Kapitulo 26

Sagradong Tinago sa Diyos​—Mahimayaong Sangkoanan Niini!

1. (a) Sa unsang paagi si Juan nagpahibalo kanato nga ang sagradong tinago matapos na? (b) Nganong ang mga panon sa manulonda nagsultig kusog?

 NAHINUMDOM ka ba sa gipanumpaang pahayag sa kusgang manulonda nga narekord sa Pinadayag 10:1, 6, 7? Siya mipahayag: “Wala na gayoy paglangan pa; apan sa mga adlaw nga magpatingog ang ikapitong manulonda, sa dihang mohuyop na siya sa iyang trompeta, ang sagradong tinago sa Diyos sumala sa maayong balita nga iyang gipahayag sa iyang mga ulipon nga mga manalagna sa pagkatinuod matapos na.” Ang gitakdang panahon ni Jehova miabot na alang sa pagpatingog nianang pangataposang trompeta! Nan, sa unsang paagi matapos ang sagradong tinago? Naghinobra gayod ang kalipay ni Juan nga nagpahibalo kanato! Siya misulat: “Ug ang ikapitong manulonda mihuyop sa iyang trompeta. Ug dihay makusog nga mga tingog sa langit, nga nag-ingon: ‘Ang gingharian sa kalibotan nahimo nang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.’” (Pinadayag 11:15) Kadtong mga panon sa manulonda adunay katarongan sa pagsultig kusog, bisan pag samag-dalugdog ang kakusog! Kay kining makasaysayanhong pahibalo hinungdanon sa tibuok uniberso. Kini hinungdanon kaayo sa tanang buhing mga linalang.

2. Kanus-a ug duyog sa unsang hitabo nga ang sagradong tinago gitapos nga madaogon?

² Ang sagradong tinago midangat na sa makapalipay nga sangkoanan niini! Sa mahimayaon, matahom nga paagi, kini gitapos nga madaogon niadtong 1914 sa dihang ang Ginoong Jehova nag-entrono sa iyang Kristo ingon nga kaubang Hari. Ingon nga hawas sa iyang Amahan, si Jesu-Kristo mibanos sa pagmando nga aktibo taliwala sa kaaway nga kalibotan sa katawhan. Ingon nga sinaad nga Binhi, gidawat niya ang gahom sa Gingharian aron laglagon ang Halas ug ang iyang binhi ug ipasig-uli ang paraisonhong kalinaw niining yutaa. (Genesis 3:15; Salmo 72:1, 7) Ingon nga Mesiyanikong Hari, si Jesus sa ingon magtuman sa Pulong ni Jehova ug magbindikar sa iyang Amahan, ang “Hari nga walay kataposan,” kinsa kinahanglang magmando ingon  nga Soberanong Ginoo “hangtod sa kahangtoran.”—1 Timoteo 1:17.

3. Nganong si Jehova nga Diyos, bisan pag kanunay nga Hari, nagtugot sa ubang mga pagmando nga maglungtad sa yuta?

³ Apan sa unsang paagi ‘ang gingharian sa kalibotan nahimong gingharian sa atong Ginoo,’ si Jehova? Dili ba si Jehova nga Diyos kanunay man nga Hari? Matuod kana, kay ang Levihanon nga si Asap miawit: “Ang Diyos mao ang akong Hari sukad pa kanhi.” Ug ang laing salmista nagpahayag: “Si Jehova nahimong hari! . . . Ang imong trono lig-on nga natukod sukad pa kanhi; ikaw maoy gikan sa panahong walay tino.” (Salmo 74:12; 93:1, 2) Hinuon, sa iyang pagkamaalamon si Jehova nagtugot sa ubang mga pagmando nga maglungtad sa yuta. Sa maong paagi ang isyu nga gipatungha sa Eden bahin sa katakos sa tawo sa pagmando sa iyang kaugalingon nga walay Diyos nasulayan sa bug-os. Napakyas gayod ang pagmando sa tawo. Matuod gayod ang mga pulong sa manalagna sa Diyos: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Sukad nga mitalikod sa Diyos ang atong unang mga ginikanan, ang tibuok gipuy-ang yuta gigamhan na sa “orihinal nga halas,” si Satanas. (Pinadayag 12:9; Lucas 4:6) Panahon na karon alang sa dakong kausaban! Aron mabindikar ang iyang angayan nga posisyon, si Jehova nagsugod sa pagmando sa yuta sa usa ka bag-ong paagi, pinaagi sa iyang tinudlong Mesiyanikong Gingharian.

