Ipaubos ni Jehova ang mga Mapahitas-on
Kapitulo Singko
Ipaubos ni Jehova ang mga Mapahitas-on
1, 2. Nganong ang matagnaong mensahe ni Isaias alang sa mga Hudiyo sa iyang adlaw makapaikag kanato?
KAY nayugot sa kahimtang sa Jerusalem ug sa Juda, si propeta Isaias karon miliso kang Jehova nga Diyos ug mipahayag: “Imong gitalikdan ang imong katawhan, ang balay ni Jacob.” (Isaias 2:6a) Unsay nakapasuko sa Diyos nga isalikway man ang katawhang iyang gipili ingon nga iyang “linaing katigayonan”?—Deuteronomio 14:2.
2 Ang dayag nga pagsaway ni Isaias sa mga Hudiyo sa iyang panahon makapaikag kaayo kanato. Ngano? Kay ang kahimtang sa Kakristiyanohan karon susama kaayo niadtong sa katawhan ni Isaias, ug mao man usab ang paghukom nga ginapahayag ni Jehova. Ang pagpamati sa pahayag ni Isaias mohatag kanato ug tin-awng pagsabot sa kon unsay ginapahayag sa Diyos nga daotan ug motabang kanato sa paglikay sa mga buhat nga wala niya uyoni. Nan, uban ang dakong kahinam tagdon nato ang matagnaong pulong ni Jehova sumala sa nahitala sa Isaias 2:6–4:1.
Sa Kamagarbohon Sila Moyukbo
3. Unsang sayop sa iyang katawhan ang gisugid ni Isaias?
3 Sa pagsugid sa sayop sa iyang katawhan, si Isaias nag-ingon: “Sila nangapuno sa kon unsay gikan sa Sidlakan, ug sila nagahimog salamangka sama sa mga Filistehanon, ug sila dagaya sa mga bata sa mga langyaw.” (Isaias 2:6b) Mga 800 ka tuig nga sayosayo, si Jehova nagsugo sa pinili niyang katawhan: “Dili gayod kamo maghugaw sa inyong kaugalingon pinaagi sa bisan unsa niining mga butanga [nga niana] ang kanasoran nga akong gipapahawa gikan sa inyong atubangan naghugaw sa ilang kaugalingon.” (Levitico 18:24) Mahitungod niadtong iyang gipili ingong iyang linaing katigayonan, gipugos ni Jehova si Balaam sa pagsulti: “Gikan sa tumoy sa kabatoan ako nakakita kanila, ug gikan sa kabungtoran ako nakatan-aw kanila. Didto nagpuyo sila nga sila ra ingon nga usa ka katawhan, ug sila wala mag-isip sa ilang kaugalingon nga uban sa mga nasod.” (Numeros 23:9, 12) Apan, pag-abot sa panahon ni Isaias ang mga pinili ni Jehova nagsagop sa dulumtanang mga buhat sa kanasoran sa palibot ug “nangapuno sa kon unsay gikan sa Sidlakan.” Inay ibutang ang pagtuo diha kang Jehova ug sa iyang pulong, sila nagahimog “salamangka sama sa mga Filistehanon.” Halayo sa pagpabiling bulag sa mga nasod, ang yuta “dagaya sa mga bata sa mga langyaw”—walay duhaduha, mga langyaw nga nagpailailag dili-diyosnong mga buhat ngadto sa katawhan sa Diyos.
4. Inay magpahinabo nga pasalamatan nila si Jehova, sa unsang paagi ang bahandi ug militaryong kusog nag-apektar sa mga Hudiyo?
4 Kay nakamatikod sa presenteng kauswagan sa ekonomiya ug sa militaryong kusog sa Juda ubos kang Haring Uzzias, si Isaias mipahayag: “Ang ilang yuta napuno sa plata ug bulawan, ug walay kinutoban ang ilang mga bahandi. Ug ang ilang yuta napuno sa mga kabayo, ug walay limite ang ilang mga karo.” (Isaias 2:7) Ang katawhan ba nagpasalamat kang Jehova tungod sa maong bahandi ug militaryong kusog? (2 Cronicas 26:1, 6-15) Halayo niana! Sa kapulihay, gibutang nila ang ilang pagsalig diha sa bahandi mismo ug gitalikdan ang Tinubdan niini, si Jehova nga Diyos. Ang resulta? “Ang ilang yuta napuno sa walay-bili nga mga diyos. Nagayukbo sila sa buhat sa ilang mga kamot, nianang hinimo sa ilang mga tudlo. Ug ang yutan-ong tawo nagayukbo, ug ang tawo nahimong ubos, ug ikaw dili makapasaylo kanila.” (Isaias 2:8, 9) Gilingiw nila ang ilang mga nawong gikan sa buhing Diyos ug giyukboan ang way-kinabuhing mga diyosdiyos.
