Kapitulo 19

Pagtimbre sa Israel sa Diyos

Panan-awon 4—Pinadayag 7:1-17

Ulohan: Ang 144,000 gitimbrehan, ug usa ka dakong panon ang nakita nga nagbarog atubangan sa trono ni Jehova ug atubangan sa Kordero

Panahon sa katumanan: Gikan sa paglingkod ni Kristo Jesus sa trono niadtong 1914 hangtod sa iyang Milenyong Pagmando

1. “Kinsay arang makabarog” sa dakong adlaw sa kasuko sa Diyos?

 “KINSAY arang makabarog?” (Pinadayag 6:17) Oo, kinsa ba gayod? Angay nga ipangutana kini sa mga magmamando ug sa mga tawo sa kalibotan sa dihang laglagon na ang sistema ni Satanas panahon sa dakong adlaw sa kasuko sa Diyos. Alang kanila, wala gayoy tawong mahibilin kon modangat na kining taliabot nga katalagman. Apan tinuod ba kana? Makapalipay nga ang manalagna sa Diyos nagpasalig kanato: “Ang matag usa nga magatawag sa ngalan ni Jehova maluwas.” (Joel 2:32) Gipamatud-an ni apostol Pedro ug apostol Pablo kanang kamatuorana. (Buhat 2:19-21; Roma 10:13) Oo, kadtong motawag sa ngalan ni Jehova maluwas. Kinsa sila? Ato kining mahibaloan samtang madayag ang sunod nga panan-awon.

2. Nganong talagsaon nga adunay makalabang-buhi sa adlaw sa paghukom ni Jehova?

² Talagsaon gayod nga adunay makalabang-buhi sa adlaw sa paghukom ni Jehova, kay kini gihubit sa laing manalagna sa Diyos pinaagi niining mga pulonga: “Tan-awa! Ang usa ka unos ni Jehova, ang kaaligutgot mismo, migula, usa ka maharosong kusog nga bagyo. Diha sa ulo sa mga daotan kini mohuros. Ang nagasilaob nga kasuko ni Jehova dili motalikod hangtod nga iyang ikapahamtang ug hangtod nga iyang matuman ang mga laraw sa iyang kasingkasing.” (Jeremias 30:23, 24) Dinalian gayod nga molihok kita aron makalingkawas sa maong bagyo!—Proverbio 2:22; Isaias 55:6, 7; Sofonias 2:2, 3.

Ang Upat ka Hangin

3. (a) Unsang linaing pag-alagad nga gihimo sa mga manulonda ang nakita ni Juan? (b) Unsay gisimbolohan sa “upat ka hangin”?

³ Sa dili pa buhian ni Jehova kining bagyoha, ang mga manulonda sa langit maghimog usa ka linaing pag-alagad. Nakita kini karon ni Juan sa panan-awon: “Human niini nakita ko ang upat ka manulonda nga nagbarog diha sa upat ka suok sa yuta, nga hugot nga nagkupot sa upat ka hangin sa yuta, aron walay hanging mohuyop sa yuta o sa dagat o sa bisan unsang kahoy.” (Pinadayag 7:1) Unsay kahulogan niini alang kanato karon? Kining “upat ka hangin” maoy usa ka klarong simbolo sa malaglagong paghukom nga hapit nang buhian diha sa daotang katilingban sa yuta, sa nag-alimbukad nga “dagat” sa malinapasong katawhan, ug sa tag-as, samag-kahoy nga mga magmamando nga nagkuhag tabang ug puwersa gikan sa katawhan sa yuta.—Isaias 57:20; Salmo 37:35, 36.

4. (a) Unsay gihawasan sa upat ka manulonda? (b) Unsay mahitabo sa yutan-ong organisasyon ni Satanas sa dihang buhian na ang upat ka hangin?

