Mga Langyaw Natigom sa Ampoanan nga Balay sa Diyos
Kapitulo Desisiyete
Mga Langyaw Natigom sa Ampoanan nga Balay sa Diyos
1, 2. Unsang makapahinam nga pahibalo ang gipahayag sa 1935, ug kadto maoy usa ka bahin sa unsa?
SA Biyernes, Mayo 31, 1935, si Joseph F. Rutherford nagpakigpulong sa panon sa katawhan sa kombensiyon sa Washington, D.C. Iyang gihisgotan ang ilhanan sa “dakong panon,” nga nakita ni apostol Juan diha sa panan-awon. Sa tayuktok sa pakigpulong ni Brader Rutherford, siya mihangyo: “Mahimo bang motindog kadtong naghambin sa paglaom nga mabuhing walay kataposan sa yuta?” Sumala sa usa niadtong mitambong, “kapig katunga sa mamiminaw mitindog.” Unya ang mamumulong miingon: “Tan-awa! Ang dakong panon!” Ang lain nga niadto presente nahinumdom: “Sa sinugdan may kahilom, dayon malipayong paghugyaw, ug ang suliyaw maoy kusog ug dugay.”—Pinadayag 7:9, King James Version.
2 Kadto maoy talagsaong gutlo sa nagpadayon nga pagkatuman sa usa ka tagnang nahisulat mga 2,700 ka tuig nga sayosayo ug makita sa atong mga Bibliya ingong Isaias kapitulo 56. Sama sa daghang ubang mga tagna sa Isaias, kini adunay makahupayng mga saad ug mapig-otong mga pasidaan. Sa unang pagpadapat, kini gitumong ngadto sa katawhang may pakigsaad sa Diyos sa adlaw mismo ni Isaias, apan ang katumanan niini nakaabot sa daghang siglo hangtod sa atong adlaw.
Kon Unsay Gikinahanglan Alang sa Kaluwasan
3. Kon ang mga Hudiyo nagtinguhag kaluwasan gikan sa Diyos, unsay kinahanglang buhaton nila?
3 Ang Isaias kapitulo 56 nagsugod uban ang tambag alang sa mga Hudiyo. Bisan pa niana, ang tanang matuod nga mga magsisimba angayng magpatalinghog kon unsay gisulat sa manalagna. Mabasa nato: “Mao kini ang giingon ni Jehova: ‘Sunda ninyo ang hustisya ug buhata ang matarong. Kay hapit na moabot ang akong kaluwasan, ug ipadayag ang akong pagkamatarong. Malipayon ang may-kamatayong tawo nga nagbuhat niini, ug ang anak sa katawhan nga nangupot niini, nga nagtuman sa igpapahulay aron dili magpasipala niini, ug nagbantay sa iyang kamot aron dili makahimog bisan unsang matang sa pagkadaotan.’” (Isaias 56:1, 2) Ang mga molupyo sa Juda nga nagtinguhag kaluwasan gikan sa Diyos kinahanglang mosunod sa Moisesnong Balaod, nga magsunod sa hustisya ug magkinabuhi sa pagkamatarong. Ngano man? Kay si Jehova mismo maoy matarong. Kadtong nagsunod sa pagkamatarong magtagamtam ug kalipay nga nagagikan sa pagbaton sa pag-uyon ni Jehova.—Salmo 144:15b.
