“Pangupti Pag-ayo ang Imong Nabatonan”
Kapitulo 12
“Pangupti Pag-ayo ang Imong Nabatonan”
FILADELFIA
1. Sa unsang siyudad nahimutang ang kongregasyon nga gipadad-an ni Jesus sa iyang ikaunom nga mensahe, ug unsay kahulogan sa ngalan nianang siyudara?
INIGSOONG PAGBATI—pagkatilinguhaon nga kinaiya! Walay duhaduha kini ang gihunahuna ni Jesus sa dihang iyang gihatag ang iyang ikaunom nga mensahe, nga gipadala ngadto sa kongregasyon sa Filadelfia, tungod kay kanang ngalana nagkahulogang “Inigsoong Pagbati.” Ang tigulang na nga si Juan nahinumdom gihapon sa nahitabo, kapin na sa 60 ka tuig ang milabay, sa dihang si Pedro tulo ka beses nga miinsistir ngadto kang Jesus nga siya, si Pedro, may mainit nga pagbati alang sa iyang Ginoo. (Juan 21:15-17) Ang mga Kristohanon ba sa Filadelfia, sa ilang bahin, nagpakitag inigsoong pagbati? Dayag gayod!
2. Unsang matanga sa siyudad ang Filadelfia, unsang matanga sa kongregasyon ang atua didto, ug unsay giingon ni Jesus ngadto sa manulonda niini nga kongregasyon?
2 Nahimutang mga 50 kilometros habagatan-sidlakan sa Sardis (sa dapit sa modernong siyudad sa Alasehir, Turkey), ang Filadelfia mauswagon kaayong siyudad sa adlaw ni Juan. Apan, mas talagsaon ang pag-uswag sa Kristohanong kongregasyon didto. Nalipay kaayo sila sa pag-abiabi sa ministro nga miduaw kanila, nga tingali miagi sa Sardis! Ang mensahe nga dala niya may makaiikag nga tambag alang kanila. Apan ang unang gihisgotan niini mao ang awtoridad sa dungganong Nagpadala niini. Siya nag-ingon: “Ug ngadto sa manulonda sa kongregasyon sa Filadelfia isulat kini: Mao kini ang mga butang nga ginaingon niya nga balaan, kinsa matuod, kinsa adunay yawi ni David, kinsa magabukas nga walay makasira, ug magasira nga walay makabukas.”—Pinadayag 3:7.
3. Nganong haom nga tawgong “balaan” si Jesus, ug nganong ikaingon nga siya “matuod”?
3 Si Juan nakadungog kang Pedro nga miingon ngadto sa tawong si Jesu-Kristo: “Ikaw mao ang may mga pulong mahitungod sa kinabuhing walay kataposan; ug kami mituo ug nahibalo nga ikaw mao ang Balaang Usa sa Diyos.” (Juan 6:68, 69) Sanglit kinaiyahan gayod ni Jehova nga Diyos ang pagkabalaan, ang iyang bugtong nga Anak kinahanglang “balaan” usab. (Pinadayag 4:8) Si Jesus usab “matuod.” Ang Gregong pulong nga gigamit dinhi (a·le·thi·nosʹ) nagpasabot ug pagkatiunay. Niini nga diwa, si Jesus mao ang matuod nga kahayag ug ang matuod nga tinapay nga nanaog gikan sa langit. (Juan 1:9; 6:32) Siya ang matuod nga punoan sa paras. (Juan 15:1) Si Jesus matuod usab sa diwa nga siya kasaligan. Siya kanunayng nagsulti sa kamatuoran. (Tan-awa ang Juan 8:14, 17, 26.) Kining Anak sa Diyos takos gayod sa pag-alagad ingong Hari ug Maghuhukom.—Pinadayag 19:11, 16.
“Yawi ni David”
4, 5. Sa unsang pakigsaad nalangkit ang “yawi ni David”?
4 Anaa kang Jesus ang “yawi ni David.” Pinaagi niini, siya “magabukas nga walay makasira, ug magasira nga walay makabukas.” Unsa kining “yawi ni David”?
5 Si Jehova naghimog pakigsaad kang Haring David sa Israel alang sa usa ka gingharian nga walay kataposan. (Salmo 89:1-4, 34-37) Ang panimalay ni David naglingkod sa trono ni Jehova nga nagmando sa Jerusalem sukad sa 1070 hangtod 607 W.K.P., apan gihukman sa Diyos ang maong gingharian tungod kay kini nahimong daotan. Sa ingon si Jehova nagsugod sa pagtuman sa iyang tagna sa Ezequiel 21:27: “Kagun-oban, kagun-oban, pagahimoon ko kini [yutan-ong Jerusalem] nga kagun-oban. Ug kon bahin niini usab, walay magapanag-iya niini [ang setro sa pagkahari sa kaliwat ni David] hangtod nga moabot siya nga may legal nga katungod, ug ihatag ko kini kaniya.”