⁴ Walay duhaduha nga kining upat ka manulonda naghawas sa upat ka grupo sa mga  manulonda, nga gigamit ni Jehova sa pagpugong sa paghukom hangtod sa tinudlong panahon. Dako gayod ang mahitabong kalaglagan sa dihang buhian na sa mga manulonda ang mga hangin sa kasuko sa Diyos nga dungang mohuros gikan sa amihanan, habagatan, sidlakan, ug kasadpan. Kini mahimong kaamgid, apan sa dako kaayong gilapdon, sa paggamit ni Jehova sa upat ka hangin sa pagpatibulaag sa karaang mga Elamihanon, sa paglaglag ug pagpatay kanila. (Jeremias 49:36-38) Kini mahimong usa ka dako kaayong bagyo nga labi pang malaglagon kay sa “bagyo” nga gipahinabo ni Jehova sa paglaglag sa nasod sa Ammon. (Amos 1:13-15) Walay bahin sa organisasyon ni Satanas sa yuta ang makabarog sa adlaw sa kasuko ni Jehova, sa dihang bayawon na niya ang iyang pagkasoberano hangtod sa kahangtoran.—Salmo 83:15, 18; Isaias 29:5, 6.

5. Sa unsang paagi ang tagna ni Jeremias motabang kanato sa pagsabot nga ang mga paghukom sa Diyos maglangkit sa tibuok yuta?

⁵ Makaseguro ba kita nga ang mga paghukom sa Diyos mohampak sa tibuok yuta? Pamati pag-usab sa iyang manalagna nga si Jeremias: “Tan-awa! Usa ka katalagman modangat sa usa ka nasod ngadto sa laing nasod, ug usa ka kusog kaayong bagyo ipatungha gikan sa kinalay-ang mga bahin sa yuta. Ug ang mga pinatay ni Jehova nianang adlawa maoy gikan gayod sa usa ka tumoy sa yuta hangtod sa laing tumoy sa yuta.” (Jeremias 25:32, 33) Mongitngit ang tibuok kalibotan sa panahon nga mohampak kanang kusog nga bagyo. Ang mga magmamando niini kusokusohon hangtod mangahanaw. (Pinadayag 6:12-14) Apan ang umaabot dili mangiob alang sa tanan. Busa, alang kang kinsa gipugngan ang upat ka hangin?

Ang Pagtimbre sa mga Ulipon sa Diyos

6. Kinsay nagsugo sa mga manulonda sa pagpugong sa upat ka hangin, ug naghatag kini ug panahon alang sa unsa?

⁶ Si Juan nagpadayon sa paghubit kon sa unsang paagi ang pipila pagatimbrehan alang sa kaluwasan, nga nagaingon: “Ug nakita ko ang laing manulonda nga mikayab gikan sa silangan sa adlaw, nga adunay timbre sa buhing Diyos; ug sa makusog nga tingog siya misinggit ngadto sa upat ka manulonda nga gitugotan sa pagdaot sa yuta ug sa dagat, nga nag-ingon: ‘Ayaw daota ang yuta o ang dagat o ang mga kahoy, hangtod nga ang mga ulipon sa atong Diyos amo nang matimbrehan diha sa ilang mga agtang.’”—Pinadayag 7:2, 3.

7. Kinsa man gayod ang ikalimang manulonda, ug unsang pamatuod ang makatabang kanato sa pag-ila kaniya?

⁷ Bisag wala nganli kining ikalimang manulonda, ang tanang pamatuod nagpakita nga siya mao ang hinimayang Ginoong Jesus. Sanglit Arkanghel si Jesus, siya gipakita dinhi nga adunay awtoridad ibabaw sa ubang mga manulonda. (1 Tesalonica 4:16; Judas 9) Mokayab siya gikan sa sidlakan, sama sa “mga hari gikan sa silangan sa adlaw”—si Jehova ug ang iyang Kristo—kinsa moabot sa pagpatuman sa paghukom, sama sa gibuhat sa mga hari nga si Dario ug Ciro sa dihang ilang gipukan ang karaang Babilonya. (Pinadayag 16:12; Isaias 45:1; Jeremias 51:11; Daniel 5:31) Kini nga manulonda susama usab kang Jesus sa pagkaagi nga siya gipiyalan sa pagtimbre sa dinihogang mga Kristohanon. (Efeso 1:13, 14) Dugang pa, sa dihang buhian na ang mga hangin, si Jesus mao ang manguna sa langitnong kasundalohan sa paghukom sa mga nasod. (Pinadayag 19:11-16) Busa, makataronganon nga si Jesus mao ang nagsugo sa pagpugong una sa paglaglag sa yutan-ong organisasyon ni Satanas hangtod matimbrehan na ang mga ulipon sa Diyos.

