Palit ug Bulawan nga Dinalisay sa Kalayo
Kapitulo 13
Palit ug Bulawan nga Dinalisay sa Kalayo
LAODICEA
1, 2. Asang dapita nahimutang ang kataposan sa pito ka kongregasyon nga nakadawat ug mensahe gikan sa hinimayang Jesus, ug unsay kahimtang sa siyudad?
ANG Laodicea mao ang kataposan sa pito ka kongregasyon nga nakadawat ug mensahe gikan sa gibanhawng Jesus. Makapalamdag ug makapadasig gayod ang impormasyon nga gihatag niini!
2 Karon, ang kagun-oban sa Laodicea makaplagan duol sa Denizli, mga 90 kilometros habagatan-sidlakan sa Alasehir. Ang Laodicea mauswagong siyudad niadtong unang siglo. Kay nahimutang sa krosing sa usa ka dakong dalan, kini hinungdanong sentro sa bangko ug komersiyo. Ang halin sa iladong banyos sa mata nakadugang sa pagkaadunahan niini, ug nabantog usab kini tungod sa dekalidad nga mga panapton nga gama sa pinong itom nga delana nianang dapita. Ang kakulang sa tubig, nga dakong problema sa siyudad, nasulbad pinaagi sa paghimog kanal gikan sa init nga mga tubod nga atua sa layo. Busa, ang tubig dagaang na inig-abot sa siyudad.
3. Unsay pangbukas nga mga pulong ni Jesus ngadto sa kongregasyon sa Laodicea?
3 Ang Laodicea duol sa Colosas. Sa dihang si apostol Pablo misulat sa mga taga-Colosas, siya naghisgot bahin sa sulat nga iyang gipadala sa mga taga-Laodicea. (Colosas 4:15, 16) Wala kita mahibalo kon unsay gihisgotan ni Pablo nianang sulata, apan ang mensahe karon nga gipadala ni Jesus sa mga taga-Laodicea nagpakita nga nahimong makaluluoy ang ilang espirituwal nga kahimtang. Apan, sama sa naandan, ang unang gihisgotan ni Jesus mao ang iyang awtoridad, nga nag-ingon: “Ug ngadto sa manulonda sa kongregasyon sa Laodicea isulat kini: Mao kini ang mga butang nga ginaingon sa Amen, ang matinumanon ug matuod nga saksi, ang sinugdan sa kalalangan sa Diyos.”—Pinadayag 3:14.
4. Nganong gitawag si Jesus nga “Amen”?
4 Nganong gitawag ni Jesus ang iyang kaugalingon nga “Amen”? Kining tituloha naghatag ug dugang puwersa sa iyang mensahe ingong usa ka maghuhukom. Ang “Amen” maoy transliterasyon sa Hebreohanong pulong nga nagkahulogang “mao gayod,” “hinaot unta,” ug kini gigamit diha sa kataposan sa mga pag-ampo sa pag-uyon sa gibungat nga mga pag-ampo. (1 Corinto 14:16) Si Jesus mao ang “Amen” tungod kay ang iyang hingpit nga integridad ug haladnong kamatayon nagpalig-on ug naggarantiya sa katumanan sa tanang hamili nga mga saad ni Jehova. (2 Corinto 1:20) Sukad niadtong panahona, ang tanang pag-ampo angayng itumong ngadto kang Jehova pinaagi kang Jesus.—Juan 15:16; 16:23, 24.
5. Sa unsang paagi si Jesus “ang matinumanon ug matuod nga saksi”?
5 Si Jesus usab “ang matinumanon ug matuod nga saksi.” Diha sa tagna, siya kasagarang nalangkit sa pagkamatinumanon, kamatuoran, ug pagkamatarong, kay siya kasaligan gayod ingong alagad ni Jehova nga Diyos. (Salmo 45:4; Isaias 11:4, 5; Pinadayag 1:5; 19:11) Siya ang kinalabwang Saksi dapig kang Jehova. Sa pagkamatuod, ingong “sinugdan sa kalalangan sa Diyos,” si Jesus nagpahayag sa himaya sa Diyos sukad gayod sa sinugdan. (Proverbio 8:22-30) Ingong tawo nga nagkinabuhi sa yuta, siya nanaksi sa kamatuoran. (Juan 18:36, 37; 1 Timoteo 6:13) Human sa iyang pagkabanhaw, siya misaad nga hatagag balaang espiritu ang iyang mga tinun-an ug misulti kanila: “Kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” Sugod sa Pentekostes 33 K.P. padayon, si Jesus nagtultol niining dinihogang mga Kristohanon sa pagwali sa maayong balita “sa tibuok kalalangan ilalom sa langit.” (Buhat 1:6-8; Colosas 1:23) Sa pagkamatuod, si Jesus takos nga tawgong matinumanon ug matuod nga saksi. Ang dinihogang mga Kristohanon sa Laodicea makabenepisyo pinaagi sa pagpatalinghog sa iyang mga pulong.