5. Nganong ang pagyukbo ngadto sa mga diyosdiyos dili usa ka buhat sa pagpaubos?
5 Ang pagyukbo mahimong usa ka ilhanan sa pagpaubos. Apan ang pagyukbo ngadto sa way-kinabuhing mga butang maoy kawang, nga naghimo sa magsisimbag diyosdiyos nga “ubos,” menos. Sa unsang paagi makapasaylo si Jehova nianang salaa? Unsay buhaton sa maong mga magsisimbag idolo sa dihang si Jehova makighusay na kanila?
‘Paubson Gayod ang Mapahitas-ong mga Mata’
6, 7. (a) Unsay mahitabo sa mga mapahitas-on sa adlaw sa paghukom ni Jehova? (b) Diha sa unsa ug kang kinsa nga ipahayag ni Jehova ang iyang kasuko, ug ngano?
6 Si Isaias nagpadayon: “Sumulod ka sa bato ug pagtago sa abog tungod sa pagkamakalilisang ni Jehova, ug gikan sa iyang mahimayaong pagkalabaw.” (Isaias 2:10) Apan walay bato ang may igong gidak-on sa pagpanalipod kanila, walay salipod ang may igong gibag-on sa pagtago kanila, gikan kang Jehova, ang Labing Gamhanan. Sa dihang moabot siya aron ipatuman ang iyang paghukom, “ang mapahitas-ong mga mata sa yutan-ong tawo mapaubos, ug ang pagkahataas sa mga tawo moyuko; ug si Jehova lamang ang igatuboy nianang adlawa.”—Isaias 2:11.
7 “Ang adlaw nga iya ni Jehova sa mga panon” nagsingabot. Kana usa unya ka panahon aron ipahayag sa Diyos ang iyang kasuko “sa tanang sedro sa Lebanon nga habog ug hataas ug sa tanang buntaog nga mga kahoy sa Basan; ug sa tanang bukid nga habog ug sa tanang bungtod nga hataas; ug sa matag hataas nga torre ug sa matag kinutaang paril; ug sa tanang barko sa Tarsis ug sa tanang tilinguhaong sakayan.” (Isaias 2:12-16) Oo, ang matag organisasyong gipatindog sa tawo ingon nga simbolo sa iyang pagkagarboso ug ang matag dili-diyosnong tawo hatagag pagtagad sa adlaw sa kapungot ni Jehova. Busa, “ang pagkamapahitas-on sa yutan-ong tawo moyuko, ug ang pagkahataas sa mga tawo mapaubos; ug si Jehova lamang ang igatuboy nianang adlawa.”—Isaias 2:17.
8. Sa unsang paagi ang gitagnang adlaw sa paghukom midangat sa Jerusalem niadtong 607 W.K.P.?
8 Ang gitagnang adlaw sa paghukom midangat sa mga Hudiyo sa 607 W.K.P. sa dihang gilaglag ni Haring Nabucodonosor sa Babilonya ang Jerusalem. Ang mga molupyo nakakita sa ilang minahal nga siyudad nga nagdilaab, sa matahom nga mga tinukod nga gilumpag, sa lig-ong paril nga gidugmok. Ang templo ni Jehova nahimong gun-ob na lamang. Walay kapuslanan ang ilang mga bahandi o ang ilang mga karo sa “adlaw nga iya ni Jehova sa mga panon.” Ug ang ilang mga diyosdiyos? Nahitabo ang sumala sa gitagna ni Isaias: “Ang walay-bili nga mga diyos mahanaw sa bug-os.” (Isaias 2:18) Ang mga Hudiyo—mga prinsipe ug lakip ang gamhanang mga tawo—gidala ngadto sa pagkadestiyero sa Babilonya. Ang Jerusalem magpabiling awaaw sulod sa 70 ka tuig.
