“Walay Molupyo nga Moingon: ‘Ako Masakiton’”
Kapitulo Bayente-sayis
“Walay Molupyo nga Moingon: ‘Ako Masakiton’”
1. Nganong makahupay ang mga pulong sa Isaias 33:24?
‘ANG tanang kalalangan sa tingob nagapadayon pag-agulo ug sa tingob anaa sa kasakit hangtod karon.’ Mao kanay giingon ni apostol Pablo. (Roma 8:22) Bisan pa sa mga kauswagan sa medikal nga siyensiya, ang sakit ug kamatayon nagpadayon sa paghampak sa tawhanong banay. Nan, pagkatalagsaon ang saad nga maoy kinapungkayan niining bahina sa tagna ni Isaias! Tiaw mo na nga usa ka panahon nga “walay molupyo nga moingon: ‘Ako masakiton.’” (Isaias 33:24) Kanus-a ug sa unsang paagi matuman kining saara?
2, 3. (a) Sa unsang paagi masakiton ang nasod sa Israel? (b) Sa unsang paagi ang Asirya nagsilbing “bunal” sa Diyos alang sa pagdisiplina?
2 Si Isaias nagsulat sa usa ka panahon nga ang katawhang may pakigsaad sa Diyos maoy masakiton sa espirituwal. (Isaias 1:5, 6) Naunlod silag maayo sa apostasya ug imoralidad nga nagkinahanglan sila ug bug-at nga disiplina gikan ni Jehova nga Diyos. Ang Asirya nagsilbing “bunal” ni Jehova aron ipahamtang ang disiplina. (Isaias 7:17; 10:5, 15) Nahauna, ang amihanang napulo-ka-tribo nga gingharian sa Israel napukan ngadto sa mga Asiryanhon sa tuig 740 W.K.P. (2 Hari 17:1-18; 18:9-11) Pipila ka tuig sa ulahi, si Haring Senakerib sa Asirya naglansad ug bug-os nga pag-atake sa habagatang gingharian sa Juda. (2 Hari 18:13; Isaias 36:1) Samtang gitadlas sa dili-mabangbang nga Asiryanhong puwersa ang tibuok nasod, ang bug-os nga kalaglagan sa Juda daw dili kalikayan.
3 Apan ang Asirya, kay milapaw sa awtoridad nga gihatag kaniya aron pagdisiplina sa katawhan sa Diyos, niadtong higayona nagtinguha sa pagtuman sa hakog nga tingusbawan niini sa pagbihag sa tibuok kalibotan. (Isaias 10:7-11) Itugot ba ni Jehova nga dili masilotan ang mapintasong pagdagmal niini sa iyang katawhan? Pagaayohon ba unya ang espirituwal nga sakit sa nasod? Sa Isaias kapitulo 33, mabasa nato ang mga tubag ni Jehova niining mga pangutanaha.
Paglaglag sa Maglalaglag
4, 5. (a) Unsang pagbalit-ad ang maagoman sa Asirya? (b) Unsang pag-ampo ang gihimo ni Isaias alang sa katawhan ni Jehova?
4 Ang tagna nagsugod: “Alaot ikaw nga nagalaglag, nga ikaw wala malaglag, ug ikaw nga nagmaluibon, nga wala ang uban magmaluibon kanimo! Sa diha nga ikaw makahuman ingong maglalaglag, ikaw pagalaglagon. Sa diha nga ikaw makahuman sa pagluib, sila magmaluibon kanimo.” (Isaias 33:1) Si Isaias laktod nga nagpakigsulti sa maglalaglag, ang Asirya. Sa pungkay sa gahom niini, maorag walay makapildi nianang makiggubatong nasod. Kini ‘nakalaglag nga wala malaglag,’ nga nanglaglag sa mga siyudad sa Juda, nga naglimas pa sa bahandi sa balay ni Jehova—ug naghimo niana nga maorag wala masiloti! (2 Hari 18:14-16; 2 Cronicas 28:21) Karon, hinuon, mabalit-ad ang kahimtang. “Ikaw pagalaglagon,” maisogong nagpahayag si Isaias. Pagkamakapalipay kining tagnaa alang sa mga matinumanon!
