Kapitulo 42

Usa ka Bag-ong Langit ug Usa ka Bag-ong Yuta

1. Unsay gihubit ni Juan sa dihang gidala siyag balik sa manulonda ngadto sa sinugdan sa Usa ka Libo ka Tuig nga Pagmando?

 KINING mahimayaong panan-awon padayong nadayag samtang si Juan gidalag balik sa manulonda ngadto sa sinugdan sa Usa ka Libo ka Tuig nga Pagmando. Unsay iyang gihubit? “Ug nakita ko ang usa ka bag-ong langit ug usa ka bag-ong yuta; kay ang unang langit ug ang unang yuta nangahanaw na man, ug ang dagat wala na.” (Pinadayag 21:1) Nadayag ang usa ka makapadani nga talan-awon!

2. (a) Sa unsang paagi ang tagna ni Isaias mahitungod sa bag-ong mga langit ug usa ka bag-ong yuta natuman diha sa napasig-uling mga Hudiyo niadtong 537 W.K.P.? (b) Sa unsang paagi nahibalo kita nga aduna pay dugang nga kapadapatan sa tagna ni Isaias, ug sa unsang paagi matuman kining saara?

² Ginatos ka katuigan una pa sa adlaw ni Juan, si Jehova miingon kang Isaias: “Kay ania, ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing.” (Isaias 65:17; 66:22) Kining tagnaa unang natuman sa dihang ang matinumanong mga Hudiyo nahibalik sa Jerusalem niadtong 537 W.K.P. human sa ilang pagkadestiyero ug 70 ka tuig sa Babilonya. Sa maong pagpasig-uli, sila nahimong usa ka nahinloang katilingban, “usa ka bag-ong yuta,” ubos sa usa ka bag-ong sistema sa kagamhanan, ang “bag-ong mga langit.” Apan gihisgotan ni apostol Pedro ang dugang nga kapadapatan sa tagna, nga nag-ingon: “Apan adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Gipakita karon ni Juan nga kining saara matuman sa adlaw sa Ginoo. “Ang unang langit ug ang unang yuta,” ang organisadong sistema sa mga butang ni Satanas uban sa porma sa kagamhanan niini nga impluwensiyado ni Satanas ug sa iyang mga demonyo, mawala na unya. Mawagtang na ang magubot nga “dagat” sa daotan, rebelyosong katawhan. Pulihan unya kinig “usa ka bag-ong langit ug usa ka bag-ong yuta”—nga usa ka bag-o nga yutan-ong katilingban ubos sa usa ka bag-ong kagamhanan, ang Gingharian sa Diyos.—Itandi ang Pinadayag 20:11.

3. (a) Unsay gihubit ni Juan, ug unsa ang Bag-ong Jerusalem? (b) Sa unsang paagi ang Bag-ong Jerusalem “nanaog gikan sa langit”?

³ Si Juan nagpadayon: “Nakita ko usab ang balaang siyudad, ang Bag-ong Jerusalem, nga nanaog gikan sa langit gikan sa Diyos ug giandam ingong usa ka pangasaw-onon nga gidayandayanan alang sa iyang bana.” (Pinadayag 21:2) Ang Bag-ong Jerusalem mao ang pangasaw-onon ni Kristo, nga gilangkoban sa dinihogang mga Kristohanon nga nagpabiling matinumanon hangtod sa kamatayon ug gibanhaw aron mahimong mga hari ug mga saserdote uban sa hinimayang Jesus. (Pinadayag 3:12; 20:6) Maingon nga ang yutan-ong Jerusalem nahimong kaulohan sa kagamhanan sa karaang Israel, ang matahom nga Bag-ong Jerusalem ug ang iyang Pamanhonon naglangkob sa kagamhanan sa bag-ong sistema sa mga butang. Kini mao ang bag-ong langit. Ang ‘pangasaw-onon nanaog gikan sa langit,’ dili sa literal nga paagi, kondili sa diwa nga ang pagtagad niini gipunting sa yuta. Ang pangasaw-onon  sa Kordero mao ang mahimong iyang maunongong katabang sa pagdumala sa usa ka matarong nga kagamhanan ibabaw sa tanang katawhan. Panalangin gayod alang sa bag-ong yuta!

