Kapitulo 15

“Kinsa ba ang Takos nga Mobukas sa Linukot nga Basahon?”

1. Unsay nakita ni Juan niining tungora sa iyang panan-awon?

 PAGKANINDOT! MAKAPAHINGANGHA! Kana ang makaiikag nga panan-awon sa trono ni Jehova taliwala sa mga lampara sa kalayo, mga kerubin, 24 ka ansiyano, ug sa dagat nga bildo. Apan Juan, unsay sunod nimong nakita? Gihatagag pagtagad ni Juan ang sentro mismo niining langitnong talan-awon, nga nagsugilon kanato: “Ug nakita ko diha sa tuong kamot sa Usa nga naglingkod sa trono ang usa ka linukot nga basahon nga gisulatan sa sulod ug sa likod nga bahin, nga hugot nga gitimbrehan sa pito ka timbre. Ug nakita ko ang usa ka kusgan nga manulonda nga nagamantala sa makusog nga tingog: ‘Kinsa ba ang takos nga mobukas sa linukot nga basahon ug motangtang sa mga timbre niini?’ Apan wala gayoy usa sa langit ni sa yuta ni sa ilalom sa yuta ang makahimo sa pagbukas sa linukot nga basahon o sa pagtan-aw sa sulod niini. Ug ako mihilak pag-ayo tungod kay walay nakaplagan nga takos sa pagbukas sa linukot nga basahon o sa pagtan-aw sa sulod niini.”—Pinadayag 5:1-4.

2, 3. (a) Nganong naikag si Juan nga makaplagan ang usa nga arang makabukas sa linukot nga basahon, apan may nakaplagan bang takos? (b) Unsay maikagong gipaabot sa dinihogang katawhan sa Diyos sa atong panahon?

² Si Jehova mismo, ang Soberanong Ginoo sa tanang linalang, mao ang nagtunol nianang linukot nga basahon. Lagmit kini puno sa hinungdanong  impormasyon, kay kini gisulatan sa sulod ug sa likod. Napukaw ang atong interes. Unsa kahay nasulat diha sa linukot nga basahon? Atong mahinumdoman ang pagdapit ni Jehova kang Juan: “Saka ngari, ug akong ipakita kanimo ang mga butang nga kinahanglang mahitabo.” (Pinadayag 4:1) Uban ang dakong kaikag, kita naglaom nga mahibalo bahin nianang mga butanga. Apan ikasubo, ang linukot nga basahon hugot nga gitimbrehan ug pito ka timbre!

³ Makakaplag kaha ang kusgang manulonda ug usa nga takos sa pagbukas sa linukot nga basahon? Sumala sa Kingdom Interlinear, ang linukot nga basahon “anaa sa tuong kamot” ni Jehova. Kini nagpasabot nga iya kining gitunol. Apan morag walay usa sa langit o sa yuta ang takos sa pagdawat ug pagbukas sa linukot nga basahon. Bisan gani ilalom sa yuta, taliwala sa matinumanong mga alagad sa Diyos nga nangamatay na, walay usa nga kuwalipikado alang niining dakong kadungganan. Dili ikatingala nga si Juan naguol! Basin dili na niya mahibaloan “ang mga butang nga kinahanglang mahitabo.” Sa atong panahon usab, ang dinihogang katawhan sa Diyos maikagong nagpaabot kang Jehova sa pagpadan-ag sa iyang kahayag ug kamatuoran bahin sa Pinadayag. Kini anam-anam niyang gipadan-ag sa tinudlong panahon sa pagkatuman sa tagna, aron sa pagtultol sa iyang katawhan diha sa dalan sa “dakong kaluwasan.”—Salmo 43:3, 5.

Ang Usa nga Takos

4. (a) Kinsay nakaplagan nga takos sa pagbukas sa linukot nga basahon ug sa mga timbre niini? (b) Unsang ganti ug pribilehiyo ang gipakig-ambitan karon sa Juan nga matang ug sa ilang mga kauban?

