Ginatudloan Kita ni Jehova Alang sa Atong Kaayohan
Kapitulo Nuybe
Ginatudloan Kita ni Jehova Alang sa Atong Kaayohan
1. Unsay sanong sa mga maalamon sa mga pulong ni Jehova?
INIGSULTI ni Jehova, sila nga maalamon magpatalinghog uban ang dakong pagtahod ug mosanong sa iyang mga pulong. Ang tanan nga isulti ni Jehova maoy alang sa atong benepisyo, ug siya dulot nga interesado sa atong kaayohan. Pananglitan, makalilipay gayod ang paghunahuna sa paagi sa pagpakigsulti ni Jehova sa iyang karaang katawhang may pakigsaad: “Oh kon ikaw mamati lamang unta gayod sa akong mga sugo!” (Isaias 48:18) Ang napamatud-ang bili sa mga pagtulon-an sa Diyos angay nga magdasig nato nga magpatalinghog kaniya ug mosunod sa iyang paggiya. Ang rekord sa natuman nang tagna magwagtang sa bisan unsang pagduhaduha mahitungod sa hugot nga tinguha ni Jehova sa pagtuman sa iyang mga saad.
2. Alang kang kinsa gisulat ang mga pulong sa Isaias 48, ug kinsa pay makabenepisyo niana?
2 Ang mga pulong sa ika-48 nga kapitulo sa basahon ni Isaias sumala sa ebidensiya gisulat alang sa mga Hudiyo nga nadestiyero sa Babilonya. Dugang pa, kining mga pulonga may mensahe nga kinahanglang tagdon sa mga Kristohanon karong adlawa. Sa Isaias kapitulo 47, ang Bibliya nagtagna sa pagkapukan sa Babilonya. Karon si Jehova nagbatbat kon unsay diha sa iyang hunahuna alang sa Hudiyong mga destiyero sa maong siyudad. Si Jehova nasubo tungod sa pagkasalingkapaw sa iyang piniling katawhan ug sa ilang magahiong pagkawalay-pagtuo sa iyang mga saad. Bisan pa niana, buot niya nga tudloan sila alang sa ilang kaayohan. Iyang nakita daan ang usa ka yugto sa pagdalisay nga mosangko nga mapasig-uli ang matinumanong nahibilin ngadto sa ilang yutang-natawhan.
3. Unsay nakadaot sa pagsimba sa Juda?
3 Pagkalayo na ang pagbulag sa katawhan ni Jehova gikan sa putling pagsimba! Ang unang mga pulong ni Isaias makapahinuklog: “Pamatia kini, Oh balay ni Jacob, kamo nga nagtawag sa inyong kaugalingon sa ngalan sa Israel ug nga migula gikan sa mismong katubigan sa Juda, kamo nga nanumpa sa ngalan ni Jehova ug naghisgot bisan sa Diyos sa Israel, nga dili sa kamatuoran ug dili sa pagkamatarong. Kay ilang gitawag ang ilang kaugalingon ingong gikan sa balaang siyudad, ug sa Diyos sa Israel ilang gisandig ang ilang kaugalingon, nga Jehova sa mga panon ang iyang ngalan.” (Isaias 48:1, 2) Pagkasalingkapaw! Ang ‘pagpanumpa sa ngalan ni Jehova’ tin-aw nga maoy paggamit lamang sa ngalan sa Diyos diha sa pormalistikong paagi. (Sofonias 1:5) Sa wala pa sila madestiyero sa Babilonya, ang mga Hudiyo nagsimba kang Jehova diha sa “balaang siyudad,” ang Jerusalem. Apan ang ilang pagsimba dili sinsero. Ang ilang mga kasingkasing halayo gikan sa Diyos, ug ang ilang mga buhat sa pagsimba maoy “dili sa kamatuoran ug dili sa pagkamatarong.” Wala nila mabatoni ang pagtuo sa mga patriarka.—Malaquias 3:7.
4. Unsang matanga sa pagsimba ang makapahimuot kang Jehova?
4 Ang mga pulong ni Jehova magpahinumdom kanato nga ang pagsimba angayng dili usa ka rutina. Kinahanglan nga kinasingkasing kini. Ang aron-ingnon lang nga pag-alagad—tingali gihimo aron magpahimuot o magpadayeg sa uban—dili maoy “mga buhat sa diyosnong pagkamahinalaron.” (2 Pedro 3:11) Ang pagtawag sa usa ka tawo sa iyang kaugalingon nga usa ka Kristohanon dili mismo maghimo sa iyang pagsimba nga dalawaton sa Diyos. (2 Timoteo 3:5) Hinungdanon ang pag-ila nga naglungtad si Jehova, apan sinugdanan lamang kini. Buot ni Jehova ang pagsimba nga bug-os kalag ug dinasig sa halalom nga gugma ug apresasyon.—Colosas 3:23.
