Kapitulo 3

Mga Butang nga Kinahanglang Mahitabo sa Dili-Madugay

1. Sa unsang paagi makaikyas ka sa paghukom sa Diyos niining kalibotana?

 ANGAY kang mabalaka sa mga nagakahitabo sa kalibotan karon. Ngano? Tungod kay kining kalibotana dili makaikyas sa paghukom sa Diyos. Apan ikaw mahimong makaikyas. Makaikyas ka kon ikaw “dili bahin sa kalibotan” nga gihukmang pagalaglagon. Wala kini magpasabot nga magsubay ka ug simple, samag-monghe nga kinabuhi. Kini nagkahulogan nga samtang nagtagamtam ka ug malipayon, may-katuyoan nga kinabuhi, nagpalayo ka gikan sa kadunotan sa politika, gikan sa hakog nga komersiyalismo, ug gikan sa nagpasipala-sa-Diyos nga relihiyon, maingon man gikan sa mapintas ug daotang kagawian. Sa samang panahon, kinahanglang imong sundon ang hataas nga mga sukdanan sa Diyos sa paggawi ug maningkamot sa pagtuman sa iyang kabubut-on. (Juan 17:14-16; Sofonias 2:2, 3; Pinadayag 21:8) Ang basahong Pinadayag sa Bibliya nagpakita nga importante gayod nga maningkamot ka sa pagpadapat niining mga butanga, ug maghimog gikinahanglang mga kausaban sa imong paagi sa pagkinabuhi.

2. Sa unsang paagi gipaila ni apostol Juan ang dakong tagna sa Pinadayag, ug ngadto kang kinsa gihatag sa Diyos kining hinungdanong mensahe?

² Gipaila ni apostol Juan kining dakong tagna pinaagi sa mga pulong: “Usa ka pinadayag ni Jesu-Kristo, nga gihatag sa Diyos kaniya, aron ipakita sa iyang mga ulipon ang mga butang nga kinahanglang mahitabo sa dili-madugay.” (Pinadayag 1:1a) Busa, ang gibanhaw nga Jesu-Kristo mao ang midawat niining hinungdanong mensahe gikan sa Diyos. Inay kay bahin sa usa ka misteryosong Trinidad, si Jesus dinhi gipakita nga nagpasakop sa iyang Amahan. Sa samang paagi, ang “mga ulipon” nga naglangkob sa Kristohanong kongregasyon nagpasakop usab kang Jesu-Kristo, mao nga sila ‘nagpadayon sa pagsunod kaniya bisan asa siya moadto.’ (Pinadayag 14:4; Efeso 5:24) Apan kinsa karon ang tinuod nga “mga ulipon” sa Diyos, ug sa unsang paagi makabenepisyo sila sa Pinadayag?

3. (a) Kinsa ang “mga ulipon” nga nagpasakop kang Jesu-Kristo? (b) Unsang buluhaton ang gihimo sa matinumanong “mga ulipon” ilalom sa pagtultol sa manulonda?

³ Si apostol Juan, nga nagsulat sa Pinadayag, naghubit sa iyang kaugalingon ingon nga ulipon. Siya ang kataposang buhi nga apostol ug usa sa piniling grupo sa “mga ulipon” nga dinihogan sa espiritu nga magapanunod ug imortal nga kinabuhi sa langit. Karon, pipila ka libo na lang kanila ang nahibilin sa yuta. Ang Diyos adunay ubang mga alagad usab, usa ka dakong panon sa mga lalaki, mga babaye, ug mga bata, nga may gidaghanon karon nga minilyon. Ilalom sa pagtultol sa manulonda, kini sila nakigbahin sa dinihogang “mga ulipon” sa pagmantala sa walay-kataposang maayong balita ngadto sa tanang katawhan. Ang maong “mga ulipon” naghago gayod sa pagtabang sa mga maaghop sa yuta aron makabaton ug kaluwasan! (Mateo 24:14; Pinadayag 7:9, 14; 14:6) Gipakita sa Pinadayag kon unsay imong kinahanglang himoon aron makabenepisyo ka sa makalilipay nga maayong balita.

4. (a) Sanglit kapin na sa 1,900 ka tuig ang milabay sukad nga gisulat ni Juan ang Pinadayag, sa unsang paagi siya nakasulti sa “mga butang nga kinahanglang mahitabo sa dili-madugay”? (b) Unsa ang gipakita sa ebidensiya karon mahitungod sa mga butang nga gitagna?

