Kapitulo 24

Matam-is ug Mapait nga Mensahe

Panan-awon 6​—Pinadayag 10:1–11:19

Ulohan: Ang panan-awon bahin sa gamayng linukot nga basahon; mga kasinatian diha sa templo; ang paghuyop sa ikapitong trompeta

Panahon sa katumanan: Gikan sa paglingkod ni Jesus sa trono niadtong 1914 hangtod sa dakong kasakitan

1, 2. (a) Unsay resulta sa ikaduhang kaalaotan, ug kanus-a ipahayag nga natapos na kini nga kaalaotan? (b) Kinsa karon ang nakita ni Juan nga mikunsad gikan sa langit?

 MALAGLAGON gayod ang ikaduhang kaalaotan. Kini nakapasakit sa Kakristiyanohan ug sa iyang mga lider, ang “ikatulo ka bahin sa mga tawo,” nga giyagyag ingong patay sa espirituwal. (Pinadayag 9:15) Human niini, dayag nga gusto gayong mahibalo si Juan kon unsa kahay ipahinabo sa ikatulong kaalaotan. Apan hulat una! Ang ikaduhang kaalaotan wala pa matapos—kay wala pa kita makadangat sa punto nga girekord sa Pinadayag 11:14. Sa dili pa kini mahitabo, makasaksi una si Juan ug mga panghitabo nga siya mismo aktibong makigbahin. Kini nagsugod pinaagi sa usa ka makahahadlok nga talan-awon:

² “Ug nakita ko ang laing kusgang manulonda nga mikunsad gikan sa langit, nga sinul-oban ug panganod, ug may usa ka balangaw diha sa iyang ulo, ug ang iyang nawong ingon sa adlaw, ug ang iyang mga tiil ingon sa mga haligi nga kalayo.”—Pinadayag 10:1.

3. (a) Kinsa ang “kusgang manulonda”? (b) Unsay kahulogan sa balangaw diha sa iyang ulo?

³ Kinsa kining “kusgang manulonda”? Dayag nga siya mao ang hinimayang Jesu-Kristo diha sa lain nga papel. Siya nasul-oban ug panganod nga nagsalipod kaniya aron dili siya makita, nga nagpahinumdom kanato sa gipamulong kanhi ni Juan bahin kang Jesus: “Tan-awa! Siya moanhi uban sa mga panganod, ug ang tanang mata makakita kaniya, ug kadtong nagdughang kaniya.” (Pinadayag 1:7; itandi ang Mateo 17:2-5.) Ang balangaw diha sa iyang ulo nagpahinumdom kanato sa nag-unang panan-awon ni Juan sa trono ni Jehova, nga may “balangaw nga sama ug esmeralda tan-awon.” (Pinadayag 4:3; itandi ang Ezequiel 1:28.) Ang maong balangaw nagpasabot sa kalinaw ug pakigdait nga naglibot sa trono sa Diyos. Sa samang paagi, kining balangaw diha sa ulo sa manulonda magpaila kaniya ingong usa ka espesyal nga mensahero sa pakigdait, ang gitagnang “Prinsipe sa Pakigdait” ni Jehova.—Isaias 9:6, 7.

4. Unsay kahulogan (a) sa nawong sa kusgang manulonda nga “ingon sa adlaw”? (b) sa mga tiil sa manulonda nga “ingon sa mga haligi nga kalayo”?

⁴ Ang nawong sa kusgang manulonda maoy “ingon sa adlaw.” Una pa niini, sa iyang panan-awon kang Jesus diha sa langitnong templo, namatikdan ni Juan nga ang panagway ni Jesus maoy “ingon sa adlaw sa dihang kini mosidlak diha sa bug-os nga gahom niini.” (Pinadayag 1:16) Si Jesus, ingong “ang adlaw sa pagkamatarong,” mosidlak nga ang iyang mga pako may gahom sa pagpang-ayo alang sa kaayohan niadtong nahadlok sa ngalan ni Jehova. (Malaquias 4:2) Dili lamang ang nawong niini nga manulonda ang mahimayaon kondili ang iyang mga tiil usab, nga “ingon sa mga haligi nga kalayo.” Ang iyang lig-ong pagbarog maoy sama sa Usa nga gihatagan ni Jehova sa “tanang awtoridad . . . sa langit ug sa yuta.”—Mateo 28:18; Pinadayag 1:14, 15.

