Kapitulo 1

Pinadayag​—Ang Makalilipay nga Sangkoanan Niini!

1. Sa unsang paagi kita nahibalo nga buot sa Diyos nga magmalipayon kita?

 ANG PINADAYAG NGADTO KANG JUAN—kining makapaukyab nga basahon sa Bibliya nagdala sa balaang rekord ngadto sa usa ka makalilipay nga sangkoanan. Nganong makaingon kita nga “makalilipay”? Tungod kay ang Awtor sa Bibliya gihubit ingong “malipayong Diyos,” nga nagpiyal sa “mahimayaong maayong balita” ngadto niadtong nahigugma kaniya. Buot niya nga magmalipayon usab kita. Busa, sa sinugdanan pa lamang kita gipasaligan sa Pinadayag: “Malipayon siya nga nagabasa . . . sa mga pulong niini nga tagna.” Sa kataposang kapitulo niini kita gisultihan: “Malipayon ang si bisan kinsa nga magatuman sa mga pulong sa tagna niining linukot nga basahon.”—1 Timoteo 1:11; Pinadayag 1:3; 22:7.

2. Unsay atong himoon aron makakaplag ug kalipay sa basahon sa Pinadayag?

² Unsay atong himoon aron makakaplag ug kalipay sa basahon sa Pinadayag? Angay natong tukion ang kahulogan sa klarong mga ilhanan, o mga simbolo, ug molihok uyon niana. Ang magubot nga kasaysayan sa tawo sa dili madugay modangat na sa malaglagong sangkoanan, dihang silotan na unya sa Diyos ug ni Jesu-Kristo ang daotang sistema karon, ug pulihan kini ug “usa ka bag-ong langit ug usa ka bag-ong yuta,” diin bisan “ang kamatayon mawala na.” (Pinadayag 21:1, 4) Dili ba kitang tanan buot mopuyo nianang maong bag-ong kalibotan, sa matuod nga kalinaw ug kasegurohan? Makapuyo kita niana kon palig-onon nato ang atong pagtuo pinaagi sa pagtuon sa Pulong sa Diyos, lakip na sa makapadasig nga tagna sa Pinadayag.

Apokalipsis—Unsa Kini?

3. Unsay pangagpas sa daghang tawo mahitungod sa kahulogan sa Apokalipsis ug sa Armagedon?

³ Dili ba ang Pinadayag gitawag usab nga Apokalipsis? Oo, kay ang “pinadayag” mao ang Cebuano nga hubad sa a·po·kaʹly·psis sa Gregong teksto. Gilangkit sa daghang tawo ang Apokalipsis sa kalaglagan sa kalibotan pinaagi sa nukleyar nga gubat. Sa usa ka siyudad sa Texas, U.S.A., diin daghan kaayong hinagibang nukleyar ang gihimo kaniadto, ang relihiyosong mga tawo miingon, “Kita ang unang malaglag.” Ang mga klerigo nianang dapita gitaho nga “kombinsido nga ang Armagedon dili lamang kay dili kalikayan kondili kini haduol na usab, ug nga ang kataposang gubat taliwala sa mga puwersa sa maayo ug sa daotan, sa Diyos ug ni Satanas, mahitabo ingon nga usa ka nukleyar nga kalaglagan.” a

4. Unsa ba gayod ang kahulogan sa pulong “apokalipsis,” ug nganong ang kataposang basahon sa Bibliya haom nga gitawag ug “Pinadayag”?

⁴ Apan unsa ba gayod ang apokalipsis? Bisan pag gihubit kini sa mga diksiyonaryo pinaagi sa paggamit ug mga termino sama sa “nagsingabot nga kosmikong kalaglagan,” ang Gregong a·po·kaʹly·psis nagkahulogan ug “pagbutyag” o “pagpadayag.” Busa, ang kataposang basahon sa Bibliya haom nga gitawag ug “Pinadayag.” Atong makaplagan dinhi nga dili kini usa ka mensahe bahin sa natakda na nga kalaglagan sa kalibotan, kondili kini maoy usa ka pagpadayag sa mga kamatuoran gikan sa Diyos nga angayng makapaugmad ug usa ka masanag nga paglaom ug dili matarog nga pagtuo diha sa atong kasingkasing.

5. (a) Kinsa ang laglagon sa Armagedon, ug kinsa ang makalabang-buhi? (b) Unsang nindot nga kaugmaon ang naghulat sa mga makalabang-buhi sa Armagedon?

⁵ Sa pagkatinuod, ang Armagedon gihubit sa kataposang basahon sa Bibliya ingong “gubat sa dakong adlaw sa Diyos nga Labing Gamhanan.” (Pinadayag 16:14, 16) Apan lahi kaayo kini sa usa ka nukleyar nga kalaglagan! Ang maong kalaglagan lagmit nga nagkahulogan ug kalaglagan sa tanang kinabuhi sa yuta. Sa baylo, ang Pulong  sa Diyos naghatag ug malipayong pasalig nga ang daotang mga magsusupak sa Diyos lamang ang laglagon—pinaagi sa mga puwersa nga kontrolado sa Diyos. (Salmo 37:9, 10; 145:20) Usa ka dakong panon sa mga tawo gikan sa tanang mga nasod ang makalabang-buhi sa sangkoanan sa paghukom sa Diyos diha sa Armagedon. Unya si Jesu-Kristo magabantay ug magatultol kanila ngadto sa kinabuhing walay kataposan sa usa ka paraisong yuta. Buot ka bang mahimong usa kanila? Makalilipay nga ang Pinadayag nagpakita nga ikaw mahimong usa unya kanila!—Pinadayag 7:9, 14, 17.

