Kapitulo 7

Halinga Pag-usab ang Unang Gugma!

EFESO

1. Sa unsang kongregasyon gipadala ang unang mensahe ni Jesus, ug unsay iyang gipahinumdom sa mga magtatan-aw?

 ANG unang mensahe ni Jesus maoy alang sa kongregasyon sa Efeso, nga niadtong panahona usa ka mauswagong siyudad sa baybayon sa Asia Minor duol sa pulo sa Patmos. Siya nagsugo kang Juan: “Ngadto sa manulonda sa kongregasyon sa Efeso isulat kini: Mao kini ang mga butang nga ginaingon sa nagkupot sa pito ka bituon diha sa iyang tuong kamot, ang nagalakaw taliwala sa pito ka tangkawan nga bulawan.” (Pinadayag 2:1) Sama sa ubang unom ka mensahe, gihatagan ug pagtagad ni Jesus dinhi ang usa ka butang nga nagpaila sa iyang awtoridad. Iyang gipahinumdoman ang mga magtatan-aw sa Efeso nga ang tanang ansiyano nailalom sa iyang mapanalipdanong pagdumala ug nga siya nagsusi sa tanang kongregasyon. Hangtod sa atong panahon, siya nagpadayon sa pagpasundayag niining mahigugmaong pagkaulo, nga nagbantay sa mga ansiyano ug malulotong nag-atiman sa tanang membro sa kongregasyon. Matag karon ug unya, iyang ginabag-o ang mga kahikayan sa kongregasyon aron ang kahayag mas modan-ag pa. Oo, si Jesus mao ang Pangulong Magbalantay sa panon sa Diyos.—Mateo 11:28-30; 1 Pedro 5:2-4.

2. (a) Tungod sa unsang maayong mga butang nga gikomendahan ni Jesus ang kongregasyon sa Efeso? (b) Unsang tambag ni apostol Pablo ang dayag nga gisunod sa mga ansiyano sa Efeso?

² Dayon gisugdan ni Jesus ang iyang mensahe pinaagig mainitong mga pulong sa komendasyon, nga iyang gihimo sa tanan gawas sa duha sa iyang pito ka mensahe. Alang sa mga taga-Efeso, kini ang iyang mensahe: “Nahibalo ako sa imong mga buhat, ug sa imong kahago ug paglahutay, ug nga ikaw dili makaagwanta sa daotang mga tawo, ug nga gibutang mo sa pagsulay ang nanag-ingon nga sila mga apostoles, apan dili diay, ug nakaplagan mo nga sila mga bakakon. Nagapakita ka usab ug paglahutay, ug nag-antos ka tungod sa akong ngalan ug wala maluya.” (Pinadayag 2:2, 3) Sa mga tuig una pa niini, gipasidan-an ni apostol Pablo ang mga ansiyano sa Efeso bahin sa “malupigong mga lobo,” mga apostata nga nagsamok-samok sa panon, ug gisultihan ang maong mga ansiyano sa ‘pagtukaw,’ nga magsunod sa iya mismong panig-ingnan sa pagkamakugihon. (Buhat 20:29, 31) Sanglit niining higayona gikomendahan man sila ni Jesus tungod sa ilang paghago ug paglahutay ug tungod kay sila wala man maluya, dayag nga ilang gipadapat ang maong tambag.

3. (a) Sa unsang paagi ang “mini nga mga apostoles” nagtinguha sa paglimbong sa mga matinumanon sa atong panahon? (b) Unsang pasidaan mahitungod sa mga apostata ang gihatag ni Pedro?