5. Unsay nakita ni Juan diha sa kamot sa kusgang manulonda?

 ⁵ Si Juan nagpadayon sa pagtan-aw: “Ug diha sa iyang kamot ang usa ka gamayng linukot nga basahon nga binuksan. Ug iyang gitunob ang iyang tuong tiil sa dagat, apan ang iyang wala nga tiil sa yuta.” (Pinadayag 10:2) Laing linukot nga basahon? Oo, apan niining higayona kini walay timbre. Uban kang Juan, kita makapaabot nga sa dili madugay makakita pa kita ug dugang makaiikag nga mga pagbutyag. Apan, una pa niana, kita gisultihan kon unsay sunod nga mahitabo.

6. (a) Nganong haom nga ang mga tiil ni Jesus nagtunob sa yuta ug sa dagat? (b) Kanus-a bug-os nga natuman ang Salmo 8:5-8?

⁶ Balikan nato ang paghubit kang Jesus. Ang iyang nagkalayong mga tiil nagtunob sa yuta ug sa dagat, nga karon ilalom na sa iyang bug-os nga paggahom. Sama gayod kini sa gipahayag sa matagnaong salmo: “Gihimo mo [Jehova] usab siya [Jesus] nga ubos ug diyutay kay sa mga samag-diyos, ug sa himaya ug kahalangdon gipurongpurongan mo siya. Gipagahom mo siya sa ibabaw sa mga buhat sa imong mga kamot; ang tanan gibutang mo sa ilalom sa iyang mga tiil: ang mga karnero ug mga kanding ug mga baka, silang tanan, ug ang mga mananap usab sa kapatagan, ang mga langgam sa kalangitan ug ang mga isda sa dagat, bisan unsa nga moagi sa mga alagianan sa kadagatan.” (Salmo 8:5-8; tan-awa usab ang Hebreohanon 2:5-9.) Kini nga salmo bug-os nga natuman niadtong 1914, sa dihang si Jesus gipalingkod sa trono ingong Hari sa Gingharian sa Diyos ug nagsugod ang panahon sa kataposan. Busa, ang nakita ni Juan dinhi sa panan-awon mapadapat sukad nianang tuiga.—Salmo 110:1-6; Buhat 2:34-36; Daniel 12:4.

Ang Pito ka Dalugdog

7. Sa unsang paagi ang kusgang manulonda misinggit, ug unsay kahulogan sa iyang pagsinggit?

⁷ Ang pagpamalandong ni Juan bahin niining kusgang manulonda gibalda sa manulonda mismo: “Ug sa makusog nga tingog siya [ang manulonda] misinggit ingon sa usa ka leyon dihang magangulob. Ug sa pagsinggit niya, ang pito ka dalugdog mitingog.” (Pinadayag 10:3) Dayag nga nakuha ang pagtagad ni Juan sa maong kusog nga pagsinggit, nga nagpamatuod nga si Jesus gayod “ang Leyon nga gikan sa tribo ni Juda.” (Pinadayag 5:5) Nasabtan usab ni Juan nga si Jehova usahay giingon usab nga ‘nagangulob.’ Ang pagngulob ni Jehova matagnaong nagpahibalo sa pagtigom pag-usab sa espirituwal nga Israel ug sa pag-abot sa malaglagong “adlaw ni Jehova.” (Oseas 11:10; Joel 3:14, 16; Amos 1:2; 3:7, 8) Nan, klaro nga ang samag-leyon nga pagsinggit niining kusgang manulonda nagpasabot ug susamang dagkong mga hitabo alang sa dagat ug sa yuta. Kini nag-awhag sa pito ka dalugdog sa pagsulti.

