Si Jesus Moanhi nga May Pagpalig-on
Kapitulo 4
Si Jesus Moanhi nga May Pagpalig-on
1. Kinsa karon ang gisulatan ni Juan, ug kinsa ang angay gayod nga magpakitag dakong kaikag sa iyang mensahe?
ANG mosunod angayng makapaikag gayod sa tanan nga nakig-uban sa mga kongregasyon sa katawhan sa Diyos karon. Usa kini ka serye sa mga mensahe. Kini may partikular nga aplikasyon samtang nagkahiduol na ang “tinudlong panahon.” (Pinadayag 1:3) Alang sa atong dumalayong kaayohan nga atong patalinghogan kining mga kapahayagan. Ang rekord mabasa: “Si Juan nganha sa pito ka kongregasyon nga anaa sa distrito sa Asia: Hinaot nga kamo adunay dili-takos nga kalulot ug kalinaw gikan sa ‘Usa kinsa mao ang karon ug ang kaniadto ug ang umaabot,’ ug gikan sa pito ka espiritu nga anaa sa atubangan sa iyang trono, ug gikan kang Jesu-Kristo.”—Pinadayag 1:4, 5a.
2. (a) Unsa ang gisimbolohan sa numero nga “pito”? (b) Sa adlaw sa Ginoo, ngadto kang kinsa aplikado ang mga mensahe sa “pito ka kongregasyon”?
2 Gisulatan dinhi ni Juan ang “pito ka kongregasyon,” ug sa ulahing bahin sa tagna, kini iyang ginganlan alang kanato. Ang numero nga “pito” balik-balik nga gihisgotan sa Pinadayag. Kini nagsimbolo sa pagkakompleto, ilabina maylabot sa mga butang sa Diyos ug sa iyang dinihogang kongregasyon. Sanglit ang gidaghanon sa mga kongregasyon sa katawhan sa Diyos sa tibuok kalibotan halos tinagpulo ka libo na niining adlaw sa Ginoo, makapaneguro kita nga ang gipamulong alang sa “pito ka kongregasyon” sa mga dinihogan aplikado usab sa tanang katawhan sa Diyos karon. (Pinadayag 1:10) Oo, si Juan dunay hinungdanong mensahe alang sa tanang kongregasyon sa mga Saksi ni Jehova ug sa tanang nakig-uban kanila, bisan diin man sa yuta karon.
3. (a) Sa pangomosta ni Juan, diin gikan ang “dili-takos nga kalulot ug kalinaw”? (b) Unsa ang mga pulong ni apostol Pablo nga kaamgid sa pangomosta ni Juan?
3 “Dili-takos nga kalulot ug kalinaw”—pagkatahom niini ilabina kon atong palandongon kon kinsa ang tinubdan niini! Ang “Usa” nga tinubdan niini mao ang Soberanong Ginoong Jehova, ang “Hari nga walay kataposan,” kinsa nagkinabuhi “gikan sa panahong walay tino hangtod sa panahong walay tino.” (1 Timoteo 1:17; Salmo 90:2) Nalangkit usab dinhi ang “pito ka espiritu,” diin ang maong termino nagpakita ug bug-os nga paglihok sa aktibong puwersa sa Diyos, o balaang espiritu, samtang kini naghatag ug pagsabot ug panalangin sa tanang nagpatalinghog niini nga tagna. Dunay dakong papel usab si “Jesu-Kristo,” nga bahin kaniya si Juan sa ulahi nagsulat: “Siya puno sa dili-takos nga kalulot ug sa kamatuoran.” (Juan 1:14) Busa, ang pangomosta ni Juan kaamgid usab sa mga pulong nga gihisgotan ni apostol Pablo sa paniklop sa iyang ikaduhang sulat sa kongregasyon sa Corinto: “Ang dili-takos nga kalulot sa Ginoong Jesu-Kristo ug ang gugma sa Diyos ug ang panag-ambitay diha sa balaang espiritu magauban kaninyong tanan.” (2 Corinto 13:14) Hinaot nga kining mga pulonga aplikado usab sa matag usa kanato nga nahigugma sa kamatuoran karon!—Salmo 119:97.