6, 7. Kanus-a ug sa unsang paagi moabot ang usa nga dunay “legal nga katungod”?
6 Kanus-a ug sa unsang paagi moabot ang usa nga dunay “legal nga katungod”? Sa unsang paagi ang setro sa gingharian ni David ihatag kaniya?
7 Mga 600 ka tuig sa ulahi, usa ka kaliwat ni Haring David, ang Hudiya nga dalaga nga si Maria, nagmabdos pinaagi sa balaang espiritu. Gipadala sa Diyos ang manulondang si Gabriel sa pagpahibalo kang Maria nga siya makabaton ug usa ka anak nga lalaki nga paganganlan ug Jesus. Midugang si Gabriel: “Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.”—Lucas 1:31-33.
8. Sa unsang paagi gipamatud-an ni Jesus nga siya kuwalipikado sa pagpanunod sa Davidnong gingharian?
8 Sa 29 K.P., sa dihang si Jesus gibawtismohan sa Suba sa Jordan ug gidihogan sa balaang espiritu, siya nahimong Tinudlo nga Hari sa kaliwat ni David. Siya nagpakitag sulondang kadasig sa pagwali sa maayong balita sa Gingharian ug nagsugo usab sa iyang mga tinun-an sa pagwali. (Mateo 4:23; 10:7, 11) Si Jesus nagmapaubsanon bisan hangtod sa kamatayon diha sa estaka sa pagsakit, sa ingon iyang gipamatud-an nga siya kuwalipikado gayod sa pagpanunod sa Davidnong gingharian. Si Jesus gibanhaw ni Jehova ingong imortal nga espiritu ug gibayaw siya ngadto sa Iyang tuong kamot diha sa mga langit. Didto iyang napanunod ang tanang katungod sa Davidnong gingharian. Sa takdang panahon gamiton ni Jesus ang iyang katungod sa ‘pagpangdaog taliwala sa iyang mga kaaway.’—Salmo 110:1, 2; Filipos 2:8, 9; Hebreohanon 10:13, 14.
9. Sa unsang paagi gigamit ni Jesus ang yawi ni David sa pagbukas ug pagsira?
9 Sa kasamtangan, mahimo nang gamiton ni Jesus ang yawi ni David, sa pagbukas sa mga kahigayonan ug mga pribilehiyo maylabot sa Gingharian sa Diyos. Pinaagi kang Jesus, luwason na ni Jehova karon ang dinihogang mga Kristohanon sa yuta “gikan sa awtoridad sa kangitngit,” ug ibalhin sila “ngadto sa gingharian sa Anak nga iyang gihigugma.” (Colosas 1:13, 14) Ang yawi gamiton usab sa pagsira sa maong mga pribilehiyo ngadto kang bisan kinsa nga dili matinumanon. (2 Timoteo 2:12, 13) Sanglit kining permanenteng manununod sa gingharian ni David gipaluyohan man ni Jehova, walay linalang ang makapugong kaniya sa pagtuman sa maong mga katungdanan.—Itandi ang Mateo 28:18-20.
10. Unsang pagdasig ang gihatag ni Jesus sa kongregasyon sa Filadelfia?
10 Kay naggikan man sa usa nga dunay awtoridad, ang mga pulong ni Jesus ngadto sa mga Kristohanon sa Filadelfia makapahupay gayod! Iyang gihatagan sila ug komendasyon, nga nag-ingon: “Ako nahibalo sa imong mga buhat—tan-awa! gibutang ko sa imong atubangan ang usa ka binuksan nga pultahan, nga walay makasira—nga ikaw may diyutayng gahom, ug ikaw nagbantay sa akong pulong ug wala maglimod sa akong ngalan.” (Pinadayag 3:8) Ang kongregasyon aktibo, ug usa ka pultahan ang nabuksan alang niini—walay duhaduha usa ka pultahan sa kahigayonan alang sa pag-alagad sa ministeryo. (Itandi ang 1 Corinto 16:9; 2 Corinto 2:12.) Busa, gidasig ni Jesus ang kongregasyon nga pahimuslan sa bug-os ang kahigayonan sa pagwali. Sa tabang sa espiritu sa Diyos, sila nakalahutay ug nagpakita nga sila may igong kusog sa pagpadayon sa paghimog dugang pa nga “mga buhat” sa pag-alagad kang Jehova. (2 Corinto 12:10; Zacarias 4:6) Sila nagtuman sa mga sugo ni Jesus ug wala ipangulipas si Kristo, sa pulong man o sa buhat.