Pagtagna ug Bag-ong mga Butang
5. Unsa ang pipila sa “unang mga butang” nga gitagna ni Jehova?
5 Gikinahanglan tingali nga pukawon ang panumdoman niadtong mga Hudiyo sa Babilonya. Busa, si Jehova sa makausa pa nagpahinumdom kanila nga siya mao ang Diyos sa matuod nga tagna: “Ang unang mga butang nga akong gisulti bisan sukad sa maong panahon, ug gikan sa akong kaugalingong baba kini sila migula, ug ako nagpadayon sa pagpadungog niini. Sa kalit milihok ako, ug ang mga butang nangabot.” (Isaias 48:3) “Ang unang mga butang” mao ang mga butang nga nahimo na sa Diyos, sama sa pagpagawas sa mga Israelinhon gikan sa Ehipto ug sa paghatag kanila sa Yutang Saad ingong usa ka panulondon. (Genesis 13:14, 15; 15:13, 14) Ang maong mga tagna nagagula gikan sa baba sa Diyos; kana naggikan sa Diyos. Gipahinabo sa Diyos nga makadungog ang mga tawo sa iyang mga balaod, ug ang ilang madunggan angayng magdasig kanila nga magmasinugtanon. (Deuteronomio 28:15) Sa hinanali siya molihok aron buhaton kon unsay iyang gitagna. Ang kamatuoran nga si Jehova maoy Labing Gamhanan magtino nga ang iyang katuyoan matuman.—Josue 21:45; 23:14.
6. Sa unsang gidak-on ang mga Hudiyo nahimong “gahian ug masuklanon”?
6 Ang katawhan ni Jehova nahimong “gahian ug masuklanon.” (Salmo 78:8) Siya prangkang nagsulti kanila: “Ikaw matig-a ug . . . ang imong liog maoy usa ka ugat nga puthaw ug ang imong agtang maoy tumbaga.” (Isaias 48:4) Sama sa mga metal, ang mga Hudiyo dili monunot—dili mopahiuyon. Usa kana ka hinungdan nga si Jehova magpadayag sa mga butang sa dili pa sila mahitabo. Kay kon dili, mahitungod sa mga butang nga nahimo ni Jehova ang iyang katawhan moingon: “Ang akong idolo ang naghimo kanila, ug ang akong linilok nga larawan ug ang akong inumol nga larawan ang nagsugo kanila.” (Isaias 48:5) Aduna ba unyay epekto ang ginasulti ni Jehova karon diha sa dili-matinumanong mga Hudiyo? Ang Diyos nag-ingon kanila: “Imong nadungog. Tan-awa kining tanan. Kon bahin kaninyo, dili ba ninyo isulti kini? Akong gipadungog kaninyo ang bag-ong mga butang sukad karon, bisan ang mga butang nga gitipigan, nga wala ninyo mahibaloi. Sa pagkakaron sila pagalalangon, ug dili sukad nianang panahona, bisan ang mga butang nga wala nimo madungog sa wala pa kining adlawa, aron dili ka moingon, ‘Tan-awa! Ako nang nahibaloan kini sila.’”—Isaias 48:6, 7.
7. Unsay kinahanglang pagailhon sa nadestiyerong mga Hudiyo, ug unsa ang ilang madahom?
7 Abante kaayong gisulat ni Isaias ang tagna bahin sa pagkapukan sa Babilonya. Ingon nga mga destiyero karon sa Babilonya, ang mga Hudiyo matagnaong gisugo nga palandongon ang katumanan sa tagna. Ikapanghimakak ba nila nga si Jehova mao ang Diyos sa natumang tagna? Ug sanglit nakakita ug nakadungog ang mga molupyo sa Juda nga si Jehova mao ang Diyos sa kamatuoran, dili ba angay nga sila magpahayag usab sa maong kamatuoran ngadto sa uban? Ang gipadayag nga pulong ni Jehova nagtagna ug bag-ong mga butang nga wala pa mahitabo, sama sa pagbihag ni Ciro sa Babilonya ug sa pagpagawas sa mga Hudiyo. (Isaias 48:14-16) Ang maong makapakurat nga mga panghitabo nahitabo nga kalit ug wala damha. Walay usa nga abanteng makakita niana pinaagi sa pagpalandong lamang sa nagakaugmad nga mga kahimtang sa kalibotan. Kana nahitabo nga walay dayag nga hinungdan. Kinsay nagpahinabo nianang mga panghitaboa? Sanglit gitagna kini ni Jehova nga abanteg mga 200 ka tuig, ang tubag dayag.