⁴ Oo, adunay usa nga arang makabukas sa linukot nga basahon! Si Juan nag-asoy: “Apan usa sa mga ansiyano miingon kanako: ‘Hunong na sa paghilak. Tan-awa! Ang Leyon nga gikan sa tribo ni Juda, ang gamot ni David, nakadaog aron sa pagbukas sa linukot nga basahon ug sa pito ka timbre niini.’” (Pinadayag 5:5) Busa Juan, pahiri na ang imong mga luha! Ang Juan nga matang ug ang ilang maunongong mga kauban karon nag-antos usab ug grabeng mga pagsulay sa daghang katuigan samtang mapailobong naghulat ug kalamdagan. Pagkamakapahupay nga ganti ang atong nabatonan karon nga kita nakasabot sa panan-awon, ug pagkadakong pribilehiyo nga makapakig-ambit sa katumanan niini pinaagi sa pagsangyaw sa mensahe niini ngadto sa uban!

5. (a) Unsay gitagna bahin kang Juda, ug diin nagmando ang mga kaliwat ni Juda? (b) Kinsa si Shilo?

⁵ Ah, “ang Leyon nga gikan sa tribo ni Juda”! Suheto si Juan sa tagna nga gisulti ni Jacob, nga kagikan sa Hudiyong kaliwat, bahin sa iyang ikaupat nga anak nga si Juda: “Usa ka nating leyon si Juda. Gikan sa tukbonon, anak ko, ikaw gayod mosaka. Siya miyukbo, siya mituyhad sama sa usa ka leyon ug, sama sa usa ka leyon, kinsay mangahas sa pagpukaw kaniya? Ang setro dili mobiya gikan kang Juda, ni ang sungkod sa komandante gikan sa taliwala sa iyang mga tiil, hangtod nga moabot si Shilo; ug kaniya ang pagkamasinugtanon sa mga katawhan maiya.” (Genesis 49:9, 10) Ang harianong kaliwat sa katawhan sa Diyos naggikan kang Juda.  Ang tanang hari nga nagmando sa Jerusalem sugod kang David hangtod sa panahon nga napukan sa mga Babilonyanhon ang maong siyudad maoy mga kaliwat ni Juda. Apan walay usa kanila ang Shilo nga gitagna ni Jacob. Ang Shilo nagkahulogang “Iya Kini [nga Katungod].” Sa matagnaong paagi, kining ngalana nagpunting kang Jesus, ang usa nga permanenteng nanag-iya karon sa Davidnong Gingharian.—Ezequiel 21:25-27; Lucas 1:32, 33; Pinadayag 19:16.

6. Sa unsang paagi si Jesus mao ang “gamayng sanga” ni Jese ug ang “gamot [usab] ni David”?

⁶ Nasabtan dayon ni Juan ang gihisgotang “gamot ni David.” Ang gisaad nga Mesiyas matagnaong gitawag nga “gamayng sanga gikan sa tuod ni Jese [amahan ni Haring David] . . . usa ka turok” ug “gamot ni Jese nga mobarog ingon nga usa ka timaan alang sa mga katawhan.” (Isaias 11:1, 10) Si Jesus usa ka gamayng sanga ni Jese, kay siya natawo sa harianong kaliwat ni David, nga anak ni Jese. Dugang pa, ingong gamot ni Jese, siya mao ang Usa nga nagpahinabo sa Davidnong dinastiya sa pagturok pag-usab, nga naghatag niinig kinabuhi sa walay kataposan.—2 Samuel 7:16.

7. Nganong si Jesus ang takos nga mokuha sa linukot nga basahon gikan sa kamot sa Usa nga naglingkod sa trono?

⁷ Ingong hingpit nga tawo, si Jesus ang unang nag-alagad kang Jehova nga maunongon ubos sa grabe kaayong mga pagsulay. Iyang gihatag ang hingpit nga tubag sa hagit ni Satanas. (Proverbio 27:11) Busa, sa gabii una pa sa iyang haladnong kamatayon siya nakasulti niining mga pulonga, “Gidaog ko na ang kalibotan.” (Juan 16:33) Tungod niini, gihatag ni Jehova ngadto sa gibanhawng Jesus “ang tanang awtoridad . . . sa langit ug sa yuta.” Sa tanang alagad sa Diyos siya lang ang takos sa pagdawat sa linukot nga basahon, sa tuyo nga iyang ikapahibalo ang mahinungdanon kaayong mensahe niini.—Mateo 28:18.