“Ang Matinumanong Saksi”
4. Giunsa paghubit ni Juan si Jesu-Kristo, ug nganong tukma kaayo kini nga paghubit?
4 Sunod kang Jehova, si Jesus mao ang labing mahimayaong persona sa uniberso, ingon sa pag-ila ni Juan, nga naghubit kaniya ingong “‘ang Matinumanong Saksi,’ ‘Ang panganay gikan sa mga patay,’ ug ‘Ang Magmamando sa mga hari sa yuta.’” (Pinadayag 1:5b) Sama sa bulan sa kalangitan, siya napamatud-an gayod nga mao ang labing dakong Saksi sa pagka-Diyos ni Jehova. (Salmo 89:37) Human siya makapabiling maunongon hangtod sa haladnong kamatayon, siya ang labing una gikan sa katawhan nga gibanhaw ngadto sa imortal nga espirituhanong kinabuhi. (Colosas 1:18) Karon sa presensiya mismo ni Jehova, siya gituboy nga mas taas pa kay sa tanang hari sa yuta, nga gitugyanan sa “tanang awtoridad . . . sa langit ug sa yuta.” (Mateo 28:18; Salmo 89:27; 1 Timoteo 6:15) Niadtong 1914 siya gipalingkod ingong Hari aron magmando sa mga nasod sa yuta.—Salmo 2:6-9.
5. (a) Sa unsang paagi si Juan nagpadayon sa pagpahayag ug apresasyon alang kang Ginoong Jesu-Kristo? (b) Kinsa ang makabenepisyo sa pagtanyag ni Jesus sa iyang hingpit nga tawhanong kinabuhi ingong gasa, ug sa unsang paagi ang dinihogang mga Kristohanon nakaambit niining linain nga panalangin?
5 Si Juan nagpadayon sa pagpahayag ug apresasyon alang kang Ginoong Jesu-Kristo niining makapalipayng mga pulong: “Kaniya nga nahigugma kanato ug nagtangtang kanato gikan sa atong mga sala pinaagi sa iyang dugo—ug kita iyang gihimo nga usa ka gingharian, mga saserdote ngadto sa iyang Diyos ug Amahan—oo, ngadto kaniya ang himaya ug ang gahom hangtod sa kahangtoran. Amen.” (Pinadayag 1:5c, 6) Gitanyag ni Jesus ang iyang hingpit nga tawhanong kinabuhi aron kadtong mga tawo nga motuo kaniya mapasig-uli sa hingpit nga kinabuhi. Ikaw, minahal nga magbabasa, mahimong malakip niini! (Juan 3:16) Apan ang haladnong kamatayon ni Jesus nagbukas sa dalan alang sa linain nga panalangin alang niadtong mahimong dinihogang mga Kristohanon sama kang Juan. Sila gipahayag nga matarong pinasukad sa halad lukat ni Jesus. Pinaagi sa pagsalikway sa tanang yutan-on nga paglaom sa kinabuhi, sama sa gihimo ni Jesus, ang mga sakop sa gamayng panon gipanganak sa espiritu sa Diyos, nga may paglaom nga banhawon aron mag-alagad ingong mga hari ug mga saserdote uban ni Jesu-Kristo sa iyang Gingharian. (Lucas 12:32; Roma 8:18; 1 Pedro 2:5; Pinadayag 20:6) Pagkadako niini nga pribilehiyo! Dili katingalahan nga positibo gayod nga nakapahayag si Juan nga ang himaya ug ang gahom iya ni Jesus!
“Moanhi Uban sa mga Panganod”
6. (a) Unsay gipahibalo ni Juan bahin sa ‘pag-anhi ni Jesus uban sa mga panganod,’ ug unsang tagna ni Jesus ang lagmit nahinumdoman ni Juan? (b) Sa unsang paagi si Jesus “moanhi,” ug kinsa ang makaagom ug dakong kasubo sa yuta?
6 Sunod niini, si Juan malipayong nagpahibalo: “Tan-awa! Siya moanhi uban sa mga panganod, ug ang tanang mata makakita kaniya, ug kadtong nagdughang kaniya; ug ang tanang tribo sa yuta magapukpok sa ilang kaugalingon sa kasubo tungod kaniya. Oo, Amen.” (Pinadayag 1:7) Sa walay duhaduha si Juan dinhi nahinumdom sa mas unang tagna ni Jesus bahin sa kataposan sa sistema sa mga butang. Si Jesus didto nag-ingon: “Unya ang ilhanan sa Anak sa tawo mopakita sa langit, ug niana ang tanang tribo sa yuta magapukpok sa ilang kaugalingon sa pagminatay, ug sila makakita sa Anak sa tawo nga moanhi diha sa mga panganod sa langit uban ang gahom ug dakong himaya.” (Mateo 24:3, 30) Busa, si Jesus “moanhi” pinaagi sa pagpatuman sa mga paghukom ni Jehova batok sa mga nasod. Kini moresulta ug dagkong mga kausaban sa yuta, ug sanglit ang “tanang tribo sa yuta” wala magtagad sa katinuoran sa pagkahari ni Jesus, ilang maagoman ang “kasuko sa kapungot sa Diyos nga Labing Gamhanan.”—Pinadayag 19:11-21; Salmo 2:2, 3, 8, 9.