8. Unsa ang pagtimbre, ug kanus-a kini nagsugod?

⁸ Unsa kining maong pagtimbre, ug kinsa kining mga ulipon sa Diyos? Ang pagtimbre nagsugod sa Pentekostes 33 K.P. sa dihang ang unang Hudiyong mga Kristohanon gidihogan ug balaang espiritu. Sa ulahi, ang Diyos nagtawag ug nagdihog sa “katawhan sa kanasoran.” (Roma 3:29; Buhat 2:1-4, 14, 32, 33; 15:14) Si apostol Pablo misulat nga ang dinihogang mga Kristohanon dunay garantiya nga sila “iya ni Kristo” ug midugang nga ang Diyos “nagbutang usab sa iyang timbre kanato ug naghatag kanato sa timaan sa kon unsay moabot, nga mao, ang espiritu, diha sa atong mga kasingkasing.” (2 Corinto 1:21, 22; itandi ang Pinadayag 14:1.) Busa, sa dihang kining mga ulipona gisagop ingong espirituwal nga mga anak sa Diyos, sila nakadawat ug pasiunang timaan sa ilang langitnong panulondon—usa ka timbre, o pasalig. (2 Corinto 5:1, 5; Efeso  1:10, 11) Unya sila makaingon: “Ang espiritu mismo nagpamatuod uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo, basta duyog kita nga magaantos aron kita usab duyog nga pagahimayaon.”—Roma 8:15-17.

9. (a) Unsang paglahutay ang gikinahanglan sa bahin sa nahibilin sa inanak-sa-espiritu nga mga anak sa Diyos? (b) Hangtod kanus-a magpadayon ang pagsulay sa mga dinihogan?

⁹ “Basta duyog kita nga magaantos”—unsa ang kahulogan niana? Aron makadawat sa purongpurong sa kinabuhi, ang dinihogang mga Kristohanon kinahanglang magmalahutayon, magmatinumanon bisan hangtod sa kamatayon. (Pinadayag 2:10) Kini wala magpasabot nga ‘sa dihang luwas na, permanente nang luwas.’ (Mateo 10:22; Lucas 13:24) Hinunoa, sila gitambagan: “Buhata ang kutob sa inyong maarangan aron maseguro ang inyong pagkatinawag ug pagkapinili.” Sama kang apostol Pablo, sa kaulahian sila makaingon gayod: “Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo.” (2 Pedro 1:10, 11; 2 Timoteo 4:7, 8) Busa dinhi sa yuta ang pagsulay ug pag-ayag sa nahibilin sa inanak-sa-espiritu nga mga anak sa Diyos kinahanglang magpadayon hangtod matimbrehan ni Jesus ug sa iyang kaubang mga manulonda ang “agtang” nilang tanan, nga nagpaila kanila sa bug-os, nga dili na gayod mausab, ingong nasulayan ug matinumanong “mga ulipon sa atong Diyos.” Kanang timbreha mahimong permanente nga ilhanan. Dayag nga sa dihang ang upat ka hangin sa kasakitan buhian na, ang tanan sa espirituwal nga Israel natimbrehan na, bisan may pipila pang buhi sa unod. (Mateo 24:13; Pinadayag 19:7) Makompleto na ang gidaghanon niini!—Roma 11:25, 26.

Pila ang Timbrehan?

10. (a) Unsang mga teksto ang nagpakita nga limitado lang ang gidaghanon sa mga tinimbrehan? (b) Pila ang katibuk-ang gidaghanon sa tinimbrehan, ug sa unsang paagi sila gitala?