5 Sulod nianang makahahadlok nga panahon, ang maunongong mga magsisimba ni Jehova kinahanglang modangop kaniya alang sa tabang. Sa ingon si Isaias nag-ampo: “Oh Jehova, pakitai kamig pabor. Kanimo kami naglaom. Mahimo kang among bukton [sa kusog ug pagpaluyo] matag buntag, oo, among kaluwasan sa panahon sa kasakit. Sa tingog sa kaguliyang ang mga katawhan nangalagiw. Sa imong pagtindog ang mga nasod natibuagsa.” (Isaias 33:2, 3) Nahiangay, si Isaias nag-ampo nga luwason ni Jehova ang Iyang katawhan sumala sa Iyang nahimo sa daghang higayon sa nangagi. (Salmo 44:3; 68:1) Ug human dayon sa paglitok ni Isaias niining pag-ampo nga gitagna niya ang tubag ni Jehova niana!
6. Unsay mahitabo sa Asirya, ug nganong angay kini?
6 “Ang inyong [ang mga Asiryanhon] mga inagaw sa gubat tigomon sama sa mga uk-ok dihang magatigom, sama sa paghasmag sa mga panon sa dulon nga mohasmag batok sa usa.” (Isaias 33:4) Ang Juda nahibalo sa madinaotong mga paghugpa sa mga dangan. Hinuon, sa maong higayon, ang mga kaaway sa Juda mao ang madaot. Makaagom ang Asirya ug makauulawng kapildihan, ug ang mga sundalo niini mapugos pagkalagiw, nga magbilin ug dakong inagaw aron tigomon sa mga molupyo sa Juda! Angay lamang nga ang Asirya, nga ilado sa pagkamapintason niini, makaagom sa kalaglagan.—Isaias 37:36.
Ang Modernong-Adlaw nga Asiryanhon
7. (a) Kinsa karon ang ikatandi sa masakiton-sa-espirituwal nga nasod sa Israel? (b) Kinsa ang magsilbing “bunal” ni Jehova aron laglagon ang Kakristiyanohan?
7 Sa unsang paagi mapadapat ang tagna ni Isaias sa atong adlaw? Ang masakiton-sa-espirituwal nga nasod sa Israel ikatandi sa dili-matinumanong Kakristiyanohan. Ingon nga gigamit ni Jehova ang Asirya isip “bunal” sa pagsilot sa Israel, busa siya mogamit ug “bunal” sa pagsilot sa Kakristiyanohan—sa nahibiling bahin usab sa tibuok-kalibotang imperyo sa bakak nga relihiyon, ang “Dakong Babilonya.” (Isaias 10:5; Pinadayag 18:2-8) Ang maong “bunal” mao unya ang mga membrong nasod sa Hiniusang Kanasoran—usa ka organisasyong gihulagway diha sa Pinadayag ingon nga pitog-ulo, napulog-sungay, sanag-pula nga mapintas nga mananap.—Pinadayag 17:3, 15-17.
8. (a) Kinsa karon ang ikatandi kang Senakerib? (b) Ang modernong-adlaw nga Senakerib makabatog kaisog aron pag-atake kang kinsa, ug unsay sangpotanan?
8 Inigpanglaglag sa modernong-adlawng Asiryanhon sa tibuok dominyo sa bakak nga relihiyon, mopatim-aw nga dili kini mapugngan. Nga may tinamdan nga sama sa kang Senakerib, si Satanas nga Yawa makabatog kaisog aron moatake—dili lamang batok sa apostatang mga organisasyon nga takos sa silot kondili batok usab sa matuod nga mga Kristohanon. Duyog sa mga nahibilin sa dinihogang espirituwal nga mga anak ni Jehova, ang milyonmilyong nanggula sa kalibotan ni Satanas, nga naglakip sa Dakong Babilonya, nagabarog dapig sa Gingharian ni Jehova. Kay nasuko sa pagdumili sa matuod nga mga Kristohanon sa pagsimba kaniya, “ang diyos niining sistema sa mga butang,” si Satanas, molansad ug bug-os nga pag-atake batok kanila. (2 Corinto 4:4; Ezequiel 38:10-16) Bisan pag tinong makalilisang unya ang maong pag-atake, ang katawhan ni Jehova dili gayod mangurog sa kalisang. (Isaias 10:24, 25) Ang Diyos nagpasalig kanila nga siya mahimong ilang “kaluwasan sa panahon sa kasakit.” Siya mosalga, nga maglaglag kang Satanas ug sa iyang panon. (Ezequiel 38:18-23) Sama sa karaang mga panahon, kadtong mosulay paglaglag sa katawhan sa Diyos pagalaglagon mismo! (Itandi ang Proverbio 13:22b.) Ang ngalan ni Jehova pagabalaanon, ug ang mga makalabang-buhi pagagantihan tungod kay nagtinguhag “kaalam ug kahibalo [ug] ang kahadlok kang Jehova.”—Basaha ang Isaias 33:5, 6.