6. (a) Giunsa paghubit ni Jesus ang espirituwal nga kahimtang sa kongregasyon sa Laodicea? (b) Unsa ang maayong panig-ingnan ni Jesus nga wala sundoga sa mga Kristohanon sa Laodicea?
6 Unsay mensahe ni Jesus sa mga taga-Laodicea? Wala siyay gisulting komendasyon. Siya miprangka kanila: “Ako nahibalo sa imong mga buhat, nga ikaw dili bugnaw ni init. Ako nanghinaot nga ikaw unta bugnaw o kaha init. Busa, tungod kay ikaw dagaang lamang ug dili init ni bugnaw, isuka ko ikaw gikan sa akong baba.” (Pinadayag 3:15, 16) Unsa kahay imong sanong sa ingon nianang mensahe gikan kang Ginoong Jesu-Kristo? Dili ka ba mahigmata ug magsusi sa imong kaugalingon? Oo, kadtong mga taga-Laodicea kinahanglang molihok, kay sila nahimong tapolan sa espirituwal, ug dayag nga walay pagpabili. (Itandi ang 2 Corinto 6:1.) Si Jesus, nga angay unta nilang sundogon ingong mga Kristohanon, kanunayng nagpasundayag ug mainitong kadasig alang kang Jehova ug sa pag-alagad kaniya. (Juan 2:17) Dugang pa, nakita sa mga maaghop nga siya kanunayng buotan ug malumo, nga makapapresko sama sa usa ka baso sa bugnawng tubig sa init kaayong adlaw. (Mateo 11:28, 29) Apan ang mga Kristohanon sa Laodicea dili init ni bugnaw. Sama sa tubig nga nag-agos ngadto sa ilang siyudad, sila dagaang, walay kadasig. Sila nameligrong isalikway sa bug-os ni Jesus, nga iyang ‘isuka gikan sa iyang baba’! Hinaot unta kita sa atong bahin kanunay nga madasigong maningkamot, sama ni Jesus, sa paghatag ug espirituwal nga kahupayan sa uban.—Mateo 9:35-38.
“Ikaw Nagaingon: ‘Ako Dato’”
7. (a) Sa unsang paagi gipaila ni Jesus ang hinungdan sa problema sa mga Kristohanon sa Laodicea? (b) Nganong miingon man si Jesus nga “buta ug hubo” ang mga Kristohanon sa Laodicea?
7 Unsa ba gayoy hinungdan sa problema sa mga taga-Laodicea? Makakuha kitag ideya gikan sa sunod nga mga pulong ni Jesus: “Tungod kay ikaw nagaingon: ‘Ako dato ug nakabatog mga bahandi ug wala na manginahanglan ug bisan unsa pa,’ apan wala ka mahibalo nga ikaw alaot ug makaluluoy ug kabos ug buta ug hubo.” (Pinadayag 3:17; itandi ang Lucas 12:16-21.) Kay nagpuyo sa usa ka adunahang siyudad, sila masaligon tungod sa ilang mga bahandi. Lagmit, ang mga tinukod sama sa mga estadyum, teatro, ug mga gimnasyum nakaapektar sa ilang paagi sa kinabuhi mao nga sila nahimong “mga mahigugmaon sa kalipayan inay nga mga mahigugmaon sa Diyos.” a (2 Timoteo 3:4) Bisan tuod ang mga taga-Laodicea dato sa materyal, sila kabos sa espirituwal. Kon aduna man ugaling silay ‘bahandi nga natigom sa langit,’ kini gamay lang. (Mateo 6:19-21) Wala nila hupting yano ang ilang mata pinaagi sa pag-una sa Gingharian sa Diyos diha sa ilang kinabuhi. Sa pagkatinuod, sila anaa sa kangitngit, buta, walay espirituwal nga panan-aw. (Mateo 6:22, 23, 33) Dugang pa, bisan pa sa nindot nga mga besti nga lagmit mapalit sa ilang materyal nga bahandi, sa panan-aw ni Jesus sila hubo. Sila walay espirituwal nga mga besti nga magpaila kanila ingong mga Kristohanon.—Itandi ang Pinadayag 16:15.
8. (a) Sa unsang paagi naglungtad usab karon ang kahimtang sama nianang sa Laodicea? (b) Sa unsang paagi ang pipila ka Kristohanon naglimbong sa ilang kaugalingon niining hakog nga kalibotan?