7. Sa unsang paagi “makakita” kang Jesus ang “tanang mata,” lakip na kanilang dili masinugtanon?
7 Sa kataposang gabii ni Jesus uban sa iyang mga tinun-an, siya nag-ingon kanila: “Hamubo na lamang nga panahon ug ang kalibotan dili na makakita kanako.” (Juan 14:19) Nan, sa unsang paagi nga ang “tanang mata makakita kaniya”? Dili kita angayng magdahom nga ang mga kaaway ni Jesus makakita kaniya pinaagi sa ilang literal nga mga mata, kay si apostol Pablo nag-ingon, human mikayab si Jesus sa langit, nga si Jesus karon “nagpuyo sa kahayag nga dili-maduol,” ug “walay tawo nga nakakita o makakita” kaniya. (1 Timoteo 6:16) Dayag nga ang buot ipasabot ni Juan nga “makakita” maoy sa diwa nga “masabtan,” sama nga kita mahimong makakita, o makasabot, sa dili makitang mga hiyas sa Diyos pinaagi sa iyang mga linalang. (Roma 1:20) Si Jesus “moanhi uban sa mga panganod” sa diwa nga siya dili makita sa literal nga mata sama nga ang adlaw dili makita kon kini matabonan sa mga panganod. Bisan pag matabonan sa mga panganod sa tibuok adlaw, kita nahibalo nga ang adlaw anaa ra tungod sa kahayag sa atong palibot. Sa samang paagi, bisan pag ang Ginoong Jesus dili makita, siya ipadayag sama sa ‘usa ka nagdilaab nga kalayo, sa dihang siya manimalos kanilang wala magsunod sa maayong balita bahin kaniya.’ Sila usab mapugos sa ‘pagkakita kaniya.’—2 Tesalonica 1:6-8; 2:8.
8. (a) Kinsa “kadtong nagdughang kaniya” sa 33 K.P., ug kinsa sila karon? (b) Sanglit si Jesus wala na dinhi sa yuta, sa unsang paagi ang mga tawo ‘makadughang kaniya’?
8 Si Jesus ‘makita’ usab ‘niadtong nagdughang kaniya.’ Kinsa sila? Sa dihang si Jesus gipatay niadtong 33 K.P., siya literal nga gidughang sa mga sundalong Romano. Ang mga Hudiyo sad-an usab sa maong pagpatay, kay gisultihan ni Pedro ang pipila kanila sa Pentekostes: “Ang Diyos naghimo kaniyang Ginoo ug Kristo, kining Jesus nga inyong gilansang.” (Buhat 2:5-11, 36; itandi ang Zacarias 12:10; Juan 19:37.) Kadtong mga Romano ug mga Hudiyo patay na duolan sa 2,000 ka tuig. Busa kadtong “nagdughang kaniya” karon mahimong naghawas sa mga nasod ug mga tawo nga nagpasundayag ug samang pagdumot nga gipakita nila sa gilansang si Jesus. Si Jesus wala na dinhi sa yuta. Apan kon mapintasong lutoson sa mga magsusupak ang mga Saksi ni Jehova, nga nagpamatuod kang Jesus, o kaha magpakabuta-bungol lang sa maong pagtratar, sama ra nga ‘gidughang’ niining mga magsusupak si Jesus mismo.—Mateo 25:33, 41-46.
“Ang Alfa ug ang Omega”
9. (a) Kinsa karon ang nagsulti, ug pila ka beses siya nagsulti diha sa Pinadayag? (b) Unsay buot ipasabot sa pagtawag ni Jehova sa iyang kaugalingon nga “ang Alfa ug ang Omega” ug “ang Labing Gamhanan”?