4. Sa dihang nagsugod na ang pagpatingog sa mga trompeta niadtong 1922, unsa ang napaila? Ipatin-aw.

⁴ Sa dihang nagsugod na ang pagpatingog sa pito ka trompeta niadtong 1922, sa kombensiyon sa mga Estudyante sa Bibliya sa Cedar Point, Ohio, gipahayag ni J. F. Rutherford ang linaing pakigpulong nga gipasukad sa kasulatan nga “Ang gingharian sa langit haduol na.” (Mateo 4:17, King James Version) Ang iyang paniklop mao kining mga pulonga: “Nan balik sa kanataran, Oh kamong mga anak sa hataas uyamot nga Diyos! Isul-ob ang inyong armadura! Magmaugdang, magtukaw, magmaaktibo, magmaisogon. Magmatinumanon ug magmatinud-anon nga mga saksi alang sa Ginoo. Asdang sa pagpakiggubat hangtod ang tanang timaan sa Babilonya mahanaw na. Isangyaw sa halayo ang mensahe. Ang kalibotan kinahanglang mahibalo nga si Jehova mao ang Diyos ug nga si Jesu-Kristo mao ang Hari sa mga hari ug Ginoo sa mga ginoo. Kini ang adlaw sa tanang adlaw. Tan-awa, ang Hari nagmando na! Kamo ang iyang mga magsasangyaw. Busa imantala, imantala, imantala, ang Hari ug ang iyang gingharian.” Napaila ang Gingharian sa Diyos pinaagi ni Kristo Jesus, ug kadto maoy sinugdanan sa talagsaong pag-uswag sa pagwali sa Gingharian nga naglakip sa mga paghukom nga gisangyaw pinaagi sa pagpatingog sa tanang pito ka trompeta sa manulonda.

5. Niadtong 1928, unsay nahitabo sa kombensiyon sa mga Estudyante sa Bibliya nga nagpasiugda sa tingog sa ikapitong trompeta?

⁵ Ang tingog sa trompeta sa ikapitong manulonda gibanaag sa dagkong mga punto sa kombensiyon sa mga Estudyante sa Bibliya sa Detroit, Michigan, sa Hulyo 30-Agosto 6, 1928. Niadtong panahona, 107 ka estasyon sa radyo ang gikonektar nga gihubit sa The New York Times ingong ‘ang labing dako ug labing gastoso nga pagkonektar sa radyo sa kasaysayan.’ Madasigong gisagop sa maong kombensiyon ang usa ka puwersado nga “Deklarasyon Batok Kang Satanas ug Dapig Kang Jehova,” nga nagpunting sa pagkapukan ni Satanas ug sa iyang daotang organisasyon ug sa kagawasan sa tanang nahigugma sa pagkamatarong panahon sa Armagedon. Ang maunongong mga sakop sa Gingharian sa Diyos nalipay sa pagkadawat sa usa ka basahon nga giluwatan sa kombensiyon, ang 368-panid nga librong Government. Kini mihatag sa labing klarong mga pamatuod “nga ang Diyos nag-entrono na sa iyang Dinihogang Hari niadtong 1914.”

Si Jehova Nagagahom

6. Sa unsang paagi mitaho si Juan sa pahibalo bahin sa paglingkod ni Kristo sa trono sa Gingharian sa Diyos?

⁶ Si Kristo naglingkod na sa trono sa Gingharian sa Diyos—pagkamakapalipay kana nga pahibalo! Si Juan mitaho: “Ug ang kawhaag-upat ka ansiyano nga naglingkod sa ilang mga trono atubangan sa Diyos nanghapa ug misimba sa Diyos, nga nag-ingon: ‘Kami nagpasalamat kanimo, Jehova nga Diyos, ang Labing Gamhanan, ang Usa kinsa mao ang karon ug ang kaniadto, tungod kay nahuptan mo ang imong dakong gahom ug misugod ka sa pagmando ingong hari.’”—Pinadayag 11:16, 17.