Usa ka Pasidaan Ngadto sa mga Dili-Matinuohon
9. (a) Unsay buhaton sa “mga bayani” ug “mga mensahero sa pakigdait” sa Juda? (b) Sa unsang paagi mosanong ang Asiryanhon sa mga lakang alang sa kalinaw sa Juda?
9 Apan, unsay dangatan sa mga dili-matinuohon sa Juda? Si Isaias nagpahayag ug makapasubong kahubitan sa ilang umaabot nga kalaglagan diha sa mga kamot sa Asirya. (Basaha ang Isaias 33:7.) Ang militaryong “mga bayani” sa Juda mosinggit sa kahadlok tungod sa pag-abante sa Asiryanhon. Ang “mga mensahero sa pakigdait,” mga pinadala nga gisugo aron makigsabotsabot alang sa kalinaw uban sa makiggubatong mga Asiryanhon, moatubang sa pagtamay ug pagpakaulaw. Motiyabaw sila tungod sa ilang kapakyasan. (Itandi ang Jeremias 8:15.) Ang mapintasong Asiryanhon dili maluoy kanila. (Basaha ang Isaias 33:8, 9.) Sa kawalay-kaluoy dili niya tagdon ang mga pakigsaad nga iyang gihimo uban sa mga molupyo sa Juda. (2 Hari 18:14-16) Ang Asiryanhon ‘magtamay sa mga siyudad’ sa Juda, nga mag-isip kanila nga matamayon ug mayubiton, nga walay pagtahod sa tawhanong kinabuhi. Hilabihan ang kalaglagan nga ang yuta mismo, ingnon ta, magbangotan. Ang Lebanon, Saron, Basan, ug Carmel samang magbangotan tungod sa kalaglagan.
10. (a) Sa unsang paagi ang “mga bayani” sa Kakristiyanohan mahimong walay-pulos? (b) Kinsay manalipod sa tinuod nga mga Kristohanon panahon sa kasakitan sa Kakristiyanohan?
10 Ang susamang mga kahimtang sa walay duhaduha haduol nang mahitabo samtang ang mga nasod mosugod sa ilang pag-atake sa relihiyon. Sama sa adlaw ni Ezequias, makawang unya ang pisikal nga pagsukol sa maong mga puwersa sa paglaglag. Ang “mga bayani” sa Kakristiyanohan—ang mga politiko, mga tigpamuhonan, ug ubang mga tawong may impluwensiya—dili makaduol sa pagtabang kaniya. Ang politikanhon ug pinansiyal nga ‘mga pakigsaad,’ o mga kasabotan, nga gidisenyo aron sa pagpanalipod sa intereses sa Kakristiyanohan pagabungkagon. (Isaias 28:15-18) Mapakyas ang natarantang mga singkamot sa pagpugong sa kalaglagan pinaagig diplomasya. Ang komersiyal nga kalihokan mohunong, kay ang mga propiedad ug mga pamuhonan sa Kakristiyanohan ilogon o gub-on. Si bisan kinsang magmahigalaon pa sa Kakristiyanohan molantaw na lamang sa layolayong distansiya ug magbangotan sa iyang pagkalaglag. (Pinadayag 18:9-19) Malaglag ba ang matuod nga Kristiyanidad duyog sa bakak? Dili, kay si Jehova mismo naghatag niining pasalig: “‘Karon ako motindog,’ nag-ingon si Jehova, ‘karon akong bayawon ang akong kaugalingon; karon akong ipataas ang akong kaugalingon.’” (Isaias 33:10) Sa kataposan, si Jehova mosalga sa kaayohan sa mga matinuohon, sama kang Ezequias, ug pahunongon ang pag-abante sa Asirya.—Salmo 12:5.
11, 12. (a) Kanus-a ug sa unsang paagi matuman ang mga pulong sa Isaias 33:11-14? (b) Ang mga pulong ni Jehova naghatag ug unsang pasidaan alang niining adlawa?