9 Karon, katingalahan sa tanang katingalahan! Ang Soberanong Ginoong Jehova mismo misulti. Haom kaayo kini ingon nga pasiuna sa mga panan-awon nga hapit nang ipadayag, kay siya ang atong Dakong Instruktor ug ang Tuboran mismo sa Pinadayag! (Isaias 30:20) Ang atong Diyos nagpahayag: “Ako mao ang Alfa ug ang Omega, . . . ang Usa kinsa mao ang karon ug ang kaniadto ug ang moabot, ang Labing Gamhanan.” (Pinadayag 1:8) Kini ang una sa tulo ka beses sa Pinadayag nga si Jehova mismo nagsulti gikan sa langit. (Tan-awa usab ang Pinadayag 21:5-8; 22:12-15.) Mailhan dayon sa unang-siglong mga Kristohanon nga ang alfa ug ang omega mao ang una ug kataposang mga letra sa Gregong alpabeto. Ang pagtawag ni Jehova sa iyang kaugalingon pinaagi niining duha ka letra nagpasiugda nga una pa kaniya, walay laing labing gamhanan nga Diyos ang naglungtad, ug wala nay uban pa nga mosunod kaniya. Ang isyu bahin sa pagka-Diyos malamposon niyang husayon sa dayon. Siya mabindikar hangtod sa kahangtoran ingong mao ang usa ug bugtong Diyos nga labing gamhanan, ang Supremong Soberano sa tanan niyang kalalangan.—Itandi ang Isaias 46:10; 55:10, 11.
10. (a) Sa unsang paagi gihubit ni Juan ang iyang kaugalingon, ug diin siya gibilanggo? (b) Kinsay lagmit mitabang sa pagpadala sa linukot nga basahon nga gisulat ni Juan ngadto sa mga kongregasyon? (c) Sa unsang paagi ang espirituwal nga pagkaon kanunayng gitagana karon?
10 Masaligon nga ipadangat ni Jehova ang resulta sa mga butang, gisultihan ni Juan ang iyang mga isigkaulipon: “Ako si Juan, nga inyong igsoon ug mag-aambit uban kaninyo sa kasakitan ug sa gingharian ug sa paglahutay kauban ni Jesus, nahidangat sa pulo nga gitawag ug Patmos tungod sa pagsulti bahin sa Diyos ug sa pagpamatuod bahin kang Jesus.” (Pinadayag 1:9) Usa ka binilanggo sa Patmos tungod sa maayong balita, nag-antos sa kasakitan uban sa iyang mga igsoon, nga may dakong paglaom nga makabahin sa umaabot nga Gingharian, nakita karon sa tigulang na nga si Juan ang una sa mga panan-awon sa Pinadayag. Dayag nga napalig-on gayod siya niining maong mga panan-awon, sama nga ang Juan nga matang napalig-on karon nga nakakita sa katumanan niini. Wala kita mahibalo kon giunsa pagpadala ni Juan ang linukot nga basahon sa Pinadayag ngadto sa mga kongregasyon, tungod kay siya binilanggo man nianang higayona. (Pinadayag 1:11; 22:18, 19) Lagmit ang mga manulonda ni Jehova mitabang aron mahimo kini, sama sa ilang pagpanalipod kanunay sa matinumanong mga Saksi ni Jehova nga nag-alagad bisan pa sa mga pagbando ug mga pagdili karon, nga tungod niini sila nakatagana ug nunot-sa-panahong espirituwal nga pagkaon alang sa ilang mga igsoon nga gigutom sa kamatuoran.—Salmo 34:6, 7.
11. Unsang pribilehiyo ang gipakabahandi karon sa Juan nga matang nga susama nianang gipabilhan gayod ni Juan?
11 Dayag nga gipabilhan gayod ni Juan ang iyang pribilehiyo sa paggamit ni Jehova kaniya ingong Iyang alagianan sa komunikasyon ngadto sa mga kongregasyon! Sa susamang paagi, gipakabahandi karon sa Juan nga matang ang ilang pribilehiyo sa pagtagana sa panimalay sa Diyos ug espirituwal nga “pagkaon sa hustong panahon.” (Mateo 24:45) Hinaot usa ikaw niadtong napalig-on niining espirituwal nga tagana aron imong matagamtam ang mahimayaong tumong nga kinabuhing walay kataposan!—Proverbio 3:13-18; Juan 17:3.
[Mga Pangutana sa Pagtuon]
[Kahon sa panid 21]
Pagbaton ug Espirituwal nga Pagkaon sa Malisod nga mga Panahon
Niining kataposang mga adlaw, diin ang mga Saksi ni Jehova nag-antos ug grabeng paglutos ug kalisod, hinungdanon gayod nga makabaton sila ug espirituwal nga pagkaon aron sila makapabiling malig-on sa pagtuo. Sa daghang kaso, ang igong tabang natagana tungod sa talagsaong pagpasundayag sa gahom ni Jehova.