7. Sa unsang paagi gipasalamatan si Jehova nga Diyos (a) sa nahibilin sa simbolikong 24 ka ansiyano sa yuta? (b) sa simbolikong 24 ka ansiyano nga nabanhaw na ug miokupar sa ilang mga katungdanan sa langit?

⁷ Ang mga nagpasalamat kang Jehova nga Diyos mao ang 24 ka ansiyano, nga nagsimbolo  sa dinihogang mga igsoon ni Kristo diha sa ilang langitnong mga katungdanan. Sukad sa 1922 padayon, ang nahibilin sa yuta niining 144,000 nga mga dinihogan nagkapuliki sa buluhaton nga gipalihok pinaagi sa pagpatingog sa mga trompeta. Sila nakaamgo sa bug-os nga kahulogan sa ilhanan sa Mateo 24:3–25:46. Hinuon, sayosayo pa sa adlaw sa Ginoo, ang ilang kaubang mga saksi nga ‘nakapamatuod na nga matinumanon bisan hangtod sa kamatayon’ gibanhaw na aron sa pag-okupar sa ilang mga katungdanan sa langit, mao nga sila karon makahawas na sa enterong grupo sa 144,000 diha sa paghapa ug pagsimba kang Jehova. (Pinadayag 1:10; 2:10) Pagkamapasalamaton nila nga ang ilang Soberanong Ginoo wala maglangan sa pagtapos sa iyang sagradong tinago!

8. (a) Unsay epekto diha sa kanasoran ang paghuyop sa ikapitong trompeta? (b) Batok kang kinsa gipahayag sa kanasoran ang ilang kapungot?

⁸ Sa laing bahin, ang paghuyop sa ikapitong trompeta wala makapalipay sa kanasoran. Ang panahon miabot na aron masinati nila ang kapungot ni Jehova. Ingon sa giasoy ni Juan: “Apan ang kanasoran nangapungot, ug miabot ang imong kapungot, ug ang tinudlong panahon sa paghukom sa mga patay, ug sa paghatag ug ganti ngadto sa imong mga ulipon nga mga manalagna ug sa mga balaan ug sa mga nangahadlok sa imong ngalan, mga gagmay ug dagko, ug sa paglaglag sa mga nagalaglag sa yuta.” (Pinadayag 11:18) Sukad sa 1914 padayon, ang kanasoran sa kalibotan mabangisong nagpahayag sa ilang kapungot batok sa usag usa, batok sa Gingharian sa Diyos, ug ilabina batok sa duha ka saksi ni Jehova.—Pinadayag 11:3.

9. Sa unsang paagi ang mga nasod nagalaglag sa yuta, ug unsa ang gihukom sa Diyos nga buhaton mahitungod niini?

⁹ Sa tibuok kasaysayan ang mga nasod nagalaglag sa yuta pinaagi sa ilang way-puas nga pagpakiggubat ug dili maayong pagdumala. Apan sukad sa 1914, ang maong pagpanglaglag migrabe  nga kana makapabalaka kaayo. Ang kahakog ug korapsiyon misangpot sa nagkalapad nga desyerto ug pagkawagtang sa daghan kaayong umahan. Gidaot sa ulan nga may asido ug sa radyoaktibong abo ang dagkong mga luna. Nahugawan ang mga kahinguhaan sa pagkaon. Hugaw na ang hangin nga atong ginahanggab ug ang tubig nga atong ginainom. Peligrosong mapuo ang kalalangan sa mamala ug sa kadagatan tungod sa mga biya sa industriya. Usa ka higayon, ang gamhanang mga nasod nanghulga ug bug-os nga kalaglagan pinaagi sa nukleyar nga pagbomba sa tanang tawo. Ikalipay, si Jehova ‘maglaglag sa mga nagalaglag sa yuta’; iyang ipatuman ang paghukom diha sa garboso, walay-diyos nga mga tawo nga maoy responsable sa makaluluoy nga kahimtang sa yuta. (Deuteronomio 32:5, 6; Salmo 14:1-3) Busa, giandam ni Jehova ang ikatulong kaalaotan, aron papanubagon ang maong mga mamumuhat ug daotan.—Pinadayag 11:14.