8. Unsang bag-ong mga butang ang gilaoman sa mga Kristohanon karong adlawa, ug nganong sila adunay bug-os nga pagsalig sa matagnaong pulong ni Jehova?
8 Dugang pa, tumanon ni Jehova ang iyang pulong sumala sa iyang kaugalingong eskedyul. Ang nangatuman nga mga tagna magapamatuod sa iyang pagka-Diyos dili lamang alang sa mga Hudiyo sa karaang mga panahon kondili alang usab sa mga Kristohanon karong adlawa. Ang talaan sa daghang tagna nga nangatuman sa nangagi—“ang unang mga butang”—maoy pasalig nga ang bag-ong mga butang nga gisaad ni Jehova—ang umaabot nga “dakong kasakitan,” ang paglabang-buhi sa “usa ka dakong panon” latas sa maong kasakitan, ang “bag-ong yuta,” ug daghan pa kaayo—pagatumanon pa. (Pinadayag 7:9, 14, 15; 21:4, 5; 2 Pedro 3:13) Ang maong pasalig modasig sa mga tawong may matarong nga kasingkasing karong adlawa nga mosulting masiboton mahitungod kaniya. Ang ilang mga pagbati mahisama sa iya sa salmista, kinsa miingon: “Akong gipahayag ang maayong balita sa pagkamatarong diha sa dakong kongregasyon. Tan-awa! Ang akong mga ngabil wala ko pugngi.”—Salmo 40:9.
Si Jehova Nagpugong sa Kaugalingon
9. Sa unsang paagi ang nasod sa Israel nahimong “malapason gikan pa sa tiyan”?
9 Ang pagkawalay-pagtuo sa mga Hudiyo sa mga tagna ni Jehova nagpugong kanila sa pagpamati sa iyang mga pasidaan. Kana ang hinungdan nga siya nagpadayon sa pag-ingon kanila: “Dugang pa, wala nimo madungog, ni imong nahibaloan, ni sukad nianang panahona nabuksan ang imong igdulungog. Kay ako nahibalo pag-ayo nga ikaw nagpadayon gayod sa pagpakiglabot nga malipoton, ug usa ka ‘malapason gikan pa sa tiyan’ ikaw gitawag.” (Isaias 48:8) Ang Juda wala mamati sa makalilipay nga mga balita ni Jehova. (Isaias 29:10) Ang paggawi sa katawhang may pakigsaad sa Diyos nagpakita nga ang nasod “malapason gikan pa sa tiyan.” Sukad sa pagkahimugso niini ug sa tibuok niining kasaysayan, ang nasod sa Israel nakaugmad ug rekord sa pagkamasuklanon. Ang paglapas ug pagluib maoy nabatasang mga sala sa katawhan, dili lang panagsang mga sala.—Salmo 95:10; Malaquias 2:11.
10. Nganong si Jehova magapugong sa iyang kaugalingon?
10 Nahanaw ba ang tanang paglaom? Wala. Bisan pag ang Juda nahimong masuklanon ug malipoton, si Jehova kanunayng matinud-anon ug matinumanon. Alang sa kadungganan sa iyang kaugalingong dakong ngalan, limitahan niya ang pagbubo sa iyang kapungot. Siya nag-ingon: “Tungod sa akong ngalan pugngan ko ang akong kasuko, ug alang sa akong kadayeganan pugngan ko ang akong kaugalingon labot kanimo aron dili ka pagalaglagon.” (Isaias 48:9) Pagkalahi! Ang katawhan ni Jehova, ang Israel ug Juda, wala magmatinumanon kaniya. Apan balaanon ni Jehova ang iyang ngalan, nga magagawi sa paagi nga magdalag pagdayeg ug kadungganan niini. Tungod niini, dili niya laglagon ang iyang piniling katawhan.—Joel 2:13, 14.