8 Pagkamakapakurat nga kahimtang! Apan dili ba kanunay kitang makakita ug susamang kahimtang karon? Unsay hinungdan niining kahimtanga? Tungod kini sa kompiyansa sa kaugalingon nga resulta sa pagsalig sa materyal nga mga kabtangan ug tawhanong mga kahinguhaan. Sama sa mga maninimba sa Kakristiyanohan, adunay pipila sa katawhan ni Jehova nga naglimbong sa ilang kaugalingon ug nagtuo nga ilang mapahimut-an ang Diyos pinaagi sa pagtambong lang sa mga miting popanagsa. Sila basta lang nag-alagad ingong taphaw nga “mga magtutuman sa pulong.” (Santiago 1:22) Bisan pa sa sublisubling mga pasidaan gikan sa Juan nga matang, sila determinado gayod nga makabaton ug usong mga sinina, mga sakyanan, ug mga balay, ug magkinabuhi nga nasentro sa kalingawan ug lulinghayaw. (1 Timoteo 6:9, 10; 1 Juan 2:15-17) Kining tanan miresulta sa pagkahabol sa espirituwal nga panabot. (Hebreohanon 5:11, 12) Imbes magpabiling dagaang, kinahanglang halingon nila pag-usab ang “kalayo sa espiritu” ug ipakita ang makapalagsik nga kaikag sa ‘pagwali sa pulong.’—1 Tesalonica 5:19; 2 Timoteo 4:2, 5.
9. (a) Unsang mga pulong ni Jesus ang angayng makapahigmata sa dagaang nga mga Kristohanon, ug ngano? (b) Sa unsang paagi matabangan sa kongregasyon ang nasalaag nga ‘mga karnero’?
9 Unsay panglantaw ni Jesus sa dagaang nga mga Kristohanon? Ang iyang prangka nga mga pulong angayng makapahigmata kanila: “Wala ka mahibalo nga ikaw alaot ug makaluluoy ug kabos ug buta ug hubo.” Ang ilang mga konsensiya gikubalan na mao nga wala gani sila makaamgo sa ilang makuyaw nga kahimtang. (Itandi ang Proverbio 16:2; 21:2.) Kining seryoso nga kahimtang sa kongregasyon dili mahimong ibalewala lang. Pinaagi sa pagpakitag maayong panig-ingnan sa kadasig ug pinaagi sa mahigugmaong pagbantay sa panon, ang mga ansiyano ug ang uban nga ilang gihatagag kaakohan makatabang sa pagpukaw niining nasalaag nga ‘mga karnero’ aron mahibalik ang ilang kanhing kalipay sa bug-os-kasingkasing nga pag-alagad.—Lucas 15:3-7.
Tambag “Aron Madato”
10. Unsa ang “bulawan” nga giingon ni Jesus sa mga Kristohanon sa Laodicea nga ilang paliton gikan kaniya?
10 Aduna bay tambal alang sa makapasubo nga kahimtang sa Laodicea? Oo, kon ipadapat sa maong mga Kristohanon ang tambag ni Jesus: “Tambagan ko ikaw nga mopalit gikan kanako ug bulawan nga dinalisay sa kalayo aron madato ka.” (Pinadayag 3:18a) Ang tinuod nga Kristohanong “bulawan,” nga dinalisay sa kalayo ug gihinloan sa tanang hugaw, maghimo kanila nga “dato ngadto sa Diyos.” (Lucas 12:21) Asa man sila makapalit sa maong bulawan? Dili gikan sa mga magbabangko sa ilang dapit kondili gikan kang Jesus! Gipatin-aw ni apostol Pablo kon unsa ang maong bulawan sa dihang iyang gisultihan si Timoteo sa pagsugo sa adunahang mga Kristohanon ‘sa pagbuhat ug maayo, nga magmadato sa maayong mga buhat, nga magmahinatagon, andam sa pagpaambit, nga maampingong magtipig alang sa ilang kaugalingon ug usa ka maayong patukoranan alang sa umalabot.’ Pinaagi lamang sa pagpanglimbasog niining paagiha nga sila “makapangupot pag-ayo sa tinuod nga kinabuhi.” (1 Timoteo 6:17-19) Gipadapat unta sa dato nga mga taga-Laodicea ang tambag ni Pablo aron sila mahimong dato sa espirituwal.—Tan-awa usab ang Proverbio 3:13-18.
