Pagdumot sa “Lawom nga mga Butang ni Satanas”
Kapitulo 10
Pagdumot sa “Lawom nga mga Butang ni Satanas”
TIATIRA
1. Unsa ka layo ang Tiatira gikan sa ubang mga kongregasyon, ug unsa ang relihiyosong kahimtang didto?
MGA 65 kilometros habagatan-sidlakan sa Bergama (Pergamo) mao ang mauswagong lungsod sa Akhisar, Turkey. Duolan sa 1,900 ka tuig kanhi, kining lungsora ang nahimutangan sa Tiatira. Daling biyaheon sa usa ka nagapanawng magtatan-aw ang Tiatira agi sa interyor nga dalan gikan sa Pergamo ug dayon moduaw sa nahibiling mga kongregasyon nga gihisgotan sa Pinadayag kapitulo 3—ang Sardis, Filadelfia, ug Laodicea. Dili sama sa Pergamo, ang Tiatira daw dili prominenteng sentro sa pagsimba sa emperador, apan kini may mga altar ug templo alang sa paganong mga diyos. Ang Tiatira nabantog ingong sentro sa negosyo.
2, 3. (a) Unsa ang unang narekord bahin sa usa ka taga-Tiatira nga nahimong Kristohanon? (b) Unsay kahulogan alang sa mga Kristohanon sa Tiatira nga si Jesus mao ang “Anak sa Diyos” ug nga ang iyang “mga mata samag nagdilaab nga kalayo”?
2 Sa dihang si Pablo nagwali sa Macedonia, nakaila niya ang usa ka babayeng taga-Tiatira nga ginganlag Lydia, nga tigbaligyag purpura. Si Lydia ug ang tibuok niyang panimalay malipayong midawat sa mensahe nga giwali ni Pablo ug nagpakitag talagsaong pagkamaabiabihon. (Buhat 16:14, 15) Sumala sa rekord, siya ang unang taga-Tiatira nga midawat sa Kristiyanidad. Sa ngadtongadto, dihay natukod nga kongregasyon sa mga Kristohanon nianang siyudara. Si Jesus nagpadala sa iyang kinatas-ang mensahe didto: “Ug ngadto sa manulonda sa kongregasyon sa Tiatira isulat kini: Mao kini ang mga butang nga ginaingon sa Anak sa Diyos, kansang mga mata samag nagdilaab nga kalayo, ug ang iyang mga tiil samag dalisay nga tumbaga.”—Pinadayag 2:18.
3 Kini lamang ang bugtong higayon nga ang mga pulong “Anak sa Diyos” makita sa Pinadayag, bisan pag sa ubang mga teksto gitawag ni Jesus si Jehova ingong “akong Amahan.” (Pinadayag 2:27; 3:5, 21) Ang paggamit sa maong titulo dinhi dayag nga nagpahinumdom sa mga Kristohanon sa Tiatira sa pagkasuod ni Jesus kang Jehova. Kining maong Anak dunay “mga mata [nga] samag nagdilaab nga kalayo”—usa ka pasidaan sa mga Kristohanon sa Tiatira nga ang iyang paghukom mosilaob batok sa bisan unsa nga makita niyang makahugaw sa kongregasyon. Pinaagi sa paghisgot sa ikaduhang higayon bahin sa iyang nagsiga, samag-tumbaga nga mga tiil, siya nagpasiugda sa iya mismong maayo kaayong panig-ingnan sa pagkamatinumanon sa dinhi pa siya sa yuta. Ang mga Kristohanon sa Tiatira seguradong namati sa iyang tambag, ug kinahanglang mamati usab kita karon!—1 Pedro 2:21.
4, 5. (a) Nganong gikomendahan ni Jesus ang mga Kristohanon sa Tiatira? (b) Sa unsang paagi ang kongregasyon sa Tiatira sama sa mga kongregasyon sa mga Saksi ni Jehova karon?