11. Nganong dili itugot sa Diyos nga bug-os malaglag ang iyang katawhan?
11 Ang mga tawong may matarong nga kasingkasing taliwala sa nadestiyerong mga Hudiyo nahigmata tungod sa pagbadlong sa Diyos ug nagmatinguhaon sa pagpamati sa iyang mga pagtudlo. Nianang mga tawhana labing mapasaligon ang mosunod nga pagpahayag: “Tan-awa! Gidalisay ko ikaw, apan dili ingong plata. Gipili ko ikaw diha sa tunawanang hudno sa kasakitan. Tungod sa akong kaugalingon, tungod sa akong kaugalingon ako molihok, kay motugot ba ang usa nga siya panamastamasan? Ug dili ko ihatag ang akong kaugalingong himaya kang bisan kinsa.” (Isaias 48:10, 11) Ang masulayong pait nga mga kasinatian—samag diha sa “hudno sa kasakitan”—nga gitugot ni Jehova nga modangat sa iyang katawhan nagsulay ug nagdalisay kanila, nga nagpadayag kon unsay anaa sa ilang mga kasingkasing. Ang susamang butang nahitabo kasiglohang sayosayo sa dihang si Moises miingon ngadto sa ilang mga katigulangan: ‘Ikaw gipalakat ni Jehova nga imong Diyos niining kap-atan ka tuig sa kamingawan, aron sa pagpaubos kanimo, sa pagbutang kanimo sa pagsulay aron mahibaloan kon unsa ang anaa sa imong kasingkasing.’ (Deuteronomio 8:2) Bisan pa sa ilang masuklanong tinamdan, si Jehova wala maglaglag sa nasod niadtong panahona, ug sa maong panahon siya dili bug-os nga maglaglag sa nasod. Sa ingon nga paagi ang iyang ngalan ug kadungganan mahituboy. Kon ang iyang katawhan malaglag diha sa mga kamot sa mga Babilonyanhon, mahimong wala siya magtuman sa iyang pakigsaad ug mapanamastamasan ang iyang ngalan. Mopatim-aw nga ang Diyos sa Israel daw walay gahom sa pagluwas sa iyang katawhan.—Ezequiel 20:9.
12. Sa unsang paagi ang matuod nga mga Kristohanon nadalisay panahon sa unang gubat sa kalibotan?
12 Sa modernong mga panahon usab, ang katawhan ni Jehova kinahanglan nga dalisayon. Sa sayong mga adlaw sa ika-20ng siglo, daghan sa gamayng pundok sa mga Estudyante sa Bibliya nag-alagad sa Diyos gumikan sa sinserong tinguha sa pagpahimuot kaniya, apan ang pipila may daotang mga motibo, sama sa tinguha sa pagkainila. Sa dili pa makapanguna kadtong gamayng pundok sa tibuok-kalibotang pagwali sa maayong balita nga gitagna alang sa panahon sa kataposan, sila kinahanglang hinloan. (Mateo 24:14) Ang manalagnang si Malaquias eksaktong nagtagna nga ang maong buhat sa pagdalisay pagahimoon maylabot sa pag-anha ni Jehova sa iyang templo. (Malaquias 3:1-4) Ang iyang mga pulong natuman sa 1918. Ang matuod nga mga Kristohanon nakaagi sa usa ka yugto sa kalayonhong pagsulay sa kinainitang bahin sa unang gubat sa kalibotan ug ang maong pagsulay misangko sa pagkabilanggo ni Joseph F. Rutherford, ang presidente niadto sa Watch Tower Society, ug sa pipila sa pangunang opisyales niini. Kadtong sinserong mga Kristohanon nakabenepisyo gikan sa pag-agi sa proseso sa pagdalisay. Sila migula sa Gubat sa Kalibotan I nga labawng matinguhaon kay sukad masukad nga moalagad sa ilang dakong Diyos sa bisan unsang paagi nga girekomendar niya.
13. Unsay pagsanong sa katawhan ni Jehova sa paglutos sa mga tuig sukad sa unang gubat sa kalibotan?
13 Sukad niadtong mga adlawa, ang mga Saksi ni Jehova sublisubling nag-atubang sa labing mapintasong mga matang sa paglutos. Wala kini makapaduhaduha nila sa pulong sa ilang Maglalalang. Sa kapulihay, ilang gimatikdan ang mga pulong ni apostol Pedro ngadto sa gilutos nga mga Kristohanon sa iyang adlaw: “Kamo naguol sa nagkadaiyang mga pagsulay, aron nga ang sinulayang kalidad sa inyong pagtuo . . . makaplagan nga usa ka hinungdan sa pagdayeg ug himaya ug dungog sa pagpadayag ni Jesu-Kristo.” (1 Pedro 1:6, 7) Ang grabeng paglutos dili makabungkag sa integridad sa matuod nga mga Kristohanon. Hinunoa, kini magpadayag sa kaputli sa ilang mga motibo. Modugang kini sa sinulayang kalidad nganha sa ilang pagtuo ug magpadayag sa giladmon sa ilang pagkamahinalaron ug gugma.—Proverbio 17:3.
