Kapitulo 29

Nanag-awit sa Madaogong Bag-ong Awit

Panan-awon 9​—Pinadayag 14:1-20

Ulohan: Ang 144,000 uban sa Kordero sa Bukid sa Zion; gipalanog sa tibuok yuta ang mga pahibalo sa manulonda; ginaani ang mga abot

Panahon sa katumanan: 1914 hangtod sa dakong kasakitan

1. Unsa nay atong nakat-onan mahitungod sa Pinadayag mga kapitulo 7, 12, ug 13, ug unsay atong makat-onan karon?

 PAGKAMAKAPAHAYAHAY nga iliso ang atong pagtagad sa sunod nga panan-awon ni Juan! Lahi sa mangil-ad, samag-mananap nga mga organisasyon sa dragon, atong makita karon ang maunongong mga alagad ni Jehova ug ang ilang mga kalihokan panahon sa adlaw sa Ginoo. (Pinadayag 1:10) Ang Pinadayag 7:1, 3 nagbutyag na kanato nga ang upat ka hangin sa kalaglagan ginapugngan hangtod matimbrehan na ang tanang 144,000 ka dinihogang mga ulipon. Ang Pinadayag 12:17 nagpahibalo nga kining ‘mga nahibilin sa binhi sa babaye’ nahimong linaing puntirya ni Satanas, ang dragon, sulod nianang panahona. Ug ang Pinadayag kapitulo 13 tin-awng naghulagway sa politikanhong mga organisasyon nga gipatungha ni Satanas dinhi sa yuta aron ipahinabo ang dakong kapit-osan ug pintas nga paglutos diha sa matinumanong mga alagad ni Jehova. Apan ang maong pangunang kaaway dili makasanta sa katuyoan sa Diyos! Ato karong makat-onan nga bisan pa sa pagpangdaot ni Satanas, ang tanang 144,000 malamposong natigom.

2. Unsang pasiunang talan-awon bahin sa malipayong sangpotanan ang gihatag kanato ni Juan diha sa Pinadayag 14:1, ug kinsa ang Kordero?

² Si Juan, ug ang iyang kaubang Juan nga matang karon, gihatagan ug pasiunang talan-awon nianang malipayong sangpotanan: “Ug nakita ko, ug, tan-awa! ang Kordero nga nagbarog diha sa Bukid sa  Zion, ug uban kaniya ang usa ka gatos ug kap-atag-upat ka libo nga nakabaton sa iyang ngalan ug sa ngalan sa iyang Amahan nga nasulat diha sa ilang mga agtang.” (Pinadayag 14:1) Sumala sa ato nang nasabtan, kining Kordero mao si Miguel nga naghinlo sa mga langit pinaagi sa pagpalagpot sa Yawa ug sa iyang mga demonyo. Siya mao si Miguel nga gihubit ni Daniel nga ‘nagbarog alang sa mga anak sa katawhan sa Diyos’ samtang siya nangandam nga “mobarog” sa pagpatuman sa matarong nga mga paghukom ni Jehova. (Daniel 12:1; Pinadayag 12:7, 9) Sukad sa 1914 kining nagsakripisyo-sa-kaugalingon nga Kordero sa Diyos nagbarog na sa Bukid sa Zion ingon nga Mesiyanikong Hari.