8. (a) Kon bahin sa Gingharian, unsay nagpakita sa pagkatakos ni Jesus? (b) Nganong haom nga usa sa 24 ka ansiyano ang mosulti kang Juan kon kinsay takos nga mobukas sa linukot nga basahon?

⁸ Angayan gayod nga si Jesus ang magbukas sa linukot nga basahon. Sukad sa 1914 siya naentrono na ingong Hari sa Mesiyanikong Gingharian sa Diyos, ug ang linukot nga basahon daghag gibutyag bahin sa Gingharian ug sa pagabuhaton niini. Si Jesus matinumanong nagpamatuod bahin sa kamatuoran sa Gingharian sa dinhi pa siya sa yuta. (Juan 18:36, 37) Iyang gitudloan ang iyang mga sumusunod sa pag-ampo nga moabot ang Gingharian. (Mateo 6:9, 10) Iyang gisugdan ang pagwali sa maayong balita sa Gingharian sa sinugdanan sa Kristohanong panahon ug gitagna ang sangkoanan sa buluhatong pagsangyaw sa panahon sa kataposan. (Mateo 4:23; Marcos 13:10) Haom usab nga usa sa 24 ka ansiyano ang mosulti kang Juan nga si Jesus ang magbukas sa mga timbre. Ngano? Tungod kay kining maong mga ansiyano naglingkod sa mga trono ug nagsul-ob ug mga korona ingong kaubang mga manununod ni Kristo sa iyang Gingharian.—Roma 8:17; Pinadayag 4:4.

‘Ang Kordero nga Gipatay’

9. Inay usa ka leyon, unsay nakita ni Juan nga nagbarog “taliwala sa trono,” ug giunsa niya kini paghubit?

⁹ Si Juan buot nga motan-aw niining “Leyon nga gikan sa tribo ni Juda.” Apan katingad-an gayod! Lahi kaayo ang simbolikong dagway nga iyang nakita: “Ug nakita ko nga nagbarog taliwala sa trono ug sa upat ka buhing linalang ug sa taliwala sa mga ansiyano ang usa ka kordero nga daw kini gipatay na, nga may pito ka sungay ug pito ka mata, kansang mga mata mao ang pito ka espiritu sa Diyos nga gipadala sa tibuok yuta.”—Pinadayag 5:6.

10. Kinsa ang “kordero” nga nakita ni Juan, ug nganong haom ang maong termino?

¹⁰ Diha mismo sa sentro, tapad sa trono, nga gilibotan sa upat ka buhi nga mga linalang ug sa 24 ka ansiyano, anaay usa ka kordero! Seguradong giila dayon ni Juan kining maong kordero ingong “ang Leyon nga gikan sa tribo ni Juda” ug “ang gamot ni David.” Nahibalo siya nga, kapin sa 60 ka tuig una pa niana, gipailaila ni Juan Bawtista si Jesus ngadto sa nanan-awng mga Hudiyo ingong “ang Kordero sa Diyos nga magakuha sa sala sa kalibotan!” (Juan 1:29) Sa tibuok niyang pagkinabuhi sa yuta, si Jesus wala gayod magpamantsa sa kalibotan—samag kordero nga walay buling—aron iyang ikahatag ang iyang hingpit nga kinabuhi ingong halad alang sa katawhan.—1 Corinto 5:7; Hebreohanon 7:26.