‘Ako ang Una, Ako ang Ulahi’
14. (a) Sa unsang paagi si Jehova “ang una” ug “ang ulahi”? (b) Unsang gamhanang mga buhat ang nahimo ni Jehova pinaagi sa iyang “kamot”?
14 Karon si Jehova madasigong mihangyo sa iyang katawhang may pakigsaad: “Pamati kanako, Oh Jacob, ug ikaw Israel nga akong tinawag. Ako mao gihapon Siya. Ako ang una. Ako usab ang ulahi. Dugang pa, ang akong kamot nagpahimutang sa patukoranan sa yuta, ug ang akong tuong kamot nagbuklad sa kalangitan. Ako nagtawag kanila, aron sila magpadayon sa pagbarog nga tingob.” (Isaias 48:12, 13) Lahi sa tawo, ang Diyos maoy dumalayon ug dili mausab. (Malaquias 3:6) Sa Pinadayag, si Jehova nagpahayag: “Ako mao ang Alfa ug ang Omega, ang una ug ang ulahi, ang sinugdan ug ang kataposan.” (Pinadayag 22:13) Una kang Jehova walay labing gamhanang Diyos ug walay mosunod kaniya. Siya mao ang Supremo ug Dumalayon, ang Maglalalang. Ang iyang “kamot”—iyang gigamit nga gahom—nagtukod sa yuta ug nag-inat sa bituonong kalangitan. (Job 38:4; Salmo 102:25) Inigtawag niya sa iyang mga linalang, sila andam moalagad kaniya.—Salmo 147:4.
15. Sa unsang paagi ug sa unsang katuyoan nga si Jehova “nahigugma” kang Ciro?
15 Ang usa ka maugdang nga imbitasyon gipahayag ngadto sa mga Hudiyo ug sa mga dili-Hudiyo: “Magtapok kamong tanan, ug patalinghog. Kinsa taliwala kanila ang nagsaysay niining mga butanga? Si Jehova nahigugma kaniya. Iyang buhaton sa Babilonya kon unsa ang iyang gikahimut-an, ug ang iyang bukton anha unya sa mga Caldeanhon. Ako—ako maoy nagsulti. Dugang pa, akong gitawag siya. Akong gidala siya sa sulod, ug himoon nga malamposon ang iyang dalan.” (Isaias 48:14, 15) Si Jehova lamang ang gamhanan sa tanan ug tukmang makatagna sa mga panghitabo. Walay mausa “kanila,” ang way-pulos nga mga diyosdiyos, ang makaarang sa pagsulti niining mga butanga. Si Jehova, dili mga diyosdiyos, ang “nahigugma kaniya,” kang Ciro—nga mao, si Jehova nagpili kaniya alang sa usa ka tino nga katuyoan. (Isaias 41:2; 44:28; 45:1, 13; 46:11) Nakita niyang daan ang pagtungha ni Ciro sa entablado sa kalibotan ug nagpili kaniya ingong umaabot nga magpupukan sa Babilonya.
16, 17. (a) Nganong ikaingon nga ang Diyos wala maghatag sa iyang mga tagna sa tago? (b) Sa unsang paagi si Jehova nagmantala sa iyang mga katuyoan karong adlawa?
16 Sa madapitong tono, si Jehova nagpadayon: “Duol kamo kanako. Pamatia kini. Sukad sa sinugdan ako nagsulti dili gayod diha sa tagoanang dapit. Sukad sa panahon sa pagkahitabo niini ako dinha na.” (Isaias 48:16a) Ang mga tagna gikan ni Jehova wala ihatag sa tago o ipahibalo lamang sa pipila ka bag-ohan. Ang mga manalagna ni Jehova maoy prangkang mga tigpahayag alang sa Diyos. (Isaias 61:1) Sa dayag sila nagpahayag sa kabubut-on sa Diyos. Pananglitan, ang mga panghitabo nga may kalangkitan ni Ciro dili kay bag-o sa Diyos o wala niya makitang daan. Mga 200 ka tuig nga abante, ang Diyos nagtagna niana sa dayag pinaagi ni Isaias.