3. Unsa ang “Bukid sa Zion” nga diha niana “nagbarog” ang Kordero ug ang 144,000?

³ Sama gayod sa gitagna ni Jehova: “Ako, ako mismo, nagpahimutang sa akong hari ibabaw sa Zion, ang akong bukid nga balaan.” (Salmo 2:6; 110:2) Wala na kini magtumong sa yutan-ong Bukid sa Zion, ang nahimutangan sa yutan-ong Jerusalem, nga sa maong siyudad ang tawhanong mga hari sa banay ni David nagmando kanhi. (1 Cronicas 11:4-7; 2 Cronicas 5:2) Wala kini magtumong nianang siyudara kay si Jesus, tapos sa iyang pagkamatay ug pagkabanhaw sa 33 K.P., gipahimutang na ingong usa ka patukoranang batong pamag-ang sa langitnong Bukid sa Zion, ang langitnong dapit nga gihukom ni Jehova nga maoy butangan sa “siyudad sa buhing Diyos, ang langitnong Jerusalem.” Busa, ang “Bukid sa Zion” dinhi naghawas sa binayaw nga katungdanan ni Jesus ug sa iyang kaubang mga manununod, nga naglangkob sa langitnong Jerusalem, nga mao ang Gingharian. (Hebreohanon 12:22, 28; Efeso 3:6) Kini mao ang ilang mahimayaon ug harianong kahimtang nga nganha niana sila gibayaw ni Jehova panahon sa adlaw sa Ginoo. Latas sa mga siglo, ang dinihogang mga Kristohanon, ingong “buhing mga bato,” maikagong nagdahom nga mobarog nianang langitnong Bukid sa Zion, nga nahiusa sa hinimayang Ginoong Jesu-Kristo diha sa iyang halangdong Gingharian.—1 Pedro 2:4-6; Lucas 22:28-30; Juan 14:2, 3.

4. Sa unsang paagi ang tanang 144,000 nagbarog sa Bukid sa Zion?

⁴ Dili lamang si Jesus ang nakita ni Juan kondili ang kompletong pundok sa 144,000 nga kaubang mga manununod sa langitnong Gingharian nga nagbarog sa Bukid sa Zion. Sa panahon nga gihulagway diha sa panan-awon, daghan, apan dili tanan, sa 144,000 ang atua na sa langit. Sa ulahing bahin sa samang panan-awon, nahibaloan ni Juan nga ang ubang mga balaan kinahanglan pang molahutay ug mamatay nga matinumanon. (Pinadayag 14:12, 13) Nan, dayag nga ang ubang sakop sa 144,000 ania pa sa yuta. Busa sa unsang paagi nga silang tanan nakita ni Juan nga nagbarog uban kang Jesus sa Bukid sa Zion? a Sa pagkaagi nga, ingong mga membro sa kongregasyon sa dinihogang mga Kristohanon, sila karon “nakaduol [na] sa Bukid sa Zion ug sa siyudad sa buhing Diyos, ang langitnong Jerusalem.” (Hebreohanon 12:22) Sama kang Pablo sa dinhi pa siya sa yuta, sila nabanhaw—sa espirituwal nga diwa—aron mahiusa uban kang Kristo Jesus sa langit. (Efeso 2:5, 6) Dugang pa, niadtong 1919 ilang gidawat ang imbitasyon, “Saka kamo ngari,” ug sa masambingayong paagi “sila misaka sa langit diha sa panganod.” (Pinadayag 11:12) Gumikan niining mga tekstoha, atong masabtan nga ang tanang 144,000—sa espirituwal nga pagkasulti—anaa sa Bukid sa Zion uban ni Jesu-Kristo.

5. Kang kinsang mga ngalan ang nasulat diha sa mga agtang sa 144,000, ug unsay ipasabot sa matag ngalan?

⁵ Ang 144,000 dili makigbahin sa mga magsisimba sa mapintas nga mananap, kinsa markado sa simbolikong numero nga 666. (Pinadayag 13:15-18) Sa kasukwahi, ang ngalan sa Diyos ug sa Kordero nasulat diha sa mga agtang sa maong  mga maunongon. Walay duhaduha nga si Juan, nga usa ka Hudiyo, nakakita sa ngalan sa Diyos diha sa Hebreohanong mga titik, יהוה. b Kay nasulat sa simbolikong paagi ang ngalan sa Amahan ni Jesus diha sa ilang mga agtang, kining mga tinimbrehan nagpahibalo sa tanan nga sila maoy mga saksi ni Jehova, nga Iyang mga ulipon. (Pinadayag 3:12) Ang ilang pagpasundayag usab sa ngalan ni Jesus diha sa ilang mga agtang nagpasabot nga ilang giila nga siya ang nanag-iya kanila. Siya ang ilang gisaad nga ‘pamanhonon,’ ug sila ang iyang umaabot nga “pangasaw-onon,” nga “usa ka bag-ong linalang” nga nagaalagad sa Diyos nga may tumong nga langitnong kinabuhi. (Efeso 5:22-24; Pinadayag 21:2, 9; 2 Corinto 5:17) Ang ilang suod nga relasyon uban kang Jehova ug Jesu-Kristo nag-impluwensiya sa ilang tanang panghunahuna ug mga buhat.

