa pagkamapainubsanon ug sa pagkamatarong” ug nagmadaogon sa bug-os! (Salmo 45:4) Diha sa iyang nawisikan-ug-dugo nga mga besti nahisulat ang ngalan nga gihatag kaniya sa Soberanong Ginoong Jehova, isip Iyang Tigbayaw!
Ang Dakong Panihapon sa Diyos
20. Sa unsang paagi gihubit ni Juan ang “dakong panihapon sa Diyos,” nga magpahinumdom sa unsang nauna, apan susamang tagna?
20 Sa panan-awon ni Ezequiel, human malaglag ang panon ni Gog, ang mga langgam ug ang ihalas nga mga mananap gidapit sa usa ka kombira! Ilang hinloan ang palibot sa yuta pinaagi sa pagkaon sa patayng lawas sa mga kaaway ni Jehova. (Ezequiel 39:11, 17-20) Ang sunod nga mga pulong ni Juan tin-awng magpahinumdom sa naunang tagna: “Nakita ko usab ang usa ka manulonda nga nagtindog diha sa adlaw, ug sa makusog nga tingog siya misinggit ug miingon sa tanang langgam nga nanaglupad sa kinatung-an sa langit: ‘Umari kamo, tambong kamo sa dakong panihapon sa Diyos, aron inyong kan-on ang unod sa mga hari ug ang unod sa mga komandante militar ug ang unod sa mga tawong kusgan ug ang unod sa mga kabayo ug sa nanagsakay niini, ug ang unod sa tanan, sa mga tawong gawasnon maingon man usab sa mga ulipon ug sa mga gagmay ug dagko.’”—Pinadayag 19:17, 18.
21. Unsay gipasabot (a) nga ang usa ka manulonda “nagtindog diha sa adlaw”? (b) nga ang mga patay pasagdang nagbuy-od sa ibabaw sa yuta? (c) sa talaan sa mga tawo kansang patayng lawas pasagdang nagbuy-od sa ibabaw sa yuta? (d) sa mga pulong nga “dakong panihapon sa Diyos”?
21 Ang manulonda “nagtindog diha sa adlaw,” nga maayong puwesto aron madani ang pagtagad sa kalanggaman. Siya nag-agda kanila nga maandam nga mabusog sa unod niadtong hapit nang patyon sa Manggugubat-Hari ug sa iyang langitnong kasundalohan. Kay ang mga patay pasagdan man nga nagbuy-od sa ibabaw sa yuta, kini nagpasabot nga sila mamatay nga maulawan sa publiko. Sama kang Jezebel sa karaang panahon, dili sila makabaton ug dungganong paglubong. (2 Hari 9:36, 37) Ang talaan sa mga tawo kansang patayng lawas pasagdang nagbuy-od didto magpadayag sa gidak-on sa kalaglagan: mga hari, mga komandante militar, kusgang mga tawo, gawasnong mga tawo, ug mga ulipon. Walay makalingkawas. Wagtangon na ang tanang ilhanan sa rebelyosong kalibotan nga nagsupak kang Jehova. Pagkatapos niini, wala nay samag-magubtanong dagat sa nalibog nga katawhan. (Pinadayag 21:1) Kini mao ang “dakong panihapon sa Diyos,” sanglit si Jehova mao ang nagdapit sa mga langgam sa pagkaon niini.
22. Sa unsang paagi gisumaryo ni Juan ang mga hitabo sa pangataposang gubat?
22 Gisumaryo ni Juan ang mga hitabo sa pangataposang gubat: “Ug nakita ko ang mapintas nga mananap ug ang mga hari sa yuta ug ang ilang kasundalohan nga nagkatigom aron makiggubat sa usa nga nagsakay sa kabayo ug uban sa iyang kasundalohan. Ug nadakpan ang mapintas nga mananap, ug uban kaniya ang mini nga manalagna nga naghimo diha sa iyang atubangan sa mga ilhanan nga pinaagi niini gipahisalaag niya ang nanagpakadawat sa marka sa mapintas nga mananap ug ang nanagsimba sa larawan niini. Samtang buhi pa, silang duha gitambog ngadto sa linaw nga kalayo nga nagdilaab sa asupre. Apan ang mga nahibilin gipamatay pinaagi sa taas nga espada sa nagsakay sa kabayo, nga ang maong espada migula gikan sa iyang baba. Ug ang tanang langgam nangabusog sa ilang unod.”—Pinadayag 19:19-21.
23. (a) Sa unsang diwa ang “gubat sa dakong adlaw sa Diyos nga Labing Gamhanan” bugnoon panahon sa “Armagedon”? (b) Unsang pasidaan ang wala patalinghogi sa “mga hari sa yuta,” ug unsay sangpotanan?