“Sila Managyukbo Kanimo”
11. Unsang panalangin ang gisaad ni Jesus sa mga Kristohanon, ug sa unsang paagi kini natuman?
11 Busa, si Jesus nagsaad kanila ug mga bunga: “Tan-awa! Akong igahatag silang gikan sa mga sinagoga ni Satanas nga nag-ingon nga sila mga Hudiyo, apan dili diay, hinunoa nagapamakak—tan-awa! paanhaon ko sila ug payukboon atubangan sa imong mga tiil ug pailhon ko sila nga ako nahigugma kanimo.” (Pinadayag 3:9) Tingali, sama sa Smirna, ang kongregasyon may problema sa mga Hudiyo nianang dapita. Gitawag sila ni Jesus nga “sinagoga ni Satanas.” Bisan pa niana, labing menos ang pipila niana nga mga Hudiyo nakaamgo sa ngadtongadto nga tinuod ang giwali sa mga Kristohanon mahitungod kang Jesus. Ang ilang ‘pagyukbo’ dayag nga sa paagi nga gihubit ni Pablo sa 1 Corinto 14:24, 25, mao nga sila naghinulsol gayod ug nahimong mga Kristohanon, nga nag-apresyar gayod sa dakong gugma ni Jesus sa paghalad bisan sa iyang kalag alang sa iyang mga tinun-an.—Juan 15:12, 13.
12. Nganong ang mga membro sa Hudiyohanong sinagoga sa Filadelfia lagmit makuratan sa pagkahibalo nga ang uban kanila ‘miyukbo’ sa lokal nga Kristohanong komunidad?
12 Ang mga membro sa Hudiyohanong sinagoga sa Filadelfia lagmit makuratan sa pagkahibalo nga ang uban kanila ‘miyukbo’ sa lokal nga Kristohanong komunidad. Kay seguradong daghan ang mga dili-Hudiyo niana nga kongregasyon, sila nagdahom nga ang mga dili-Hudiyo maoy moyukbo kanila. Ngano? Tungod kay si Isaias mitagna: “[Dili-Hudiyong] mga hari ang mahimo gayod nga mga tig-atiman kanimo [ang katawhan sa Israel], ug ang ilang mga prinsesa nga mga iwa alang kanimo. Sila managyukbo kanimo nga ang mga nawong ngadto sa yuta.” (Isaias 49:23; 45:14; 60:14) Sa susama, si Zacarias giinspirar sa pagsulat: “Mahitabo unya niadtong mga adlawa nga napulo ka tawo [mga dili-Hudiyo] gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zacarias 8:23) Oo, ang mga dili-Hudiyo mao ang angayng moyukbo sa mga Hudiyo, imbes nga ang mga Hudiyo maoy moyukbo sa mga dili-Hudiyo!
13. Kinsa nga mga Hudiyo ang makasinati sa katumanan sa mga tagna nga gitumong sa karaang Israel?
13 Ang maong mga tagna gitumong ngadto sa piniling nasod sa Diyos. Kana ang dungganong posisyon sa unodnong Israel sa dihang gibungat ang tagna. Apan sa dihang gisalikway sa Hudiyo nga nasod ang Mesiyas, sila gisalikway usab ni Jehova. (Mateo 15:3-9; 21:42, 43; Lucas 12:32; Juan 1:10, 11) Sa Pentekostes 33 K.P., iyang gipuli kanila ang matuod nga Israel sa Diyos, ang Kristohanong kongregasyon. Ang mga membro niini mao ang espirituwal nga mga Hudiyo nga nasirkunsisyonan gayod sa kasingkasing. (Buhat 2:1-4, 41, 42; Roma 2:28, 29; Galacia 6:16) Human niana, ang bugtong paagi nga ang tagsa ka unodnong Hudiyo makabaton pag-usab ug inuyonang relasyon uban kang Jehova mao ang pagpasundayag ug pagtuo kang Jesus ingong ang Mesiyas. (Mateo 23:37-39) Dayag nga mao kini ang nahitabo sa pipila ka indibiduwal sa Filadelfia. a