4. Unsang saad ang gihimo sa Diyos nga susama sa iyang gihimo sa bag-ong naporma nga nasod sa Israel?

⁴ Si Juan dugang nagtug-an kanato: “Niana nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila.’” (Pinadayag 21:3) Sa dihang gihimo ni Jehova ang pakigsaad sa Balaod uban sa bag-ong nasod sa Israel niadto, siya misaad: “Akong ibutang ang akong tabernakulo diha sa inyong taliwala, ug ang akong kalag dili masilag kaninyo. Ug ako sa pagkatinuod magalakaw sa inyong taliwala ug ako mahimong inyong Diyos, ug kamo, sa inyong bahin, mahimong akong katawhan.” (Levitico 26:11, 12) Karon si Jehova naghimog susamang saad ngadto sa matinumanong mga tawo. Sulod sa usa ka libo ka tuig nga Adlaw sa Paghukom, sila mahimong espesyal kaayong katawhan alang kaniya.

5. (a) Sa unsang paagi mopuyo ang Diyos uban sa katawhan panahon sa Milenyong Pagmando? (b) Sa unsang paagi mopuyo ang Diyos taliwala sa katawhan tapos sa Usa ka Libo ka Tuig nga Pagmando?

⁵ Panahon sa Milenyong Pagmando, si Jehova “mopuyo” taliwala sa katawhan ingon nga temporaryong kahikayan, kay siya pagahawasan sa iyang harianong Anak, si Jesu-Kristo. Apan, pagkatapos sa Usa ka Libo ka Tuig nga Pagmando, sa dihang itugyan ni Jesus ang Gingharian ngadto sa iyang Amahan, dili na kinahanglan ang usa ka harianong hawas o tigpataliwala. Si Jehova mopuyo sa espirituwal nga paagi uban sa “iyang mga katawhan” sa permanente ug direktang paagi. (Itandi ang Juan 4:23, 24.) Pagkatalagsaong pribilehiyo alang sa napasig-uling katawhan!

6, 7. (a) Unsang talagsaong mga saad ang gibutyag ni Juan, ug kinsay makatagamtam sa mga panalangin? (b) Sa unsang paagi gihubit ni Isaias ang espirituwal ug pisikal nga paraiso?

⁶ Si Juan nagpadayon sa pag-ingon: “Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:4) Sa makausa pa, kita gipahinumdoman sa mas naunang inspiradong mga saad. Si Isaias nagpaabot usab sa panahon nga ang kamatayon ug pagbangotan mawala na ug ang kasubo pulihan nag pagmaya. (Isaias 25:8; 35:10; 51:11; 65:19) Gipamatud-an karon ni Juan nga kining mga saara adunay kahibulongang katumanan sulod sa usa ka libo ka tuig nga Adlaw sa Paghukom. Sa sinugdan ang dakong panon magtagamtam ug mga panalangin. “Ang Kordero, nga anaa sa taliwala sa trono,” nga padayong nagabantay kanila, “magatultol kanila ngadto sa mga tuboran sa mga tubig sa kinabuhi. Ug ang Diyos magapahid sa tanang luha gikan sa ilang mga mata.” (Pinadayag 7:9, 17) Apan sa kaulahian ang tanan nga mabanhaw ug magpasundayag ug pagtuo sa mga tagana ni Jehova mahiuban kanila didto, nga magpahimulos sa espirituwal ug pisikal nga paraiso.

⁷ “Nianang panahona,” nag-ingon si Isaias, “ang mga mata sa mga buta mabuka, ug ang igdulungog sa mga bungol mabuksan.” Oo, “nianang panahona ang bakol mosaka ingon sa laking osa, ug ang dila sa amang mosinggit sa kasadya.” (Isaias 35:5, 6) Nianang panahona usab, “sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang mga kamot.” (Isaias 65:21, 22) Busa sila dili pagalukahon gikan sa yuta.

8. Unsay giingon ni Jehova mismo mahitungod sa pagkakasaligan niining talagsaong mga saad?

⁸ Pagkanindot nga mga hulagway ang mosantop sa atong hunahuna samtang palandongon nato ang maong mga saad! Ang kahibulongang mga tagana mabatonan sa matinumanong katawhan ubos sa mahigugmaong kagamhanan sa langit. Ang mao bang mga saad kahibulongan kaayo nga daw dili katuohan? Mga damgo ba lang kana sa usa ka tigulang nga lalaki nga nadestiyero sa pulo sa Patmos? Si Jehova mismo nagtubag: “Ug ang Usa nga naglingkod sa trono miingon: ‘Tan-awa! Ginabag-o ko ang tanang butang.’ Dugang pa, siya nag-ingon: ‘Isulat kini, tungod kay kining mga pulonga kasaligan ug matuod.’ Ug siya miingon kanako: ‘Nahitabo na kini! Ako mao ang Alfa ug ang Omega, ang sinugdan ug ang kataposan.’”—Pinadayag 21:5, 6a.