Nag-awit ug Daw Usa ka Bag-ong Awit

6. Unsang pag-awit ang nadungog ni Juan, ug sa unsang paagi gihubit niya kini?

⁶ Uyon niini, si Juan mitaho: “Ug nadungog ko ang usa ka tingog gikan sa langit nga ingon sa dinaganas sa daghang katubigan ug ingon sa dinahunog sa makusog nga dalugdog; ug ang tingog nga akong nadungog maoy ingon sa mga mag-aawit nga dinuyogan sa alpa nga nagpatugtog sa ilang mga alpa. Ug sila nag-awit ug daw usa ka bag-ong awit diha sa atubangan sa trono ug atubangan sa upat ka buhing linalang ug sa mga ansiyano; ug walay makakat-on sa bug-os sa maong awit gawas sa usa ka gatos ug kap-atag-upat ka libo, nga gipalit gikan sa yuta.” (Pinadayag 14:2, 3) Dili katingalahan nga si Juan, sa pagkadungog sa tingog sa 144,000 nga nahiusa sa usa ka mananoy nga koro, nahinumdom sa dinaganas sa mga busay ug sa dinahunog sa mga dalugdog. Pagkanindot nianang klaro, samag-alpa nga duyog! (Salmo 81:2) Aduna bay koro sa yuta nga makatupong sa kaanindot nianang talagsaong pag-awit?

7. (a) Unsa ang bag-ong awit sa Pinadayag 14:3? (b) Sa unsang paagi ang awit sa Salmo 149:1 bag-o sa atong adlaw?

⁷ Ug unsa ba kining “bag-ong awit”? Sumala sa ato nang namatikdan sa paghisgot sa Pinadayag 5:9, 10, ang awit adunay kalabotan sa mga katuyoan sa Gingharian ni Jehova ug sa iyang kahibulongang tagana, pinaagi ni Jesu-Kristo, nga himoon ang espirituwal nga Israel nga “usa ka gingharian ug mga saserdote ngadto sa atong Diyos.” Usa kini ka awit sa pagdayeg kang Jehova nga nagmantala sa bag-ong mga butang nga iyang ginahimo pinaagi ug alang sa Israel sa Diyos. (Galacia 6:16) Ang mga membro niining espirituwal nga Israel misanong sa imbitasyon sa salmista: “Dayega ninyo si Jah! Pag-awit kang Jehova ug usa ka bag-ong awit, ang iyang pagdayeg diha sa kongregasyon sa mga maunongon. Magmaya unta ang Israel sa iyang Dakong Magbubuhat, ang mga anak sa Zion—magmalipayon unta sila sa ilang Hari.” (Salmo 149:1, 2) Matuod, kanang mga pulonga gisulat mga siglo na kanhi, apan sa atong adlaw, kini giawit uban ang bag-ong pagsabot. Niadtong 1914 ang Mesiyanikong Gingharian natukod. (Pinadayag 12:10) Niadtong 1919 ang katawhan ni Jehova sa yuta misugod sa pagpahibalo sa “pulong sa gingharian” uban ang bag-ong kadasig. (Mateo 13:19) Kay gipalihok sa tinuig nga teksto para sa 1919 (Isaias 54:17) ug nadasig tungod kay sila napasig-uli sa espirituwal nga paraiso, nianang tuiga sila misugod sa ‘pag-awit kang Jehova uban sa honi diha sa ilang mga kasingkasing.’—Efeso 5:19.