³ Sa adlaw sa Ginoo mitungha usab ang “mini nga mga apostoles” nga ‘nagsultig tinuis nga mga butang aron ipahilayo ang mga tinun-an ngadto kanila.’ (2 Corinto 11:13; Buhat 20:30; Pinadayag 1:10) Matod nila, adunay makitang maayo diha sa tanang nagkasumpaki nga mga sekta sa relihiyon, nga ang Diyos walay organisasyon, ug dili tinuod nga si Jesus nakadawat ug gahom sa Gingharian niadtong 1914. Ilang gituman ang tagna sa 2 Pedro 3:3, 4: “Sa kataposang mga adlaw adunay mangabot nga mga mabiaybiayon uban sa ilang mga pagbiaybiay, nga magpahiuyon sa ilang kaugalingong mga tinguha ug magaingon: ‘Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.’”

4. (a) Sa unsang paagi ang garbo ug pagkarebelyoso niining mga mabiaybiayon nadayag? (b) Sa pagpakita nga sila sama sa mga taga-Efeso, unsay gibuhat sa mga Kristohanon karon batok sa bakakong mga magsusupak?

⁴ Kining mga mabiaybiayon misupak sa ideya nga kinahanglang ilang ipahayag sa dayag ang  ilang pagtuo. (Roma 10:10) Ilang gihangyo ang pagpaluyo sa klero sa Kakristiyanohan ug ang tabang sa mga mantalaan ug mga estasyon sa TV sa pagsabwag ug bakak nga mga taho mahitungod sa ilang kanhing mga kauban. Wala madugay nakita sa mga matinumanon nga ang sinultihan ug paggawi sa maong mga limbongan dili matinud-anon. Sama sa mga taga-Efeso, ang mga Kristohanon karon “dili makaagwanta sa daotang mga tawo,” busa ilang gipalagpot kining mga tawhana gikan sa ilang mga kongregasyon. a

5. (a) Unsay giingon ni Jesus nga kahuyangan sa mga taga-Efeso? (b) Unsang mga pulong ang angay untang nahinumdoman sa mga taga-Efeso?

⁵ Apan niining tungora, sama sa iyang gibuhat ngadto sa lima sa pito ka kongregasyon, si Jesus naghisgot ug usa ka seryosong problema. Siya nag-ingon sa mga taga-Efeso: “Bisan pa, ako adunay ikasulti batok kanimo, nga imong gibiyaan ang gugma nga imong nabatonan sa sinugdan.” (Pinadayag 2:4) Dili unta kini angayng mahitabo kanila, kay gisulatan sila ni Pablo 35 ka tuig una pa niana nga naghisgot bahin sa ‘dakong gugma [sa Diyos] alang kanato,’ ug siya nag-awhag kanila: “Mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma, ingon nga si Kristo nahigugma usab kaninyo.” (Efeso 2:4; 5:1, 2) Dugang pa, angay untang nasilsil pag-ayo sa ilang mga kasingkasing ang mga pulong ni Jesus: “Si Jehova nga atong Diyos maoy usa ka Jehova, ug higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:29-31) Ang unang gugma sa mga taga-Efeso nawala.

6. (a) Bisan kon kita dugay na o bag-o pa nga nakig-uban sa kongregasyon, batok sa unsang kapeligrohan ug mga hilig nga kita kinahanglang magbantay? (b) Ang atong gugma sa Diyos angayng magpalihok kanato sa pagbuhat sa unsa?

⁶ Bisan kon kita dugay na o bag-o pa nga nakig-uban sa kongregasyon, kinahanglang magbantay kita nga dili mawala ang atong unang gugma kang Jehova. Sa unsang paagi kini mawala? Basin tugotan nato ang pagmahal sa atong sekular nga trabaho, ang tinguha nga makasapig dako, o ang pagpangagpas sa kalingawan nga mahimong hinungdanon kaayo sa atong kinabuhi. Sa ingon kita mahimong mahunahunaon sa unod inay kay mahunahunaon sa espirituwal nga mga butang. (Roma 8:5-8; 1 Timoteo 4:8; 6:9, 10) Ang atong gugma kang Jehova angayng magpalihok kanato sa pagtul-id sa bisan hain nianang maong mga hilig ug sa ‘pagpadayon sa pagpangita pag-una sa gingharian sa Diyos ug sa iyang pagkamatarong,’ aron ‘magtigom alang sa atong kaugalingon ug mga bahandi sa langit.’—Mateo 6:19-21, 31-33.