9. Sa unsang paagi ang kahimtang sa Kakristiyanohan susama nianang sa Jerusalem ug sa Juda sa adlaw ni Isaias?
9 Susama kaayo ang kahimtang sa Kakristiyanohan sa iya sa Jerusalem ug sa Juda sa adlaw ni Isaias! Ang Kakristiyanohan tinong nakaugmad ug suod nga relasyon uban sa mga nasod niining kalibotana. Siya madasigong tigpaluyo sa Hiniusang Kanasoran ug nagpuno sa iyang balay sa mga diyosdiyos ug sa dili-kasulatanhong mga buhat. Ang iyang mga sumusunod materyalistiko ug nagbutang sa ilang pagsalig diha sa militaryong gahom. Ug dili ba giisip nila ang ilang klero ingong takos sa dakong kadungganan, nga naghatag pa kanilag mga titulo ug mga pasidungog? Ang pagbayaw-sa-kaugalingon sa Kakristiyanohan sa walay pakyas pagawagtangon. Apan kanus-a?
Ang Umaabot nga “Adlaw ni Jehova”
10. Sa unsang “adlaw ni Jehova” nga ang mga apostol nga si Pablo ug Pedro mipunting?
10 Ang Kasulatan nagpunting sa usa ka “adlaw ni Jehova” nga labaw pa unyang makahuloganon kay sa adlaw sa paghukom sa karaang Jerusalem ug Juda. Si apostol Pablo, ubos sa inspirasyon, naglangkit sa umaabot nga “adlaw ni Jehova” uban sa presensiya sa naentronong Haring Jesu-Kristo. (2 Tesalonica 2:1, 2) Si Pedro naghisgot nianang adlawa nga langkit sa pagkatukod sa ‘bag-ong mga langit ug usa ka bag-ong yuta nga niini magapuyo ang pagkamatarong.’ (2 Pedro 3:10-13) Kini ang adlaw nga niana si Jehova magpatuman sa iyang paghukom diha sa tibuok daotang sistema sa mga butang, lakip ang Kakristiyanohan.
11. (a) Kinsay “makasugakod” sa umaabot nga “adlaw ni Jehova”? (b) Sa unsang paagi mahimo natong atong dalangpanan si Jehova?
11 “Pagkaalaot sa maong adlaw,” matod ni manalagnang Joel, “tungod kay ang adlaw ni Jehova haduol na, ug sama sa usa ka paglaglag gikan sa Usa nga Labing Gamhanan kini moabot!” Tungod sa pagkaduol sa maong “adlaw,” dili ba ang matag usa angayng mabalaka bahin sa kasegurohan sa maong makalilisang nga panahon? “Kinsa ang makasugakod niana?” nangutana si Joel. Siya mitubag: “Si Jehova mahimong dalangpanan sa iyang katawhan.” (Joel 1:15; 2:11; 3:16) Si Jehova nga Diyos ba mahimong usa ka dalangpanan niadtong adunay mapahitas-ong espiritu ug nagbutang sa ilang pagsalig diha sa bahandi, militaryong gahom, ug ginamag-tawo nga mga diyos? Imposible! Ang Diyos mibiya gani sa pinili niyang katawhan sa dihang migawi sila sa ingon nga paagi. Pagkabililhon nga ang tanang alagad sa Diyos ‘mangita sa pagkamatarong, mangita sa kaaghop,’ ug maugdang nga magsusi sa dapit sa pagsimba ni Jehova diha sa ilang mga kinabuhi!—Sofonias 2:2, 3.
“Ngadto sa mga Ilaga ug sa mga Kabog”
12, 13. Nganong haom nga isalibay sa mga magsisimbag diyosdiyos ang ilang mga diyos “ngadto sa mga ilaga ug sa mga kabog” sa adlaw ni Jehova?
12 Unsay pag-isip unya sa mga magsisimbag diyosdiyos sa ilang mga diyos panahon sa dakong adlaw ni Jehova? Si Isaias nagtubag: “Ang katawhan mosulod sa mga langob sa mga bato ug sa mga lungag sa abog tungod sa pagkamakalilisang ni Jehova ug gumikan sa iyang mahimayaong pagkalabaw, sa dihang siya motindog aron ang yuta mokurog. Nianang adlawa isalibay sa yutan-ong tawo ang iyang walay-pulos nga mga diyos nga plata ug ang iyang walay-bili nga mga diyos nga bulawan . . . ngadto sa mga ilaga ug sa mga kabog, aron mosulod sa mga lungag diha sa mga bato ug sa mga giwang sa dagkong bato, tungod sa pagkamakalilisang ni Jehova ug gumikan sa iyang mahimayaong pagkalabaw, sa dihang siya motindog aron ang yuta mokurog. Tungod ug alang kaninyo, ayaw pagduol sa yutan-ong tawo, kansang gininhawa anaa sa mga buho sa iyang ilong, kay sa unsang pasukaranan nga siya pagatagdon?”—Isaias 2:19-22.