17 Sa samang paagi karong adlawa, dili isekreto ni Jehova ang iyang mga katuyoan. Ang milyonmilyong tawo diha sa ginatos ka kayutaan ug kapuloan sa dagat nagmantala diha sa balay-balay, sa kadalanan, ug sa bisan diin pa nga ilang maarangan sa pasidaan bahin sa umaabot nga kataposan niining sistema sa mga butang ug sa maayong balita sa mga panalangin nga moabot ilalom sa Gingharian sa Diyos. Sa pagkamatuod, si Jehova maoy Diyos nga magpahibalo sa iyang mga katuyoan.
‘Pamati sa Akong mga Sugo!’
18. Unsa ang tinguha ni Jehova alang sa iyang katawhan?
18 Kay gihatagag katakos sa espiritu ni Jehova, ang manalagna nagpahayag: “Ang Soberanong Ginoong Jehova mismo nagpadala kanako, bisan sa iyang espiritu. Mao kini ang giingon ni Jehova, ang imong Manlulukat, ang Balaang Usa sa Israel: ‘Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.’” (Isaias 48:16b, 17) Kining mahigugmaong pagpahayag sa pagkamatinagdanon ni Jehova angayng magpasalig sa nasod sa Israel nga ang Diyos magaluwas kanila gikan sa Babilonya. Siya mao ang ilang Manlulukat. (Isaias 54:5) Ang kinasingkasing nga tinguha ni Jehova mao nga ikapasig-uli sa mga Israelinhon ang ilang relasyon uban kaniya ug tagdon ang iyang mga sugo. Ang matuod nga pagsimba gipasukad sa pagkamasinugtanon sa mga instruksiyon sa Diyos. Ang mga Israelinhon dili makalakaw sa hustong dalan gawas kon tudloan sila sa ‘dalan nga pagalaktan.’
19. Unsang kinasingkasing nga hangyo ang gihimo ni Jehova?
19 Ang tinguha ni Jehova nga makalikay sa katalagman ug magkalipay sa kinabuhi ang iyang katawhan gipahayag sa maanindot nga paagi: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.” (Isaias 48:18) Kinasingkasing gayod nga hangyo gikan sa labing gamhanan nga Maglalalang! (Deuteronomio 5:29; Salmo 81:13) Inay makasinati sa pagkabihag, ang mga Israelinhon makatagamtam ug kalinaw nga dagaya kaayo sama sa tubig nga nagaagos sa usa ka suba. (Salmo 119:165) Ang ilang mga buhat sa pagkamatarong mahimong di-maihap sama sa mga balod sa dagat. (Amos 5:24) Ingon nga interesado kaayo kanila, si Jehova mihangyo sa mga Israelinhon, nga mahigugmaong nagpakita kanila sa dalan nga angay nilang pagalaktan. Oh, kon unta magpatalinghog sila!
20. (a) Unsa ang tinguha sa Diyos alang sa Israel bisan pa sa ilang pagkamasuklanon? (b) Unsay atong makat-onan bahin kang Jehova gikan sa iyang mga pagpakiglabot sa iyang katawhan? (Tan-awa ang kahon sa panid 133.)
20 Unsang mga panalangin ang moabot kon maghinulsol ang Israel? Si Jehova nag-ingon: “Ang imong kaliwat mahimong sama gayod sa balas, ug ang mga kaliwat gikan sa imong kahiladmang mga bahin sama sa mga lugas niini. Ang ngalan sa usa dili putlon o laglagon gikan sa akong atubangan.” (Isaias 48:19) Si Jehova nagpahinumdom sa katawhan bahin sa iyang saad nga ang binhi ni Abraham modaghan, “sama sa mga bituon sa kalangitan ug sama sa mga lugas sa balas nga anaa sa baybayon.” (Genesis 22:17; 32:12) Bisan pa niana, ang maong mga kaliwat ni Abraham nagmasuklanon, ug sila walay katungod sa pagdawat sa katumanan sa saad. Sa pagkatinuod, daotan kaayo ang ilang rekord nga sumala sa kaugalingong Balaod ni Jehova, takos putlon ang ilang ngalan ingong usa ka nasod. (Deuteronomio 28:45) Sa gihapon, wala tinguhaa ni Jehova ang pagkapuo sa iyang katawhan, ug dili niya buot nga bug-os silang biyaan.