4 Makalilipay nga gihatagan ni Jesus ug komendasyon ang mga taga-Tiatira. Siya nag-ingon: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.” (Pinadayag 2:19) Dili sama sa mga taga-Efeso, ang dinihogang mga Kristohanon didto wala mawad-i sa ilang unang gugma kang Jehova. Lig-on ang ilang pagtuo. Dugang pa, ang ilang mga buhat mas labaw pa kay sa kaniadto, ug sama sa unang tulo ka kongregasyon, ang mga Kristohanon sa Tiatira nagmalahutayon. Sama gayod niini ang halos 100,000 ka kongregasyon sa mga Saksi ni Jehova sa tibuok yuta karon! Ang ilang gugma kang Jehova dayag nga makita, samtang ang espiritu sa kadasig sa ministeryo mituhop sa organisasyon, nga nagpalihok sa mga batan-on ug mga tigulang. Nagakadaghan ang makugihong nagpayunir, sa ingon ilang gigamit nga maalamon ang nahibiling panahon sa pagmantala sa mahimayaong paglaom sa nagsingabot nga Gingharian sa Diyos!—Mateo 24:14; Marcos 13:10.
5 Sulod sa mga dekada, daghan sa matinumanong mga dinihogang nahibilin ug sa dakong panon ang nagpakitag talagsaong pagkamalahutayon sa pag-alagad sa Diyos, samtang ang kalibotan sa ilang palibot misamot kangitngit tungod sa kawalay paglaom. Apan magmaisogon kita! Gipamatud-an sa Pinadayag nga tinuod ang gipahayag sa unang mga manalagna sa Diyos. “Ang dakong adlaw ni Jehova haduol na. Kini haduol na, ug nagadali sa hilabihan.”—Sofonias 1:14; Joel 2:1; Habacuc 2:3; Pinadayag 7:9; 22:12, 13.
“Kanang Babaye nga si Jezebel”
6. (a) Bisan pa sa dalayegong mga hiyas niini, unsang problema ang namatikdan ni Jesus sa kongregasyon sa Tiatira nga nagkinahanglan ug dihadihang pagtagad? (b) Kinsa si Jezebel, ug siya ba may balidong pasikaranan sa pag-angkong manalagna?
6 Ang panan-aw sa nagdilaab nga mga mata ni Jesus milagbas pa. Iyang namatikdan ang usa ka butang nga nagkinahanglan ug dihadihang pagtagad. “Bisan pa niana,” iyang gisultihan ang mga Kristohanon sa Tiatira, “ako adunay ikasulti batok kanimo, nga gipasagdan lang nimo kanang babaye nga si Jezebel, kinsa nagtawag sa iyang kaugalingon nga usa ka manalagna, ug siya nagpanudlo ug nagpahisalaag sa akong mga ulipon aron makighilawas ug mokaon sa mga butang nga gihalad ngadto sa mga idolo.” (Pinadayag 2:20) Sa ikanapulong siglo W.K.P., si Raynang Jezebel, ang magsisimba kang Baal nga asawa ni Haring Ahab sa Israel, daotan ug dungog tungod sa iyang pagkamamumuno, pagkamananapaw, ug pagkadominante. Gipapatay siya ni Jehu, ang dinihogan ni Jehova. (1 Hari 16:31; 18:4; 21:1-16; 2 Hari 9:1-7, 22, 30, 33) Ang idolatrosong si Jezebel dili makapangangkon nga manalagna. Dili siya sama kang Miriam ug Debora nga nag-alagad ingong matinumanong mga manalagna sa Israel. (Exodo 15:20, 21; Maghuhukom 4:4; 5:1-31) Ug ang espiritu ni Jehova wala magpalihok kaniya sa pagpanagna maingon nga nagpalihok kini sa tigulang nga si Ana ug sa upat ka anak nga babaye ni Felipe nga ebanghelisador.—Lucas 2:36-38; Buhat 21:9.
7. (a) Sa paghisgot bahin ‘nianang babaye nga si Jezebel,’ unsang impluwensiya ang dayag nga gipasabot ni Jesus? (b) Sa unsang paagi lagmit gipakamatarong sa pipila ka nakig-anib nga mga babaye ang ilang pagkamabuotbuoton?
7 Nan, dayag nga “kanang babaye nga si Jezebel” nga nag-angkong manalagna sa Tiatira maoy mini. Siya wala paluyohi sa espiritu sa Diyos. Kinsa siya? Lagmit, siya usa ka babaye o grupo sa kababayen-an nga way-ulaw nga nagpakaylap ug daotang impluwensiya diha sa kongregasyon. Ang pipila ka nakig-anib nga mga babaye mahimong nag-impluwensiya sa mga membro sa kongregasyon sa pagpakigbahin sa imoralidad, samtang way-ulaw nga nagpakamatarong sa ilang pagkamabuotbuoton pinaagi sa pagtuis sa mga kasulatan. Bakak gayod kini nga pagpanagna! Ilang gidaldal ang uban sa pagsunod sa ilang mga buhat sa “pakighilawas, kahugawan, seksuwal nga gana, makadaot nga tinguha, ug hakog nga pangibog, nga maoy idolatriya.” (Colosas 3:5) Buot nila nga ang mga sakop sa kongregasyon magpatuyang sa imoral, maiyaiyahon nga estilo sa pagkinabuhi nga karon gitugotan, o gikonsentir, sa kadaghanang relihiyon sa Kakristiyanohan.