13 Ang mga ilaga nagpuyo sa mga lungag sa yuta, ug ang mga kabog mopahulay sa mangitngit ug awaaw nga mga langob. Dugang pa, kon ang daghang kabog mopahulay sa usa ka dapit, adunay angso nga baho ug bagang tapok sa tai. Ang pagsalibay sa mga diyosdiyos ngadto nianang mga dapita maoy haom. Ang usa ka dapit nga mangitngit ug mahugaw lamang ang angay nila. Kon bahin sa katawhan, sila mangitag dalangpanan diha sa mga langob ug sa mga giwang sa bato sa adlaw sa paghukom ni Jehova. Busa ang dulnganan sa mga diyosdiyos ug sa ilang mga magsisimba managsama unya. Ingong katumanan sa tagna ni Isaias, ang way-kinabuhing mga diyosdiyos wala makaluwas sa ilang mga magsisimba o sa Jerusalem gikan sa mga kamot ni Nabucodonosor sa 607 W.K.P.
14. Panahon sa umaabot nga adlaw sa paghukom ni Jehova sa tibuok-kalibotang imperyo sa bakak nga relihiyon, unsay pagabuhaton sa mga tawong kalibotanon ug hunahuna?
14 Panahon sa umaabot nga adlaw sa paghukom ni Jehova sa Kakristiyanohan ug sa ubang mga bahin sa tibuok-kalibotang imperyo sa bakak nga relihiyon, unsay buhaton sa mga tawo? Kay nag-atubang sa nagkadaot nga mga kahimtang sa tibuok yuta, ang kinabag-an lagmit makaamgo nga ang ilang mga diyosdiyos walay bili. Puli kanila, sila mahimong mangitag dalangpanan ug panalipod diha sa dili-espirituwal, yutan-ong mga organisasyon, tingali lakip ang Hiniusang Kanasoran, ang “sanag-pulang bulok nga mapintas nga mananap” sa Pinadayag kapitulo 17. Ang “napulo ka sungay” nianang simbolikong mapintas nga mananap mao ang molaglag sa Dakong Babilonya, ang tibuok-kalibotang imperyo sa bakak nga relihiyon, nga ang Kakristiyanohan usa ka dakong bahin niana.—Pinadayag 17:3, 8-12, 16, 17.
15. Sa unsang paagi si Jehova lamang ang “igatuboy” sa iyang adlaw sa paghukom?
15 Bisan kon ang paglaglag ug pagsunog sa Dakong Babilonya mahimong maoy direktang buhat nianang simbolikong napulo ka sungay, kini, sa pagkatinuod, maoy pagpatuman sa paghukom ni Jehova. Mahitungod sa Dakong Babilonya, ang Pinadayag 18:8 nag-ingon: “Mao kana nganong sa usa ka adlaw moabot ang iyang mga hampak, kamatayon ug pagbangotan ug gutom, ug siya bug-os ugdawon pinaagi sa kalayo, tungod kay si Jehova nga Diyos, kinsa naghukom kaniya, kusgan man.” Busa kang Jehova nga Diyos, ang Labing Gamhanan, moadto ang kadungganan sa pagpagawas sa katawhan gikan sa paggahom sa bakak nga relihiyon. Sumala sa giingon ni Isaias, “si Jehova lamang ang igatuboy nianang adlawa. Kay kini mao ang adlaw nga iya ni Jehova sa mga panon.”—Isaias 2:11b, 12a.
‘Ang mga Pangulo Magapasalaag Kaninyo’
16. (a) Unsay mahimong “tukod ug banting” sa usa ka tawhanong katilingban? (b) Sa unsang paagi ang katawhan ni Isaias mag-antos gumikan sa pagkuha sa “tukod ug banting” sa ilang katilingban?