⁴ Apan, sa unsang paagi nakasulti si Juan nga  kining “mga ulipon” makakita sa “mga butang nga kinahanglang mahitabo sa dili madugay”? Dili ba gisulti man kining mga pulonga kapin na sa 1,900 ka tuig kanhi? Sa panglantaw ni Jehova, nga kaniya ang usa ka libo ka tuig samag “kagahapon” lamang, ang 1,900 ka tuig maoy mubo lamang nga panahon kon itandi sa dili-maihap nga katuigan nga iyang gigugol sa paglalang ug pag-andam sa yuta aron pagapuy-an sa tawo. (Salmo 90:4) Si apostol Pablo nagsulat bahin sa iyang “maikagong pagdahom ug paglaom,” kay sa walay duhaduha alang kaniya hapit na gayod niyang maangkon ang iyang ganti. (Filipos 1:20) Apan, sa pagkakaron, daghan kaayog ebidensiya nga ang tanang mga butang nga gitagna matuman sumala sa gitakda nga panahon. Wala pa sukad mahitabo sa kasaysayan nga ang kaluwasan sa katawhan nameligro. Ang Diyos lamang ang may solusyon!—Isaias 45:21.

Alagianan sa Komunikasyon

5. Sa unsang paagi napasa ang Pinadayag ngadto kang apostol Juan ug dayon sa mga kongregasyon?

⁵ Ang Pinadayag 1:1b, 2 nagpadayon: “Ug iyang [si Jesus] gipadala ang iyang manulonda ug pinaagi kaniya gipadayag kini [ang Pinadayag] pinaagig mga ilhanan ngadto sa iyang ulipon nga si Juan, kinsa nagpamatuod bahin sa pulong nga gihatag sa Diyos ug sa gipamatud-an ni Jesu-Kristo, sa tanang butang nga iyang nakita.” Busa, nadawat ni Juan ang inspiradong rekord pinaagi sa usa ka mensahero nga manulonda. Kini iyang gisulat diha sa linukot nga basahon, ug gipadala ngadto sa mga kongregasyon sa iyang panahon. Makalilipay nga gitipigan kini sa Diyos aron mapalig-on ang halos 100,000 ka kongregasyon sa iyang nahiusa nga mga alagad sa yuta karon.

6. Sa unsang paagi gipaila ni Jesus ang alagianan nga iyang gamiton sa pagtaganag espirituwal nga pagkaon alang sa iyang ‘mga ulipon’ karon?

⁶ Ang Diyos adunay gigamit nga alagianan aron mabutyag ang Pinadayag sa adlaw ni Juan, ug si Juan mao ang yutan-ong bahin niana nga alagianan. Mao man usab karon, ang Diyos may gigamit nga alagianan sa paghatag ug espirituwal nga pagkaon sa iyang ‘mga ulipon.’ Sa iyang dakong tagna mahitungod sa kataposan sa sistema sa mga butang, gipaila ni Jesus ang yutan-ong bahin niini nga alagianan ingong ang “matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon.” (Mateo 24:3, 45-47) Iyang gigamit kining Juan nga matang sa pagpahayag sa kahulogan sa tagna.

7. (a) Sa unsang paagi kita angayng maapektohan sa mga ilhanan sa Pinadayag? (b) Unsa na ka dugay nga nakapakigbahin ang pipila sa Juan nga matang sa katumanan sa mga panan-awon sa Pinadayag?

⁷ Si apostol Juan nagsulat nga si Jesus nagpresentar sa Pinadayag pinaagig “mga ilhanan,” o mga simbolo. Kon susihon, kini buhi ug makapaukyab. Gihulagway niini ang gamhanang mga buhat nga angayng magpalihok kanato sa pagkugi pa sa pagpahibalo sa uban sa maong tagna ug  sa kahulogan niini. Ang Pinadayag nagpresentar kanato ug pipila ka makapatandog nga mga panan-awon, nga sa matag usa niini si Juan aktibo nga nakigbahin o usa ka maniniid. Ang sakop sa Juan nga matang, nga ang pipila kanila daghan nang katuigan nga nakapakigbahin sa katumanan niining maong mga panan-awon, nalipay nga gipadayag sa espiritu sa Diyos ang kahulogan niini aron ilang ikapatin-aw kini sa uban.

8. (a) Unsay nakapatalagsaon sa matag usa sa mga panan-awon sa Pinadayag? (b) Sa unsang paagi gitabangan kita sa tagna ni Daniel sa pagsabot kon kinsa ang gihulagwayan sa mga mananap sa Pinadayag?