21. Unsang mga panalangin ang atong masinati karong adlawa kon tinguhaon nato ang pagtudlo ni Jehova?
21 Ang mga prinsipyong nasulod niining gamhanang kasulatan mapadapat sa mga magsisimba ni Jehova karong adlawa. Si Jehova mao ang Tuboran sa kinabuhi, ug siya mas nahibalo kay kang bisan kinsa kon unsaon nato paggamit ang atong mga kinabuhi. (Salmo 36:9) Siya naghatag kanatog mga latid, dili aron hikawan kita sa kalipay, kondili sa paghatag kanatog kaayohan. Ang matuod nga mga Kristohanon mosanong pinaagi sa pagtinguha nga tudloan ni Jehova. (Miqueas 4:2) Ang iyang mga kalagdaan magapanalipod sa atong espirituwalidad ug sa atong relasyon uban niya, ug kini magapanalipod kanato gikan sa makapadaot nga impluwensiya ni Satanas. Sa dihang mapabilhan nato ang mga prinsipyo luyo sa mga balaod sa Diyos, atong masabtan nga si Jehova nagtudlo kanato alang sa atong kaayohan. Makaamgo kita nga “ang iyang mga sugo dili mabug-at.” Ug kita dili pagalaglagon.—1 Juan 2:17; 5:3.
‘Gula Gikan sa Babilonya!’
22. Ang matinumanong mga Hudiyo giawhag sa pagbuhat sa unsa, ug unsang mga pagpasalig ang gihatag kanila?
22 Sa dihang mapukan ang Babilonya, may mga Hudiyo ba nga magpadayag sa matarong nga kahimtang sa kasingkasing? Pahimuslan ba nila ang pagluwas sa Diyos, mobalik sa ilang yutang-natawhan, ug ipasig-uli ang maputling pagsimba? Oo. Ang sunod nga mga pulong ni Jehova magpakita sa iyang pagsalig nga kini mahitabo. “Gula kamo gikan sa Babilonya! Dagan kamo palayo sa mga Caldeanhon. Ipahayag uban ang hugyaw sa kalipay, himoa kining madungog. Paabta kini hangtod sa kinatumyan sa yuta. Isulti: ‘Si Jehova naglukat sa iyang alagad nga si Jacob. Ug sila wala uhawa dihang siya nagpalakaw kanila bisan agi sa nagun-ob nga mga dapit. Ang tubig gikan sa bato iyang gipaagay alang kanila, ug iyang gipikas ang bato aron ang tubig mobuhagay.’” (Isaias 48:20, 21) Ang katawhan ni Jehova sa matagnaon giawhag nga mopahawa sa Babilonya sa walay langan. (Jeremias 50:8) Ang pagtubos kanila kinahanglang ipahibalo ngadto sa mga kinatumyan mismo sa yuta. (Jeremias 31:10) Human sa Exodo gikan sa Ehipto, gitagana ni Jehova ang mga panginahanglan sa iyang katawhan samtang nagbaktas sila sa desyertong kayutaan. Sa susama, siya magtagana alang sa iyang katawhan sa ilang pagpauli gikan sa Babilonya.—Deuteronomio 8:15, 16.
23. Kinsay dili makatagamtam sa hinatag-sa-Diyos nga kalinaw?
23 Adunay laing bililhong prinsipyo nga kinahanglang hinumdoman sa mga Hudiyo kon bahin sa mga buhat sa pagluwas ni Jehova. Ang mahiligon sa pagkamatarong tingali mag-antos tungod sa ilang mga sala, apan sila dili laglagon. Hinuon, alang sa dili-matarong kini maoy lahi. “‘Walay kalinaw,’ si Jehova nag-ingon, ‘alang sa mga daotan.’” (Isaias 48:22) Ang dili-mahinulsolong mga makasasala dili makadawat sa kalinaw nga gitagana sa Diyos alang niadtong nahigugma kaniya. Ang mga buhat sa pagluwas wala itagana alang sa magahiong mga daotan o sa mga dili motuo. Ang maong mga buhat maoy alang lamang niadtong adunay pagtuo. (Tito 1:15, 16; Pinadayag 22:14, 15) Ang kalinaw gikan sa Diyos wala mapanag-iya sa mga daotan.