8. Nganong 144,000 lamang ang makakat-on sa bag-ong awit sa Pinadayag 14:3?

⁸ Apan, nganong 144,000 lamang ang makakat-on sa awit nga gihisgotan sa Pinadayag 14:3? Tungod kay kini adunay kalabotan sa ilang mga kasinatian ingon nga piniling mga manununod sa Gingharian sa Diyos. Sila lamang ang gisagop ingong mga anak sa Diyos ug gidihogan sa balaang espiritu. Sila lamang ang gipalit gikan sa yuta aron mahimong bahin nianang langitnong Gingharian, ug sila lamang ang “mahimong mga saserdote . . . ug magamando ingong mga hari” uban ni Jesu-Kristo sulod sa usa ka libo ka tuig aron pagahingpiton ang katawhan. Sila lamang ang nakita nga “nag-awit ug daw usa ka bag-ong awit” sa mismong presensiya ni Jehova. c  Kining talagsaong mga kasinatian ug mga palaaboton naghatag kanila ug linaing pagpabili sa Gingharian ug nakapaarang kanila sa pag-awit mahitungod niini sa paaging walay lain ang makahimo niana.—Pinadayag 20:6; Colosas 1:13; 1 Tesalonica 2:11, 12.

9. Sa unsang paagi misanong ang dakong panon sa pag-awit sa mga dinihogan, ug busa unsang pag-awhag ang ilang gibuhat?

⁹ Hinuon, ang uban namati ug misanong sa ilang pag-awit. Sukad sa 1935 ang nag-uswag nga dakong panon sa ubang mga karnero nakadungog sa ilang madaogong awit ug nadasig sa pagduyog kanila diha sa pagmantala sa Gingharian sa Diyos. (Juan 10:16; Pinadayag 7:9) Matuod, kining mga bag-ohan dili makakat-on sa eksaktong pag-awit sa mismong bag-ong awit nga giawit sa umaabot nga mga magmamando sa Gingharian sa Diyos. Apan ilang gipalanog usab ang usa ka mananoy nga koro sa pagdayeg kang Jehova sa usa ka balaang awit nga nagdayeg kang Jehova tungod sa bag-ong mga butang nga iyang gilalang. Sa ingon ilang gibuhat ang giawhag sa salmista: “Pag-awit kang Jehova ug usa ka bag-ong awit. Pag-awit kang Jehova, kamong tibuok nga katawhan sa yuta. Pag-awit kamo kang Jehova, dayega ang iyang ngalan. Sa matag adlaw imantala ang maayong balita sa iyang pagluwas. Ipahayag sa taliwala sa kanasoran ang iyang himaya, ang iyang katingalahang mga buhat sa taliwala sa tanang mga katawhan. Ipahinungod kang Jehova, Oh kamong kabanayan sa mga katawhan, ipahinungod kang Jehova ang himaya ug kusog. Isulti taliwala sa kanasoran: ‘Si Jehova nahimong hari.’”—Salmo 96:1-3, 7, 10; 98:1-9.

10. Sa unsang paagi ang 144,000 makaawit “atubangan” sa simbolikong 24 ka ansiyano?

¹⁰ Sa unsang paagi ang 144,000 makaawit “atubangan” sa mga ansiyano, sanglit ang 24 ka ansiyano mao man ang 144,000 diha sa ilang mahimayaon nga langitnong katungdanan? Sa sinugdan sa adlaw sa Ginoo, kadtong “nangamatay nga nahiusa kang Kristo” gibanhaw ingong espiritung mga linalang. Busa, ang matinumanon nga dinihogang mga Kristohanon nga nagmadaogon atua na karon sa langit, nga sa simbolikong paagi nagtuman sa mga katungdanan nga susama niadtong sa 24 ka bahin sa saserdotehanong mga ansiyano. Nalakip sila sa panan-awon sa langitnong organisasyon ni Jehova. (1 Tesalonica 4:15, 16; 1 Cronicas 24:1-18; Pinadayag 4:4; 6:11) Busa ang nahibilin sa 144,000 nga ania pa sa yuta nag-awit sa bag-ong awit sa atubangan o sa panan-aw sa ilang nabanhaw nang mga igsoon sa langit.