23 Human sa pagbubo sa ikaunom nga panaksan sa kapungot ni Jehova, gitaho ni Juan nga “ang mga hari sa yuta ug sa tibuok kalibotan” gitigom pinaagi sa demonyohanong propaganda ngadto sa “gubat sa dakong adlaw sa Diyos nga Labing Gamhanan.” Kini bugnoon sa Armagedon—dili literal nga dapit, kondili ang tibuok-yutang kahimtang nga kinahanglang laglagon na ni Jehova. (Pinadayag 16:12, 14, 16, King James Version) Nakita karon ni Juan ang mga lumbay sa mga manggugubat. Didto, naglumbay batok sa Diyos ang tanang “mga hari sa yuta ug ang ilang kasundalohan.” Sila midumili gayod sa pagpasakop sa ilang kaugalingon sa Hari ni Jehova. Siya naghatag kanilag makataronganong pasidaan diha sa inspiradong mensahe: “Hagki ninyo ang anak, aron dili Siya [si Jehova] masuko ug dili kamo mangahanaw gikan sa dalan.” Kay sila wala magpasakop sa pagmando ni Kristo, sila mamatay gayod.—Salmo 2:12.
24. (a) Unsang paghukom ang ipatuman diha sa mapintas nga mananap ug sa mini nga manalagna ug sa unsang diwa nga sila “buhi pa”? (b) Nganong kinahanglang masambingayon ang “linaw nga kalayo”?
24 Ang pitog-ulo, napulog-sungay nga mapintas nga mananap nga migula sa dagat, nga naghawas sa politikanhong organisasyon ni Satanas, pagawagtangon apil ang mini nga manalagna, nga ikapitong gahom sa kalibotan. (Pinadayag 13:1, 11-13; 16:13) Samtang “buhi” pa, o samtang naglihok pa sa ilang nahiusang pagsupak sa katawhan sa Diyos sa yuta, sila gitambog ngadto sa “linaw nga kalayo.” Kini ba literal nga linaw nga kalayo? Dili, sama ra nga ang mapintas nga mananap ug ang mini nga manalagna dili literal nga mga mananap. Hinunoa, kini maoy simbolo sa kompleto, pangataposang kalaglagan, nga wala nay kapasig-ulian. Dinhi itambog sa ulahi ang kamatayon ug ang Hades ug ang Yawa mismo. (Pinadayag 20:10, 14) Tino nga dili kini impiyerno sa walay kataposang pagsakit alang sa mga daotan, sanglit ang ideya mismo bahin sa maong dapit dulumtanan kang Jehova.—Jeremias 19:5; 32:35; 1 Juan 4:8, 16.
25. (a) Kinsa kadtong ‘patyon pinaagi sa taas nga espada sa usa nga nagsakay sa kabayo’? (b) Dahomon ba nato nga pagabanhawon kadtong “gipamatay”?
25 Ang uban pa nga dili direktang bahin sa kagamhanan apan maoy dili na matul-id nga bahin niining hiwi nga kalibotan ‘patyon [usab] pinaagi sa taas nga espada sa usa nga nagsakay sa kabayo.’ Ipahayag ni Jesus nga sila takos sa kamatayon. Sanglit sa ilang kahimtang wala man hisgoti ang linaw nga kalayo, dahomon ba nato nga sila banhawon? Walay gisulti kanato nga pagabanhawon kadtong pagapatyon sa Maghuhukom ni Jehova nianang panahona. Sama sa giingon ni Jesus mismo, ang tanan nga dili “karnero” moadto sa “kalayo nga walay kataposan nga giandam alang sa Yawa ug sa iyang mga manulonda,” nga mao, “ngadto sa walay kataposang kalaglagan.” (Mateo 25:33, 41, 46) Kini ang sangkoanan sa “adlaw sa paghukom ug sa kalaglagan sa mga tawong dili-diyosnon.”—2 Pedro 3:7; Nahum 1:2, 7-9; Malaquias 4:1.
26. Ipahayag sa mubo ang sangpotanan sa Armagedon.
26 Niining paagiha matapos ang tibuok yutan-ong organisasyon ni Satanas. Ang “unang langit” sa politikanhong pagmando nahanaw na. Ang “yuta,” ang daw permanenteng sistema nga gitukod ni Satanas latas sa kasiglohan, niining tungora bug-os nang nalaglag. Ang “dagat,” ang masa sa daotang katawhan nga supak kang Jehova, nawagtang na. (Pinadayag 21:1; 2 Pedro 3:10) Apan, unsay gitagana ni Jehova alang kang Satanas mismo? Si Juan nagpadayon sa pagtug-an kanato.
[Mga Pangutana sa Pagtuon]