8. (a) Unsay gisulti ni Jesus bahin sa “Jezebel” sa Tiatira? (b) Sa unsang paagi ang daotag-impluwensiya nga mga babaye makita sa modernong panahon?
8 Si Jesus nagpadayon sa pagsulti ngadto sa mga ansiyano sa Tiatira: “Ug gihatagan ko siyag panahon nga maghinulsol, apan siya dili buot maghinulsol sa iyang pagpakighilawas. Tan-awa! Iitsa ko na siya ngadto sa higdaanag masakiton, ug kadtong nagapanapaw uban kaniya ngadto sa dakong kasakitan, gawas kon sila maghinulsol sa iyang mga buhat.” (Pinadayag 2:21, 22) Maingon nga ang orihinal nga Jezebel dayag nga nagdominar kang Ahab ug unya mibatok sa tiglaglag sa Diyos nga si Jehu, kining daotag-impluwensiya nga mga babaye lagmit misulay usab sa pagmaniobra sa ilang mga bana ug sa mga ansiyano. Daw mikonsentir ang mga ansiyano sa Tiatira niining malaw-ay nga impluwensiya ni Jezebel. Si Jesus naghatag dinhi ug kusganong pasidaan alang kanila, ug maingon man sa tibuok-kalibotang kongregasyon sa katawhan ni Jehova karon. Sa modernong panahon, ang pipila niining mabuotbuotong mga babaye nagdaldal sa ilang mga bana sa pagkaapostata ug nagpasaka pa gani sila ug sumbong sa mga korte batok sa matinumanong mga alagad ni Jehova.—Itandi ang Judas 5-8.
9. (a) Nganong ang mga pulong ni Jesus mahitungod kang Jezebel wala makadaot sa dungog sa tanang babaye sa kongregasyon? (b) Kanus-a lamang motungha ang Jezebel nga impluwensiya?
9 Kini wala makadaot sa dungog sa matinumanong mga babaye sa Kristohanong kongregasyon. Karong adlawa, ang dakong bahin sa buluhatong pagsangyaw gihimo sa matinumanon nga mga igsoong babaye; pinaagi sa pagdumala ug mga pagtuon sa Bibliya sa balay, daghan kaayong bag-ohan ang ilang natabangan nga mahimong sakop sa kongregasyon. Kini nga kahikayan gipanalanginan mismo sa Diyos, sumala sa gipakita sa Salmo 68:11: “Si Jehova nag-ingon; ang kababayen-an nga nagapahayag sa maayong balita maoy usa ka dakong panon.” Maayong impluwensiya sa mga bana ang malumo, matinahoron nga paggawi sa ilang mga asawa, nga “dakog bili sa mga mata sa Diyos.” (1 Pedro 3:1-4) Gidayeg ni Haring Lemuel ang takos ug kugihan nga asawa. (Proverbio 31:10-31) Ang Jezebel nga impluwensiya motungha lamang kon ang mga babaye manghaylo sa mga lalaki o manghagit o mosupak sa prinsipyo sa pagkaulo.—Efeso 5:22, 23; 1 Corinto 11:3.
10. (a) Nganong gihukman si Jezebel ug ang iyang mga anak? (b) Unsa ang peligrosong kahimtang niadtong nahimong mga anak ni Jezebel, ug unsay kinahanglan nilang buhaton?