14. Sa unsang paagi ang Isaias 49:23 ug Zacarias 8:23 talagsaon nga natuman sa modernong mga panahon?
14 Sa modernong mga panahon, ang mga tagna sama sa Isaias 49:23 ug Zacarias 8:23 talagsaon nga natuman. Tungod sa pagwali sa Juan nga matang, daghan kaayong katawhan ang nanulod sa bukas nga pultahan sa pag-alagad sa Gingharian. b Kadaghanan kanila migula sa Kakristiyanohan, kansang mga relihiyon sayop nga nag-angkon ingong espirituwal nga Israel. (Itandi ang Roma 9:6.) Isip dakong panon, ilang gilabhan ang ilang mga besti ug gipaputi kini pinaagi sa pagpasundayag ug pagtuo sa gihalad nga dugo ni Jesus. (Pinadayag 7:9, 10, 14) Kay nagpasakop sa pagmando ni Kristo sa Gingharian, sila naglaom nga makapanunod sa mga panalangin niini dinhi sa yuta. Sila nangadto sa dinihogang mga igsoon ni Kristo ug ‘miyukbo’ kanila, sa espirituwal nga pagkasulti, tungod kay ‘sila nakadungog nga ang Diyos nagauban kanila.’ Sila nag-alagad sa mga dinihogan, nga nahiusa uban kanila diha sa tibuok-kalibotang kapunongan sa mga igsoon.—Mateo 25:34-40; 1 Pedro 5:9.
“Takna sa Pagsulay”
15. (a) Unsay gisaad ni Jesus sa mga Kristohanon sa Filadelfia, ug unsay gidasig kanila nga buhaton? (b) Unsang “purongpurong” ang gilaomang madawat sa mga Kristohanon?
15 Si Jesus nagpadayon sa pag-ingon: “Tungod kay gibantayan mo ang pulong bahin sa akong paglahutay, ako usab magaamping kanimo gikan sa takna sa pagsulay, nga moabot sa tibuok gipuy-ang yuta, aron sa pagsulay sa mga nagapuyo sa yuta. Ako moabot sa madali. Pangupti pag-ayo ang imong nabatonan, aron nga walay usa nga magkuha sa imong purongpurong.” (Pinadayag 3:10, 11) Bisan tuod ang mga Kristohanon sa adlaw ni Juan dili na makaabot nga buhi sa adlaw sa Ginoo (nagsugod sa 1914), ang ilang pagsalig nga moabot si Jesus naghatag kanila ug kusog sa pagpadayon sa pagsangyaw. (Pinadayag 1:10; 2 Timoteo 4:2) Ang “purongpurong,” o ganti nga kinabuhing walay kataposan, naghulat kanila sa langit. (Santiago 1:12; Pinadayag 11:18) Walay makahikaw kanila nianang maong ganti kon sila magmatinumanon hangtod sa kamatayon.—Pinadayag 2:10.
16, 17. (a) Unsa ang “takna sa pagsulay, nga moabot sa tibuok gipuy-ang yuta”? (b) Unsay kahimtang sa mga dinihogan pagsugod sa “takna sa pagsulay”?
16 Apan, unsa ang “takna sa pagsulay”? Tinuod, kinahanglang sagubangon sa maong mga Kristohanon sa Asia ang laing grabe pa nga paglutos gikan sa imperyo sa Roma. c Bisan pa niana, ang dakong katumanan mao ang takna sa pag-ayag ug paghukom nga miabot ra gayod panahon sa adlaw sa Ginoo, nga misangko sa kinatayuktokan niini gikan sa 1918 padayon. Ang pagsulay maoy pagtino kon ang usa dapig ba sa natukod na nga Gingharian sa Diyos o sa kalibotan ni Satanas. Kini mahitabo sulod sa mubong yugto, sa usa ka “takna,” apan kini nagpadayon gihapon hangtod karon. Kay wala pa man kini matapos, kinahanglang dili gayod nato kalimtan nga kita nagkinabuhi sa “takna sa pagsulay.”—Lucas 21:34-36.
17 Niadtong 1918 ang Juan nga matang sa dinihogang mga Kristohanon—sama sa malig-ong kongregasyon sa Filadelfia—nagsagubang sa pagsupak sa modernong “sinagoga ni Satanas.” Ang relihiyosong mga lider sa Kakristiyanohan, nga nangangkon ingong espirituwal nga mga Hudiyo, malipotong nagmaniobra sa mga magmamando sa pagsumpo sa matuod nga mga Kristohanon. Bisan pa niana, sila naningkamot pag-ayo sa ‘pagbantay sa pulong bahin sa paglahutay ni Kristo’; busa, pinaagig espirituwal nga tabang, nga mao ang usa ka talagsaon nga “diyutayng gahom,” sila nakalahutay ug napukaw sa pagsulod sa pultahan nga karon gibuksan atubangan kanila. Sa unsang paagi?
“Usa ka Binuksan nga Pultahan”
18. Unsang katungdanan ang gihatag ni Jesus niadtong 1919, ug sa unsang paagi nga ang gihatagag katungdanan nahimong sama sa matinumanong tinugyanan ni Ezequias?