11. Unsay atong modernong-adlaw nga mga panig-ingnan niadtong nagpalit ug “bulawan nga dinalisay sa kalayo”?
11 Aduna bay modernong-adlaw nga mga panig-ingnan niadtong nagpalit ug “bulawan nga dinalisay sa kalayo”? Oo, aduna! Bisan sa nagsingabot pa lang ang adlaw sa Ginoo, diha nay usa ka gamayng grupo sa mga estudyante sa Bibliya nga nahigmata sa kabakakan sa daghang Babilonyanhong mga pagtulon-an sa Kakristiyanohan, sama sa Trinidad, pagkadili-mamatay sa kalag, pagsakit sa kalayonhong impiyerno, pagbunyag sa masuso, ug pagsimba sa mga imahen (lakip sa krus ug sa imahen ni Maria). Agig pagtuboy sa kamatuoran sa Bibliya, kining mga Kristohanon nagmantala sa Gingharian ni Jehova ingong bugtong paglaom sa katawhan ug nagmantala sa halad lukat ni Jesus ingong pasukaranan sa kaluwasan. Halos 40 ka tuig nga abante, sila nagpunting sa 1914 ingong ang tuig nga gipakita sa tagna sa Bibliya nga maoy kataposan sa panahon sa mga Hentil, nga duyogan ug makapakurat nga mga panghitabo sa yuta.—Pinadayag 1:10.
12. Kinsa ang usa sa mga nanguna taliwala sa nahigmatang mga Kristohanon, ug sa unsang paagi siya nagpakitag talagsaong panig-ingnan sa pagtigom ug mga bahandi sa langit?
12 Nanguna niining nahigmatang mga Kristohanon mao si Charles Taze Russell, kinsa sa unang bahin sa mga tuig sa 1870 nag-organisar ug usa ka klase sa pagtuon sa Bibliya sa Allegheny (karon bahin sa Pittsburgh), Pennsylvania, U.S.A. Sa dihang gisugdan niya ang iyang pagpangita sa kamatuoran, si Russell kasosyo sa iyang amahan sa negosyo ug hapit nang mahimong milyonaryo. Apan iyang gibaligya ang iyang bahin sa negosyo nga mga tindahan ug gigamit ang iyang bahandi aron masuportahan sa pinansiyal ang pagmantala sa Gingharian sa Diyos sa tibuok yuta. Niadtong 1884 si Russell nahimong unang presidente sa korporasyon nga nailhan karon ingong Watch Tower Bible and Tract Society of Pennsylvania. Niadtong 1916 siya namatay sakay sa tren duol sa Pampa, Texas, paingon sa New York, nga gikapoy sa iyang ulahing panaw sa pagwali sa kasadpang bahin sa Tinipong Bansa. Siya nagpakitag talagsaong panig-ingnan sa pagtigom ug espirituwal nga mga bahandi sa langit, usa ka panig-ingnan nga gisundog karon sa gatosan ka libong nagsakripisyo-sa-kaugalingon nga payunir nga mga ministro.—Hebreohanon 13:7; Lucas 12:33, 34; itandi ang 1 Corinto 9:16; 11:1.
Naggamit sa Espirituwal nga Banyos sa Mata
13. (a) Sa unsang paagi ang espirituwal nga banyos sa mata makapauswag sa kahimtang sa mga taga-Laodicea? (b) Unsang matanga sa mga besti ang girekomendar ni Jesus, ug ngano?
13 Si Jesus mihatag usab ug bug-at nga tambag sa mga taga-Laodicea: ‘Palit ug maputing panggawas nga mga besti aron mabestihan ka ug aron nga ang kaulawan sa imong pagkahubo dili madayag, ug banyos-sa-mata nga ihidhid sa imong mga mata aron ikaw makakita.’ (Pinadayag 3:18b) Kinahanglang mangita sila ug tambal alang sa ilang espirituwal nga pagkabuta pinaagi sa pagpalit ug makaayo nga banyos sa mata, dili kadtong gibaligya sa mga mananambal sa ilang dapit, kondili ang banyos nga si Jesus lamang ang makatagana. Kini motabang kanila sa pagbaton ug espirituwal nga pagsabot, nga moabag kanila sa paglakaw sa “dalan sa mga matarong” uban sa ilang sanag nga mga mata nga nasentro sa pagbuhat sa kabubut-on sa Diyos. (Proverbio 4:18, 25-27) Sa ingon sila makasul-ob, dili sa mahalong itom nga delanang mga besti nga gama sa Laodicea, kondili sa pino, “maputing panggawas nga mga besti” nga nagpaila sa ilang pribilehiyo ingong mga sumusunod ni Jesu-Kristo.—Itandi ang 1 Timoteo 2:9, 10; 1 Pedro 3:3-5.
14. (a) Unsang espirituwal nga banyos sa mata ang nabatonan sukad sa 1879? (b) Kinsa ang kinalabwang tinubdan sa pondo nga nagsuportar sa mga Saksi ni Jehova? (c) Sa paggamit sa mga amot, sa unsang paagi ang mga Saksi ni Jehova lahi sa uban?