¹⁰ Giingnan ni Jesus kadtong pagatimbrehan: “Ayaw kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.” (Lucas 12:32) Gipakita sa ubang mga teksto, sama sa Pinadayag 6:11 ug Roma 11:25, nga limitado lang ang gidaghanon niining gamayng panon, sa pagkatinuod, gitino nang daan. Gipamatud-an kini sa sunod nga mga pulong ni Juan: “Ug nadungog ko ang gidaghanon niadtong gitimbrehan, usa ka gatos ug kap-atag-upat ka libo, nga gipangtimbrehan gikan sa matag tribo sa mga anak nga lalaki ni Israel: Gikan sa tribo ni Juda napulog-duha ka libo ang gitimbrehan; gikan sa tribo ni Ruben napulog-duha  ka libo; gikan sa tribo ni Gad napulog-duha ka libo; gikan sa tribo ni Aser napulog-duha ka libo; gikan sa tribo ni Neptali napulog-duha ka libo; gikan sa tribo ni Manases napulog-duha ka libo; gikan sa tribo ni Simeon napulog-duha ka libo; gikan sa tribo ni Levi napulog-duha ka libo; gikan sa tribo ni Isacar napulog-duha ka libo; gikan sa tribo ni Zabulon napulog-duha ka libo; gikan sa tribo ni Jose napulog-duha ka libo; gikan sa tribo ni Benjamin napulog-duha ka libo ang gitimbrehan.”—Pinadayag 7:4-8.

11. (a) Nganong ang paghisgot bahin sa 12 ka tribo dinhi dili aplikado sa literal, unodnon nga Israel? (b) Nganong gitala sa Pinadayag ang 12 ka tribo? (c) Nganong walay gipinig nga mahimong hari o mahimong saserdote nga tribo sa Israel sa Diyos?

¹¹ Dili ba kaha kini nagtumong sa literal, unodnon nga Israel? Dili, tungod kay ang Pinadayag 7:4-8 wala magsunod sa naandang talaan sa mga tribo. (Numeros 1:17, 47) Dayag nga ang katuyoan sa pagtala dinhi maoy dili aron mailhan ang unodnong mga Hudiyo pinaagi sa ilang mga tribo kondili aron ipakita ang kaamgid nga organisasyonal nga kahikayan sa espirituwal nga Israel. Kini balanse. Kinahanglang eksakto nga 144,000 ka membro kining bag-ong nasod—12,000 gikan sa matag usa sa 12 ka tribo. Walay tribo niining Israel sa Diyos ang gipinig aron mahimong hari o mahimong saserdote. Ang tibuok nasod magmando ingong mga hari, ug ang tibuok nasod mag-alagad ingong mga saserdote.—Galacia 6:16; Pinadayag 20:4, 6.

12. Nganong haom nga ang 24 ka ansiyano moawit sa mga pulong sa Pinadayag 5:9, 10 atubangan sa Kordero?

¹² Bisan tuod ang kinaiyanhon ug nakombertir nga mga Hudiyo mao ang gihatagan sa unang kahigayonan nga mapili alang sa espirituwal nga Israel, diyutay lamang ang misanong nianang nasora. Busa gitanyag ni Jehova ang imbitasyon ngadto sa mga Hentil. (Juan 1:10-13; Buhat 2:4, 7-11; Roma 11:7) Sama sa kahimtang sa mga taga-Efeso, nga kanhi “bulag sa estado sa Israel,” karon ang mga dili-Hudiyo mahimong matimbrehan pinaagi sa espiritu sa Diyos ug mahimong bahin sa kongregasyon sa dinihogang mga Kristohanon. (Efeso 2:11-13; 3:5, 6; Buhat 15:14) Busa, haom nga moawit ang 24 ka ansiyano sa atubangan sa Kordero: “Pinaagi sa imong dugo gipalit mo ang mga tawo alang sa Diyos gikan sa matag tribo ug pinulongan ug katawhan ug nasod, ug gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.”—Pinadayag 5:9, 10.

13. Nganong haom nga gitumong ni Santiago, nga igsoon ni Jesus sa inahan, ang iyang sulat ngadto sa “napulog-duha ka tribo nga nagkatibulaag”?

¹³ Ang Kristohanong kongregasyon maoy “usa ka piniling rasa, usa ka harianong pagkasaserdote, usa ka balaang nasod.” (1 Pedro 2:9) Sa  dihang gipulihan niini ang kinaiyanhong Israel ingong nasod sa Diyos, kini nahimong usa ka bag-ong Israel, ang “tinuod nga ‘Israel.’” (Roma 9:6-8; Mateo 21:43) a Tungod niini, haom nga gitumong ni Santiago, nga igsoon ni Jesus sa inahan, ang iyang sulat ngadto sa “napulog-duha ka tribo nga nagkatibulaag,” sa ato pa, ngadto sa tibuok-kalibotang kongregasyon sa dinihogang mga Kristohanon nga sa ngadtongadto moabot ug 144,000.—Santiago 1:1.