11. Nganong dili pagpakaulaw ang paglarawan sa hinimayang Jesus ingong ‘usa ka kordero nga daw gipatay na’?

¹¹ Pagpakamenos ba o pagpakaulaw ang paglarawan sa hinimayang Jesus ingong ‘usa ka  kordero nga daw gipatay na’? Dili gayod! Ang pagpabiling matinumanon ni Jesus hangtod sa kamatayon maoy dakong kapildihan alang kang Satanas ug dakong kadaogan alang kang Jehova nga Diyos. Ang paglarawan kang Jesus niining paagiha klaro kaayong naghulagway sa iyang kadaogan batok sa kalibotan ni Satanas ug usa ka pahinumdom sa dakong gugma ni Jehova ug ni Jesus alang sa katawhan. (Juan 3:16; 15:13; itandi ang Colosas 2:15.) Sa ingon si Jesus gipaila ingong ang sinaad nga Binhi, nga kuwalipikado kaayo sa pagbukas sa linukot nga basahon.—Genesis 3:15.

12. Unsay gihulagwayan sa pito ka sungay sa Kordero?

¹² Unsa pay makadugang sa atong pagpabili bahin niini nga “kordero”? Siya may pito ka sungay. Sa Bibliya, ang mga sungay kasagarang naghulagway sa gahom o awtoridad, ug ang pito nagpasabot ug pagkakompleto. (Itandi ang 1 Samuel 2:1, 10; Salmo 112:9; 148:14.) Busa, ang pito ka sungay sa Kordero naghulagway sa kabug-osan sa gahom nga gihatag ni Jehova kang Jesus. Siya “labaw kaayo sa tanang kagamhanan ug awtoridad ug gahom ug pagkaginoo ug sa tanang ngalan nga gingalan, dili lamang niini nga sistema sa mga butang, kondili usab nianang sa umaabot.” (Efeso 1:20-23; 1 Pedro 3:22) Si Jesus ilabinang naggamit ug gahom sa pagmando sukad sa 1914 sa dihang si Jehova nag-entrono kaniya ingong langitnong Hari.—Salmo 2:6.

13. (a) Unsay gihulagwayan sa pito ka mata sa Kordero? (b) Unsay gihimo sa Kordero?

¹³ Dugang pa, si Jesus bug-os nga natugob sa balaang espiritu, ingong gihulagwayan sa pito ka mata sa Kordero, nga nagkahulogan sa “pito ka espiritu sa Diyos.” Ang kabug-osan sa aktibong gahom ni Jehova moagos ngadto sa Iyang yutan-ong mga alagad pinaagi kang Jesus. (Tito 3:6) Dayag nga pinaagi gihapon niining maong espiritu nga siya nagtan-aw gikan sa langit kon unsay nagakahitabo dinhi sa yuta. Sama sa iyang Amahan, si Jesus adunay hingpit nga pagsabot. Walay butang nga makaikyas sa iyang panan-aw. (Itandi ang Salmo 11:4; Zacarias 4:10.) Klaro nga kining maong Anak—ang usa nga naghupot sa iyang integridad ug nagbuntog sa kalibotan; ang Leyon gikan sa tribo ni Juda; ang gamot ni David; ang usa nga naghalad sa iyang kinabuhi alang sa katawhan; ang usa nga adunay bug-os nga awtoridad, tugob sa balaang espiritu, ug may hingpit nga pagsabot gikan kang Jehova nga Diyos—oo, kini siya takos gayod sa pagkuha sa linukot nga basahon gikan sa kamot ni Jehova. Nagpanuko ba siya sa pagdawat sa maong buluhaton sa pag-alagad diha sa hamiling organisasyon ni Jehova? Wala! Hinunoa, “siya miadto ug kini [ang linukot nga basahon] iyang gikuha gilayon gikan sa tuong kamot sa Usa nga naglingkod sa trono.” (Pinadayag 5:7) Pagkaanindot nga panig-ingnan sa kinabubut-on nga pagsugot!

Mga Awit sa Pagdayeg

14. (a) Unsay reaksiyon sa upat ka buhing mga linalang ug sa 24 ka ansiyano sa pagkuha ni Jesus sa linukot nga basahon? (b) Sa unsang paagi ang impormasyon nga nadawat ni Juan bahin sa 24 ka ansiyano nagpamatuod kon kinsa sila ug kon unsay ilang buluhaton?