7. (a) Unsay angayng magpalihok kanato sa atong pag-alagad kang Jehova? (b) Unsay giingon ni Juan mahitungod sa gugma?

⁷ Hinaot ang atong lawom nga gugma kang Jehova maoy kanunayng magpalihok kanato sa pag-alagad kaniya. Kita kinahanglang dunay kinasingkasing nga apresasyon alang sa tanan nga  nahimo ni Jehova ug ni Kristo alang kanato. Sama sa gisulat ni Juan sa ulahi: “Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.” Si Juan nagpadayon sa pagsulti kanato: “Ang Diyos gugma, ug siya nga nagpabilin sa gugma nagpabiling nahiusa sa Diyos ug ang Diyos nagpabiling nahiusa kaniya.” Hinaot nga dili gayod nato tugotan nga maawop ang atong gugma kang Jehova, kang Ginoong Jesu-Kristo, ug sa buhing Pulong sa Diyos! Kining gugmaha atong ikapahayag dili lamang pinaagi sa madasigong pag-alagad sa Diyos kondili pinaagi usab sa pagsugot ‘niini nga sugo nga atong nabatonan gikan kaniya, nga ang nahigugma sa Diyos kinahanglan usab nga mahigugma sa iyang igsoon.’—1 Juan 4:10, 16, 21; Hebreohanon 4:12; tan-awa usab ang 1 Pedro 4:8; Colosas 3:10-14; Efeso 4:15.

“Buhata ang mga Buhat Kaniadto”

8. Unsay giingon ni Jesus nga angayng buhaton sa mga taga-Efeso?

⁸ Kinahanglang halingon pag-usab sa mga taga-Efeso ang gugma nga ilang nabatonan kanhi kon sila dili buot nga mawad-an sa ilang pribilehiyo. “Busa,” si Jesus nag-ingon kanila, “hinumdomi kon gikan sa unsa ka nahulog, ug paghinulsol ug buhata ang mga buhat kaniadto. Kay kon dili man, ako moanha kanimo, ug akong kuhaon ang imong tangkawan gikan sa nahimutangan niini, gawas kon ikaw maghinulsol.” (Pinadayag 2:5) Unsay reaksiyon sa mga Kristohanon sa kongregasyon sa Efeso nianang mga pulonga? Wala kita mahibalo. Hinaot nga sila naghinulsol ug nagmalamposon sa pagpainit pag-usab sa ilang gugma kang Jehova. Kon wala, nan ang ilang lampara palongon ug ang ilang tangkawan kuhaon. Mawad-an sila sa ilang pribilehiyo sa pagpadan-ag sa kamatuoran.

9. (a) Unsa ang makapadasig nga mga pulong ni Jesus alang sa mga taga-Efeso? (b) Sa unsang paagi ang mga kongregasyon tapos sa adlaw ni Juan wala magpatalinghog sa tambag ni Jesus sa mga taga-Efeso?