Kaalaotan sa mga Nagalaglag sa Yuta!

10. (a) Unsa ang ikatulong kaalaotan? (b) Sa unsang paagi labaw pa sa kasakit ang ipahinabo sa ikatulong kaalaotan?

¹⁰ Ania na ang ikatulong kaalaotan. Kini moabot sa madali! Kini ang gamiton ni Jehova sa paglaglag sa mga nagapanamastamas sa iyang ‘tumbanan sa tiil,’ kining matahom nga yuta nga atong ginapuy-an. (Isaias 66:1) Kini palihokon sa Mesiyanikong Gingharian—ang sagradong tinago sa Diyos. Ang mga kaaway sa Diyos, ilabina ang mga lider sa Kakristiyanohan, gisakit na sa unang duha ka kaalaotan—nga mao gayod ang resulta sa hampak nga dulon ug sa nagkabayo nga kasundalohan; apan labaw pa sa kasakit ang gipahinabo sa ikatulong kaalaotan, nga ipatuman mismo sa Gingharian ni Jehova. (Pinadayag 9:3-19) Ipahamtang niini ang hapak sa kamatayon aron palagpoton ang tawhanong katilingban nga nagalaglag sa yuta ug ang mga magmamando niini. Moabot kini ingon nga sangkoanan sa paghukom ni Jehova panahon sa Armagedon. Kini maoy sumala gayod sa gitagna ni Daniel: “Ug sa mga adlaw nianang mga haria [mga magmamando nga nagalaglag sa yuta] ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” Sama sa nagbuntaog nga bukid, ang Gingharian sa Diyos magamando sa yuta nga gihimong matahom, nga magabayaw sa pagkasoberano ni Jehova ug magdalag dumalayong pagmaya sa katawhan.—Daniel 2:35, 44; Isaias 11:9; 60:13.

11. (a) Unsang sunodsunod nga makapalipayng mga panghitabo ang gihubit sa tagna? (b) Unsay maangkon tungod sa dili-takos nga kalulot, sa unsang paagi, ug pinaagi ni kinsa?

 ¹¹ Ang ikatulong kaalaotan duyogan sa sunodsunod nga makapalipayng mga panghitabo nga anam-anam nga mahitabo sulod sa adlaw sa Ginoo. Kini maoy panahon ‘nga pagahukman ang mga patay, ug nga ang Diyos maghatag sa ilang ganti ngadto sa iyang mga ulipon nga mga manalagna ug ngadto sa mga balaan ug ngadto sa mga nahadlok sa iyang ngalan.’ Kana nagkahulogan sa pagkabanhaw sa mga patay! Alang sa dinihogang mga balaan nga nangatulog sa kamatayon, kini mahitabo sayo sa adlaw sa Ginoo. (1 Tesalonica 4:15-17) Sa dagan sa panahon, ang nahibiling mga balaan moduyog kanila pinaagi sa dihadiha nga pagkabanhaw. Ang uban usab pagagantihan, lakip ang mga ulipon sa Diyos nga mga manalagna sa karaang mga panahon ug ang tanang ubang katawhan nga nahadlok sa ngalan ni Jehova, bahin man sila sa dakong panon nga makalabang-buhi sa dakong kasakitan o bahin sa “mga patay, ang dagko ug ang gagmay,” nga pagabanhawon sa kinabuhi panahon sa Milenyong Pagmando ni Kristo. Sanglit ang Mesiyanikong Hari sa Diyos nagkupot man sa mga yawi sa kamatayon ug sa Hades, ang iyang pagmando sa Gingharian magbukas sa dalan aron iyang ihatag ang kinabuhing walay kataposan ngadto sa tanan nga nagapangab-ot nianang bililhong tagana. (Pinadayag 1:18; 7:9, 14; 20:12, 13; Roma 6:22; Juan 5:28, 29) Imortal man kini nga kinabuhi sa mga langit o walay-kataposang kinabuhi sa yuta, kini nga gasa sa kinabuhi maoy dili-takos nga kalulot gikan ni Jehova, nga tungod niana ang matag dumadawat mahimong mapasalamaton hangtod sa hangtod!—Hebreohanon 2:9.