4. Nganong ang pagtuman sa Igpapahulay hinungdanon sa Israel?
4 Ang tagna nagpasiugda sa pagtuman sa Igpapahulay kay ang Igpapahulay maoy usa ka importanteng bahin sa Moisesnong Balaod. Sa pagkatinuod, usa sa mga hinungdan nga ang mga molupyo sa Juda sa kadugayan nadestiyero mao ang dili nila pagtagad sa Igpapahulay. (Levitico 26:34, 35; 2 Cronicas 36:20, 21) Ang Igpapahulay maoy usa ka ilhanan sa linaing relasyong nabatonan ni Jehova uban sa mga Hudiyo, ug kadtong nagtuman sa Igpapahulay nagpakita nga ilang gipabilhan ang maong relasyon. (Exodo 31:13) Dugang pa, ang pagtuman sa Igpapahulay makapahinumdom sa mga katalirongan ni Isaias nga si Jehova mao ang Maglalalang. Ang maong pagtuman makapahinumdom usab sa iyang mga kaluoy ngadto kanila. (Exodo 20:8-11; Deuteronomio 5:12-15) Sa kataposan, ang pagtuman sa Igpapahulay nagtaganag regular, organisadong kahikayan sa pagsimba kang Jehova. Ang pagpahulay kas-a sa usa ka semana gikan sa ilang regular nga trabaho maghatag sa mga molupyo sa Juda ug higayon alang sa pag-ampo, pagtuon, ug pagpamalandong.
5. Sa prinsipyo, sa unsang paagi ikapadapat sa mga Kristohanon ang tambag sa pagtuman sa Igpapahulay?
5 Nan, komosta man ang mga Kristohanon? Ang pagdasig ba sa pagtuman sa Igpapahulay mapadapat kanila? Dili sa direktang paagi, sanglit ang mga Kristohanon dili man ilalom sa Balaod ug busa dili obligado nga magtuman sa Igpapahulay. (Colosas 2:16, 17) Bisan pa niana, si apostol Pablo nagpatin-aw nga adunay “usa ka pagpahulay sa igpapahulay” alang sa matinumanong mga Kristohanon. Ang maong “pagpahulay sa igpapahulay” naglangkit sa pagtuo sa halad lukat ni Jesus alang sa kaluwasan ug paghunong sa pagsalig sa mga buhat lamang. (Hebreohanon 4:6-10) Busa, ang mga pulong sa tagna ni Isaias mahitungod sa Igpapahulay magpahinumdom sa mga alagad ni Jehova karong adlawa sa bililhong panginahanglan nga motuo sa kahikayan sa Diyos alang sa kaluwasan. Kini usa ka maayong pahinumdom usab sa panginahanglan nga ugmaron ang suod nga relasyon uban kang Jehova ug pagsunod sa paagi sa regular, makanunayong pagsimba.
Kahupayan Alang sa Langyaw ug sa Eunuko
6. Unsang duha ka pundok ang karon nahatagan ug pagtagad?
6 Si Jehova karon namulong sa duha ka pundok nga buot moalagad kaniya apan kinsa ilalom sa Moisesnong Balaod dili takos mosulod sa Hudiyohanong kongregasyon. Atong mabasa: “Ayaw paingna ang langyaw nga nakighiusa kang Jehova, ‘Sa walay duhaduha si Jehova maglain kanako gikan sa iyang katawhan.’ Ni ipaingon sa eunuko, ‘Tan-awa! Ako usa ka kahoyng uga.’” (Isaias 56:3) Ang kahadlok sa langyaw mao nga siya ibulag gikan sa Israel. Ang kabalaka sa eunuko mao nga dili gayod siya makabaton ug mga anak aron mapreserbar ang iyang ngalan. Ang duha ka pundok angayng makabatog kaisog. Sa dili pa nato masusi kon ngano, tagdon nato kon unsay ilang kahimtang ilalom sa Balaod maylabot sa nasod sa Israel.