14 Mabatonan ba ang espirituwal nga banyos sa mata sa modernong mga panahon? Oo! Niadtong 1879 si Pastor Russell, nga maoy mahigugmaong pagtawag kaniya, nagsugod sa pagpatik sa magasin nga nailhan karon sa tibuok kalibotan nga Ang Bantayanang Torre Nagapahayag sa Gingharian ni Jehova, sa pagdepensa sa kamatuoran. Sa ikaduhang gula niini, siya miingon: “Kami nagtuo nga si JEHOVA maoy tigpaluyo [niining magasina] ug samtang gipaluyohan niya kini, dili gayod kini magpakilimos ni mangayo sa mga tawo ug suporta. Kon Siya nga nag-ingon: ‘Ang tanang bulawan ug plata sa kabukiran akoa,’ mapakyas sa pagtagana sa gikinahanglang pondo, kini among sabton ingong panahon na nga hunongon kini nga publikasyon.” Ang ubang mga magwawali sa telebisyon nakakolekta ug daghan kaayong bahandi ug nagkinabuhi sa makauulaw (ug usahay imoral) nga kaluho. (Pinadayag 18:3) Sa kasukwahi, ang mga Estudyante sa Bibliya, nga nailhan karon ingong mga Saksi ni Jehova, naggamit sa tanang kinabubut-ong mga amot nga nadawat sa pag-organisar ug pagpauswag sa tibuok-kalibotang pagsangyaw bahin sa umaabot nga Gingharian ni Jehova. Ang Juan nga matang hangtod karon nagdumala sa pagpatik sa Ang Bantayanang Torre ug Pagmata!, nga ang tingob nga sirkulasyon niini nga mga magasin sa 2006 mikabat na ug kapin sa 59 milyones. Ang Bantayanang Torre mabatonan diha sa mga 150 ka pinulongan. Kini ang opisyal nga basahon sa kongregasyon nga gilangkoban ug kapin sa unom ka milyong Kristohanon nga naggamit sa maong espirituwal nga banyos sa mata aron ilang makita ang kabakakan sa bakak nga relihiyon ug ang pagkadinalian sa pagwali sa maayong balita sa tanang kanasoran.—Marcos 13:10.
Pagbaton ug Kaayohan Gikan sa Pagbadlong ug Disiplina
15. Nganong gihatagan ni Jesus ug bug-at nga tambag ang mga Kristohanon sa Laodicea, ug sa unsang paagi ang kongregasyon angayng mosanong niini?
15 Mobalik kita sa mga taga-Laodicea. Sa unsang paagi sila mosanong sa bug-at nga tambag ni Jesus? Angay ba silang maluya ug mobati nga si Jesus dili na gusto kanila nga mahimong iyang mga sumusunod? Dili, dili gayod kana ang buot niyang mahitabo. Ang mensahe nagpadayon sa pag-ingon: “Ang tanan nga akong gimahal akong ginabadlong ug ginadisiplina. Busa magmasiboton ug maghinulsol.” (Pinadayag 3:19) Sama sa disiplina gikan kang Jehova, ang disiplina ni Jesus maoy ilhanan sa iyang gugma. (Hebreohanon 12:4-7) Kinahanglang pahimuslan sa kongregasyon sa Laodicea ang iyang mahigugmaong kahingawa ug ipadapat ang iyang tambag. Sila kinahanglang maghinulsol, nga ilhon ang ilang pagkadagaang ingong pagpakasala. (Hebreohanon 3:12, 13; Santiago 4:17) Kinahanglang talikdan sa ilang mga ansiyano ang materyalistikanhong mga paagi ug “sugniban sama sa kalayo” ang gasa nga ilang nabatonan gikan sa Diyos. Ug samtang ang espirituwal nga banyos sa mata magsugod sa pag-epekto, hinaot ang tanan sa kongregasyon makabaton ug kahupayan sama sa makapalagsik nga epekto sa pag-inom ug bugnawng tubig sa tubod.—2 Timoteo 1:6; Proverbio 3:5-8; Lucas 21:34.
16. (a) Sa unsang paagi ang gugma ug pagmahal ni Jesus gipasundayag karon? (b) Kon kita makadawat ug bug-at nga tambag, sa unsang paagi kita mosanong?
16 Komosta kita karon? Si Jesus nagpadayon sa ‘paghigugma sa mga iyaha nga ania sa kalibotan.’ Pagabuhaton niya kini “sa tanang adlaw hangtod sa kataposan sa sistema sa mga butang.” (Juan 13:1; Mateo 28:20) Ang iyang gugma ug pagmahal gipasundayag pinaagi sa modernong-adlaw nga Juan nga matang ug sa mga bituon, o mga ansiyano, sa Kristohanong kongregasyon. (Pinadayag 1:20) Niining malisod kaayong mga panahon, ang mga ansiyano interesado gayod sa pagtabang kanatong tanan, tigulang man ug batan-on, aron makapabilin sulod sa mga utlanan sa teokratikanhong toril, nga nakigbisog batok sa pagkaindependente, sa materyalistikanhong kahakog, ug sa imoral nga kahugawan sa kalibotan. Kon kita makadawat usahay ug bug-at nga tambag o disiplina, hinumdomi nga “ang mga pagbadlong sa disiplina maoy dalan sa kinabuhi.” (Proverbio 6:23) Kitang tanan dili hingpit ug kinahanglang magmadasigon sa paghinulsol aron kita matul-id ug magpabilin sa gugma sa Diyos.—2 Corinto 13:11.