10 Naghisgot bahin ‘nianang babaye nga si Jezebel,’ si Jesus nagpadayon: “Ug pamatyon ko ang iyang mga anak pinaagig makamatay nga hampak, aron ang tanang kongregasyon mahibalo nga ako mao ang usa nga nagasusi sa mga rinyon ug mga kasingkasing, ug ako magabalos sa tagsatagsa kaninyo sumala sa inyong mga buhat.” (Pinadayag 2:23) Gihatagan ni Jesus ug panahon si Jezebel ug ang iyang mga anak sa paghinulsol, apan sila nagpadayon sa ilang imoral nga mga buhat busa sila kinahanglang hukman. Kini adunay puwersadong mensahe alang sa mga Kristohanon karon. Kadtong nagsundog kang Jezebel, lalaki man o babaye, nga sa ingon nahimong iyang mga anak pinaagi sa paglapas sa mga prinsipyo sa Bibliya bahin sa pagkaulo ug moralidad o pinaagi sa pagkagahig-ulo tungod sa dili pagsunod sa teokratikanhong kahikayan, adunay grabeng sakit sa espirituwal. Tinuod, kon ang maong tawo mohangyo sa mga ansiyano sa kongregasyon sa pag-ampo alang kaniya, “ang pag-ampo sa pagtuo mag-ayo sa usa nga naluya, ug si Jehova magbangon kaniya”—sa kondisyon nga mapaubsanon siyang molihok uyon sa maong mga pag-ampo. Apan dili siya angayng maghunahuna nga iyang malimbongan ang Diyos o si Kristo pinaagi sa pagtago sa imoral nga mga buhat o sa pagpakaaron-ingnon nga madasigon sa pag-alagad.—Santiago 5:14, 15.
11. Sa unsang paagi ang mga kongregasyon karon gitabangan nga magmaalisto sa makadaot nga impluwensiya sa mga babaye?
11 Makalilipay nga ang kadaghanan sa mga kongregasyon sa mga Saksi ni Jehova karon alisto niining maong kapeligrohan. Ang mga ansiyano mabinantayon sa pagtungha sa mga kiling sa dili-teokratikanhong mga tinamdan ug sa mga buhat nga daotan. Sila naningkamot sa pagtabang sa nameligrong mga lalaki ug babaye aron mapalig-on sila sa espirituwal ug matul-id sa dili pa ulahi ang tanan. (Galacia 5:16; 6:1) Sa mahigugmaon ug puwersado nga paagi, babagan niining Kristohanong mga magtatan-aw ang bisan unsang paningkamot sa kababayen-an sa pagtukod ug mga grupo aron sa pagpasiugda ug mga kalihokang kaamgid sa women’s liberation. Dugang pa, ang sibo-sa-panahong tambag mabasa matag karon ug unya diha sa mga publikasyon sa mga Saksi ni Jehova. a
12. Sa unsang paagi ang Juan nga matang karon nagpasundayag ug kasibot sama kang Jehu?
12 Apan sa kaso sa grabeng imoralidad, ug ilabina kon kini nabatasan na, ang dili-mahinulsolong mga makasasala kinahanglang ipalagpot. Atong mahinumdoman ang kasibot ni Jehu sa pagwagtang sa tanang timailhan sa impluwensiya ni Jezebel sa Israel. Sa samang paagi, ang Juan nga matang karon puwersadong naglihok nga nagsilbing panig-ingnan alang sa ilang mga kaubang “Jonadab” ug nagpakita nga sila lahi ra kaayo sa konsentidor nga mga ministro sa Kakristiyanohan.—2 Hari 9:22, 30-37; 10:12-17.
13. Unsay mahitabo niadtong magpadaog sa makadaot nga impluwensiya sa mga babaye?
13 Ingong Mensahero ug Maghuhukom ni Jehova, husto ang gihimo sa Anak sa Diyos sa pagyagyag sa modernong Jezebel ug pag-itsa kaniya ngadto sa higdaanag masakiton, kay milaygay na ang iyang espirituwal nga sakit. (Malaquias 3:1, 5) Kadtong nagpadaog niining makadaot nga impluwensiya sa mga babaye mag-antos usab ug dakong kasakit—ang kasubo nga mapalagpot, mahimulag sa Kristohanong kongregasyon nga morag patay na. Gawas kon sila maghinulsol, mobalik, ug dawaton sa kongregasyon, sila mameligro usab nga mamatay sa pisikal pinaagi sa “makamatay nga hampak”—sa labing madali, sa dakong kasakitan. Sa kasamtangan, ang pagpasig-uli posible kon sila bug-os nga maghinulsol sa ilang sayop nga mga buhat.—Mateo 24:21, 22; 2 Corinto 7:10.
14. (a) Sa unsang paagi gigamit ni Jesus ang mga ansiyano sa pagsulbad sa pipila ka problema, sama sa Jezebel nga impluwensiya? (b) Sa unsang paagi paluyohan sa kongregasyon ang mga ansiyano nga nagsulbad sa maong mga problema?