7. Unsang mga restriksiyon ang gibutang sa Balaod nganha sa mga langyaw sa Israel?
7 Ang dili-tinuli nga mga langyaw dili makaapil sa pagsimba uban sa Israel. Pananglitan, sila dili tugotan nga moambit sa Paskuwa. (Exodo 12:43) Ang mga langyaw nga wala maglapas sa dayag sa mga balaod sa yuta makapahimulos sa hustisya ug pagkamaabiabihon, apan sila walay permanenteng kalangkitan sa nasod. Dayag na lang, ang pipila bug-os nga nagdawat sa Balaod, ug ingong usa ka ilhanan niini, ang mga lalaki nagpatuli. Unya sila maoy mga proselita, nga may pribilehiyo sa pagsimba diha sa sawang sa balay ni Jehova ug giisip nga bahin sa kongregasyon sa Israel. (Levitico 17:10-14; 20:2; 24:22) Bisan pa niana, bisan ang mga proselita dili bug-os nga mga sumasalmot sa pakigsaad ni Jehova uban sa Israel, ug sila walay panulondon nga yuta sa Yutang Saad. Ang ubang mga langyaw mahimong moatubang sa templo diha sa pag-ampo, ug sumala sa ebidensiya sila makatanyag ug mga halad pinaagi sa mga saserdote basta ang mga halad nahiuyon sa Balaod. (Levitico 22:25; 1 Hari 8:41-43) Apan ang mga Israelinhon dili angayng makigsuod kanila.
Mga Eunuko Makadawat ug Ngalan Hangtod sa Panahong Walay Tino
8. (a) Ilalom sa Balaod, unsa ang pag-isip bahin sa mga eunuko? (b) Sa unsang paagi gigamit ang mga eunuko sa paganong mga nasod, ug unsay gitumong usahay sa terminong “eunuko”?
8 Ang mga eunuko, bisan pag sila natawo sa Hudiyong mga ginikanan, gihikawan ug bug-os nga pagkasakop sa nasod sa Israel. a (Deuteronomio 23:1) Sa taliwala sa pipila ka paganong mga nasod sa kapanahonan sa Bibliya, ang mga eunuko may usa ka linaing dapit ug nahimong batasan ang pagkapon sa pipila sa mga anak nga nabihag sa panggubatan. Ang mga eunuko gitudlo ingong mga opisyales sa harianong mga palasyo. Ang usa ka eunuko mahimo tingaling “magbalantay sa mga babaye,” “magbalantay sa mga puyopuyo,” o usa ka alagad sa rayna. (Ester 2:3, 12-15; 4:4-6, 9) Walay ebidensiya nga gisunod sa mga Israelinhon ang maong mga batasan o nga ang mga eunuko ilabinang gipangita aron mag-alagad sa Israelinhong mga hari. b
9. Unsang makapahupay nga mga pulong ang gipunting ni Jehova ngadto sa mga eunuko sa pisikal nga paagi?
9 Gawas pa sa pag-ambit sa limitado lang nga paagi sa pagsimba sa matuod nga Diyos, ang mga eunuko sa pisikal nga paagi sa Israel nakaagom ug dakong kaulawan sa pagkadili-makaanak aron ipadayon ang ngalan sa ilang pamilya. Nan, pagkamakapahupay ang sunod nga mga pulong sa tagna! Atong mabasa: “Mao kini ang giingon ni Jehova sa mga eunuko nga nagtuman sa akong mga igpapahulay ug nga nagpili sa kon unsay akong gikahimut-an ug nga nangupot sa akong pakigsaad: ‘Igahatag ko gayod kanila sa akong balay ug sulod sa akong mga paril ang usa ka monyumento ug ang usa ka ngalan, usa ka butang nga mas maayo kay sa mga anak nga lalaki ug mga anak nga babaye. Usa ka ngalan hangtod sa panahong walay tino akong igahatag kanila, nga dili pagaputlon.’”—Isaias 56:4, 5.