Pagtuki sa Balaang mga Tinago

6. Paglabay sa katuigan, unsang mga libro ang gipatik sa mga Saksi ni Jehova sa pagpatin-aw sa Pinadayag?

⁶ Ingon ka sayo sa 1917, ang Watch Tower Society nagpatik ug librong The Finished Mystery. Usa kini ka bersikulo-por-bersikulo nga komentaryo sa mga basahon sa Bibliya nga Ezequiel ug Pinadayag. Unya, samtang ang mga hitabo sa kalibotan padayon nga nadayag ingong katumanan sa tagna sa Bibliya, ang duha ka tomong libro nga nag-ulohang Light giandam, nga giluwatan niadtong 1930. Kini nagtanyag ug nunot-sa-panahon nga pagtuon sa Pinadayag. Ang kahayag padayon nga ‘nagkasanag alang sa matarong’ tungod kay sa 1963 ang mga Saksi ni Jehova nagpatik ug 704-panid nga librong “Babylon the Great Has Fallen!” God’s Kingdom Rules! Detalyado kaayong gisaysay niini ang kasaysayan sa pagbangon ug pagkapukan sa Dakong Babilonya, ang tibuok-kalibotang imperyo sa bakak nga relihiyon, ug kini gitapos pinaagi sa paghisgot sa kataposang siyam ka kapitulo sa Pinadayag. Samtang ‘ang alagianan sa mga matarong nagkasanag,’ ilabina may kalabotan sa kalihokan sa kongregasyon, gisundan kini niadtong 1969 ug usa ka 384-panid nga tomo, ang “Then Is Finished the Mystery of God,” nga naghisgot sa unang 13 ka kapitulo sa Pinadayag.—Salmo 97:11; Proverbio 4:18.

7. (a) Nganong ang mga Saksi ni Jehova nagtagana niini nga libro bahin sa Pinadayag? (b) Unsang mga tabang sa pagpanudlo ang gitagana sa libro alang sa kaayohan sa mga magbabasa?

⁷ Apan nganong nagpatik ug nag-imprenta na usab ug laing libro bahin sa Pinadayag karon? Ang kadaghanan sa impormasyong napatik detalyado kaayo, ug dili kini sayon nga hubaron ug patikon sa tibuok kalibotan sa daghang pinulongan. Busa, nakita nga kinahanglang magtagana ug usa ka libro bahin sa Pinadayag sa usa lamang ka tomo ug sa paagi nga daling maimprenta diha sa daghang pinulongan. Dugang pa, gipahimuslan niining maong tomo ang pagtaganag mga tabang sa pagpanudlo, sama sa mga ilustrasyon, mga tsart, ug mga sumaryo, nga makatabang sa mga magbabasa sa tin-aw nga pagsabot sa makapaukyab nga kahulogan niining kahibudnganang tagna.

8. Unsa ang dako pang katarongan kon nganong gipatik kining libroha?

⁸ Ang dako pang katarongan kon nganong gipatik kining libroha mao ang panginahanglan sa pagnunot sa kamatuoran karon. Si Jehova padayon nga naghatag ug dugang kahayag sa kahulogan sa iyang Pulong, ug kita makadahom nga ang atong pagsabot sa Pinadayag, duyog sa uban pang mga tagna, mas magakasanag pa samtang kita nagakaduol na sa dakong kasakitan. (Mateo 24:21; Pinadayag 7:14) Importante nga kita makabaton ug hustong kahibalo. Ingon sa gisulat ni apostol Pedro mahitungod sa balaang tagna: “Maayo ang inyong ginabuhat sa paghatag ug pagtagad niini samag usa ka lampara nga nagadan-ag sa usa ka dapit nga mangitngit, hangtod nga ang adlaw mobanagbanag ug ang bituon sa adlaw mosubang, sa inyong mga kasingkasing.”—2 Pedro 1:19.

9. (a) Duyog sa uban pang mga tagna, unsay gipakita sa Pinadayag nga lalangon sa Diyos? (b) Unsa ang bag-ong kalibotan, ug sa unsang paagi maluwas ka ngadto niana?

⁹ Ang Pinadayag naghatag ug dugang pamatuod sa daghang uban pang mga tagna sa Bibliya, nga nagpakita nga katuyoan ni Jehova nga Diyos ang paglalang ug bag-ong mga langit ug usa ka bag-ong yuta. (Isaias 65:17; 66:22; 2 Pedro 3:13; Pinadayag 21:1-5) Ang mensahe niini pangunang gitumong ngadto sa dinihogang mga Kristohanon, kinsa gipalit ni Jesus pinaagi sa iyang dugo aron mahimong mga isigkamagmamando uban kaniya sa bag-ong mga langit. (Pinadayag 5:9, 10) Bisan pa niana, kining maayong balita mopalig-on usab sa pagtuo sa minilyon nga naglaom nga mabuhi sa walay kataposan ilalom sa Gingharian ni Kristo. Usa ka ba kanila? Nan, ang Pinadayag mopalig-on sa imong paglaom sa pagpuyo sa Paraiso, ingong bahin sa bag-ong yuta, nga magtagamtam ug dagayang kalinaw, lagsik nga panglawas, ug nagaawas nga mga tagana sa Diyos nga dili gayod matapos. (Salmo 37:11, 29, 34; 72:1, 7, 8, 16) Kon buot kang maluwas ngadto nianang bag-ong kalibotan, dinalian ug kinahanglan gayod nga imong hatagan ug pagtagad ang buhi nga paghubit sa Pinadayag sa makasaysayanhong sangkoanan nga karon haduol na.—Sofonias 2:3; Juan 13:17.

[Footnote]

[Mga Pangutana sa Pagtuon]

 [Tibuok panid nga hulagway sa panid 7]