⁹ Bisan pa niana, mao kini ang makapadasig nga mga pulong ni Jesus alang sa mga taga-Efeso: “Hinuon, nabatonan mo kini, nga imong gidumtan ang mga buhat sa sekta ni Nicolas, nga gidumtan ko usab.” (Pinadayag 2:6) Bisan pa sa ilang kakulangan, sila nagdumot sa sektaryanismo o pagbahinbahin, maingon nga si Ginoong Jesu-Kristo nagdumot niini. Apan, paglabay sa katuigan, daghang kongregasyon ang wala magpatalinghog sa mga pulong ni Jesus. Kay wala kaayoy gugma kang Jehova, sa kamatuoran, ug sa usag usa, sila naanod ngadto sa espirituwal nga kangitngit. Sila nabahinbahin sa daghang nag-awayay nga mga sekta. Ang “Kristohanong” mga magkokopya nga walay gugma kang Jehova nagtangtang sa mismong ngalan sa Diyos gikan sa Gregong mga manuskrito sa Bibliya. Tungod kay walay gugma, sila nagtudlo usab ug Babilonyanhon ug Gresyanhon nga mga doktrina sa ngalan sa Kristiyanidad, sama sa kalayonhong impiyerno, purgatoryo, ug Trinidad. Kay walay gugma sa Diyos ug sa kamatuoran, kadaghanan niadtong nag-angkong Kristohanon mihunong na sa pagwali sa maayong balita sa Gingharian sa Diyos. Sa ulahi, sila gigamhan sa usa ka hakog nga klerong matang nga nagtukod ug kaugalingong gingharian niini dinhi sa yuta.—Itandi ang 1 Corinto 4:8.

10. Unsay kahimtang sa mga relihiyon sa Kakristiyanohan niadtong 1918?

¹⁰ Sa dihang nagsugod ang paghukom sa balay sa Diyos niadtong 1918, ang panatikong klero sa Kakristiyanohan dayag nga nagpaluyo sa Gubat sa Kalibotan I, nga nag-awhag sa mga Katoliko ug mga Protestante sa magkaaway nga mga nasod sa pagpatay sa usag usa. (1 Pedro 4:17) Dili sama sa kongregasyon sa Efeso nga nagdumot sa gibuhat sa sekta ni Nicolas, ang mga relihiyon sa Kakristiyanohan dugay nang napuno sa nagkasumpaki, batok-Diyos nga mga doktrina, ug ang klero niini nakig-anib sa kalibotan, nga matod ni Jesus ang iyang mga tinun-an kinahanglang dili bahin niana. (Juan 15:17-19) Kay walay alamag bahin sa tema sa Bibliya nga mao ang Gingharian sa Diyos, ang ilang mga kongregasyon wala magsilbing mga tangkawan nga nagpadan-ag ug Kasulatanhong kamatuoran, ug ang ilang mga membro dili usab bahin sa espirituwal nga templo ni Jehova. Ang mga lalaki (ug mga babaye) nga nanguna kanila nadayag nga dili mga bituon kondili mga membro sa simbolikong “tawo sa kalapasan.”—2 Tesalonica 2:3; Malaquias 3:1-3.

11. (a) Unsang Kristohanong grupo niadtong 1918 ang nagpadapat sa mga pulong ni Jesus ngadto sa mga taga-Efeso? (b) Unsay gibuhat sa Juan nga matang sukad niadtong 1919?

¹¹ Hinunoa, ang Juan nga matang nakalabang sa magubot nga mga adlaw sa unang gubat sa kalibotan nga nagpasundayag ug gugma kang Jehova ug sa kamatuoran nga maoy nagtukmod kanila sa pag-alagad kaniya uban ang nagdilaab nga  kadasig. Gisanta nila kadtong misulay sa pagpasulod ug sekta pinaagi sa halos pagsimba sa unang presidente sa Watch Tower Society, nga si Charles T. Russell, sa dihang namatay siya niadtong 1916. Kay nadisiplina tungod sa mga paglutos ug kalisdanan, kining Kristohanong grupo klarong gihukman nga ‘maayo’ sa ilang Agalon ug gidapit sa pag-ambit sa iyang kalipay. (Mateo 25:21, 23) Nakita nila diha sa mga panghitabo sa kalibotan, ug sa ilang kaugalingong kasinatian, ang katumanan sa ilhanan nga gihatag ni Jesus ingong timaan sa iyang dili-makitang presensiya ingong Hari sa Gingharian. Sukad sa 1919, sila nagpadayon sa pagpakigbahin diha sa dugang katumanan sa dakong tagna ni Jesus: “Ug kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 6:9, 10; 24:3-14) Kon sa pipila ka paagi naawop ang ilang gugma kang Jehova, kini gipadilaab sukad nianang panahona.