¹⁴ Unsay reaksiyon sa uban nga anaa sa atubangan sa trono ni Jehova? “Ug sa nakuha na niya ang linukot nga basahon, ang upat ka buhing linalang ug ang kawhaag-upat ka ansiyano nanghapa atubangan sa Kordero, nga ang matag usa nagkupot ug alpa ug mga bulawang panaksan nga puno sa insenso, ug ang insenso mao ang mga pag-ampo sa mga balaan.” (Pinadayag 5:8) Sama sa upat ka buhing linalang nga mga kerubin atubangan sa trono sa Diyos, ang 24 ka ansiyano nangyukbo kang Jesus sa pag-ila sa iyang awtoridad. Apan ang mga ansiyano lang ang dunay mga alpa ug mga panaksan sa insenso. a Ug sila lang ang nag-awit ug usa ka bag-ong awit. (Pinadayag 5:9) Sa ingon susama sila sa 144,000 sa balaang “Israel sa Diyos,” nga nagdala usab ug mga alpa ug nag-awit ug usa ka bag-ong awit. (Galacia 6:16; Colosas 1:12; Pinadayag 7:3-8; 14:1-4) Dugang pa, ang 24 ka ansiyano gipakita nga nagbuhat ug usa ka langitnon, saserdotehanon nga buluhaton, nga gihulagwayan sa mga saserdote sa karaang Israel nga nagsunog ug insenso ngadto kang Jehova diha sa tabernakulo—usa ka buluhaton nga natapos sa yuta sa dihang gitapos sa Diyos ang Moisesnong Balaod pinaagi sa paglansang niini diha sa estaka sa pagsakit ni Jesus. (Colosas 2:14) Unsay atong ikahinapos gikan niining tanan? Nga dinhi ang dinihogang mga mananaog nakita nga nagbuhat sa ilang pangunang buluhaton ingong ‘mga saserdote sa Diyos ug sa Kristo, nga nagmando ingong mga hari uban kaniya sulod sa usa ka libo ka tuig.’—Pinadayag 20:6.

15. (a) Sa Israel, kinsa lang ang makasulod sa Labing Balaan sa tabernakulo? (b) Nganong ang pagsunog ug insenso sa hataas nga saserdote sa dili pa siya mosulod sa Labing Balaan mahimong magkahulogan ug kinabuhi o kamatayon?

 ¹⁵ Sa karaang Israel, ang hataas nga saserdote lang ang makasulod sa Labing Balaan diha sa simbolikong presensiya ni Jehova. Ang iyang pagdala ug insenso mahimong magkahulogan ug kinabuhi o kamatayon. Ang balaod ni Jehova nag-ingon: “Kuhaon [ni Aaron] ang insensaryo nga puno sa nagasigang mga baga sa kalayo gikan sa halaran sa atubangan ni Jehova, ug ang mga lubyok sa duha niya ka kamot nga puno sa pinong pinahumotan nga insenso, ug iyang dad-on sila sa sulod sa kortina. Ang insenso ibutang usab niya sa kalayo sa atubangan ni Jehova, ug ang panganod sa insenso motaklap sa tabon sa Arka, nga anaa ibabaw sa Pagpamatuod, aron siya dili mamatay.” (Levitico 16:12, 13) Ang hataas nga saserdote dili gayod makasulod sa Labing Balaan gawas kon siya magsunog ug insenso.

16. (a) Sa Kristohanong kahikayan, kinsa ang makasulod sa mahulagwayong Labing Balaan? (b) Nganong kinahanglang ‘magsunog ug insenso’ ang dinihogang mga Kristohanon?

¹⁶ Sa Kristohanong kahikayan dili lamang ang mahulagwayong Hataas nga Saserdote, si Jesu-Kristo, kondili ang matag usa usab sa 144,000 ka luyoluyong mga saserdote makasulod ngadtongadto sa mahulagwayong Labing Balaan, ang dapit sa presensiya ni Jehova sa langit. (Hebreohanon 10:19-23) Ang maong mga saserdote, nga gihulagwayan dinhi sa 24 ka ansiyano, dili gayod makasulod sa Labing Balaan gawas kon sila ‘magsunog ug insenso,’ nga sa ato pa, maghalad kanunay ug mga pag-ampo ug mga pangaliyupo ngadto kang Jehova.—Hebreohanon 5:7; Judas 20, 21; itandi ang Salmo 141:2.