11 Ang mga dili-matinuohon dili makasalig sa maong panalipod. Si Jehova nag-ingon: “Manamkon kamo ug laya nga balili; manganak kamo ug dagami. Ang inyong espiritu mismo, ingon sa kalayo, molamoy kaninyo. Ug ang mga katawhan mahimo gayong sama sa mga sinunog nga apog. Ingong mga sampinit nga pinutol, sila padilaabon sa kalayo. Pamati, kamong anaa sa halayo, kon unsay akong pagabuhaton! Ug hibaloi ninyo, kamong anaa sa haduol, ang akong pagkagamhanan. Sa Zion ang mga makasasala gipanguyawan; ang pagpangurog mihakgom sa mga apostata: ‘Kinsa kanato ang makapuyo sa bisan unsang panahon uban sa nagalamoy nga kalayo? Kinsa kanato ang makapuyo sa bisan unsang panahon uban sa dagkong mga sunog nga malungtaron?’” (Isaias 33:11-14) Kining mga pulonga dayag mapadapat sa panahon sa dihang ang Juda moatubang sa usa ka bag-ong kaaway, ang Babilonya. Sa pagkamatay ni Ezequias, ang Juda mibalik ngadto sa iyang daotang mga panggawi. Latas sa misunod nga pipila ka dekada, ang mga kahimtang sa Juda nadaot sa punto nga ang tibuok nasod makaagom gayod sa kalayo sa kasuko sa Diyos.—Deuteronomio 32:22.
12 Ang daotang mga plano ug mga laraw nga gimugna sa mga masukihon aron mapugngan ang paghukom sa Diyos mahimong walay-pulos sama sa dagami. Ngani, ang mahambogon, masuklanong espiritu sa nasod maghaling gayod sa mga hitabo nga mosangpot sa kalaglagan niini. (Jeremias 52:3-11) Ang mga daotan “mahimo gayong sama sa mga sinunog nga apog”—bug-os nga malaglag! Samtang palandongon nila ang maong umaabot nga paghukom sa kalaglagan, ang masuklanong mga molupyo sa Juda mobatig grabeng kalisang. Ang mga pulong ni Jehova ngadto sa dili-matinumanong Juda naghulagway sa kahimtang sa mga membro sa Kakristiyanohan karon. Kon dili sila mamati sa pasidaan sa Diyos, ang makapasubong umaabot ang nagpaabot kanila.
“Naglakaw sa Mapinadayonong Pagkamatarong”
13. Unsang saad ang gihimo ngadto sa usang “naglakaw sa mapinadayonong pagkamatarong,” ug sa unsang paagi kini natuman sa kahimtang ni Jeremias?
13 Ingon nga katugbang, si Jehova dayon nag-ingon: “Adunay usa nga naglakaw sa mapinadayonong pagkamatarong ug nagsulti kon unsa ang matul-id, nga nagsalikway sa dili-minatarong nga kinitaan gikan sa mga pagpanikas, nga nangwilik sa iyang mga kamot sa dili pagdawat ug hiphip, nga nagsampong sa iyang dalunggan sa dili pagpamati sa pag-ula ug dugo, ug nga nagpiyong sa iyang mga mata aron dili makakita kon unsay daotan. Siya ang usa nga mopuyo sa mga kahitas-an; ang iyang luwas nga hataas nga dapit maoy batoong mga dapit nga lisod duolon. Ang iyang kaugalingong tinapay tinong ihatag kaniya; ang iyang abiyo nga tubig dili mahurot.” (Isaias 33:15, 16) Sumala sa pagpahayag sa ulahi ni apostol Pedro niini, ‘Si Jehova nahibalo kon unsaon sa pagluwas sa katawhan nga may diyosnong pagkamahinalaron gikan sa pagsulay, apan sa pagtagana sa katawhang dili-matarong alang sa adlaw sa paghukom aron pagaputlon.’ (2 Pedro 2:9) Nasinati ni Jeremias ang maong pagluwas. Panahon sa Babilonyanhong pag-atake, ang katawhan ‘nagkaon ug tinapay nga tinimbang ug uban ang kabalaka.’ (Ezequiel 4:16) Ang pipila ka babaye nagkaon gani sa unod sa ilang kaugalingong mga anak. (Lamentaciones 2:20) Bisan pa niana, gitino ni Jehova nga si Jeremias naluwas.