8. Unsa ang ‘mga tingog sa pito ka dalugdog’?

⁸ Si Juan nakadungog na ug mga dalugdog gikan sa trono mismo ni Jehova. (Pinadayag 4:5) Sa panahon ni David, ang literal nga dalugdog gihisgotan  usahay nga “tingog ni Jehova.” (Salmo 29:3) Sa dihang lanog nga gimantala ni Jehova ang iyang katuyoan sa paghimaya sa iyang kaugalingong ngalan sa mga adlaw sa yutan-ong ministeryo ni Jesus, alang sa daghan morag dalugdog kadto. (Juan 12:28, 29) Busa, makataronganon lang ang pag-ingon nga ang ‘mga tingog sa pito ka dalugdog’ maoy pagpahayag mismo ni Jehova sa iyang mga katuyoan. Ang pagkaadunay “pito” ka dalugdog nagpasabot nga bug-os ang nadunggan ni Juan.

9. Unsay gisugo sa usa ka tingog gikan sa langit?

⁹ Apan pamati! Dunay laing tingog nga nadungog. Ang gisugo niini daw nakapatingala kang Juan: “Karon sa dihang ang pito ka dalugdog misulti, mosulat na unta ako; apan nadungog ko ang usa ka tingog gikan sa langit nga nag-ingon: ‘Ililong ang mga butang nga gisulti sa pito ka dalugdog, ug ayaw kini isulat.’” (Pinadayag 10:4) Si Juan lagmit naghinamhinam sa pagpamati ug pagrekord niadtong samag-dalugdog nga mga mensahe, maingon nga ang Juan nga matang karon maikagong naghulat kang Jehova sa pagbutyag sa iyang balaang mga katuyoan nga ilang imantala. Ang maong mga pagpadayag moabot lamang sa gitakdang panahon ni Jehova.—Lucas 12:42; tan-awa usab ang Daniel 12:8, 9.

Matapos na ang Sagradong Tinago

10. Kang kinsa nanumpa ang kusgang manulonda, ug unsay iyang gipanumpa?

¹⁰ Sa kasamtangan, si Jehova adunay laing ipabuhat kang Juan. Tapos milanog ang pito ka dalugdog, ang kusgang manulonda misulti na usab: “Ug ang manulonda nga akong nakitang nagbarog sa dagat ug sa yuta miisa sa iyang tuong kamot ngadto sa langit, ug pinaagi sa Usa kinsa buhi hangtod sa kahangtoran, kinsa maoy naglalang sa langit ug sa mga butang nga anaa niini ug sa yuta ug sa mga butang nga anaa niini ug sa dagat ug sa mga butang nga anaa niini, siya nanumpa: ‘Wala na gayoy paglangan pa.’” (Pinadayag 10:5, 6) Kang kinsa nanumpa ang kusgang manulonda? Ang hinimayang Jesus nanumpa, dili sa iyang kaugalingon, kondili sa kinalabwang Awtoridad sa tanan, kang Jehova, ang dili-mamatay nga Maglalalang sa mga langit ug yuta. (Isaias 45:12, 18) Pinaagi niini nga panumpa, ang manulonda nagpasalig kang Juan nga dili gayod maglangan ang Diyos.

11, 12. (a) Unsay kahulogan sa mga pulong nga “wala na gayoy paglangan pa”? (b) Unsa ang matapos na?

¹¹ Ang Gregong pulong nga gihubad dinhi nga “paglangan” maoy khroʹnos, nga sa literal nagkahulogang “panahon.” Busa ang uban nagtuo nga ang gipahayag sa manulonda angayng hubarong: “Mawala na ang panahon,” nga daw ang panahon nga atong nahibaloan matapos na. Apan ang pulong khroʹnos dinhi walay definite article. Busa, kini wala magpunting sa panahon sa katibuk-an, kondili sa “usa ka panahon” o sa “usa ka yugto sa panahon.” Sa ato pa, wala nay dugang yugto sa panahon (o, paglangan) si Jehova. Ang usa ka Gregong berbo nga naggikan sa pulong khroʹnos gigamit usab sa Hebreohanon 10:37, diin si Pablo, nga nagkutlo sa Habacuc 2:3, 4, misulat nga “siya nga moanhi . . . dili magalangan.”