14 “Ang tanang kongregasyon” kinahanglang mahibalo nga si Jesus nagsusi sa “mga rinyon,” ang kinalalomang mga pagbati, ug sa “kasingkasing,” ang kinailadmang pagkatawo, apil na ang mga motibo. Niini nga katuyoan, iyang gigamit ang kasaligang mga bituon, o mga ansiyano, sa pagsulbad sa pipila ka problema nga basin motungha, sama sa Jezebel nga impluwensiya. (Pinadayag 1:20) Human masusi sa bug-os sa mga ansiyano ang maong problema ug nahatag na ang desisyon, walay katungod ang si bisan kinsa sa pagkuwestiyon sa maong desisyon. Ang tanan kinahanglang mapaubsanong modawat sa pagdumala sa mga ansiyano sa mga problema ug padayong magpaluyo sa maong mga bituon sa kongregasyon. Ang pagkamaunongon kang Jehova ug sa mga kahikayan sa iyang organisasyon pagagantihan. (Salmo 37:27-29; Hebreohanon 13:7, 17) Sa imong bahin, hinaot nga panalangin ang imong madawat sa dihang si Jesus mohatag na sa matag usa sumala sa iyang binuhatan.—Galacia 5:19-24; 6:7-9.
“Pangupti Pag-ayo ang Inyong Nabatonan”
15. (a) Unsay giingon ni Jesus niadtong wala maimpluwensiyahi ni Jezebel? (b) Unsay nagpakita nga dili tanang nag-angkong mga Kristohanon niadtong 1918 naimpluwensiyahan sa apostatang Kakristiyanohan?
15 Makapahupay ang sunod nga mga pulong ni Jesus: “Hinunoa, ako magaingon sa uban kaninyo nga anaa sa Tiatira, ang tanan nga wala maghupot niini nga pagtulon-an, ang wala mahibalo sa ‘lawom nga mga butang ni Satanas,’ sumala sa ilang ginaingon: Dili ako magpapas-an kaninyo ug lain pang kabug-at. Apan sa gihapon, pangupti pag-ayo ang inyong nabatonan hangtod sa akong pag-abot.” (Pinadayag 2:24, 25) Dihay matinumanong mga kalag sa Tiatira nga wala maimpluwensiyahi ni Jezebel. Sa susama, sa 40 ka tuig una pa ang 1918 ug sukad niadto, dili tanang nag-angkong mga Kristohanon ang mikonsentir sa imoral, dunot nga mga buhat nga kaylap kaayo sa Kakristiyanohan. Ang gamayng grupo sa mga Estudyante sa Bibliya, nga karon nailhan ingong mga Saksi ni Jehova, nga naningkamot sa pagtabang sa mga membro sa simbahan nga mahibalo nga dili-Kristohanon ang gigikanan sa daghang doktrina sa Kakristiyanohan, nagsalikway na sa tanang Babilonyanhong mga pagtulon-an ug mga buhat nga naggikan sa apostatang Kakristiyanohan. Kini naglakip sa matinugotong pagtulon-an ‘nianang babaye nga si Jezebel.’
16. Bisan tuod si Jesus ug ang nagamandong lawas sa mga Kristohanon sa unang siglo wala magsangon ug dugang pang palas-anon, unsang mga butanga ang kinahanglang likayan?
16 Ang Juan nga matang karon nagdasig usab sa ilang mga kauban, ang dakong panon, sa paglikay sa imoral nga mga impluwensiya, sama sa malaw-ayng kalingawan sa kalibotan. Dili na kinahanglang molantaw o makaeksperyensiya ug kahiwian aron matagbaw ang pagkamausisaon o aron mahibalo kon unsay likayan. Maalamon nga magpalayo kita sa “lawom nga mga butang ni Satanas.” Ingon sa gipamulong ni Jesus: “Dili ako magpapas-an kaninyo ug lain pang kabug-at.” Kini nagpahinumdom kanato sa sugo sa nagamandong lawas sa mga Kristohanon sa unang siglo: “Ang balaang espiritu ug kami nagkauyon nga dili magsangon ug dugang pang palas-anon kaninyo, gawas niining kinahanglanong mga butang, nga padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas. Kon kamo magpahilayo gayod niining mga butanga, mabulahan kamo.” (Buhat 15:28, 29) Aron mouswag sa espirituwal, likayi ang bakak nga relihiyon, sayop nga paggamit sa dugo (sama sa pag-abonog dugo), ug imoralidad! Ug ang imong pisikal nga panglawas lagmit mapanalipdan usab.