Usa ka Bag-ong Awit

17. (a) Unsang bag-ong awit ang giawit sa 24 ka ansiyano? (b) Sa unsang paagi ang mga pulong “bag-ong awit” sagad gigamit sa Bibliya?

¹⁷ Niining tungora usa ka mananoy nga awit ang milanog. Ang kaubang mga saserdote sa Kordero, ang 24 ka ansiyano, miawit ngadto kaniya: “Ug sila nanag-awit ug usa ka bag-ong awit, nga nagaingon: ‘Takos ikaw sa pagkuha sa linukot nga basahon ug sa pagbukas sa mga timbre niini, tungod kay ikaw gipatay ug pinaagi sa imong dugo gipalit mo ang mga tawo alang sa Diyos gikan sa matag tribo ug pinulongan ug katawhan ug nasod.’” (Pinadayag 5:9) Ang mga pulong “bag-ong awit” daghang beses nga mabasa sa Bibliya ug sagad nagtumong sa pagdayeg kang Jehova tungod sa iyang gamhanang buhat sa pagluwas. (Salmo 96:1; 98:1; 144:9) Busa, ang awit bag-o tungod kay ikamantala na karon sa mag-aawit ang dugang katingalahang mga buhat ni Jehova ug ikapahayag pag-usab ang pagdayeg sa Iyang mahimayaong ngalan.

18. Nganong gidayeg sa 24 ka ansiyano si Jesus pinaagi sa ilang bag-ong awit?

¹⁸ Apan dinhi, ang 24 ka ansiyano nag-awit ug bag-ong awit sa atubangan ni Jesus imbes sa atubangan ni Jehova. Hinunoa ang prinsipyo mao gihapon. Sila nagdayeg kang Jesus tungod kay siya, ingong Anak sa Diyos, nagbuhat ug bag-ong mga butang alang kanila. Pinaagi sa iyang dugo, siya nahimong tigpataliwala sa bag-ong pakigsaad ug sa ingon natukod ang usa ka bag-ong nasod nga linaing gipanag-iya ni Jehova. (Roma 2:28, 29; 1 Corinto 11:25; Hebreohanon 7:18-25) Ang mga membro niining bag-ong espirituwal nga nasod naggikan sa daghang literal nga mga nasod, apan si Jesus naghiusa kanila diha sa usa ka kongregasyon ingong usa ka nasod.—Isaias 26:2; 1 Pedro 2:9, 10.

19. (a) Unsang panalangin ang wala matagamtam sa unodnong Israel tungod sa ilang pagkadili-matinumanon? (b) Unsang panalangin ang gipahimuslan sa bag-ong nasod ni Jehova?

¹⁹ Sa dihang ang mga Israelinhon gitukod ni Jehova ingong usa ka nasod sa panahon ni Moises, siya naghimog pakigsaad uban kanila ug nagsaad nga kon sila magpabiling matinumanon sa maong pakigsaad, sila mahimong usa ka gingharian sa mga saserdote atubangan kaniya. (Exodo 19:5, 6) Ang mga Israelinhon wala magmatinumanon ug wala gayod nila matagamtam ang katumanan nianang saara. Sa laing bahin, nagpabiling matinumanon ang bag-ong nasod nga gitukod pinasukad sa bag-ong pakigsaad diin si Jesus maoy tigpataliwala. Busa ang mga membro niini makabaton ug kahigayonan sa pagmando ibabaw sa yuta ingong mga hari ug sa pag-alagad usab ingong mga saserdote, nga motabang sa mga tawong matarong ug kasingkasing nga mapasig-uli ngadto kang Jehova. (Colosas 1:20) Sama gayod kini sa gipahayag sa bag-ong awit: “Ug gihimo mo sila nga usa ka gingharian ug mga saserdote ngadto sa atong  Diyos, ug sila magamando ingong mga hari ibabaw sa yuta.” (Pinadayag 5:10) Pagkadakong kalipay sa 24 ka ansiyano nga makaawit niining bag-ong awit sa pagdayeg ngadto sa hinimayang Jesus!