16 Aron ang tawhanong katilingban malig-on, kinahanglang kini adunay “tukod ug banting”—ang mga panginahanglan sama sa pagkaon ug tubig ug, mas hinungdanon, kasaligang mga pangulo nga makagiya sa katawhan ug makahupot sa kahusay sa katilingban. Mahitungod sa karaang Israel, hinunoa, si Isaias nagtagna: “Tan-awa! ang matuod nga Ginoo, si Jehova sa mga panon, nagkuha gikan sa Jerusalem ug gikan sa Juda sa tukod ug banting, sa tibuok tukod nga tinapay ug sa tibuok tukod nga tubig, tawong gamhanan ug manggugubat, maghuhukom ug propeta, ug magtatag-an ug tigulang nga lalaki, pangulo sa kalim-an ug tinahod kaayong tawo ug magtatambag ug batid sa mga kalaki sa salamangka, ug sa hanas nga manglalamat.” (Isaias 3:1-3) Mga batang lalaki lamang ang mahimo unyang mga prinsipe ug magamando sa mapahinaykong paagi. Dili lang mga magmamando ang magdaogdaog sa katawhan kondili “ang katawhan magmalupigon sa usag usa . . . Sila moatake, ang batang lalaki batok sa tigulang nga lalaki, ug ang usa nga dili tinamod batok sa usa nga pagapasidunggan.” (Isaias 3:4, 5) Ang mga bata “moatake” sa ilang mga tigulang, nga walay pagtahod kanila. Timawa kaayo ang kahimtang sa kinabuhi nga ang usa moingon sa lain nga walay katakos sa pagmando: “Ikaw adunay kupo. Ikaw angay nga mahimong diktador kanamo, ug kining mga nangapukan kinahanglang mailalom sa imong kamot.” (Isaias 3:6) Apan ang mga tawong gidapit sa ingon modumili, nga mopugos nga sila walay katakos sa pagtambal sa nasamdan nga yuta ni bahandi sa pag-abaga sa responsibilidad. Moingon sila: “Dili ako mahimong tighunad sa samad; ug sa akong balay walay tinapay ni kupo. Dili gayod kamo magbutang kanako nga diktador sa katawhan.”—Isaias 3:7.
17. (a) Sa unsang diwa ang sayop sa Jerusalem ug Juda “sama nianang sa Sodoma”? (b) Kinsay gibasol ni Isaias tungod sa kahimtang sa iyang katawhan?
17 Si Isaias nagpadayon: “Ang Jerusalem natumba, ug ang Juda napukan, tungod kay ang ilang dila ug ang ilang mga pakiglabot maoy batok kang Jehova, sa paggawi nga masuklanon sa mga mata sa iyang himaya. Ang hitsura mismo sa ilang mga nawong nagpamatuod gayod batok kanila, ug kini nagpadayag labot sa ilang sala nga sama nianang sa Sodoma. Wala nila kini matago. Alaot ang ilang kalag! Kay sila naghatag sa ilang kaugalingon ug kadaotan.” (Isaias 3:8, 9) Ang katawhan sa Diyos nangrebelde batok sa matuod nga Diyos sa pulong ug sa buhat. Bisan ang way-ulaw ug dili-mahinulsolong mga hitsura sa ilang mga nawong nagpadayag sa ilang mga sala, nga dulumtanan sama nianang sa Sodoma. Sila adunay usa ka pakigsaad uban kang Jehova nga Diyos, apan dili niya usbon ang iyang mga sukdanan alang kanila. “Magmaayo ra alang sa usang matarong, kay ilang kan-on ang bunga mismo sa ilang mga pagpakiglabot. Alaot ang daotan!—Katalagman; kay ang pagtratar nga gibuhat sa iyang kaugalingong mga kamot pagabuhaton kaniya! Kon bahin sa akong katawhan, ang mga tighatag ug buluhaton niini nagamapig-oton, ug mga babaye lamang ang nagmando gayod niini. Oh akong katawhan, silang nagatultol kaninyo nagpasalaag kaninyo, ug ang dalan sa inyong mga alagianan ilang gilibog.”—Isaias 3:10-12.
18. (a) Unsang paghukom ang gipahayag ni Jehova diha sa mga ansiyano ug mga prinsipe sa adlaw ni Isaias? (b) Unsang pagtulon-an ang atong makat-onan gikan sa paghukom ni Jehova sa mga ansiyano ug mga prinsipe?