¹² “Wala na gayoy paglangan pa”—pagkamakaiikag kanang mga pulonga alang sa tigulang nang Juan nga matang karon! Sa unsang bahina nga wala na gayoy paglangan pa? Si Juan nagpahibalo kanato: “Apan sa mga adlaw nga magpatingog ang ikapitong manulonda, sa dihang mohuyop na siya sa iyang trompeta, ang sagradong tinago sa Diyos sumala sa maayong balita nga iyang gipahayag sa iyang mga ulipon nga mga manalagna sa pagkatinuod matapos na.” (Pinadayag 10:7) Miabot na ang panahon aron ipadangat na ni Jehova ang makapalipay nga sangkoanan sa iyang sagradong tinago, nga may mahimayaong kalamposan!

13. Unsa ang sagradong tinago sa Diyos?

 ¹³ Unsa kining sagradong tinago? Kini may kalabotan sa binhi nga unang gisaad didto sa Eden, nga pangunang nagtumong kang Jesu-Kristo. (Genesis 3:15; 1 Timoteo 3:16) May kalabotan usab kini sa kon kinsa ang babaye, nga kaniya maggikan ang Binhi. (Isaias 54:1; Galacia 4:26-28) Dugang pa, kini naglakip sa ikaduhang bahin sa binhi ug sa Gingharian nga pagamandoan sa Binhi. (Lucas 8:10; Efeso 3:3-9; Colosas 1:26, 27; 2:2; Pinadayag 1:5, 6) Ang maayong balita bahin niining talagsaon nga langitnong Gingharian kinahanglang imantala sa tibuok yuta sa panahon sa kataposan.—Mateo 24:14.

14. Nganong ang ikatulong kaalaotan nalangkit sa Gingharian sa Diyos?

¹⁴ Dayag nga kini ang kinamaayohan sa tanang balita. Apan sa Pinadayag 11:14, 15, ang ikatulong kaalaotan nalangkit sa Gingharian. Ngano? Tungod kay alang niadtong mipili niining sistema sa mga butang ni Satanas, ang pagpalanog sa maayong balita nga ang sagradong tinago sa Diyos matapos na—sa ato pa, ang Mesiyanikong Gingharian ania na—maoy makapaguol nga balita. (Itandi ang 2 Corinto 2:16.) Kini nagkahulogan nga ang tibuok-kalibotang kahikayan nga ilang nagustohan kaayo hapit nang laglagon. Ang mga tingog sa pito ka dalugdog, nga naundan ug makahahadlok nga mga pasidaan sa taliabot nga bagyo, mas nagkatin-aw ug mas nagkakusog samtang nagsingabot ang dakong adlaw sa panimalos ni Jehova.—Sofonias 1:14-18.

Ang Binuksan nga Linukot nga Basahon

15. Unsay gisulti sa tingog gikan sa langit ug sa kusgang manulonda ngadto kang Juan, ug unsay epekto niini kang Juan?

¹⁵ Samtang si Juan naghulat sa paghuyop sa ikapitong trompeta ug sa pagtapos sa sagradong tinago sa Diyos, siya gihatagag dugang buluhaton: “Ug ang tingog nga akong nadungog gikan sa langit misulti kanako pag-usab ug nag-ingon: ‘Lakaw, kuhaa ang binuksan nga linukot nga basahon nga anaa sa kamot sa manulonda nga nagbarog sa dagat ug sa yuta.’ Ug ako miadto sa manulonda ug giingnan siya nga ihatag kanako ang gamayng linukot nga basahon. Ug siya miingon kanako: ‘Kuhaa kini ug kan-a kini, ug kini makapapait sa imong tiyan, apan sa imong baba kini matam-is ingon sa dugos.’ Ug akong gikuha ang gamayng linukot nga basahon gikan sa kamot sa manulonda ug gikaon kini, ug sa akong baba kini matam-is ingon sa dugos; apan sa nakaon ko na kini, gipapait niini ang akong tiyan. Ug sila miingon kanako: ‘Kinahanglan nga ikaw managna pag-usab labot sa mga katawhan ug kanasoran ug mga pinulongan ug sa daghang hari.’”—Pinadayag 10:8-11.