17. Sa unsang paagi ang bahandi makapameligro sa atong espirituwalidad?
17 Dili gayod nato tugotan ang materyalismo, bahandi, o ang kawalay-bahandi sa paghimo kanatong dagaang. Ang bahandi makatabang sa pagbukas ug bag-ong mga posibilidad sa pag-alagad, apan kini mahimong peligroso usab. (Mateo 19:24) Lagmit bation sa arangang tawo nga dili kinahanglang magmadasigon siya sa buluhatong pagsangyaw sama sa uban, basta mohatag lang siya ug dakodakong amot matag karon ug unya. O kaha bation niya nga ang pagkaadunahan mohatag kaniya ug katungod sa pagdawat ug mga pabor. Dugang pa, adunay daghang kalingawan ug pasatiempo nga bukas sa adunahang tawo nga dili maarangan sa uban. Apan kanang maong mga kalingawan makahurot ug panahon ug mahimong modaldal sa dili-mabinantayon pahilayo sa Kristohanong ministeryo, sa ingon ang usa nga dili maalamon mahimong dagaang. Hinaot atong likayan kining tanang lit-ag ug magpadayon sa ‘paghago ug pagpanlimbasog’ nga bug-os kasingkasing, nga nagsentro kanunay sa hunahuna sa paglaom nga kinabuhing walay kataposan.—1 Timoteo 4:8-10; 6:9-12.
Pagpakigsalo sa ‘Panihapon’
18. Unsang kahigayonan ang gitanyag ni Jesus sa mga Kristohanon sa Laodicea?
18 Si Jesus nagpadayon sa pag-ingon: “Tan-awa! Ako nagabarog sa pultahan ug nagapanuktok. Kon may magpatalinghog sa akong tingog ug magbukas sa pultahan, ako mosulod sa iyang balay ug manihapon uban kaniya ug siya uban kanako.” (Pinadayag 3:20) Kon ang mga Kristohanon sa Laodicea modawat lang unta kang Jesus sa ilang kongregasyon, siya motabang kanila sa pagbuntog sa ilang pagkadagaang!—Mateo 18:20.
19. Unsay gipasabot ni Jesus sa dihang misaad siya nga manihapon uban sa kongregasyon sa Laodicea?
19 Ang paghisgot ni Jesus ug panihapon walay duhaduha nga nagpahinumdom sa mga taga-Laodicea sa mga panahong siya mikaon uban sa iyang mga tinun-an. (Juan 12:1-8) Ang maong mga okasyon kanunayng nakahatag ug espirituwal nga mga panalangin niadtong presente. Sa samang paagi, dihay talagsaong mga okasyon human sa pagkabanhaw ni Jesus nga siya nakigsalo sa pagpangaon sa iyang mga tinun-an, ug ang maong mga okasyon nakapalig-on gayod kanila. (Lucas 24:28-32; Juan 21:9-19) Busa, ang iyang saad nga moadto sa kongregasyon sa Laodicea ug manihapon uban kanila maoy usa ka saad nga maghatag kanilag dagayang espirituwal nga mga kaayohan kon sila modawat lang unta kaniya.
20. (a) Unsay resulta sa pagkadagaang sa Kakristiyanohan sa pagsugod sa adlaw sa Ginoo? (b) Unsay epekto sa paghukom ni Jesus diha sa Kakristiyanohan?
20 Ang mahigugmaong awhag ni Jesus sa mga taga-Laodicea dunay dakong kahulogan alang sa nahibilin nga dinihogang mga Kristohanon karon. Ang pipila kanila nahinumdom nga, sa pagsugod sa adlaw sa Ginoo, migrabe pa gayod ang pagkadagaang sa mga relihiyonista sa Kakristiyanohan. Inay malipay sa pagbalik sa atong Ginoo niadtong 1914, ang klero niini nalambigit sa pagpinatyanay sa Gubat sa Kalibotan I, nga sa 28 ka nasod nga nakig-away, 24 ang nag-angkong Kristohanon. Pagkadako sa ilang sala sa dugo! Panahon sa Gubat sa Kalibotan II, diin ang dakong bahin gisangka usab sa mga nasod sa Kakristiyanohan, ang mga sala sa bakak nga relihiyon sa makausa pa “nagtipun-og sangko sa langit.” (Pinadayag 18:5) Dugang pa, gisalikway sa klero ang nagsingabot nga Gingharian ni Jehova pinaagi sa pagpaluyo sa Liga sa Kanasoran, sa Hiniusang Kanasoran, ug sa rebolusyonaryong mga kalihokan sa mga nasod, nga walay bisan usa niini ang makasulbad sa mga problema sa katawhan. Si Jesus dugay nang nagsalikway sa klero, nga naghukom ug naglabog kanila, sama sa mananagat nga naglabog sa walay-pulos nga mga isda nga nasikop sa iyang pukot. Ang makaluluoy nga kahimtang sa mga relihiyon sa Kakristiyanohan karon nagpamatuod sa maong paghukom kaniya. Hinaot ang iyang dangatan magsilbing pasidaan kanato!—Mateo 13:47-50.