9. Nganong kining umaabot nga mga panalangin mahimong isipon nga seguradong matuman?

⁹ Si Jehova samag nagpirmag usa ka garantiya  o kalig-onan niining umaabot nga mga panalangin alang sa matinumanong katawhan. Kinsay mangahas sa pagduda sa maong Tiggarantiya? Aw, segurado kaayo ang maong mga saad ni Jehova nga iya kining gihisgotan nga samag natuman na: “Nahitabo na kini!” Dili ba si Jehova “ang Alfa ug ang Omega . . . , ang Usa kinsa mao ang karon ug ang kaniadto ug ang umaabot, ang Labing Gamhanan”? (Pinadayag 1:8) Siya mao gayod! Siya mismo nagpahayag: “Ako ang una ug ako ang ulahi, ug gawas kanako wala nay Diyos.” (Isaias 44:6) Sa ingon niana, siya makadasig ug mga tagna ug makatuman sa tanang detalye niana. Pagkamakapalig-on sa pagtuo! Busa siya nagsaad: “Tan-awa! Ginabag-o ko ang tanang butang”! Inay magduhaduha kon matuman ba kining kahibulongang mga butang, kita angayng maghunahuna: ‘Unsay personal kong pagabuhaton aron makapanunod sa maong mga panalangin?’

“Tubig” Alang sa mga Giuhaw

10. Unsang ‘tubiga’ ang gitanyag ni Jehova, ug unsay gisimbolohan niini?

¹⁰ Si Jehova mismo ang nagpahayag: “Ngadto kang bisan kinsa nga giuhaw ako magahatag nga walay bayad gikan sa tuboran sa tubig sa kinabuhi.” (Pinadayag 21:6b) Sa pagtagbaw sa maong kauhaw, ang usa ka tawo kinahanglang magmahunahunaon sa iyang espirituwal nga panginahanglan ug magmaandam sa pagdawat sa “tubig” nga gitagana ni Jehova. (Isaias 55:1; Mateo 5:3) Unsang ‘tubiga’? Gitubag ni Jesus mismo ang maong pangutana sa dihang siya nagpamatuod ngadto sa usa ka babaye sa daplin sa usa ka atabay sa Samaria. Iyang giingnan ang babaye: “Bisan kinsa nga magainom sa tubig nga akong igahatag kaniya dili na gayod pagauhawon pa, hinuon ang tubig nga akong igahatag kaniya mahimong usa ka tuboran sa tubig diha kaniya nga magabugwak aron mohatag ug kinabuhing walay kataposan.” Kanang “tuboran sa tubig sa kinabuhi” modagayday gikan sa Diyos pinaagi ni Kristo ingon nga iyang tagana sa pagpasig-uli sa katawhan ngadto sa hingpit nga kinabuhi. Sama sa babaye nga Samarianhon, kita angay gayod nga mahinam sa pag-inom gikan sa maong tuboran! Ug sama nianang bayhana, kita kinahanglang andam sa pagbiya sa kalibotanong intereses aron makapahayag sa maayong balita ngadto sa uban!—Juan 4:14, 15, 28, 29.

Ang mga Magmadaogon

11. Unsay gisaad ni Jehova, ug kang kinsa unang mapadapat ang maong mga pulong?

¹¹ Kadtong moinom nianang makapapreskong “tubig” kinahanglang magmadaogon usab, kay si Jehova padayong nag-ingon: “Si bisan kinsa nga magmadaogon makapanunod niining mga butanga, ug ako mahimong iyang Diyos ug siya mahimong akong anak.” (Pinadayag 21:7) Kining saara susama sa mga saad nga anaa sa mga mensahe ngadto sa pito ka kongregasyon; busa, kining mga pulonga unang mapadapat sa dinihogang mga tinun-an. (Pinadayag 2:7, 11, 17, 26-28; 3:5, 12, 21) Ang espirituwal nga mga igsoon ni Kristo sa tanang panahon mahinamong nagpaabot sa pribilehiyo nga mahimong bahin sa Bag-ong Jerusalem. Kon sila makadaog, sama nga si Jesus nakadaog, ang ilang mga paglaom mangatuman.—Juan 16:33.