17. (a) Sa unsang paagi gitental ni Satanas ang mga tawo karon pinaagi sa “lawom nga mga butang”? (b) Unsay angay natong tinamdan maylabot sa “lawom nga mga butang” sa modernong kalibotan ni Satanas?
17 Si Satanas adunay ubang “lawom nga mga butang” karon, sama sa makalibog nga mga pangagpas ug mga pilosopiya nga gipagawal sa mga utokan. Gawas pa sa matugoton, imoral nga mga pangatarongan, kini naglakip sa espiritismo ug sa teoriya sa ebolusyon. Unsay panglantaw sa maalamon-sa-tanan nga Maglalalang bahin niining “lawom nga mga butang”? Si apostol Pablo nagkutlo kaniya nga nag-ingon: “Pagahanawon ko ang kaalam sa mga tawong maalamon.” Kon itandi niana, “ang lawom nga mga butang sa Diyos” simple, tin-aw, ug makapadasig. Ang maalamong mga Kristohanon naglikay sa “lawom nga mga butang” sa modernong kalibotan ni Satanas. Hinumdomi, “ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Corinto 1:19, Kingdom Interlinear; 2:10; 1 Juan 2:17.
18. Unsang mga panalangin ang gisaad ni Jesus sa dinihogang mga Kristohanon nga magpabiling matinumanon hangtod sa kataposan, ug unsang pribilehiyo ang mabatonan niining mga binanhaw panahon sa Armagedon?
18 Niining tungora si Jesus nagpahayag ug makapadasig nga mga pulong sa mga Kristohanon sa Tiatira. Kini makapadasig usab sa dinihogang mga Kristohanon karon: “Ug kaniya nga magmadaogon ug magatuman sa akong mga buhat hangtod sa kataposan ihatag ko kaniya ang awtoridad ibabaw sa kanasoran, ug siya magabantay sa katawhan pinaagig olisi nga puthaw aron sila mangadugmok sama sa kulonon nga mga sudlanan, ingon sa nadawat ko gikan sa akong Amahan.” (Pinadayag 2:26, 27) Pagkadako kini nga pribilehiyo! Kining awtoridad nga madawat sa dinihogang mga mananaog dihang banhawon na sila mao ang pagduyog kang Jesus sa paggamit sa “olisi nga puthaw” sa paglaglag sa rebelyosong mga nasod sa Armagedon. Ang nukleyar nga mga hinagiban sa mga nasod igo rang mopitipiti samag basa nga lebentador sa dihang dugmokon na ni Kristo ang iyang mga kaaway nga samag nagdugmok siya ug mga sudlanang kulonon.—Salmo 2:8, 9; Pinadayag 16:14, 16; 19:11-13, 15.
19. (a) Kinsa “ang bituon sa kabuntagon,” ug sa unsang paagi siya ihatag ngadto sa mga mananaog? (b) Unsang pagdasig ang gihatag ngadto sa dakong panon?
19 Si Jesus midugang: “Ug ihatag ko kaniya ang bituon sa kabuntagon.” (Pinadayag 2:28) Gipatin-aw ni Jesus mismo sa ulahi kon unsa kining “bituon,” nga nag-ingon: “Ako mao ang gamot ug ang kaliwat ni David, ug ang mahayag nga bituon sa kabuntagon.” (Pinadayag 22:16) Oo, si Jesus ang nagtuman sa tagna nga pinugos nga gipabungat ni Jehova sa midumili nga mga ngabil ni Balaam: “Usa ka bituon mogula gikan kang Jacob, ug usa ka setro motungha gikan sa Israel.” (Numeros 24:17) Sa unsang paagi ihatag ni Jesus ang “bituon sa kabuntagon” sa mga mananaog? Dayag nga pinaagi sa paghatag sa iyang kaugalingon kanila, sa pagpakigsuod gayod kanila. (Juan 14:2, 3) Pagkadako niini nga panukmod sa paglahutay! Makapadasig usab sa dakong panon ang pagkahibalo nga “ang mahayag nga bituon sa kabuntagon” sa dili madugay mogamit sa iyang awtoridad sa Gingharian sa pagpasig-uli sa Paraiso dinhi sa yuta!