Tan-awa ang Arka sa Iyang Pakigsaad!

12. (a) Sumala sa Pinadayag 11:19, unsa ang nakita ni Juan sa langit? (b) Simbolo sa unsa ang arka sa pakigsaad, ug unsa ang nahitabo niana sa dihang ang Israel nabihag sa Babilonya?

¹² Si Jehova nagamando! Pinaagi sa iyang Mesiyanikong Gingharian, siya nagamando sa katawhan sa kahibulongang paagi. Kini gilig-on sa butang nga sunod nga nakita ni Juan: “Ug ang sangtuwaryo sa templo sa Diyos nga didto sa langit nabuksan, ug ang arka sa iyang pakigsaad nakita didto sa iyang sangtuwaryo sa templo. Ug dihay mga kilat ug mga tingog ug mga dalugdog ug dagkong ulan nga yelo.” (Pinadayag 11:19) Kini lamang ang bugtong paghisgot diha sa Pinadayag bahin sa arka sa pakigsaad sa Diyos. Ang Arka mao ang makitang simbolo sa presensiya ni Jehova taliwala sa iyang katawhan nga Israel. Sa tabernakulo, ug sa ulahi sa templo nga gitukod ni Solomon, kini gibutang sa Labing Balaan. Apan sa dihang ang Israel nabihag sa Babilonya niadtong 607 W.K.P., ang Jerusalem naawaaw ug ang arka sa pakigsaad nahanaw. Kadto ang panahon nga mihunong ang mga hawas sa balay ni David sa ‘paglingkod sa trono ni Jehova ingong hari.’—1 Cronicas 29:23. a

13. Unsa ang gipasabot sa kamatuoran nga ang arka sa pakigsaad sa Diyos nakita sa langitnong sangtuwaryo sa Diyos?

¹³ Karon, paglabay sa kapig 2,600 ka tuig, ang Arka nakita na usab. Apan diha sa panan-awon  ni Juan kini nga Arka wala mabutang sa usa ka yutan-ong templo. Kini nakita sa langitnong sangtuwaryo sa Diyos. Sa makausa pa, si Jehova nagmando pinaagi sa usa ka hari sa harianong linya ni David. Hinuon, niining panahona, ang Hari, si Kristo Jesus, naglingkod sa trono sa langitnong Jerusalem—ang tinuboy, bantaaw nga dapit nga gikan niana iyang ipatuman ang mga paghukom ni Jehova. (Hebreohanon 12:22) Ang mosunod nga mga kapitulo sa Pinadayag magpadayag niini kanato.

14, 15. (a) Sa karaang Jerusalem, kinsa lamang ang makakita sa arka sa pakigsaad, ug ngano? (b) Sa langitnong sangtuwaryo sa templo sa Diyos, kinsa ang makakita sa arka sa iyang pakigsaad?

¹⁴ Sa karaan nga yutan-ong Jerusalem, ang Arka wala makita sa mga Israelinhon sa katibuk-an, ni bisan sa mga saserdote nga nag-alagad sa templo, kay kini didto sa sulod sa Labing Balaan nga gisalipdan ug kortina gikan sa Balaang Dapit. (Numeros 4:20; Hebreohanon 9:2, 3) Ang hataas nga saserdote lamang ang makakita niini sa dihang mosulod siya sa Labing Balaan sa tinuig nga Adlaw sa Pagtabon sa Sala. Bisan pa niana, sa dihang nabuksan ang sangtuwaryo sa templo sa mga langit, dili lamang ang Hataas nga Saserdote ni Jehova, si Jesu-Kristo, ang makakita sa simbolikong arka, kondili ang iyang luyoluyong mga saserdote, ang 144,000, makakita usab, apil si Juan.