14. Sa unsang paagi ang mga Kristohanon karon makapadayon sa ‘paglakaw sa mapinadayonong pagkamatarong’?
14 Ang mga Kristohanon karon kinahanglan usab nga ‘magalakaw diha sa mapinadayonong pagkamatarong,’ nga sa matag-adlaw magasunod sa mga sukdanan ni Jehova. (Salmo 15:1-5) Kinahanglang sila ‘magasulti kon unsa ang matul-id’ ug magsalikway sa pagbakak ug sa dili-tinuod. (Proverbio 3:32) Ang panikas ug panghiphip tingali kasagaran diha sa daghang nasod, apan kini sila dulumtanan alang sa usang “naglakaw sa mapinadayonong pagkamatarong.” Ang mga Kristohanon kinahanglan usab nga maghupot ug “matinud-anong tanlag” diha sa mga pakiglabot sa patigayon, nga tinuyong molikay sa kuwestiyonable o sinuwitik nga mga paagi. (Hebreohanon 13:18; 1 Timoteo 6:9, 10) Ug ang usa nga ‘nagsampong sa iyang dalunggan gikan sa pagpamati sa pag-ula ug dugo ug nagpiyong sa iyang mga mata aron dili makakita kon unsay daotan’ magmapilion sa iyang musika ug kalingawan. (Salmo 119:37) Sulod sa iyang adlaw sa paghukom, si Jehova manalipod ug maglig-on sa iyang mga magsisimba, kinsa nagkinabuhi sumala sa maong mga sukdanan.—Sofonias 2:3.
Pagkakita sa Ilang Hari
15. Unsang saad ang magpalig-on sa matinumanong Hudiyong mga destiyero?
15 Dayon si Isaias nagpahayag niining madasigong daklit nga pagtan-aw sa umaabot: “Ang imong mga mata makakita sa usa ka hari sa iyang kaambongan; sila makakita ug usa ka yuta sa halayo. Ang imong kasingkasing mopahayag sa hinayng tingog labot sa makalilisang nga butang: ‘Hain ang sekretaryo? Hain ang tigbayad? Hain ang nagaihap sa mga torre?’ Wala kay makitang salbahis nga katawhan, usa ka katawhan nga ang pinulongan labihan ka lawom aron pamatian, sa nagnganga nga dila nga dili nimo masabot.” (Isaias 33:17-19) Ang saad sa umaabot nga Mesiyanikong Hari ug iyang Gingharian mopalig-on sa matinumanong mga Hudiyo panahon sa malaay nga mga dekada sa pagkadestiyero sa Babilonya, bisan pag sila makakita lamang sa maong Gingharian gikan sa halayo. (Hebreohanon 11:13) Sa dihang mahitabo na sa kataposan ang pagmando sa Mesiyas, ang malupigong Babilonyanhong pagmando maoy halayo na sa panumdoman. Ang mga makalabang-buhi sa pag-atake sa Asiryanhon malipayong mangutana: “Hain ang mga opisyal sa maglulupig, kinsa nagpabayad kanamo ug buhis, naningil kanamo, nagkuha sa among tributo?”—Isaias 33:18, Moffatt.
16. Sukad kanus-a nga ang katawhan sa Diyos ‘nakakita’ sa Mesiyanikong Hari, ug unsay resulta?
16 Bisan pag ang mga pulong ni Isaias nagpasalig sa pagpasig-uli gikan sa pagkabihag sa Babilonya, ang tagsatagsa ka nadestiyerong mga Hudiyo magpaabot gayod sa pagkabanhaw aron makatagamtam sa bug-os nga katumanan niining bahina sa tagna. Komosta ba ang mga alagad sa Diyos karon? Sukad sa 1914, ang katawhan ni Jehova ‘nakakita,’ o nakaila, sa Mesiyanikong Hari, si Jesu-Kristo, diha sa iyang bug-os espirituwal nga katahom. (Salmo 45:2; 118:22-26) Ingong resulta, ilang nasinati ang kaluwasan gikan sa pagpanglupig ug paggahom sa daotang sistema ni Satanas. Ubos sa Zion, ang sentro sa Gingharian sa Diyos, sila magtagamtam ug tinuod nga espirituwal nga kasegurohan.
17. (a) Unsang mga saad ang gihimo bahin sa Zion? (b) Sa unsang paagi ang mga saad ni Jehova bahin sa Zion natuman diha sa Mesiyanikong Gingharian ug diha sa mga tigpaluyo niini sa yuta?