11. Nganong ang nagmadaogong mga dinihogan gipunting ingon nga 24 ka ansiyano ug 144,000 usab?

¹¹ Niining tungora kita makapangutana usab: Nganong kining nagmadaogong mga dinihogan gitumong ingon nga simbolikong 24 ka ansiyano ug ingong ang 144,000 usab? Tungod kay gisabot sa Pinadayag kining usa ka grupo pinasukad sa duha ka magkalain nga mga punto-debista. Ang 24 ka ansiyano kanunayng gipakita nga anaa sa ilang kinatas-ang katungdanan alirong sa trono ni Jehova, nga gipalingkod na ingong mga hari ug mga saserdote sa mga langit. Sila nagsimbolo sa enterong grupo sa 144,000 nga anaa sa ilang langitnong katungdanan, bisan pag sa pagkakaron ang diyutayng nahibilin niini ania pa sa yuta. (Pinadayag 4:4, 10; 5:5-14; 7:11-13; 11:16-18) Bisan pa niana, gipunting sa Pinadayag kapitulo 7 nga ang 144,000 gipatungha gikan sa katawhan, ug kini nagpasiugda sa talagsaong katuyoan ni Jehova nga timbrehan ang kompletong gidaghanon sa tagsatagsa ka espirituwal nga mga Israelinhon ug luwason ang dili-maihap nga dakong panon. Ang Pinadayag kapitulo 14 naghatag ug usa ka hulagway nga nagpamatuod nga ang kompleto nga Gingharianong matang nga 144,000 ka indibiduwal nga nagmadaogon tigomon uban sa Kordero sa Bukid sa Zion. Ang mga kuwalipikasyon nga kinahanglang kab-oton aron maihap kauban sa 144,000 gipahibalo usab, sumala sa atong masabtan karon. d

Mga Sumusunod sa Kordero

12. (a) Sa unsang paagi gipadayon ni Juan ang iyang paghubit sa 144,000? (b) Sa unsang diwa nga ang 144,000 giingon nga mga ulay?

¹² Sa pagpadayon sa iyang paghubit sa 144,000 nga “gipalit gikan sa yuta,” si Juan nag-ingon kanato: “Mao kini sila ang wala mahugawi sa mga babaye; sa pagkatinuod, sila mga ulay. Mao kini sila ang nagpadayon  pagsunod sa Kordero bisan asa siya moadto. Kini sila gipalit gikan sa katawhan ingong mga unang bunga ngadto sa Diyos ug sa Kordero, ug walay kabakakan nga nakaplagan sa ilang mga baba; sila walay lama.” (Pinadayag 14:4, 5) Ang kamatuoran nga ang 144,000 maoy “mga ulay” wala magpasabot nga ang mga membro niining grupoha dili gayod minyo samtang tawhanon pa. Si apostol Pablo misulat sa mga Kristohanon nga may langitnong pagtawag nga, bisag adunay mga bentaha nga ang usa ka Kristohanon dili magminyo, mas maayo ang pagminyo ubos sa pipila ka sirkumstansiya. (1 Corinto 7:1, 2, 36, 37) Ang butang nga nagtimaan niining grupoha mao ang espirituwal nga pagkaulay. Ilang gilikayan ang espirituwal nga pagpanapaw uban sa politika sa kalibotan ug sa bakak nga relihiyon. (Santiago 4:4; Pinadayag 17:5) Ingong gisaad nga pangasaw-onon ni Kristo, padayon nilang gihuptan ang kaputli, nga “walay lama taliwala sa baliko ug hiwi nga kaliwatan.”—Filipos 2:15.

13. Nganong ang 144,000 angayan nga pangasaw-onon alang kang Jesu-Kristo, ug sa unsang paagi sila “nagpadayon pagsunod sa Kordero bisan asa siya moadto”?