16. (a) Sa unsang paagi ang manalagna nga si Ezequiel adunay kasinatian nga susama nianang kang Juan? (b) Nganong ang gamayng linukot nga basahon matam-is kang Juan, apan nganong pait kini sa nahilis na kini diha sa iyang tiyan?

¹⁶ Ang kasinatian ni Juan medyo susama nianang sa manalagna nga si Ezequiel sa dihang nadestiyero siya sa yuta sa Babilonya. Siya gisugo usab sa pagkaon sa usa ka linukot nga basahon nga matam-is sa iyang baba. Apan sa dihang nakaabot na kini sa iyang tiyan, iyang gibati nga gihatagan siya niini ug kaakohan sa pagpanagna ug mapait nga mga butang alang sa rebelyosong panimalay sa Israel. (Ezequiel 2:8–3:15) Ang binuksan nga linukot nga basahon nga gihatag sa hinimayang Jesu-Kristo ngadto kang Juan maoy usa usab ka langitnong mensahe. Si Juan kinahanglang magwali labot sa “mga katawhan ug kanasoran ug mga pinulongan ug sa daghang hari.” Ang pagkaon niining linukot nga basahon matam-is alang kaniya tungod kay kini naggikan sa Diyos. (Itandi ang Salmo 119:103; Jeremias 15:15, 16.) Apan pait kini sa nahilis na diha sa tiyan tungod kay—sama sa gibati ni Ezequiel kaniadto—nagtagna kini bahin sa dili-maayong mga butang nga mahitabo sa rebelyosong mga tawo.—Salmo 145:20.

17. (a) Kinsa ang nagsugo kang Juan sa pagpanagna “pag-usab,” ug unsay kahulogan niini? (b) Kanus-a gitakdang matuman ang kulbahinam nga panan-awon nga nakita ni Juan?

¹⁷ Walay duhaduha nga ang mga nagsugo kang Juan sa pagpanagna pag-usab mao si Jehova nga Diyos ug si Jesu-Kristo. Si Juan, bisan tuod gidestiyero sa pulo sa Patmos, nakapanagna na labot sa mga katawhan, kanasoran, mga pinulongan, ug mga hari pinaagi sa impormasyon nga narekord hangtod niining puntoha sa basahon sa Pinadayag. Ang pulong “pag-usab” nagkahulogan nga kinahanglan niyang isulat ug imantala ang nahibiling impormasyon nga narekord sa basahon sa Pinadayag. Apan hinumdomi nga si Juan dinhi aktuwal nga nakigbahin sa matagnaong panan-awon. Sa pagkatinuod, ang iyang girekord maoy usa ka tagna nga matuman paglabay sa 1914, sa dihang ang kusgang manulonda magtunob sa iyang tiil diha sa yuta ug sa dagat. Nan,  unsay kahulogan niining kulbahinam nga panan-awon alang sa Juan nga matang karon?

Ang Gamayng Linukot nga Basahon Karon

18. Sa pagsugod sa adlaw sa Ginoo, unsang interes ang gipakita sa Juan nga matang sa basahon sa Pinadayag?

¹⁸ Ang nakita ni Juan naghulagway gayod sa kasinatian sa Juan nga matang sa pagsugod sa adlaw sa Ginoo. Ang ilang pagsabot sa mga katuyoan ni Jehova, lakip na ang gipasabot sa pito ka dalugdog, dili pa kompleto niadto. Bisan pa niana, sila interesado kaayo sa Pinadayag, ug si Charles Taze Russell nagkomento sa daghang bahin niini sa buhi pa siya. Sa dihang siya namatay niadtong 1916, daghan sa iyang mga sinulat gitigom ug gipatik diha sa usa ka libro nga nag-ulohang The Finished Mystery. Apan sa ngadtongadto, kining libroha daw kulang kon maylabot sa pagpatin-aw sa Pinadayag. Ang nahibiling mga igsoon ni Kristo naghulat pa, hangtod nagsugod sa pagkatuman ang mga panan-awon, aron masabtan sa tukmang paagi kanang inspiradong sinulat.