17 Si Isaias nagpadayon: “Tan-awa ang Zion, ang lungsod sa atong mga pista! Ang imong mga mata makakita sa Jerusalem nga usa ka puloy-anang dapit nga walay pagkatugaw, usa ka tolda nga walay maghipos. Dili gayod ibton ang mga ugsok sa tolda niini, ug walay usa sa mga pisi niini nga bugtoon. Apan didto, ang Halangdong Usa, si Jehova, alang kanato maoy usa ka dapit sa mga suba, sa halapad nga mga kanal. Walay panon sa mga sakayang ginaoran ang motadlas niini, ug walay halangdong barko ang moagi ibabaw niini.” (Isaias 33:20, 21) Si Isaias nagpasalig kanato nga ang Mesiyanikong Gingharian sa Diyos dili mahimong lukahon o gub-on. Dugang pa, ang maong panalipod tin-awng ipaabot ngadto sa matinumanong mga tigpaluyo sa Gingharian diha sa yuta karon. Bisan pag daghang indibiduwal makaagom ug grabeng mga pagsulay, ang mga ginsakpan sa Gingharian sa Diyos gipasaligan nga walay paningkamot sa paglaglag kanila ingon nga kongregasyon ang mahimong molampos. (Isaias 54:17) Si Jehova magapanalipod sa iyang katawhan sa paaging ang trinsera o kanal magapanalipod sa usa ka siyudad. Ang kaaway nga moabot batok niana—bisan ang usang gamhanan sama sa usa ka “panon sa mga sakayang ginaoran” o usa ka “halangdong barko”—pagalaglagon!
18. Unsang responsabilidad ang gidawat ni Jehova?
18 Apan, nganong ang mga nahigugma sa Gingharian sa Diyos magmasaligon pag-ayo bahin sa panalipod sa Diyos? Si Isaias nagsaysay: “Si Jehova mao ang atong Maghuhukom, si Jehova mao ang atong Maghahatag-lagda, si Jehova mao ang atong Hari; siya mismo magluwas kanato.” (Isaias 33:22) Gidawat ni Jehova ang responsabilidad sa pagpanalipod ug pagtultol sa iyang katawhan, kinsa nag-ila sa iyang posisyon ingong Supremong Soberano. Kini sila masinugtanong nagpasakop sa iyang pagmando pinaagi sa iyang Mesiyanikong Hari, nga nag-ila nga si Jehova adunay awtoridad dili lamang sa paggamag mga balaod kondili sa pagpatuman usab niini. Bisan pa niana, tungod kay si Jehova maoy mahigugmaon sa pagkamatarong ug hustisya, ang iyang pagmando, pinaagi sa iyang Anak, dili usa ka kabug-at alang sa iyang mga magsisimba. Hinunoa, sila ‘makapahimulos sa ilang kaugalingon’ pinaagi sa pagpasakop sa iyang awtoridad. (Isaias 48:17) Siya dili gayod mobiya sa mga maunongon kaniya.—Salmo 37:28.
19. Giunsa pagbatbat ni Isaias ang pagkawalay-pulos sa mga kaaway sa matinumanong katawhan ni Jehova?
19 Giingnan ni Jehova ang mga kaaway sa matinumanong katawhan ni Jehova: “Ang imong mga pisi manglugak; ang ilang palo dili nila pabarogong lig-on; sila wala makabukhad sa layag. Nianang higayona bisan ang daghang inagaw sa gubat pagabahinbahinon; ang mga bakol makakuha gayod ug dakong inagaw.” (Isaias 33:23) Si bisan kinsa nga kaaway nga nagsingabot mahimong walay-pulos ug inutil batok kang Jehova sama sa usa ka barkong iggugubat nga nalugak ang harsiya, nagpalingpaling ang palo, ug walay layag. Ang pagkalaglag sa mga kaaway sa Diyos mosangpot sa hilabihan ka daghang inagaw nga bisan ang mga baldado makaambit sa pagpanguhag inagaw. Busa kita makasalig nga pinaagi ni Haring Jesu-Kristo, si Jehova magmadaogon batok sa iyang mga kaaway sa umaabot nga “dakong kasakitan.”—Pinadayag 7:14.