Usa ka Langitnong Koro

20. Unsang awit sa pagdayeg sa Kordero ang milanog?

²⁰ Sa unsang paagi misanong sa bag-ong awit ang ubang membro sa dako kaayong panon sa langitnong organisasyon ni Jehova? Nalipay si Juan nga makakita sa ilang kinasingkasing nga pag-uyon: “Ug nakita ko, ug nadungog ko ang tingog sa daghang manulonda libot sa trono ug sa buhing mga linalang ug sa mga ansiyano, ug ang ilang gidaghanon maoy tinagpulo ka libo ka tinagpulo ka libo ug linibo ka libo, nga sa makusog nga tingog nagaingon: ‘Ang Kordero nga gipatay takos sa pagdawat sa gahom ug mga bahandi ug kaalam ug kusog ug dungog ug himaya ug pagdayeg.’” (Pinadayag 5:11, 12) Pagkanindot nga awit sa pagdayeg!

21. Ang pagdayeg ba sa Kordero nakapamenos sa pagkasoberano o posisyon ni Jehova? Ipatin-aw.

²¹ Nagkahulogan ba kini nga daw gipulihan na karon ni Jesus si Jehova nga Diyos ug nga siya nay gidayeg sa tanang linalang imbes ang iyang Amahan? Wala gayod! Hinunoa, kining awit sa pagdayeg nahiuyon sa gisulat ni apostol Pablo: “Ang Diyos nagbayaw [kang Jesus] ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan, aron nga sa ngalan ni Jesus moluhod ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.” (Filipos 2:9-11) Si Jesus gidayeg dinhi tungod sa iyang bahin sa paghusay sa pangunang isyu atubangan sa tanang linalang—ang pagbindikar sa katungod ni Jehova ingong soberano. Pagkadakong kahimayaan kini alang sa iyang Amahan!

Nagkakusog nga Awit

22. Unsang awit ang giduyogan sa mga tingog gikan sa yutan-ong dapit?

²² Sa talan-awon nga gihubit ni Juan, ang mga panon sa langit nag-awit ug mananoy nga awit sa pagdayeg kang Jesus agig pag-ila sa iyang pagkamatinumanon ug sa iyang langitnong awtoridad. Niining bahina, giduyogan sila sa mga tingog gikan sa yutan-ong dapit nga nakigbahin usab sa pagdayeg sa Amahan ug sa Anak. Maingon nga ang kalamposan sa usa ka tawhanong anak makahatag ug dakong kadungganan sa mga ginikanan, ang maunongong pagkinabuhi ni Jesus nakita sa tanang linalang ug nakahatag ug “kahimayaan sa Diyos nga Amahan.” Busa, si Juan nagpadayon sa pagtaho: “Ug ang tanang linalang nga anaa sa langit ug sa yuta ug sa ilalom sa yuta ug sa dagat, ug ang tanang butang nga diha niini, nadungog ko nga nag-ingon: ‘Ngadto sa Usa nga nagalingkod sa trono ug ngadto sa Kordero ang pagdayeg ug ang dungog ug ang himaya ug ang gahom hangtod sa kahangtoran.’”—Pinadayag 5:13.

23, 24. (a) Unsay magpaila kon kanus-a magsugod ang awit sa langit, ug kanus-a magsugod sa yuta? (b) Sa unsang paagi ang awit magkakusog pa paglabay sa mga tuig?