12. (a) Sa makasaysayanhong kombensiyon niadtong 1922, unsang sugo ang gipalanog? (b) Unsang ngalan ang gisagop sa matuod nga mga Kristohanon niadtong 1931, ug unsay ilang gihinulsolan?

¹² Sa makasaysayanhong kombensiyon nga gitambongan sa 18,000 niining maong mga Kristohanon sa Cedar Point, Ohio, U.S.A., niadtong Septiyembre 5-13, 1922, dihay sugo nga gipalanog: “Balik sa kanataran, Oh kamong mga anak sa labing hataas nga Diyos! . . . Kinahanglang mahibaloan sa kalibotan nga si Jehova mao ang Diyos ug nga si Jesu-Kristo mao ang Hari sa mga hari ug Ginoo sa mga ginoo. . . . Busa imantala, imantala, imantala, ang Hari ug ang iyang gingharian.” Ang hamili nga ngalan ni Jehova gipaila pa ug dugang. Niadtong 1931 kining maong mga Kristohanon, nga nagtigom sa kombensiyon sa Columbus, Ohio, U.S.A., nalipay sa pagsagop ug pagbaton sa ngalan nga gipaila sa Diyos sa tagna ni Isaias—mga Saksi ni Jehova. (Isaias 43:10, 12) Sa gula niini sa Marso 1, 1939, ang ngalan sa pangunang magasin sa organisasyon giilisdan ug Ang Bantayanang Torre Nagapahayag sa Gingharian ni Jehova, sa ingon naghatag sa pangunang kadungganan ngadto sa atong Maglalalang ug sa iyang harianong kagamhanan. Tungod kay nahaling pag-usab ang gugma kang Jehova, ang mga Saksi ni Jehova naghinulsol sa tanang kapakyasan nila kanhi sa pagpasidungog ug pagbayaw sa iyang mahimayaong ngalan ug Gingharian.—Salmo 106:6, 47, 48.

“Kaniya nga Magmadaogon”

13. (a) Unsang panalangin ang naghulat sa mga taga-Efeso kon sila “magmadaogon”? (b) Sa unsang paagi “magmadaogon” ang mga Kristohanon sa Efeso?

¹³ Sa kataposan, sama sa iyang gihimo usab diha sa iyang ubang mga mensahe, si Jesus naghisgot bahin sa espiritu sa Diyos nga maoy nagpahibalo pinaagi kang Jesus sa mga ganti sa pagkamatinumanon. Ngadto sa mga taga-Efeso siya nag-ingon: “Ang adunay igdulungog magpatalinghog sa ginaingon sa espiritu ngadto sa mga kongregasyon: Kaniya nga magmadaogon itugot ko ang pagkaon sa kahoy sa kinabuhi, nga anaa sa paraiso sa Diyos.” (Pinadayag 2:7) Ang dunay mga igdulungog nga andam sa pagpatalinghog maikag sa pagpamati niining hinungdanong mensahe, kay sila nahibalo nga kini wala isulti sa pagbuot lamang ni Jesus kondili kini naggikan mismo sa Soberanong Ginoong Jehova pinaagi sa Iyang balaang espiritu, o aktibong puwersa. Sa unsang paagi sila “magmadaogon”? Pinaagi sa pagsunod sa mga lakang ni Jesus, kinsa naghupot sa integridad hangtod sa kamatayon ug busa makaingon: “Magmaisogon! Gidaog ko na ang kalibotan.” —Juan 8:28; 16:33; tan-awa usab ang 1 Juan 5:4.