⁸ Dili sunodsunod ang pagkahan-ay sa mga panan-awon sa Pinadayag. Ang matag usa ka panan-awon matuman sa gitakda nga panahon niini. Daghan sa mga panan-awon nagsubli lamang sa mga pulong sa mas una pang mga tagna nga naghatag ug mga ideya mahitungod sa kahulogan niini. Pananglitan, gihubit sa tagna ni Daniel ang upat ka makahahadlok nga mga mananap, ug iyang gipatin-aw nga naghulagway kini sa mga kagamhanan nga nagmando sa yuta. Busa, kita gitabangan sa pagsabot nga ang mga mananap sa Pinadayag naghulagway sa politikal nga mga kagamhanan, lakip na kanang naglungtad karon.—Daniel 7:1-8, 17; Pinadayag 13:2, 11-13; 17:3.

9. (a) Sama kang Juan, unsang tinamdan ang gipakita sa Juan nga matang? (b) Unsay giingon ni Juan nga paagi aron kita magmalipayon?

⁹ Si Juan matinumanon sa pagpamatuod sa mensahe nga gihatag kaniya sa Diyos pinaagi ni Jesu-Kristo. Detalyado niyang gihubit ang “tanang butang nga iyang nakita.” Ang Juan nga matang kinasingkasing nga nangitag pagtultol gikan sa Diyos ug ni Jesu-Kristo aron ilang masabtan sa bug-os ang tagna ug ilang ikatudlo ang maayong mga punto niini ngadto sa katawhan sa Diyos. Alang sa kaayohan sa dinihogang kongregasyon (ug sa internasyonal nga dakong panon usab nga tipigang buhi sa Diyos sa dakong kasakitan), si Juan nagsulat: “Malipayon siya nga nagabasa sa makusog ug kadtong nagapatalinghog sa mga pulong niini nga tagna, ug kinsa nagatuman sa mga butang nga nahisulat niini; kay ang tinudlong panahon haduol na.”—Pinadayag 1:3.

10. Unsa ang angay natong himoon may kalabotan sa Pinadayag aron magmalipayon?

¹⁰ Makabenepisyo kag dako kon imong basahon ang Pinadayag ug ilabina kon imong tumanon ang mga butang nga nasulat niini. Si Juan nagpatin-aw diha sa usa sa iyang mga sulat: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at, tungod kay ang tanan nga gipanganak gikan sa Diyos nagadaog sa kalibotan. Ug kini ang pagdaog nga nakadaog sa kalibotan, ang atong pagtuo.” (1 Juan 5:3, 4) Magmalipayon ka gayod kon palig-onon mo ang maong pagtuo!

11. (a) Nganong dinalian nga atong tumanon ang mga pulong sa tagna? (b) Unsang panahon ang haduol na gayod?

¹¹ Dinalian nga atong tumanon ang mga pulong sa tagna, “kay ang tinudlong panahon haduol na.” Ang tinudlong panahon sa unsa? Sa katumanan sa mga tagna sa Pinadayag, lakip na ang mga paghukom sa Diyos. Haduol na ang panahon nga ipatuman sa Diyos ug ni Jesu-Kristo ang kataposang paghukom sa sistema sa kalibotan ni Satanas. Sa dinhi pa si Jesus sa yuta, siya nag-ingon nga ang iyang Amahan lamang ang nahibalo “nianang adlawa o taknaa.” Nagapanglantaw sa mga problema nga nagkadaghan sa yuta sa atong panahon karon, si Jesus nag-ingon usab: “Kining kaliwatana dili gayod mahanaw hangtod nga mahitabo kining tanang butanga.” Busa ang tinudlong panahon sa pagpatuman sa desisyon sa Diyos lagmit haduol na gayod. (Marcos 13:8, 30-32) Ingon sa gipahayag sa Habacuc 2:3: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan, padayon sa pagpaabot niini; kay kini matuman gayod. Kini dili maulahi.” Ang atong kaluwasan sa dakong kasakitan nagaagad sa atong pagtuman sa matagnaong Pulong sa Diyos.—Mateo 24:20-22.

[Mga Pangutana sa Pagtuon]

[Kahon sa panid 15]

Aron masabtan ang basahon sa Pinadayag kinahanglan natong

● Dawaton ang tabang sa espiritu ni Jehova

● Masabtan kon kanus-a nagsugod ang adlaw sa Ginoo

● Mailhan ang matinumanon ug maalamong ulipon karon