21. Sugod sa 1919 padayon, sa unsang paagi ang mga Kristohanon sa matuod nga kongregasyon misanong sa mga pulong ni Jesus ngadto sa mga Kristohanon sa Laodicea?
21 Bisan sa sulod sa matuod nga kongregasyon, adunay dagaang nga mga indibiduwal nga samag ilimnon nga dili makapalagsik ang kainit ni makapapresko ang kabugnaw. Apan si Jesus may mainiton gihapong pagmahal sa iyang kongregasyon. Siya andam sa pagtabang sa mga Kristohanon nga maabiabihong mosanong, ug dihay daghan nga midawat kaniya, nga morag nag-abiabi kaniya sa usa ka panihapon. Tungod niini, sugod sa 1919 padayon, ang ilang mga mata nabuksan sa kahulogan sa mga tagna sa Bibliya. Sila nagpahimulos sa usa ka yugto sa dakong kalamdagan.—Salmo 97:11; 2 Pedro 1:19.
22. Unsang umaabot nga panihapon ang lagmit gihunahuna ni Jesus, ug kinsa ang makigsalo niini?
22 Lagmit may lain pang panihapon nga gihunahuna si Jesus sa dihang gisulti niya ang iyang mensahe ngadto sa mga taga-Laodicea. Sa ulahing bahin sa Pinadayag atong mabasa: “Malipayon kadtong gidapit sa panihapon sa kasal sa Kordero.” Kini ang harianong kombira sa kadaogan agig pagdayeg kang Jehova human sa iyang pagpatuman sa paghukom sa bakak nga relihiyon—usa ka kombira nga salohan ni Kristo ug sa iyang nakompletong pangasaw-onon nga 144,000 sa langit. (Pinadayag 19:1-9) Ang masanongong mga membro nianang kongregasyon sa Laodicea sa karaang panahon—ug ang matinumanong mga igsoon ni Kristo Jesus karon, nga nagsul-ob ug hinlong mga besti nga ilhanan ingong matuod nga dinihogang mga Kristohanon—tanan magkombira uban sa ilang Pamanhonon nianang maong panihapon. (Mateo 22:2-13) Pagkapuwersadong awhag nga magmadasigon ug maghinulsol!
Usa ka Trono Alang sa mga Mananaog
23, 24. (a) Unsa ang lain pang ganti nga gihisgotan ni Jesus? (b) Kanus-a si Jesus milingkod sa iyang Mesiyanikong trono, ug kanus-a niya gisugdan ang paghukom sa nag-angkong mga Kristohanon? (c) Unsa ang talagsaong saad ni Jesus sa iyang mga tinun-an sa dihang gisugdan niya ang Memoryal sa iyang kamatayon?
23 Si Jesus naghisgot ug lain pang ganti, nga nag-ingon: “Ngadto sa magmadaogon itugot ko ang paglingkod uban kanako sa akong trono, maingon nga ako usab nagmadaogon ug milingkod uban sa akong Amahan diha sa iyang trono.” (Pinadayag 3:21) Ingong katumanan sa mga pulong ni David sa Salmo 110:1, 2, si Jesus gibanhaw sa 33 K.P. ug gibayaw sa paglingkod uban sa iyang Amahan sa Iyang langitnong trono kay iya mang gidaog ang kalibotan ug gihuptan ang iyang integridad. (Buhat 2:32, 33) Sa laing importante kaayong tuig, sa 1914, si Jesus miabot sa paglingkod sa iya mismong Mesiyanikong trono ingong Hari ug Maghuhukom. Dayag nga ang paghukom nagsugod sa 1918 diha sa nag-angkong mga Kristohanon. Ang dinihogang mga mananaog nga namatay una pa nianang panahona banhawon ug moduyog kang Jesus sa iyang Gingharian. (1 Pedro 4:17) Iya kining gisaad kanila sa dihang gisugdan niya ang Memoryal sa iyang kamatayon, nga miingon sa iyang mga tinun-an: “Nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian, aron nga mangaon kamo ug manginom sa akong lamesa diha sa akong gingharian, ug magalingkod sa mga trono aron sa paghukom sa napulog-duha ka tribo sa Israel.”—Lucas 22:28-30.