12. Sa unsang paagi matuman ang saad ni Jehova sa Pinadayag 21:7 alang sa dakong panon?

¹² Ang dakong panon gikan sa tanang kanasoran nagpaabot usab sa katumanan niining saara. Kinahanglang makadaog usab sila, nga maunongong mag-alagad sa Diyos hangtod makalabang sila sa dakong kasakitan. Unya mosulod sila sa ilang yutan-ong panulondon, ‘ang gingharian nga giandam alang kanila sukad pa sa pagkatukod sa kalibotan.’ (Mateo 25:34) Sila ug ang ubang mga karnero sa Ginoo nga may yutan-ong paglaom nga makalabang sa pagsulay sa kataposan sa usa ka libo ka tuig gitawag ug “mga balaan.” (Pinadayag 20:9) Ilang mapahimuslan ang sagrado ug samag-pamilya nga relasyon uban sa ilang Maglalalang, si Jehova nga Diyos, ingong mga membro sa iyang unibersohanong organisasyon.—Isaias 66:22; Juan 20:31; Roma 8:21.

13, 14. Aron makapanunod sa talagsaong mga saad sa Diyos, unsang mga buhata ang ato gayong likayan, ug ngano?

¹³ Tungod niining talagsaong palaaboton, pagkahinungdanon nga ang mga Saksi ni Jehova magpabiling hinlo karon gikan sa mahugawng mga butang sa kalibotan ni Satanas! Kita kinahanglang magmakusganon, desidido, ug determinado nga dili magpadani sa Yawa ngadto sa pagpakig-uban nga gihubit ni Jehova mismo dinhi: “Apan bahin sa mga talawan ug niadtong mga walay pagtuo ug niadtong mga dulumtanan tungod sa ilang kahugawan ug sa mga mamumuno ug mga makihilawason ug niadtong nanagbuhat sa espiritismo ug mga tigsimbag idolo ug sa tanang bakakon, ang ilang bahin mao unya ang linaw  nga nagdilaab sa kalayo ug asupre. Kini mao ang ikaduhang kamatayon.” (Pinadayag 21:8) Oo, ang umaabot nga manununod kinahanglang molikay sa mga buhat nga naghugaw niining daang sistema sa mga butang. Siya kinahanglang makadaog pinaagi sa pagpabiling matinumanon atubangan sa tanang pagpig-ot ug tentasyon.—Roma 8:35-39.

¹⁴ Ang Kakristiyanohan, bisan tuod nag-angkong pangasaw-onon ni Kristo, ilado tungod sa dulumtanang mga buhat nga gihubit dinhi ni Juan. Mao nga siya makaagom sa dumalayong kalaglagan kauban sa nahibiling bahin sa Dakong Babilonya. (Pinadayag 18:8, 21) Maingon man usab, si bisan kinsa sa mga dinihogan o sa dakong panon nga nagbatasan sa maong buhat nga daotan, o mosugod pagdasig niini, moatubang sa dumalayong kalaglagan. Kon mopadayon sila niining mga buhata, sila dili makapanunod sa mga saad. Ug sa bag-ong yuta, si bisan kinsa nga mosulay sa pagpasiugda nianang mga buhata pagalaglagon dayon, nga makaagom sa ikaduhang kamatayon nga wala nay paglaom sa pagkabanhaw.—Isaias 65:20.

15. Kinsa ang talagsaong mga mananaog, ug unsa ang panan-awon nga mao ang labing talagsaong sangkoanan sa Pinadayag?

¹⁵ Talagsaong mga mananaog ang Kordero, si Jesu-Kristo, ug ang iyang pangasaw-onon nga 144,000, ang Bag-ong Jerusalem. Nan, pagkahaom nga ang Pinadayag gipadangat sa labing talagsaong sangkoanan pinaagig kataposan, labing hamili nga paghulagway sa Bag-ong Jerusalem! Gihubit karon ni Juan ang kataposang panan-awon.

[Mga Pangutana sa Pagtuon]

 [Mga hulagway sa panid 302]

Sa bag-ong yuta nga katilingban, aduna unyay makapalipay nga buluhaton ug pag-ubanay alang sa tanan