24. Unsay nagdalag pagmaya sa katawhan sa Diyos sa modernong kapanahonan?
24 Sa 537 W.K.P., ang higayon sa pagbiya sa Babilonya nagdalag dakong kalipay alang sa matinumanong mga Israelinhon. Sa 1919 ang pagkagawas sa katawhan sa Diyos gikan sa pagkabihag sa Babilonya misangpot sa pagmaya sa ilang bahin. (Pinadayag 11:11, 12) Nahupong sila sa paglaom, ug gipahimuslan nila ang higayon nga pauswagon ang ilang kalihokan. Tinuod, ang kaisog gikinahanglan aron pahimuslan niadtong gamayng pundok sa mga Kristohanon ang bag-ong mga kahigayonan sa pagwali diha sa masupakong kalibotan. Apan sa tabang ni Jehova, ilang giatiman ang buluhatong pagwali sa maayong balita. Ang kasaysayan nagpamatuod nga sila gipanalanginan ni Jehova.
25. Nganong hinungdanon ang pagtagad pag-ayo sa matarong nga mga lagda sa Diyos?
25 Kining bahina sa tagna ni Isaias nagpasiugda nga si Jehova nagtudlo kanato alang sa atong kaayohan. Hinungdanon kaayo ang pagtagad pag-ayo sa matarong nga mga lagda sa Diyos. (Pinadayag 15:2-4) Kon pahinumdoman nato ang atong kaugalingon sa kaalam ug gugma sa Diyos, kini motabang kanato nga magpahiuyon sa kon unsay ginasulti ni Jehova nga maoy matarong. Ang tanan niyang sugo maoy alang sa atong kaayohan.—Isaias 48:17, 18.
[Mga Pangutana sa Pagtuon]
[Kahon/Mga hulagway sa panid 133]
Ang Labing Gamhanang Diyos Nagpugong sa Iyang Kaugalingon
“Pugngan ko ang akong kasuko . . . pugngan ko ang akong kaugalingon,” giingnan ni Jehova ang apostatang mga Israelinhon. (Isaias 48:9) Ang maong mga pagpahayag motabang nato sa pagkasabot nga ang Diyos naghatag ug hingpit nga panig-ingnan bahin sa dili gayod pag-abusar sa gahom. Tinuod nga walay usa nga mas gamhanan kay sa Diyos. Kana ang hinungdan nga atong gitawag siya nga gamhanan-sa-tanan, ang makagagahom-sa-tanan. Tukmang gipadapat niya sa iyang kaugalingon ang titulong “Labing Gamhanan.” (Genesis 17:1) Dili lang kay siya adunay way-kinutobang kusog kondili iyang nabatonan ang tanang awtoridad tungod sa iyang posisyon ingon nga Soberanong Ginoo sa uniberso, nga iyang gilalang. Kana ang hinungdan nga walay makapangahas sa pagpugong sa iyang kamot o sa pag-ingon kaniya, “Unsa ang imong ginabuhat?”—Daniel 4:35.
Bisan pa niana, ang Diyos mahinay sa kasuko bisan pag gikinahanglang ipahayag niya ang iyang gahom batok sa iyang mga kaaway. (Nahum 1:3) Si Jehova ‘makapugong sa iyang kasuko’ ug tukmang gibatbat ingon nga “mahinay sa kasuko” tungod kay ang gugma—dili ang kasuko—mao ang iyang nagpatigbabaw nga hiyas. Ang iyang kasuko, sa dihang ipahayag, kanunayng matarong, kanunayng makataronganon, kanunayng kontrolado.—Exodo 34:6; 1 Juan 4:8.
Nganong nagalihok si Jehova niining paagiha? Tungod kay siya hingpit nga nagatimbang sa iyang kinalabwang gahom uban sa iyang tulo ka ubang pangunang mga hiyas—ang kaalam, hustisya, ug gugma. Ang iyang paggamit sa gahom kanunayng nahiuyon niining ubang mga hiyas.
[Hulagway sa panid 123]
Ang mensahe ni Isaias bahin sa pagpasig-uli naghatag ug silaw sa paglaom alang sa nadestiyero nga matinumanong mga Hudiyo
[Mga hulagway sa panid 124]
Ang mga Hudiyo may kiling nga ipasidungog ang mga buhat ni Jehova ngadto sa mga diyosdiyos
1. Ishtar 2. Kinulit nga dayandayan nga ginama sa pinasinawng tisa gikan sa Dalan sa Prosesyon sa Babilonya 3. Dragon nga simbolo ni Marduk
[Hulagway sa panid 127]
Ang “hudno sa kasakitan” makapadayag kon putli ba ang atong mga motibo sa pag-alagad kang Jehova
[Mga hulagway sa panid 128]
Ang matuod nga mga Kristohanon nag-atubang sa labing mapintasong mga matang sa paglutos