Hupti ang Integridad
20. Unsang mga hitabo sa Kakristiyanohan ang nagpahinumdom kanato sa ubang mga kahuyangan sa kongregasyon sa Tiatira?
20 Kini nga mensahe seguradong nakadasig gayod sa mga Kristohanon sa Tiatira. Handurawa lang—ang hinimayang Anak sa Diyos sa langit personal nga nakigsulti sa mga Kristohanon sa Tiatira mahitungod sa pipila nila ka problema! Walay duhaduha nga sa usa ka paagi dunay pipila sa kongregasyon ang misanong sa maong mahigugmaong pagbantay. Kining kinatas-an sa pito ka mensahe nagtabang usab kanato sa pag-ila sa matuod nga Kristohanong kongregasyon karon. Niadtong 1918 sa dihang si Jesus miabot sa templo ni Jehova aron maghukom, ang kadaghanan sa mga organisasyon nga nag-angkong Kristohanon namantsahan sa idolatriya ug espirituwal nga imoralidad. (Santiago 4:4) Ang uban nagpasukad sa ilang mga pagtuo diha sa mga pagtulon-an sa dominante nga mga babaye sa ika-19ng siglo, sama ni Ellen White sa mga Sabadista ug Mary Baker Eddy sa mga Christian Scientist, ug niining bag-o pa daghang babaye ang nagwali diha sa pulpito. (Itandi ang 1 Timoteo 2:11, 12.) Diha sa lainlaing porma sa Katolisismo, si Maria sagad nga mas gipasidunggan kay sa Diyos ug kang Kristo. Si Jesus wala magpasidungog kaniya nianang paagiha. (Juan 2:4; 19:26) Ang mga organisasyon ba nga nagtugot sa maong makadaot nga impluwensiya sa mga babaye madawat ingong Kristohanon?
21. Unsang mga leksiyon ang makat-onan sa matag indibiduwal gikan sa mensahe ni Jesus sa Tiatira?
21 Kining maong mensahe angayng palandongon sa matag Kristohanon, sakop man siya sa Juan nga matang o sa ubang mga karnero. (Juan 10:16) Ang uban matental nga magrelaks-relaks lang, sama sa gibuhat sa mga tinun-an ni Jezebel sa Tiatira. Anaa usab ang tentasyon sa pagkompromiso. Karon, ang mga isyu sama sa pagkaon ug mga produktong may dugo o sa pagpaabono ug dugo kinahanglang atubangon. Tingali ang uban nagtuo nga ang kadasig sa pag-alagad sa kanataran o paghatag ug mga pakigpulong naghatag kanila sa kagawasan nga mahimong dili kaayo estrikto sa ubang mga bahin, sama sa pagtan-awg mapintas ug imoral nga mga pelikula ug video teyp, o sa pagpatuyang sa alkoholikong ilimnon. Ang pasidaan ni Jesus sa mga Kristohanon sa Tiatira nagpahimangno kanato nga dili gayod nato kini angayng buhaton. Buot ni Jehova nga kita mahinlo, bug-os kalag, dili magkabahinbahin, sama sa daghang Kristohanon sa Tiatira.
22. Sa unsang paagi gipasiugda ni Jesus ang pagkahinungdanon sa pagbaton ug igdulungog nga nagapatalinghog?
22 Sa kataposan, si Jesus mipahayag: “Ang adunay igdulungog magpatalinghog sa ginaingon sa espiritu ngadto sa mga kongregasyon.” (Pinadayag 2:29) Sa ikaupat nga higayon, gisubli ni Jesus dinhi kining makapukaw nga mga pulong, ug mao usab kini ang paniklop sa tulo ka nahibiling mga mensahe. Ikaw ba adunay igdulungog nga nagapatalinghog? Nan padayon sa pagpatalinghog ug maayo samtang ang Diyos, pinaagi sa iyang espiritu, nagpadayon sa paghatag ug tambag pinaagi sa iyang alagianan sa komunikasyon.
[Footnote]
a Pananglitan, tan-awa ang artikulong “Matinumanon nga Kristohanong mga Babaye—Bililhong mga Magsisimba sa Diyos” sa Nobyembre 1, 2003, nga gula sa Ang Bantayanang Torre.
[Mga Pangutana sa Pagtuon]
[Mga hulagway sa panid 51]
Karon, ang dakong bahin sa buluhatong pagsangyaw gihimo sa matinumanon nga mga igsoong babaye samtang sila mapaubsanong nagpaluyo sa teokratikanhong awtoridad