18 Niadtong 1919 gituman ni Jesus ang iyang saad ug giila ang gamayng pundok sa matuod nga dinihogang mga Kristohanon ingong iyang “matinumanon ug maalamong ulipon.” (Mateo 24:45-47) Sila nakabaton ug pribilehiyo nga sama nianang gipahimuslan sa matinumanong tinugyanan nga si Eliakim sa panahon ni Haring Ezequias. d Si Jehova nag-ingon bahin kang Eliakim: “Akong igabutang ang yawi sa balay ni David sa iyang abaga, ug siya magabukas nga walay bisan kinsa nga magasira, ug siya magasira nga walay bisan kinsa nga magabukas.” Gipangabaga ni Eliakim ang bug-at nga mga responsibilidad alang kang Ezequias, ang harianong anak ni David. Karon usab, “ang yawi sa balay ni David” gibutang diha sa abaga sa dinihogang Juan nga matang sa pagkaagi nga sila gipiyalan sa yutan-ong intereses sa Mesiyanikong Gingharian. Si Jehova nagpalig-on sa iyang mga alagad alang niini nga pribilehiyo, mao nga ang ilang diyutayng gahom napabaskog pag maayo nga igong gikinahanglan alang sa dako kaayong buluhaton sa tibuok-kalibotang pagsangyaw.—Isaias 22:20, 22; 40:29.
19. Sa unsang paagi giatiman sa Juan nga matang ang mga responsibilidad nga gihatag ni Jesus kanila niadtong 1919, ug unsay resulta?
19 Sukad sa 1919 padayon, gisugdan sa dinihogang nahibilin ang makugihong kampanya sa kaylap nga pagmantala sa maayong balita sa Gingharian agig pagsundog sa panig-ingnan ni Jesus. (Mateo 4:17; Roma 10:18) Tungod niini, ang pipila sa modernong sinagoga ni Satanas, ang Kakristiyanohan, mianha sa dinihogang nahibilin, naghinulsol ug ‘miyukbo,’ agig pag-ila sa awtoridad sa ulipon. Sila usab nag-alagad kang Jehova duyog sa edaran nang mga membro sa Juan nga matang. Kini nagpadayon hangtod natigom ang bug-os nga gidaghanon sa dinihogang mga igsoon ni Jesus. Human niini, ang “dakong panon . . . gikan sa tanang kanasoran” mianha sa ‘pagyukbo’ sa dinihogang ulipon. (Pinadayag 7:3, 4, 9) Ang ulipon ug kining dakong panon magkauban nga nag-alagad ingong usa ka panon sa mga Saksi ni Jehova.
20. Nganong ang mga Saksi ni Jehova karon kinahanglang malig-on gayod sa pagtuo ug aktibo sa pag-alagad sa Diyos?
20 Nahiusa sa bugkos sa tinuod nga inigsoong pagbati sama sa mga Kristohanon sa Filadelfia, ang mga Saksi ni Jehova karon nahibalo nga dinalian ang ilang buluhatong pagsangyaw. Sa dili madugay, taposon na sa dakong kasakitan ang daotang kalibotan ni Satanas. Nianang panahona, hinaot ang matag usa kanato makaplagang malig-on sa pagtuo ug aktibo sa pag-alagad sa Diyos, aron ang atong mga ngalan dili mapapas gikan sa basahon sa kinabuhi ni Jehova. (Pinadayag 7:14) Kinasingkasing gayod natong tagdon ang tambag ni Jesus sa kongregasyon sa Filadelfia aron kita makapangupot ug maayo sa atong mga pribilehiyo sa pag-alagad ug makabaton sa ganti nga kinabuhing walay kataposan.
Ang mga Panalangin sa mga Mananaog
21. Sa unsang paagi ang dinihogang mga Kristohanon karon ‘nagbantay sa pulong bahin sa paglahutay ni Jesus,’ ug unsang paglaom ang naghulat kanila?
21 Ang Juan nga matang karon ‘nagbantay sa pulong bahin sa paglahutay ni Jesus,’ sa ato pa, ilang gisundog ang iyang panig-ingnan ug milahutay. (Hebreohanon 12:2, 3; 1 Pedro 2:21) Sa ingon sila napalig-on pa ug dugang sa sunod nga mga pulong ni Jesus sa kongregasyon sa Filadelfia: “Siya nga magmadaogon—himoon ko siya nga haligi diha sa templo sa akong Diyos, ug dili na gayod siya mogula pa gikan niini.”—Pinadayag 3:12a.
22. (a) Unsa ang templo sa Diyos ni Jesus? (b) Sa unsang paagi ang dinihogang mga Kristohanon nga magmadaogon mahimong mga haligi niining temploha?