18 Sa mga ansiyano ug sa mga prinsipe sa Juda, si Jehova ‘nagpahamtang sa silot’ ug ‘misulod sa paghukom’: “Inyong giugdaw ang parasan. Ang tinulis gikan sa mga sinakit anaa sa inyong mga balay. Unsay buot ninyong ipasabot nga inyo mang gidugmok ang akong katawhan, ug inyong gigaling ang mga nawong mismo sa mga sinakit?” (Isaias 3:13-15) Inay magbuhat alang sa kaayohan sa katawhan, ang mga pangulo nagbuhat sa malimbongong mga buhat. Giabusohan nila ang ilang awtoridad pinaagi sa pagpadato sa ilang kaugalingon ug paghikaw sa mga kabos ug mga anaa sa kawalad-on. Apan kining maong mga pangulo kinahanglang manubag kang Jehova sa mga panon tungod sa ilang paglupig sa mga sinakit. Pagkatalagsaong pasidaan kini alang niadtong anaa sa mga responsableng katungdanan karon! Hinaot nga sila kanunayng mag-amping nga dili mag-abusar sa ilang awtoridad.
19. Unsang paglupig ug paglutos nga ang Kakristiyanohan sad-an?
19 Ang Kakristiyanohan—ilabina ang iyang klero ug mga kadagkoan—sa malimbongong paagi nakapanag-iyag daghan nga angayng maiya sa ordinaryong katawhan, kinsa gilupigan ug padayong gilupigan niini. Kini usab nagbunal, naglutos, ug nagdagmal sa katawhan sa Diyos ug nagpakaulaw pag-ayo sa ngalan ni Jehova. Sa gitakda niyang panahon, si Jehova tinong molihok aron sa paghukom batok kaniya.
“Usa ka Patik Inay nga Kaanyag”
20. Nganong si Jehova dayag nga nagsaway sa “mga anak nga babaye sa Zion”?
20 Human sa dayag nga pagsaway sa mga pagkadaotan sa mga pangulo, si Jehova miliso ngadto sa mga babaye sa Zion, o Jerusalem. Lagmit nga tungod kay makiurog, “ang mga anak nga babaye sa Zion” nagsul-ob ug “mga kadena sa tiil”—mga gagmayng kadena nga isul-ob sa ilang mga buolbuol—nga mohatag ug mananoy nga tagingting. Gagmayon sa mga babaye ang ilang mga tikang ug molakaw “nga magkiaykiay,” nga nagbansay sa giisip nga nindot, binabayeng linaktan. Unsa bay daotan niana? Mao ang tinamdan sa maong mga babaye. Si Jehova nag-ingon: “Ang mga anak nga babaye sa Zion nahimong mapahitas-on ug sila naglakaw nga pinatikig ang ilang mga liog ug nagpasipat sa ilang mga mata.” (Isaias 3:16) Ang maong pagkamapahitas-on dili makaikyas sa balos.
21. Sa unsang paagi ang paghukom ni Jehova sa Jerusalem nag-apektar sa Hudiyong kababayen-an?
21 Busa, sa pagdangat sa paghukom ni Jehova sa yuta, kining mapahitas-ong “mga anak nga babaye sa Zion” mawad-an sa tanan—bisan sa kaanyag nga ilang gipasigarbog maayo. Si Jehova nagtagna: “Himoon usab ni Jehova nga magnukanuka ang alimpulo sa mga anak nga babaye sa Zion, ug himoon ni Jehova nga modangas ang ilang agtang. Nianang adlawa kuhaon ni Jehova ang katahom sa mga ajorcas ug sa mga pugong sa ulo ug sa mga dayandayan nga pormag-bulan, sa mga ariyos ug sa mga pulseras ug sa mga pandong, sa mga purong ug sa mga kadena sa tiil ug sa mga bangan sa dughan ug sa ‘mga balay sa kalag’ [lagmit mga sudlanag pahumot] ug sa mga pahiyas nga mohugong nga kinhason [o, mga anting-anting], sa mga singsing sa tudlo ug sa mga singsing sa ilong, sa mga besting halangdon ug sa mga pang-ibabaw nga tunika ug sa mga kupo ug sa mga puntil.” (Isaias 3:17-22; tan-awa ang mga potnot.) Pagkamakapasubo nga pagbalit-ad sa kahimtang!