¹⁵ Kadtong una nga nabanhaw ngadto sa langit makakita niining simbolikong arka sa haduol, kay sila aduna nay katungdanan ingong bahin sa 24 ka ansiyano alirong sa trono ni Jehova. Ug ang Juan nga matang sa yuta nalamdagan sa espiritu ni Jehova mao nga ilang masabtan ang Iyang presensiya diha sa Iyang espirituwal nga templo. May mga ilhanan usab sa pagpasidaan sa katibuk-ang katawhan niining kahibulongang mga hitabo. Ang panan-awon ni Juan naghisgot ug mga kilat, mga tingog, mga dalugdog, linog, ug ulan nga yelo. (Itandi ang Pinadayag 8:5.) Unsay gisimbolohan niini?

16. Sa unsang paagi adunay mga kilat, mga tingog, mga dalugdog, linog, ug dakong ulan nga yelo?

¹⁶ Sukad sa 1914 adunay dako kaayong kasamok taliwala sa mga relihiyon. Apan ikalipay nga kini nga “linog” giubanan ug masiboton nga mga tingog nga nagahatag ug tin-awng mensahe mahitungod sa natukod nang Gingharian sa Diyos. Gipalanog ang samag-dalugdog nga ‘mga pasidaan bahin sa unos’ gikan sa Bibliya. Samag kilat, ang mga kidlap sa pagsabot mahitungod sa matagnaong Pulong sa Diyos nakita ug namantala. Ang kusog nga pagbundak sa “ulan nga yelo” sa langitnong mga paghukom nahitabo batok sa Kakristiyanohan ug sa bakak nga relihiyon sa katibuk-an. Kining tanan angay untang nakadani sa pagtagad sa katawhan. Apan ikasubo nga ang kinabag-ang katawhan—sama sa katawhan sa Jerusalem sa panahon ni Jesus—wala makasabot sa katumanan niining mga ilhanan sa Pinadayag.—Lucas 19:41-44.

17, 18. (a) Ang pagpatingog sa mga trompeta sa pito ka manulonda nagdalag unsang responsabilidad sa dedikadong mga Kristohanon? (b) Sa unsang paagi ginatuman sa mga Kristohanon ang gisugo kanilang buluhaton?

¹⁷ Ang pito ka manulonda nagpadayon sa pagpatingog sa ilang mga trompeta, nga nagpasidaan bahin sa makasaysayanhong mga hitabo dinhi sa yuta. Ang dedikadong mga Kristohanon adunay dakong responsabilidad sa pagpadayon sa pagmantala sa maong mga pahibalo ngadto sa kalibotan. Pagkamalipayon nilang nagtuman nianang sugoa! Kini gipakita sa pagkaagi nga sulod lamang sa 20 ka tuig, gikan sa 1986 hangtod sa 2005, halos nadoble ang oras nga ilang gigugol matag tuig sa ministeryo—gikan sa 680,837,042 ngadto sa 1,278,235,504. Sa pagkamatuod, “ang sagradong tinago sa Diyos sumala sa maayong balita” ginapahayag “ngadto sa kinatumyan sa gipuy-ang yuta.”—Pinadayag 10:7; Roma 10:18.

¹⁸ Ang ubang mga panan-awon karon naghulat kanato samtang ang mga katuyoan sa Gingharian sa Diyos padayon nga ipadayag.

[Footnote]

[Mga Pangutana sa Pagtuon]

[Kahon sa panid 173]

Dagkong mga Punto sa Samag-Trompeta nga Pagpahayag sa mga Paghukom ni Jehova

1. 1922 Cedar Point, Ohio: Usa ka paghagit sa mga lider sa Kakristiyanohan sa relihiyon, politika, ug dagkong negosyo nga ipakamatarong ang ilang kapakyasan sa pagpatunghag kalinaw, kauswagan, ug kalipay. Ang Gingharian sa Mesiyas maoy kasulbaran nianang tanang suliran.

2. 1923 Los Angeles, California: Ang pakigpulong publiko, “Ang Tanang Kanasoran Karon Nagmartsa Paingon sa Armagedon, Apan Minilyon nga Buhi Karon Dili na Gayod Mamatay,” nag-awhag sa mahigugmaon-sa-kalinaw nga “mga karnero” sa pagbiya sa makamatay nga dagat sa katawhan.