²³ Kanus-a man awiton kining maanindot nga awit? Nagsugod kini sayo sa adlaw sa Ginoo. Human gitambog si Satanas ug ang iyang mga demonyo gikan sa mga langit, “ang tanang linalang nga anaa sa langit” nagkahiusa na niining awit sa pagdayeg. Ug, sumala sa gipakita sa rekord, sukad sa 1919 nagkadaghan ang panon sa katawhan sa yuta nga naghiusa sa ilang mga tingog sa pagdayeg kang Jehova, gikan sa pipila ka libo ngadto sa kapin sa unom ka milyon sa 2005. b Human malaglag ang yutan-ong sistema ni Satanas, “ang tanang linalang . . . sa yuta” magaawit ug mga pagdayeg kang Jehova ug sa iyang Anak. Sa takdang panahon ni Jehova, ang pagbanhaw sa milyonmilyong patay pagasugdan, ug dayon “ang tanang linalang . . . ilalom sa yuta” nga anaa sa panumdoman sa Diyos may kahigayonan na sa pagduyog sa pag-awit sa maong awit.

²⁴ Sa pagkakaron, milyonmilyon ka tawo “gikan sa kinatumyan sa yuta . . . sa dagat ug . . . kapuloan” ang nag-awit ug bag-ong awit duyog sa tibuok-kalibotang organisasyon ni Jehova. (Isaias 42:10; Salmo 150:1-6) Kining masadyaong pagdayeg magkakusog pa inigkatapos sa Milenyo, sa dihang ang katawhan mapasig-uli na sa kahingpitan. Ang karaang halas, ang dakong limbongan, si Satanas, pagalaglagon human niana aron hingpit nang matuman ang Genesis 3:15, ug ingong madaogong sangkoanan, ang tanang buhing linalang, espirituhanon ug tawhanon, mahiusa na unya sa pag-awit: “Ngadto sa Usa nga nagalingkod sa trono ug ngadto sa Kordero ang pagdayeg ug ang dungog ug ang himaya ug ang gahom hangtod sa kahangtoran.”  Wala na unyay madungog nga mabatokong tingog sa tibuok uniberso.

25. (a) Ang pagbasa sa asoy ni Juan bahin sa unibersohanong awit makapalihok kanato sa pagbuhat sa unsa? (b) Unsay maayo kaayong panig-ingnan ang gipakita kanato sa upat ka buhing mga linalang ug sa 24 ka ansiyano sa dihang natapos na ang panan-awon?

²⁵ Pagkasadya unya nga panahon kana! Seguradong ang gihubit ni Juan dinhi makapalipay sa atong mga kasingkasing ug makapalihok kanato sa pagduyog sa langitnong mga panon sa pag-awit ug kinasingkasing nga mga pagdayeg kang Jehova nga Diyos ug kang Jesu-Kristo. Dili ba mas determinado kita kay sukad masukad nga molahutay sa paghimog matarong nga mga buhat? Kon kita molahutay, kita makalaom nga, sa tabang ni Jehova, ang matag usa kanato makasaksi sa makapalipayng sangkoanan ug makaapil sa pag-awit nianang unibersohanong koro sa pagdayeg. Sa pagkatinuod, ang upat ka buhing mga linalang nga mga kerubin ug ang binanhaw nga dinihogang mga Kristohanon bug-os nga nahiusa, kay ang panan-awon gitapos niining mga pulonga: “Ug ang upat ka buhing linalang nanag-ingon: ‘Amen!’ ug ang mga ansiyano mihapa ug misimba.”—Pinadayag 5:14.

26. Sa unsa kita kinahanglang magpasundayag ug pagtuo, ug unsay andam na nga buhaton sa Kordero?

²⁶ Hinaot ikaw, minahal nga magbabasa, magpasundayag ug pagtuo sa halad sa Kordero—ang ‘usa nga takos’—ug panalanginan sa imong mapaubsanong mga paningkamot sa pagsimba ug pag-alagad kang Jehova—ang “Usa nga naglingkod sa trono.” Tugoti ang Juan nga matang sa pagtabang kanimo karon samtang kini naghatag sa gikinahanglan nga “taganang [espirituwal nga] pagkaon sa hustong panahon.” (Lucas 12:42) Apan tan-awa! Andam na ang Kordero sa pagbukas sa pito ka timbre. Unsang makaiikag nga mga pagpadayag ang atong mahibaloan karon?

[Mga footnote]

[Mga Pangutana sa Pagtuon]

 [Tibuok panid nga hulagway sa panid 86]