Ang Israel sa Diyos Karon

14. Unsay nagpakita nga ang mga Saksi ni Jehova wala gayod magbag-o sa ilang pagtuo nga literal nga 144,000 ang maglangkob sa espirituwal nga Israel?

¹⁴ Talagsaon nga giila ni Charles T. Russell ang 144,000 ingong usa ka literal nga gidaghanon sa mga indibiduwal nga maglangkob sa espirituwal nga Israel. Sa The New Creation, Tomo VI sa iyang Studies in the Scriptures nga gipatik sa 1904, siya misulat: “Kita adunay lig-ong katarongan sa pagtuo nga ang tino, piho nga gidaghanon sa mga pinili [mga dinihogan] mao ang gihisgotan sa daghang higayon diha sa Pinadayag (7:4; 14:1); nga mao, ang 144,000 ‘nga gilukat gikan sa taliwala sa katawhan.’” Kini usab ang giingon sa Light, Basahon Uno, nga gipatik sa 1930 sa mga Estudyante sa Bibliya: “Ang 144,000 ka membro sa lawas ni Kristo gipakita nga usa ka natigom nga grupo ingong pinili ug dinihogan, o tinimbrehan.” Ang mga Saksi ni Jehova wala gayod magbag-o sa ilang pagtuo nga literal nga 144,000 ka dinihogang mga Kristohanon ang maglangkob sa espirituwal nga Israel.

15. Sa hapit nang moabot ang adlaw sa Ginoo, unsay gituohan sa sinserong mga estudyante sa Bibliya nga mabatonan sa kinaiyanhong mga Hudiyo inigkatapos sa Panahon sa mga Hentil?

¹⁵ Bisan pa niana, dili ba ang kinaiyanhong Israel karon takos sa pipila ka linaing pabor? Sa hapit nang moabot ang adlaw sa Ginoo, sa dihang natukian pag-usab sa sinserong mga estudyante sa Bibliya ang daghang pasukaranang mga kamatuoran sa Pulong sa Diyos, sila nagtuo kaniadto nga inigkatapos sa Panahon sa mga Hentil, ang mga Hudiyo makabaton pag-usab ug linaing baroganan atubangan sa Diyos. Busa, ang basahon ni C. T. Russell nga The Time Is at Hand (Tomo II sa Studies in the Scriptures), nga gipatik sa 1889, nagpadapat sa Jeremias 31:29-34 ngadto sa kinaiyanhong mga Hudiyo, ug nag-ingon: “Ang kalibotan saksi sa kamatuoran nga ang silot sa Israel ilalom sa pagmando sa mga Hentil nagpadayon sukad sa [607] W.K.P., ug kini nagapadayon pa, ug nga walay katarongan ang pagdahom nga sila maorganisar pag-usab ingong nasod samtang dili pa moabot ang 1914 K.P., ang kinutoban sa ilang ‘pito ka panahon’—2520 ka tuig.” Gituohan nila kaniadto nga ang mga Hudiyo mapasig-uli pag-usab ingong usa ka nasod, ug kini nga paglaom daw misanag niadtong 1917, sa dihang ang Balfour Declaration nanaad nga magpaluyo ang Britanya sa paghimo sa Palestina ingong nasodnong puloy-anan sa mga Hudiyo.

16. Unsang mga paningkamot ang gihimo sa mga Saksi ni Jehova aron ipaabot ang Kristohanong mensahe ngadto sa kinaiyanhong mga Hudiyo, ug unsay resulta?