3. 1924 Columbus, Ohio: Ang mga simbahan gihukmang sad-an sa pagbayaw sa kaugalingon ug sa pagdumili sa pagwali sa Gingharian sa Mesiyas. Ang matuod nga mga Kristohanon kinahanglang magwali bahin sa panimalos sa Diyos ug maghupay sa nagbangotan nga katawhan.

4. 1925 Indianapolis, Indiana: Usa ka mensahe sa paglaom nga nagtandi sa kalainan sa espirituwal nga kangitngitan sa Kakristiyanohan ug sa madan-agong saad sa Gingharian sa kalinaw, kauswagan, kahimsog, kinabuhi, kagawasan, ug dumalayong kalipay.

5. 1926 London, Inglaterra: Usa ka samag-dulon nga paghampak sa Kakristiyanohan ug sa klero niini, nga nagyagyag sa ilang pagsalikway sa Gingharian sa Diyos, ug pag-abiba sa pagkatawo nianang langitnong kagamhanan.

6. 1927 Toronto, Canada: Usa ka imbitasyon, nga samag gidala sa nagkabayo nga kasundalohan, nga nag-awhag sa katawhan sa pagbiya sa ‘organisadong Kristiyanidad’ ug sa paghatag ug kinasingkasing nga pagkamaunongon kang Jehova nga Diyos ug sa iyang Hari ug Gingharian.

7. 1928 Detroit, Michigan: Usa ka deklarasyon batok kang Satanas ug dapig kang Jehova, nga nagtin-aw nga ang dinihogang Hari sa Diyos, nga naglingkod na sa trono sa 1914, maglaglag sa daotang organisasyon ni Satanas ug magpagawas sa katawhan.

[Kahon sa panid 175]

Nagalaglag sa Yuta

“Matag tulo ka segundo ang usa ka bahin sa orihinal nga kakahoyan nga samag gidak-on sa dulaanag potbol mahanaw. . . . Ang pagkawala sa dakong lasang nagalaglag sa linibo ka matang sa tanom ug mananap.”—Illustrated Atlas of the World (Rand McNally).

“Sa duha ka siglo nga pagpamuyo, [ang Dagkong mga Lanaw] nahimo usab nga labing dagkong pondohanag hugawng tubig sa kalibotan.”—The Globe and Mail (Canada).

Sa Abril 1986 ang pagbuto ug sunog sa usa ka planta sa nukleyar nga enerhiya sa Chernobyl, U.S.S.R., “mao ang labing dakong nukleyar nga hitabo . . . sukad sa pagpamomba sa Hiroshima ug Nagasaki,” nga nagpagawas “ug dugay-mahanaw nga radyasyon nganha sa hangin, ibabawng yuta ug tubig sa kalibotan nga samag gidaghanon sa tanang pagsulay nga pagpabuto ug mga bomba nukleyar ug mga bomba nga gipabuto sukad.”—JAMA; The New York Times.

Sa Minamata, Hapon, ang usa ka planta sa kemikal nagyabo ug methylmercury sa luok. Ang pagkaon sa isda ug kinhason nga nahugawag kemikal maoy nakaingon sa Minamata disease (MD) nga usa ka “balikbalik nga sakit sa sistema sa nerbiyos. . . . Hangtod karon [1985], 2578 ka tawo sa tibuok Hapon ang opisyal nga napamatud-ang may MD.”—International Journal of Epidemiology.

[Kahon sa panid 176]

Ang bug-at nga mga pahayag sa Pinadayag 11:15-19 maoy pasiuna sa mga panan-awon nga mosunod. Ang Pinadayag kapitulo 12 maoy pagsubli sa kagahapon nga detalyadong nagpatin-aw sa talagsaong mga pahibalo diha sa Pinadayag 11:15, 17. Ang kapitulo 13 naghatag ug nangaging bahin sa 11:18, samtang kini naghubit sa sinugdan ug kaugmaran sa politikal nga organisasyon ni Satanas nga nagalaglag sa yuta. Ang mga kapitulo 14 ug 15 dugang nagpatin-aw sa mga paghukom sa Gingharian nga nalambigit sa pagpatingog sa ikapitong trompeta ug sa ikatulong kaalaotan.

[Mga hulagway sa panid 174]

Si Jehova ‘maglaglag sa mga nagalaglag sa yuta’