22 Usa gayod ka dakong pribilehiyo nga mahimong haligi sa templo ni Jehova! Sa karaang Jerusalem, ang literal nga templo mao ang sentro sa pagsimba kang Jehova. Sa sulod sa templo, ang hataas nga saserdote nagtanyag ug dugo sa mga hayop nga ihalad, usa ka adlaw kada tuig, atubangan sa milagrosong kahayag nga naghawas sa presensiya ni Jehova diha sa “Labing Balaan.” (Hebreohanon 9:1-7) Sa gibawtismohan si Jesus, natukod ang laing templo, usa ka dakong espirituwal, samag-templo nga kahikayan sa pagsimba kang Jehova. Ang balaan sa mga balaan niining maong templo atua sa langit, diin si Jesus ‘miatubang sa Diyos.’ (Hebreohanon 9:24) Si Jesus mao ang Hataas nga Saserdote, ug adunay usa lamang ka halad nga gitanyag aron bug-os nga matabonan ang mga sala: ang giula nga dugo sa hingpit nga tawong si Jesus. (Hebreohanon 7:26, 27; 9:25-28; 10:1-5, 12-14) Basta magpabilin sila nga matinumanon, ang dinihogang mga Kristohanon sa yuta mag-alagad ingong luyoluyong mga saserdote sa yutan-ong mga sawang niini nga templo. (1 Pedro 2:9) Apan sa dihang sila magmadaogon na, sila usab mosulod nianang balaan sa mga balaan sa langit ug mahimong dili-matarog nga mga tigpaluyo, nga samag mga haligi, sa samag-templo nga kahikayan sa pagsimba. (Hebreohanon 10:19; Pinadayag 20:6) Wala nay kapeligrohan nga sila “mogula pa gikan niini.”
23. (a) Unsay sunod nga gisaad ni Jesus ngadto sa dinihogang mga Kristohanon nga magmadaogon? (b) Unsay resulta sa pagsulat sa ngalan ni Jehova ug sa ngalan sa bag-ong Jerusalem diha sa Kristohanong mga mananaog?
23 Si Jesus nagpadayon sa pag-ingon: “Ug isulat ko diha kaniya ang ngalan sa akong Diyos ug ang ngalan sa siyudad sa akong Diyos, ang bag-ong Jerusalem nga manaog gikan sa langit gikan sa akong Diyos, ug ang akong bag-ong ngalan.” (Pinadayag 3:12b) Oo, nasulat diha sa mga mananaog ang ngalan ni Jehova—ang ilang Diyos ug ang Diyos ni Jesus. Kini klarong nagpakita nga si Jehova ug si Jesus duha ka magkalahi nga persona ug dili duha ka bahin sa Trinidad nga Diyos. (Juan 14:28; 20:17) Ang tanang kalalangan kinahanglang mahibalo nga kining maong mga dinihogan iya ni Jehova. Sila iyang mga saksi. Nasulat usab diha kanila ang ngalan sa bag-ong Jerusalem, ang langitnong siyudad nga manaog gikan sa langit sa diwa nga kini magpakaylap sa malulotong pagmando niini ngadto sa tanang matinumanong katawhan. (Pinadayag 21:9-14) Sa ingon, ang tanang yutan-on nga Kristohanong mga karnero mahibalo usab nga kining dinihogang mga mananaog maoy mga lungsoranon sa Gingharian, ang langitnong Jerusalem.—Salmo 87:5, 6; Mateo 25:33, 34; Filipos 3:20; Hebreohanon 12:22.
24. Sa unsa nagtumong ang bag-ong ngalan ni Jesus, ug sa unsang paagi kini nasulat diha sa matinumanon nga dinihogang mga Kristohanon?
24 Sa kataposan, nasulat diha sa dinihogang mga mananaog ang bag-ong ngalan ni Jesus. Kini nagtumong sa bag-ong katungdanan ni Jesus ug sa talagsaong mga pribilehiyo nga gihatag kaniya ni Jehova. (Filipos 2:9-11; Pinadayag 19:12) Walay laing nahibalo nianang ngalana, sa pagkaagi nga walay laing nakabaton sa maong mga kasinatian o gipiyalan sa maong mga pribilehiyo. Bisan pa niana, sa dihang isulat ni Jesus ang iyang ngalan diha sa iyang matinumanong mga igsoon, ilang mabatonan ang suod nga relasyon uban kaniya sa langitnong dapit ug makaambit pa gani sa iyang mga pribilehiyo. (Lucas 22:29, 30) Dili ikatingala nga si Jesus nagtapos sa iyang mensahe ngadto sa mga dinihogan pinaagi sa pagsubli sa awhag: “Ang adunay igdulungog magpatalinghog sa ginaingon sa espiritu ngadto sa mga kongregasyon.”—Pinadayag 3:13.