¹³ Dugang pa, “walay kabakakan nga nakaplagan sa ilang mga baba.” Niini, sila sama sa ilang Hari nga si Jesu-Kristo. Ingong usa ka hingpit nga tawo, “siya walay nahimong sala, ni may nakaplagan nga limbong diha sa iyang baba.” (1 Pedro 2:21, 22) Tungod kay walay lama ug sa samang panahon maminatud-on, ang 144,000 giandam ingong usa ka putli nga pangasaw-onon alang sa dakong Hataas nga Saserdote ni Jehova. Sa dinhi si Jesus sa yuta, iyang gidapit ang mga tawo nga matarong ug kasingkasing sa pagsunod kaniya. (Marcos 8:34; 10:21; Juan 1:43) Ang mga misanong misundog sa iyang paagi sa pagkinabuhi ug nagtuman sa iyang mga gitudlo. Busa, panahon sa ilang yutan-ong pagkinabuhi, sila “nagpadayon pagsunod sa Kordero bisan asa siya moadto” samtang siya nagagiya kanila latas sa kalibotan ni Satanas.

14. (a) Sa unsang paagi ang 144,000 maoy “mga unang bunga ngadto sa Diyos ug sa Kordero”? (b) Sa unsang diwa ang dakong panon mga unang bunga usab?

¹⁴ Ang 144,000 “gipalit gikan sa yuta,” nga “gipalit gikan sa katawhan.” Gisagop sila ingong mga anak sa Diyos, ug human sa ilang pagkabanhaw, sila dili na yanong mga tawo nga unod-ug-dugo. Ingon sa gihisgotan sa bersikulo 4, sila nahimong “mga unang bunga ngadto sa Diyos ug sa Kordero.” Tinuod, niadtong unang siglo, si Jesus mao “ang unang bunga kanilang nangatulog sa kamatayon.” (1 Corinto 15:20, 23) Apan ang 144,000 mao ang “usa ka matang sa unang mga bunga” sa dili-hingpit nga katawhan, nga gipalit pinaagi sa halad ni Jesus. (Santiago 1:18) Bisan pa niana, ang pagpanigom ug mga bunga gikan sa katawhan dili matapos kanila. Ang basahon sa Pinadayag nagpunting sa pagpangani sa dili-maihap nga dakong panon nga nanagsinggit sa makusog nga tingog: “Ang kaluwasan utang namo  sa atong Diyos, nga naglingkod sa trono, ug sa Kordero.” Kining dakong panon makalabang-buhi sa dakong kasakitan, ug samtang sila magpadayon nga mapalig-on sa “mga tuboran sa mga tubig sa kinabuhi,” sila modangat sa tawhanong kahingpitan dinhi sa yuta. Sa usa ka panahon human sa dakong kasakitan, habwaan ang Hades, ug ang dili-maihap nga minilyong ubang mga tawo banhawon ug makahigayon sa pag-inom gikan nianang mga tubiga mismo sa kinabuhi. Nga naghunahuna niini, husto ang pagtawag sa dakong panon ingong mga unang bunga sa ubang mga karnero—sila ang unang ‘naglaba sa ilang tag-as nga mga besti ug nagpaputi niana sa dugo sa Kordero’ uban ang paglaom nga mabuhing walay kataposan sa yuta.—Pinadayag 7:9, 10, 14, 17; 20:12, 13.

15. Unsa ang mga katumbas tali sa tulo ka magkalain nga mga unang bunga ug sa mga pista nga gisaulog ubos sa Moisesnong Balaod?