¹⁶ Pagkahuman sa unang gubat sa kalibotan, ang Palestina nahimong teritoryo sa Gran Britanya, ug nabuksan ang kahigayonan aron makabalik ang daghang Hudiyo nianang yutaa. Sa 1948, ang politikanhong Estado sa Israel natukod. Kini ba nagpakita nga nabatonan na sa mga Hudiyo ang mga panalangin sa Diyos? Mao kini ang gituohan sa mga Saksi ni Jehova sulod sa daghang katuigan. Busa, sa 1925 sila nagpatik ug 128-panid nga librong Comfort for the Jews. Sa 1929, ilang giluwatan ang nindot, 360-panid nga tomong Life, nga gidisenyo sa pagdani sa mga Hudiyo ug naghisgot usab sa basahong Job sa Bibliya. Dakong paningkamot ang gihimo aron ipaabot kining Mesiyanikong mensahe ngadto sa mga Hudiyo, ilabina sa New York City. Makapalipay nga misanong ang pipila ka indibiduwal, apan ang mga Hudiyo sa katibuk-an, sama sa ilang mga katigulangan sa unang siglo, nagsalikway sa pamatuod sa presensiya sa Mesiyas.

17, 18. Unsa ang bug-os nga nasabtan sa ulahi sa mga ulipon sa Diyos sa yuta mahitungod sa bag-ong pakigsaad ug sa mga tagna sa Bibliya bahin sa pagpasig-uli?

¹⁷ Dayag nga ang mga Hudiyo, ingong usa ka katawhan ug ingong usa ka nasod, dili mao ang Israel nga gihubit sa Pinadayag 7:4-8 o sa ubang mga tagna sa Bibliya nga nalangkit sa adlaw sa Ginoo. Sa pagsunod sa tradisyon, ang mga Hudiyo naglikay gihapon sa paggamit sa ngalan sa Diyos. (Mateo 15:1-3, 7-9) Sa paghisgot sa Jeremias  31:31-34, ang librong Jehovah, nga gipatik sa mga Saksi ni Jehova niadtong 1934, lig-ong miingon: “Ang bag-ong pakigsaad dili alang sa kinaiyanhong mga kaliwat sa Israel ug sa katawhan sa katibuk-an, kondili . . . alang lamang sa espirituwal nga Israel.” Ang mga tagna sa Bibliya bahin sa pagpasig-uli wala magtumong sa kinaiyanhong mga Hudiyo ni sa politikanhong Israel, nga membro sa Hiniusang Kanasoran ug bahin sa kalibotan nga gihisgotan ni Jesus diha sa Juan 14:19, 30 ug 18:36.

¹⁸ Sa 1931, malipayon kaayong gidawat sa mga ulipon sa Diyos sa yuta ang ngalang mga Saksi ni Jehova. Sila bug-os kasingkasing nga miuyon sa mga pulong sa Salmo 97:11: “Ang kahayag nagdan-ag alang sa matarong, ug ang pagmaya alang sa mga matul-id ug kasingkasing.” Bug-os nga nasabtan nila sa ulahi nga ang espirituwal nga Israel lamang ang gilakip sa bag-ong pakigsaad. (Hebreohanon 9:15; 12:22, 24) Dili bahin niini ang walay interes nga kinaiyanhong Israel, ni ang katawhan sa katibuk-an. Kini nga pagsabot nagbukas sa dalan alang sa masanag nga pagsidlak sa langitnong kahayag, nga talagsaon diha sa mga rekord sa teokratikanhong kasaysayan. Kini nagbutyag kon sa unsang paagi madagayaong gipakita ni Jehova ang iyang kaluoy, mahigugmaong-kalulot, ug kamatuoran ngadto sa tanang tawo nga makigsuod kaniya. (Exodo 34:6; Santiago 4:8) Oo, gawas sa Israel sa Diyos duna pay uban nga makabenepisyo tungod sa pagpugong sa mga manulonda sa upat ka hangin sa kalaglagan. Kinsa sila? Usa ka kaha kanila? Atong tan-awon.

[Footnote]

[Mga Pangutana sa Pagtuon]

 [Tibuok panid nga hulagway sa panid 114]

[Mga hulagway sa panid 116, 117]

Ang katibuk-ang pagpili sa tinuod nga Israel sa Diyos nagsugod gikan sa adlaw sa Pentekostes 33 K.P. hangtod sa 1935 sa dihang, sa usa ka makasaysayanhong kombensiyon sa mga Saksi ni Jehova sa Washington, D.C., gipasiugda ang pagtigom sa usa ka dakong panon nga may paglaom nga mabuhi sa yuta (Pinadayag 7:9)