19. (a) Sa unsang paagi ang Juan nga matang gigamit ni Jehova nga Diyos bisan sa wala pa bug-os ikamantala ang mga tingog sa pito ka dalugdog? (b) Kanus-a gihatagan ug binuksan nga gamayng linukot nga basahon ang Juan nga matang, ug unsay kahulogan niini alang kanila?

¹⁹ Hinunoa, sama kang Juan, sila gigamit ni Jehova bisan sa wala pa bug-os ikamantala ang mga tingog sa pito ka dalugdog. Sila makugihon nang nagwali sulod sa 40 ka tuig una pa sa 1914, ug sila naningkamot sa pagpabiling aktibo panahon sa unang gubat sa kalibotan. Sa pag-abot sa agalon, sila ang napamatud-ang nagtagana ug pagkaon sa mga sulugoon sa panimalay sa hustong panahon. (Mateo 24:45-47) Busa, sa 1919 sila ang gihatagan sa binuksan nga gamayng linukot nga basahon—sa ato pa, usa ka bukas nga mensahe nga kinahanglang iwali ngadto sa katawhan. Sama kang Ezequiel sila adunay mensahe alang sa usa ka dili-matinumanong organisasyon—ang Kakristiyanohan—nga nag-angkong nag-alagad sa Diyos apan, sa pagkatinuod, wala. Sama kang Juan sila kinahanglang magwali pa ug dugang labot sa “mga katawhan ug kanasoran ug mga pinulongan ug sa daghang hari.”

20. Unsay gihulagwayan sa pagkaon ni Juan sa linukot nga basahon?

²⁰ Ang pagkaon ni Juan sa linukot nga basahon  naghulagway sa pagdawat sa mga igsoon ni Jesus niining buluhatona. Kini nahimong bahin sa ilang pagkatawo hangtod sa punto nga sila karon gilangkit niining bahina sa inspiradong Pulong sa Diyos, nga nakabaton ug kalig-on gikan niini. Apan ang mensahe nga kinahanglan nilang iwali adunay mga pahayag sa mga paghukom ni Jehova nga dili magustohan sa kadaghanang tawo. Sa pagkatinuod, kini naglakip sa mga hampak nga gitagna sa Pinadayag kapitulo 8. Apan, kini matam-is alang sa sinserong mga Kristohanon tungod kay ilang nasabtan ang maong mga paghukom ug ilang naamgohan nga sila gigamit na usab ni Jehova sa pagmantala niini.—Salmo 19:9, 10.

21. (a) Sa unsang paagi ang mensahe sa gamayng linukot nga basahon nahimong matam-is usab alang sa dakong panon? (b) Nganong ang maayong balita maoy daotang balita alang sa mga kaaway?

²¹ Sa ngadtongadto, ang mensahe niining linukot nga basahon nahimong matam-is usab alang sa “dakong panon . . . gikan sa tanang kanasoran ug mga tribo ug katawhan ug mga pinulongan” nga nagapanghupaw tungod sa dulumtanang mga butang nga ilang nakita nga gihimo sa Kakristiyanohan. (Pinadayag 7:9; Ezequiel 9:4) Sila usab masibotong nagmantala sa maayong balita, nga naggamit ug matam-is, madanihong mga pulong sa paghubit sa maayo kaayong tagana ni Jehova alang sa samag-karnero nga mga Kristohanon. (Salmo 37:11, 29; Colosas 4:6) Apan alang sa mga kaaway, kini daotang balita. Ngano? Tungod kay ang sistema nga ilang gisaligan—ug lagmit nakahatag pa gani kanila ug lumalabay nga katagbawan—kinahanglang mahanaw. Alang kanila, ang maayong balita nagkahulogan ug kalaglagan.—Filipos 1:27, 28; itandi ang Deuteronomio 28:15; 2 Corinto 2:15, 16.

[Mga Pangutana sa Pagtuon]

[Mga hulagway sa panid 160]

Ang Juan nga matang ug ang ilang mga kauban nagmantalag usa ka matam-is ug mapait nga mensahe ngadto sa tanang tawo