25. Sa unsang paagi ang matag Kristohanon karon makapadapat sa prinsipyo sa tambag ni Jesus ngadto sa kongregasyon sa Filadelfia?
25 Pagkamakapadasig gayod nianang maong mensahe alang sa matinumanong mga Kristohanon sa Filadelfia! Ug kini tino nga dunay puwersadong pagtulon-an alang sa Juan nga matang karon, sa adlaw sa Ginoo. Apan ang mga prinsipyo niini hinungdanon alang sa matag Kristohanon, sa dinihogan man o sa ubang mga karnero. (Juan 10:16) Angay nga ang matag usa kanato magpadayon sa pagpatungha ug mga bunga sa Gingharian sama sa gibuhat sa mga Kristohanon sa Filadelfia. Kitang tanan sa labing menos adunay diyutayng gahom. Kitang tanan adunay mahimo sa pag-alagad kang Jehova. Atong gamiton kining gahoma! Mahitungod sa dugang nga mga pribilehiyo sa Gingharian, magmaalisto kita sa pagsulod sa bisan unsang pultahan nga bukas alang kanato. Mahimo pa gani kitang moampo kang Jehova sa pagbukas sa maong pultahan. (Colosas 4:2, 3) Sa atong pagsundog sa sulondan ni Jesus sa paglahutay ug pag-unong sa iyang ngalan, atong gipakita nga kita usab adunay igdulungog nga nagpatalinghog sa gisulti sa balaang espiritu sa Diyos ngadto sa mga kongregasyon.
[Mga footnote]
a Sa panahon ni Pablo, si Sostenes, ang nagadumalang opisyal sa Hudiyohanong sinagoga sa Corinto, nahimong Kristohanong igsoon.—Buhat 18:17; 1 Corinto 1:1.
b Ang magasing Ang Bantayanang Torre, nga gipatik sa Juan nga matang, nagpadayon sa pagpasiugda sa pagkadinalian sa pagpahimulos niini nga kahigayonan ug sa pagpakigbahin sa bug-os sa buluhatong pagsangyaw kutob sa maarangan; pananglitan, tan-awa ang mga artikulong “Pahimayaa ang Tanan Kang Jehova” ug “Ang Ilang Tingog Miabot sa Tibuok nga Yuta” sa Enero 1, 2004, nga gula sa Ang Bantayanang Torre. Sa Hunyo 1, 2004 nga gula, sa artikulong “Bulahan Kadtong Nagahimaya sa Diyos,” gipasiugda ang pagsulod sa “binuksan nga pultahan” sa bug-os-panahong pag-alagad. Dihay kinatas-ang ihap nga 1,093,552 ka payunir nga nagtaho sa maong pag-alagad sa usa ka bulan sa 2005.
c Ang Cyclopedia ni McClintock ug Strong (Tomo X, panid 519) nagtaho: “Napugos ang mga emperador sa paghatag ug pagtagad sa Kristiyanidad tungod kay nagkagubot ang mga tawo gumikan sa pagsulsol sa paganong mga pari, kinsa nakuyawan sa talagsaong pag-uswag sa maong tinuohan, busa si Trajan [98-117 K.P.] nagpakanaog ug mga balaod aron anam-anam nga masumpo ang bag-ong pagtulon-an nga naghimo sa mga tawo nga mga magdudumot sa mga diyos. Ang administrasyon sa batan-ong si Pliny nga gobernador sa Bitinia [utlanan sa Romanhong probinsiya sa Asia sa amihanan] naproblema tungod sa mga situwasyong mitungha gumikan sa kusog nga pagkaylap sa Kristiyanidad ug sa miresultang kasuko sa paganong mga molupyo sa iyang probinsiya.”
d Ang ngalang Ezequias nagkahulogang “Si Jehova Nagpalig-on.” Tan-awa ang potnot sa 2 Hari 16:20 sa New World Translation Reference Bible.