14. Unsay gipasabot sa “paraiso sa Diyos” nga gihisgotan ni Jesus?

¹⁴ Sanglit sila walay paglaom nga mabuhi sa usa ka yutan-ong paraiso, sa unsang paagi ang dinihogang mga Kristohanon, sama sa mga taga-Efeso, gantihan sa pagkaon “sa kahoy sa kinabuhi, nga anaa sa paraiso sa Diyos”? Kini dili mahimong sa ipasig-uli nga Paraiso sa yuta, sanglit ang 144,000 nga dinihogang mga Kristohanon, lakip na kadtong sa kongregasyon sa Efeso, gipalit man gikan sa katawhan aron sa pagmando uban sa Kordero, si Kristo Jesus, diha sa langitnong Bukid sa Zion ingon nga espirituhanong mga anak. (Efeso 1:5-12; Pinadayag 14:1, 4) Busa, ang gipasabot dinhi mao gayod ang langitnong samag-tanaman nga dapit nga panundon niining maong mga mananaog. Didto, “sa paraiso sa Diyos,” oo, sa mismong presensiya ni Jehova, kining mga mananaog nga gihatagan ug imortalidad magapadayon sa pagkinabuhi sa walay kataposan, nga maoy gisimbolohan dinhi sa ilang pagkaon sa kahoy sa kinabuhi.

15. Nganong interesado gayod ang dakong panon karon sa pagdasig ni Jesus nga magmadaogon?

¹⁵ Nan, komosta na man ang maunongon nga yutan-ong mga tigpaluyo sa 144,000 nga mga dinihogan? Usa ka dakong panon niining mga isigka-Saksi ang nagmadaogon usab. Apan ang ilang paglaom mao ang pagsulod ngadto sa usa ka yutan-ong paraiso, diin sila moinom gikan sa “usa ka suba sa tubig sa kinabuhi” ug matambalan sa “mga dahon sa mga kahoy” nga gitanom sa kadaplinan nianang subaa. (Pinadayag 7:4, 9, 17; 22:1, 2) Kon usa ka niining grupoha, hinaot nga magpahayag ka usab sa imong mainitong gugma alang kang Jehova ug magmadaogon sa pagtuo. Sa ingon imong mabatonan ang kalipay nga mabuhing walay kataposan sa Paraisong yuta.—Itandi ang 1 Juan 2:13, 14.

[Footnote]

[Mga Pangutana sa Pagtuon]

[Kahon sa panid 36]

Mahigugmaong Pagdayeg Kang Jehova ug sa Iyang Anak

Sa alawiton nga gikomposo sa katawhan ni Jehova niadtong 1905, doble ang gidaghanon sa mga awit nga nagdayeg kang Jesus kay sa mga awit nga nagdayeg kang Jehova nga Diyos. Sa ilang 1928 nga libro sa alawiton, ang gidaghanon sa mga awit nga nagdayeg kang Jesus halos susamag gidaghanon sa mga awit nga nagdayeg kang Jehova. Apan sa kinaulahiang libro sa alawiton sa 1984, si Jehova gipasidunggan ug upat ka pilo sa gidaghanon sa mga awit kay sa kang Jesus. Nahiuyon kini sa mga pulong mismo ni Jesus: “Ang Amahan labaw pa kay kanako.” (Juan 14:28) Ang gugma kang Jehova kinahanglang molabaw sa tanan, nga inubanan sa halalom nga gugma alang kang Jesus ug apresasyon alang sa iyang bililhong sakripisyo ug katungdanan ingong tinudlo-sa-Diyos nga Hataas nga Saserdote ug Hari.

[Chart sa panid 34]

Sumbanan sa Tambag ni Jesus

(nagsitar sa mga kapitulo ug mga bersikulo sa Pinadayag)

Mensahe Awtoridad Pasiuna Problema Pagtul-id Resulta

alang sa sa pagha- nga klarong ug/o nga mga

kongre- tag ug komen- gipaila pagdasig panalangin

gasyon tambag dasyon

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pergamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sardis 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodicea 3:14 — 3:15-17 3:18-20 3:21