¹⁵ Kining tulo ka unang mga bunga (si Jesu-Kristo, ang 144,000, ug ang dakong panon) may makapaikag nga mga katumbas diha sa mga pista nga gisaulog sumala sa karaan nga Moisesnong Balaod. Sa Nisan 16, panahon sa Pista sa mga Tinapay nga Walay Igpapatubo, ang usa ka binangan sa mga unang bunga sa ani nga sebada gihalad kang Jehova. (Levitico 23:6-14) Ang Nisan 16 mao ang adlaw nga gibanhaw si Jesus gikan sa mga patay. Sa ika-50 ka adlaw gikan sa Nisan 16, sa ikatulong bulan, ang mga Israelinhon nagsaulog sa pista sa pagpangani sa unang hinog nga mga bunga sa ani nga trigo. (Exodo 23:16; Levitico 23:15, 16) Kining pistaha gitawag ug Pentekostes (gikan sa Gregong pulong nga nagkahulogang “ikakalim-an”), ug maoy panahon sa Pentekostes 33 K.P. nga ang unang mga membro sa 144,000 gidihogan sa balaang espiritu. Sa kaulahian, sa ikapitong bulan sa dihang ang bug-os nga ani nahipos na, dihay Pista sa mga Balongbalong, nga usa ka panahon sa malipayong pagpasalamat sa dihang ang mga Israelinhon nanagpuyo sa mga balongbalong nga hinimo sa mga palwa sa palma ug ubang mga materyales sulod sa usa ka semana. (Levitico 23:33-43) Sa katumbas niana, ang dakong panon, nga maoy bahin sa dakong pagpanigom, nagpasalamat sa atubangan sa trono nga nagdalag “mga palwa sa palma diha sa ilang mga kamot.”—Pinadayag 7:9.

 Pagpahayag sa Walay Kataposang Maayong Balita

16, 17. (a) Diin nakita ni Juan nga naglupad ang usa ka manulonda, ug unsay gimantala sa manulonda? (b) Kinsa ang nalangkit sa buluhaton sa pagwali sa Gingharian, ug unsang mga kasinatian ang nagpakita niini?

¹⁶ Unya si Juan misulat: “Ug nakita ko ang laing manulonda nga naglupad sa kinatung-an sa langit, ug siya adunay walay kataposang maayong balita nga ipahayag ingong makapalipay nga balita ngadto sa mga nanagpuyo sa yuta, ug ngadto sa matag nasod ug tribo ug pinulongan ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.’” (Pinadayag 14:6, 7) Ang manulonda nagalupad “sa kinatung-an  sa langit,” diin nagalupad ang mga langgam. (Itandi ang Pinadayag 19:17.) Busa, ang iyang tingog madungog sa tibuok yuta. Pagkalayo ang maabot niining tibuok-kalibotang pagmantala sa manulonda kay sa maabot sa bisan unsang sibya sa balita sa telebisyon!

¹⁷ Ang tanan giawhag sa pagkahadlok, dili sa mapintas nga mananap ug sa larawan niini, kondili kang Jehova, nga labi pa gayong gamhanan kay sa bisan unsang simbolikong mananap nga kontrolado ni Satanas. Ngani, si Jehova ang naglalang sa langit ug sa yuta, ug karon miabot na ang panahon aron iyang pagahukman ang yuta! (Itandi ang Genesis 1:1; Pinadayag 11:18.) Sa dinhi sa yuta, si Jesus mitagna mahitungod sa atong adlaw: “Ug kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Ang kongregasyon sa dinihogang mga Kristohanon nagtuman niining sugoa. (1 Corinto 9:16; Efeso 6:15) Ang Pinadayag nagbutyag dinhi nga ang dili-makitang mga manulonda nalangkit usab niining buluhaton sa pagwali. Subsob nga nadayag ang paggiya sa manulonda aron maadto sa usa ka Saksi ni Jehova ang usa ka balay diin ang usa ka magul-anong tawo nangandoy, nag-ampo pa gani, alang sa espirituwal nga tabang!

18. Sumala sa manulonda nga naglupad sa kinatung-an sa langit, ang takna miabot na alang sa unsa, ug kinsa pa ang mopahayag ug dugang mga pahibalo?

¹⁸ Ingon sa gipahayag sa manulonda nga naglupad sa kinatung-an sa langit, ang takna sa paghukom miabot na. Unsang paghukom ang ipakanaog karon sa Diyos? Mosanting ang mga dalunggan tungod sa mga pahibalo nga ipahayag karon sa ikaduha, ikatulo, ikaupat, ug ikalimang manulonda.—Jeremias 19:3.

[Mga footnote]

[Mga Pangutana sa Pagtuon]

[Mga hulagway sa panid 202, 203]

144,000

24 ka ansiyano

Kaubang mga manununod sa Kordero, si Kristo Jesus, nga gisabot pinasukad sa duha ka magkalain nga mga punto-debista