[Mga Pangutana sa Pagtuon]
[Kahon sa panid 63]
Pagtabang sa Daghan sa Pagyukbo
Sa 144,000 ka dinihogang magapanunod sa langitnong Gingharian, halos 9,000 pa ang nahibiling Juan nga matang nga buhi pa karon sa yuta. Sa samang panahon, ang dakong panon miuswag sa gidaghanong 6,600,000 ug nagkadaghan pa. (Pinadayag 7:4, 9) Unsay nakatabang niining dako kaayong pag-uswag? Dakog natabang ang lainlaing mga tunghaan nga gidumala sa mga Saksi ni Jehova. Dili sama sa mga seminaryo sa Kakristiyanohan nga nagtudlo ug kalibotanong mga pilosopiya ug nagtamay sa Bibliya, ang mga tunghaan sa mga Saksi nagsilsil diha kanila ug lalom nga pagtuo sa Pulong sa Diyos. Gipakita niini nga ang Bibliya mapuslanon alang sa hinlo, matarong nga pagkinabuhi ug masibotong pag-alagad sa Diyos. Sa tibuok kalibotan sukad sa 1943, ang matag kongregasyon sa mga Saksi ni Jehova nagdumala ug Teokratikanhong Tunghaan sa Ministeryo diha sa ilang tagsatagsa ka Kingdom Hall. Milyonmilyon ang nagtambongan niini nga tunghaan matag semana, nga nagsunod sa usa ka hiniusang programa sa edukasyon sa Bibliya.
Sukad sa 1959 ang mga Saksi ni Jehova nagdumala usab ug mga Tunghaan sa Ministeryo sa Gingharian sa pagbansay sa mga ansiyano sa kongregasyon ug mga ministeryal nga alagad. Ug sukad sa 1977, ang Tunghaan sa Payunir nga Pag-alagad nakabansay na ug gatosan ka libong mga igsoon nga bug-os-panahong nag-alagad kang Jehova diha sa buluhatong pagsangyaw ug nagbaton ug espiritu nga sama gayod nianang sa mga taga-Filadelfia. Sa 1987, ang Tunghaan sa Ministeryal nga Pagbansay nagsugod sa pagbansay sa lalaking mga Saksi alang sa linaing mga asaynment sa lainlaing dapit sa tibuok kalibotan.
Sa tanang tunghaan nga gidumala sa mga Saksi ni Jehova, ang Watchtower Bible School of Gilead maoy talagsaon. Sukad sa 1943 duha ka grupo sa mga estudyante ang mograduwar halos matag tuig gikan niining tunghaan sa mga misyonaryo nga nahimutang sa Estado sa New York. Tanantanan, kini nakabansay nag kapin sa 7,000 ka ministro ni Jehova alang sa misyonaryong pag-alagad sa laing nasod. Ang mga graduwado niini nga tunghaan nag-alagad diha sa kapin na sa usa ka gatos ka kayutaan, nga sa kadaghanan niini sila nahimong instrumento sa pagbukas sa buluhaton sa Gingharian. Human sa mga 60 ka tuig, ang uban sa unang mga misyonaryo nag-alagad gihapon diha sa ilang asaynment, nga nakigtambayayong sa bag-ong mga misyonaryo alang sa tibuok-kalibotang pag-uswag sa organisasyon ni Jehova. Pagkatalagsaong pag-uswag gayod kini!
[Chart sa panid 64]
Niadtong 1919 ang nagamandong Hari nga si Jesus nagbukas sa pultahan sa kahigayonan alang sa Kristohanong pag-alagad. Nagkadaghan ang debotadong mga Kristohanon nga nagpahimulos nianang maong kahigayonan.
Kayutaan Mga Kristohanon Bug-os Panahong
nga Naabot nga Nakig-ambit mga Magwawali e
Tuig sa Pagwali sa Pagwali f
1918 14 3,868 591
1928 32 23,988 1,883
1938 52 47,143 4,112
1948 96 230,532 8,994
1958 175 717,088 23,772
1968 200 1,155,826 63,871
1978 205 2,086,698 115,389
1988 212 3,430,926 455,561
1998 233 5,544,059 698,781
2005 235 6,390,022 843,234
[Mga footnote]
e Ang mga numero sa itaas maoy binulan nga mga aberids.
f Ang mga numero sa itaas maoy binulan nga mga aberids.
[Chart sa panid 65]
Ang kalihokan sa mga Saksi ni Jehova maoy bug-os kasingkasing. Tagda, pananglitan, ang mga oras nga gigugol nila sa pagwali ug pagpanudlo ug ang daghan kaayong libreng mga pagtuon sa Bibliya nga gidumala nila diha sa mga balay sa mga tawo.
Mga Oras nga Mga Pagtuon sa
Gigugol sa Pagwali Bibliya nga Gidumala
Tuig (Tinuig nga Total) (Binulan nga Aberids)
1918 19,116 Wala Marekord
1928 2,866,164 Wala Marekord
1938 10,572,086 Wala Marekord
1948 49,832,205 130,281
1958 110,390,944 508,320
1968 208,666,762 977,503
1978 307,272,262 1,257,084
1988 785,521,697 3,237,160
1998 1,186,666,708 4,302,852
2005 1,278,235,504 6,061,534
[Hulagway sa panid 59]
Usa ka Romanhong yawi sa unang siglo