24 Pagkatalagsaong katungdanan—ang paglingkod uban sa nagamandong Hari panahon sa “paglalang-pag-usab” ug ang pagpakig-ambit uban kaniya, pinasukad sa iyang hingpit nga halad, aron ipasig-uli ang kalibotan sa matinumanong katawhan ngadto sa Edenikong kahingpitan! (Mateo 19:28; 20:28) Sama sa gipahibalo kanato ni Juan, ang mga mananaog himoon ni Jesus nga “usa ka gingharian, mga saserdote ngadto sa iyang Diyos ug Amahan,” aron molingkod sa mga trono palibot sa mismong halangdong trono ni Jehova sa langit. (Pinadayag 1:6; 4:4) Hinaot kitang tanan—dinihogan man o sakop sa katilingban sa bag-ong yuta nga naglaom sa pagpakigbahin sa pagpasig-uli sa Paraiso—magpadapat sa mga pulong ni Jesus sa mga taga-Laodicea!—2 Pedro 3:13; Buhat 3:19-21.
25. (a) Sama sa nag-unang mga mensahe, sa unsang paagi gitapos ni Jesus ang iyang mensahe ngadto sa Laodicea? (b) Unsay angayng sanong sa tagsa ka Kristohanon karon sa mga pulong ni Jesus sa kongregasyon sa Laodicea?
25 Sama sa nag-unang mga mensahe, kini gitapos ni Jesus pinaagig mga pulong sa pag-awhag: “Ang adunay igdulungog magpatalinghog sa ginaingon sa espiritu ngadto sa mga kongregasyon.” (Pinadayag 3:22) Kita nagkinabuhi sa hinapos nang bahin sa kataposan. Ang pamatuod sa pagkabugnaw sa gugma sa Kakristiyanohan kaylap nga makita sa atong palibot. Sa kasukwahi, hinaot unta kita ingong matuod nga mga Kristohanon mosanong nga madasigon sa mensahe ni Jesus ngadto sa kongregasyon sa Laodicea, oo, sa tanang pito ka mensahe sa atong Ginoo ngadto sa mga kongregasyon. Atong mahimo kini pinaagi sa aktibong pagpakigbahin sa katumanan sa dakong tagna ni Jesus sa atong adlaw: “Ug kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:12-14.
26. Kanus-a si Jesus direktang nakigsulti pag-usab kang Juan, apan sa unsa siya nakig-ambit?
26 Ang tambag ni Jesus sa pito ka kongregasyon natapos na. Siya wala na makigsulti pag-usab kang Juan sa Pinadayag kondili diha na sa kataposang kapitulo niini; apan siya nakig-ambit diha sa daghang panan-awon, sama sa pagpatuman sa mga paghukom ni Jehova. Moduyog kita karon sa Juan nga matang sa pagsusi sa ikaduhang talagsaon nga panan-awon nga gibutyag ni Ginoong Jesu-Kristo.
[Footnote]
a Kining mga dapita nakalot sa mga arkeologo diha sa Laodicea.
[Mga Pangutana sa Pagtuon]
[Kahon sa panid 73]
Materyalismo Kontra Kaalam
Niadtong 1956, usa ka kolumnista sa mantalaan misulat: “Gibanabana nga usa ka siglo kanhi ang ordinaryong tawo gustog 72 ka butang, apan 16 lang niini ang giisip nga kinahanglanon. Karon, ang ordinaryong tawo gibanabana nga gustog 474 ka butang, ug 94 lang niini ang giisip nga kinahanglanon. Usa ka siglo kanhi, 200 ka butang ang ipugos pagbaligya ngadto sa usa ka ordinaryong tawo—apan karon 32,000 na ka butang ang ginabaligya nga lisod kaayong balibaran. Diyutay lang ang kinahanglanon sa tawo—apan walay kinutbanan ang iyang mga gusto.” Karon, ang mga tawo kanunayng gipatuo nga ang materyal nga bahandi ug kabtangan mao ang pangunang butang sa kinabuhi. Busa, daghan ang wala magtagad sa maalamong tambag sa Ecclesiastes 7:12: “Ang kaalam usa ka panalipod maingon nga ang salapi usa ka panalipod; apan ang bentaha sa kahibalo mao nga ang kaalam nagatipig nga buhi sa mga nanag-iya niini.”
[Hulagway sa panid 67]
Ang tubig nga miagos ngadto sa Laodicea walay lami kay dagaang na. Ang mga Kristohanon sa Laodicea nagbaton ug dili maayong dagaang nga espiritu