Pananglitan, sa Alemanya ilalom ni Hitler, ang mga Saksi nagmimyograp ug nanagtag ug mga kopya sa Ang Bantayanang Torre, nga opisyal nga gibando sa mapintas nga mga awtoridad sa Nazi. Sa Hamburg, gilungkab sa Gestapo ang usa ka balay diin ginahimo ang pagmimyograp. Gamay lamang kini nga balay, ug walay lugar nga katagoan sa bisan unsa. Ang makenilya gibilin sa usa ka kabinet, ug ang dakong makina sa pagmimyograp gibutang sa usa ka kahon sa patatas didto sa silong sa balay. Dugang pa, dunay usa ka maleta nga punog magasin sa likod sa kahon! Seguradong makita gayod kini. Apan unsay nahitabo? Sa gibuksan sa opisyal ang kabinet, daw wala siyay nakitang makenilya. Kon bahin sa silong sa balay, ang tagbalay miingon: “Ang tulo ka opisyal nagtindog sa tunga sa kuwarto diha mismo sa nahimutangan sa kahon sa patatas uban sa maleta nga punog mga Bantayanang Torre sa luyo niini. Apan daw walay usa kanila ang nakamatikod niini; morag gibutaan sila.” Tungod niining talagsaong tabang sa Diyos, ang panimalay nakapadayon sa pagtagana ug espirituwal nga pagkaon sa malisod ug peligroso nga mga panahon.
Sa katuigan sa 1960, dihay nahitabong giyera sibil taliwala sa Nigeria ug sa mibulag nga lalawigan sa Biafra. Sanglit ang Biafra bug-os nga gilibotan sa teritoryo sa Nigeria, ang bugtong koneksiyon niini sa ubang bahin sa kalibotan mao ang usa ra ka tugpahanan sa ayroplano. Sa ato pa, ang mga Saksi sa Biafra peligrong mahutdan ug suplay sa espirituwal nga pagkaon. Unya, sa unang bahin sa 1968, ang mga awtoridad sa Biafra nag-asayn ug usa sa ilang empleyado ngadto sa usa ka dakong posisyon sa Uropa ug dihay usa nga gitudlo diha sa tugpahanan sa Biafra. Nagkaatol nga kining duha parehong mga Saksi ni Jehova, ug sila karon anaa sa isigkatumoy sa bugtong koneksiyon tali sa Biafra ug sa ubang bahin sa kalibotan. Nasabtan niining duha nga gikan kang Jehova kini nga kahikayan. Busa, miboluntaryo sila alang sa delikado ug peligroso nga buluhaton sa pagpasulod ug espirituwal nga pagkaon sa Biafra. Ug ilang gihimo kini sa tibuok panahon sa gubat. Ang usa kanila miingon: “Imposible gayod nga tawo ang nagplano niini nga kahikayan.”
[Chart sa panid 19]
Simbolikong mga Numero sa Pinadayag
Numero Simbolikong Kahulogan
2 Nagsimbolo sa lig-on nga pagpamatuod sa usa ka butang.
(Pinadayag 11:3, 4; itandi ang Deuteronomio 17:6.)
3 Nagpasabot ug pagpasiugda. Nagpaila usab ug puwersa.
(Pinadayag 4:8; 8:13; 16:13, 19)
4 Nagsimbolo sa pagkamalukpanon o pagkakuwadrado sa
proporsiyon. (Pinadayag 4:6; 7:1, 2; 9:14; 20:8; 21:16)
6 Nagsimbolo sa pagkadili-hingpit, butang nga dili
normal, makalilisang. (Pinadayag 13:18; itandi ang
7 Nagsimbolo sa pagkakompleto sa sukdanan sa Diyos, may
kalabotan man kini sa mga katuyoan ni Jehova o sa
kang Satanas. (Pinadayag 1:4, 12, 16; 4:5; 5:1, 6;
10:3, 4; 12:3)
10 Nagsimbolo sa pagkabug-os o pagkakompleto sa pisikal
nga paagi, may kalabotan sa mga butang sa yuta.
(Pinadayag 2:10; 12:3; 13:1; 17:3, 12, 16)
12 Nagsimbolo sa organisasyon nga gimugna sa Diyos sa
langit man o sa yuta. (Pinadayag 7:5-8; 12:1; 21:12, 16;
22:2)
24 Nagsimbolo sa dagaya (doble) nga organisasyonal nga
kahikayan ni Jehova. (Pinadayag 4:4)
Ang ubang mga numero nga gihisgotan sa Pinadayag angayng sabton nga literal. Kasagaran, ang konteksto makatabang sa pagkahibalo niini. (Tan-awa ang Pinadayag 7:4, 9; 11:2, 3; 12:6, 14; 17:3, 9-11; 20:3-5.)