Pagkaayo
20. Ang katawhan sa Diyos makatagamtam sa unsang matang sa pagpang-ayo, ug kanus-a?
20 Kining bahina sa tagna ni Isaias gitapos sa usa ka makapalipayng saad: “Walay molupyo nga moingon: ‘Ako masakiton.’ Ang katawhan nga nagpuyo sa yuta mao kadtong mga gipasaylo sa ilang kasaypanan.” (Isaias 33:24) Ang sakit nga gihisgotan ni Isaias sa panguna maoy espirituwal, kay kini nalangkit sa sala, o “kasaypanan.” Sa unang pagpadapat niining mga pulonga, si Jehova nagsaad nga sa ilang pagkagawas gikan sa pagkabihag sa Babilonya, ang nasod pagaayohon sa espirituwal nga paagi. (Isaias 35:5, 6; Jeremias 33:6; itandi ang Salmo 103:1-5.) Kay gipasaylo na sa ilang kanhing mga sala, tukoron pag-usab sa namalik nga mga Hudiyo ang maputling pagsimba sa Jerusalem.
21. Sa unsang mga paagi ang mga magsisimba ni Jehova karon nakatagamtam ug espirituwal nga pagkaayo?
21 Bisan pa niana, ang tagna ni Isaias adunay modernong katumanan. Ang katawhan ni Jehova karon nagpahimulos usab ug espirituwal nga pagkaayo. Sila napahigawas na gikan sa bakak nga mga pagtulon-an sama sa pagkadili-mamatay sa kalag, Trinidad, ug impiyernong-kalayo. Sila nagdawat ug moral nga paggiya, nga nagpahigawas kanila gikan sa imoral nga mga buhat ug nagtabang kanila sa paghimog maayong mga desisyon. Ug tungod sa halad lukat ni Jesu-Kristo, sila adunay mahinlong baroganan atubangan sa Diyos ug nagpahimulos ug hinlong konsensiya. (Colosas 1:13, 14; 1 Pedro 2:24; 1 Juan 4:10) Kining espirituwal nga pagkaayo adunay pisikal nga mga benepisyo. Pananglitan, ang paglikay sa imoral nga pakigsekso ug paggamit sa mga produkto sa tabako manalipod sa mga Kristohanon batok sa mga sakit nga ginapasa sa seksuwal nga paagi ug sa pipila ka matang sa kanser.—1 Corinto 6:18; 2 Corinto 7:1.
22, 23. (a) Adunay unsang dakong katumanan ang Isaias 33:24 sa umaabot? (b) Unsay gihukom sa matuod nga mga magsisimba karon?
22 Dugang pa, aduna unyay mas dakong katumanan sa mga pulong sa Isaias 33:24 human sa Armagedon, diha sa bag-ong kalibotan sa Diyos. Ubos sa pagmando sa Mesiyanikong Gingharian, matagamtam sa mga tawo ang dakong pisikal nga pagkaayo duyog sa ilang espirituwal nga pagkaayo. (Pinadayag 21:3, 4) Human dayon sa pagkalaglag sa sistema sa mga butang ni Satanas, ang mga milagro nga sama niadtong gihimo ni Jesus samtang dinhi sa yuta sa walay duhaduha mahitabo sa tibuok yuta. Ang mga buta makakita, ang mga bungol makadungog, ang mga bakol makalakaw! (Isaias 35:5, 6) Kini mopahinabo nga ang tanang makalabang-buhi sa dakong kasakitan makaambit sa dakong buluhaton sa paghimo sa yuta nga paraiso.
23 Sa ulahi, sa pagsugod sa pagkabanhaw, kadtong mabuhi pag-usab sa walay duhaduha pagabanhawon nga may maayong panglawas. Apan samtang ang bili sa halad lukat ipadapat sa inanay nga paagi, mosangpot ang mas daghang pisikal nga mga benepisyo, hangtod ang katawhan mabayaw ngadto sa kahingpitan. Unya, ang mga matarong “mabuhi” sa labing bug-os nga kahulogan. (Pinadayag 20:5, 6) Sa maong panahon, sa espirituwal ug pisikal nga paagi, “Walay molupyo nga moingon: ‘Ako masakiton.’” Pagkakulbahinam nga saad! Hinaot ang tanang matuod nga mga magsisimba karon mohukom nga mahilakip sa mga makatagamtam sa katumanan niini!
[Mga Pangutana sa Pagtuon]
[Hulagway sa panid 344]
Si Isaias masaligong nag-ampo kang Jehova
[Mga hulagway sa panid 353]
Tungod sa halad lukat, ang katawhan ni Jehova adunay mahinlong baroganan sa iyang atubangan
[Hulagway sa panid 354]
Sa bag-ong kalibotan, aduna unyay dakong pisikal nga pagpang-ayo