22. Gawas pa sa ilang mga dayandayan, nawad-an ug unsa pa ang mga babaye sa Jerusalem?
22 Ang matagnaong mensahe nagpadayon sa pag-ingon: “Inay lana sa balsamo aduna lamang unyay kaabhong; ug inay nga bakos, usa ka pisi; ug inay sa maartehong pagsudlay sa buhok, pagkaupaw; ug inay mahalong besti, usa ka pagbakos ug sakong panapton; usa ka patik inay nga kaanyag.” (Isaias 3:24) Sa 607 W.K.P., ang garbosang mga babaye sa Jerusalem midangat sa kakabos gikan sa kabahandianon. Sila nawad-an sa ilang kagawasan ug nakadawat sa “usa ka patik” sa kaulipnan.
“Siya Pagakuhaan Gayod sa Tanan”
23. Unsay gimantala ni Jehova mahitungod sa Jerusalem?
23 Sa pagpakigsulti karon ngadto sa siyudad sa Jerusalem, si Jehova nagmantala: “Pinaagi sa espada ang imong kaugalingong mga tawo mapukan, ug ang imong pagkagamhanan pinaagi sa gubat. Ug ang iyang mga ganghaan magbangotan ug magpahayag ug kasubo, ug siya pagakuhaan gayod sa tanan. Siya moyaka sa yuta mismo.” (Isaias 3:25, 26) Ang mga tawo sa Jerusalem, bisan ang iyang mga gamhanan, mamatay sa panggubatan. Ang siyudad mapayhag gayod. Alang sa “iyang mga ganghaan,” kana maoy panahon unya nga “magbangotan ug magpahayag ug kasubo.” Ang Jerusalem “pagakuhaan gayod sa tanan” ug maawaaw.
24. Ang pagkapatay sa mga lalaki pinaagi sa espada may unsang grabeng sangpotanan alang sa mga babaye sa Jerusalem?
24 Ang pagkapatay sa mga lalaki pinaagi sa espada aduna unyay daotang mga sangpotanan alang sa mga babaye sa Jerusalem. Sa pagtapos niining bahina sa iyang matagnaong basahon, si Isaias nagtagna: “Pito ka babaye mogunit sa usa ka lalaki nianang adlawa, nga magaingon: ‘Kami mokaon sa among kaugalingong tinapay ug mosul-ob sa among kaugalingong mga kupo; basta tawgon lamang kami sa imong ngalan aron mawagtang ang among kaulawan.’’’ (Isaias 4:1) Ang kanihit sa minyoonong mga lalaki mograbe kaayo nga ang ubay-ubayng mga babaye motapot sa usa ka lalaki aron tawgon sa iyang ngalan—nga mao, mailhan sa dayag ingong iyang mga asawa—ug sa ingon mahigawas sa kaulawan sa pagkawalay bana. Ang Moisesnong Balaod nagbaod nga ang bana magtaganag pagkaon ug besti alang sa iyang asawa. (Exodo 21:10) Bisan pa niana, sa pag-uyon nga ‘mokaon sa ilang kaugalingong tinapay ug mosul-ob sa ilang kaugalingong mga kupo,’ kining mga bayhana andam magpahigawas sa lalaki gikan sa iyang legal nga mga katungdanan. Pagkadesperadong kahimtang alang sa kaniadto mapahitas-ong “mga anak nga babaye sa Zion”!
25. Unsay mapaabot sa dili na madugay sa mga mapahitas-on?
25 Paubson ni Jehova ang mga mapahitas-on. Sa 607 W.K.P., gihimo gayod niya ang pagkamapahitas-on sa iyang piniling katawhan nga “moyuko” ug gipahinabo nga ang ilang “pagkahataas” mahimong “ubos.” Hinaot ang matuod nga mga Kristohanon dili gayod malimot nga “ginasupak sa Diyos ang mga mapahitas-on, apan siya nagahatag ug dili-takos nga kalulot sa mga mapainubsanon.”—Santiago 4:6.
[Mga Pangutana sa Pagtuon]
[Hulagway sa panid 50]
Ang mga diyosdiyos, bahandi, ug militaryong gahom dili makaluwas sa Jerusalem sa adlaw sa paghukom ni Jehova
[Hulagway sa panid 55]
Sa “adlaw ni Jehova,” ang tibuok-kalibotang imperyo sa bakak nga relihiyon pagalaglagon