10. Kanus-a nausab ang kahimtang sa mga eunuko, ug unsang pribilehiyo ang nabuksan alang kanila sukad niadto?
10 Oo, moabot ang panahon nga bisan ang pagka-eunuko sa pisikal nga paagi dili na mahimong babag sa bug-os nga pagkadinawat ingong alagad ni Jehova. Kon masinugtanon, ang mga eunuko makabaton ug “usa ka monyumento,” o usa ka dapit, diha sa balay ni Jehova ug usa ka ngalan, nga mas maayo kay sa mga anak nga lalaki ug mga anak nga babaye. Kanus-a ba kini mahitabo? Pagkatapos nga mamatay si Jesu-Kristo. Niadtong panahona ang daang pakigsaad sa Balaod gipulihan sa bag-ong pakigsaad, ug ang unodnong Israel gipulihan sa “Israel sa Diyos.” (Galacia 6:16) Sukad niadto, ang tanan nga nagpasundayag ug pagtuo nakahimo sa paghatag ug dalawatong pagsimba sa Diyos. Dili na hinungdanon ang unodnong mga pagkalahi ug ang lawasnong kahimtang. Kadtong makalahutay nga matinumanon, bisan kon unsay ilang lawasnong kahimtang, makabaton ug “usa ka ngalan hangtod sa panahong walay tino . . . nga dili pagaputlon.” Si Jehova dili malimot kanila. Ang ilang mga ngalan mahisulat diha sa iyang “basahon sa handomanan,” ug sa gitakdang panahon sa Diyos, sila makadawat ug kinabuhing walay kataposan.—Malaquias 3:16; Proverbio 22:1; 1 Juan 2:17.
Mga Langyaw Magasimba Uban sa Katawhan sa Diyos
11. Aron makadawat ug mga panalangin, gidasig ang mga langyaw sa pagbuhat ug unsa?
11 Nan, komosta man ang mga langyaw? Ang tagna karon naghisgot na usab kanila, ug si Jehova adunay mga pulong nga makapahupay pag-ayo kanila. Si Isaias nagsulat: “Ang mga langyaw nga nakighiusa kang Jehova sa pag-alagad kaniya ug sa paghigugma sa ngalan ni Jehova, aron mahimong mga alagad niya, ang tanan niadtong nagtuman sa igpapahulay aron dili magpasipala niini ug nangupot sa akong pakigsaad, dad-on ko usab sila ngadto sa akong balaang bukid ug pamayaon sila sa sulod sa akong balay nga ampoanan. Ang tibuok nilang mga halad-nga-sinunog ug ang ilang mga halad dawaton ibabaw sa akong halaran. Kay ang akong balay pagatawgon mismo nga usa ka balay nga ampoanan alang sa tanang mga katawhan.”—Isaias 56:6, 7.
12. Unsay pagsabot niadto sa tagna ni Jesus bahin sa “ubang mga karnero”?
12 Sa atong panahon “ang mga langyaw” anam-anam nga nagpadayag sa ilang kaugalingon. Sa wala pa ang unang gubat sa kalibotan, gisabot nga mas daghang tawo ang makadawat ug kaluwasan kay sa gidaghanon niadtong naglaom nga magamando kauban ni Jesus sa langit—ang mga tawong giila nato karong adlawa ingong ang Israel sa Diyos. Ang mga estudyante sa Bibliya nahibalo sa mga pulong ni Jesus nga nahitala sa Juan 10:16: “Ako adunay ubang mga karnero, nga wala niining torila; kinahanglan nga dad-on ko usab sila, ug sila magpatalinghog sa akong tingog, ug sila mahimong usa ka panon, usa ka magbalantay.” Kini silang “ubang mga karnero” gisabot nga usa ka yutan-ong matang. Apan ang kadaghanang Estudyante sa Bibliya nagtuo nga ang ubang mga karnero magpadayag sa ilang kaugalingon panahon sa Milenyong Paghari ni Jesu-Kristo.
13. Nganong gipangatarongan nga ang mga karnero sa Mateo kapitulo 25 kinahanglang magpadayag panahon sa kataposang mga adlaw niining sistema sa mga butang?
13 Sa ngadtongadto, miuswag ang pagsabot bahin sa usa ka nalangkit nga kasulatan nga naghisgot bahin sa mga karnero. Sa Mateo kapitulo 25, adunay talaan bahin sa sambingay ni Jesus mahitungod sa mga karnero ug sa mga kanding. Sumala sa maong sambingay, ang mga karnero makadawat ug kinabuhing walay kataposan tungod kay sila nagpaluyo sa mga igsoon ni Jesus. Busa, sila maoy usa ka matang nga bulag ug lahi sa dinihogang mga igsoon ni Kristo. Niadtong 1923, panahon sa usa ka kombensiyon sa Los Angeles, California, T.B.A., gipatin-aw nga ang maong mga karnero kinahanglang magpadayag sa ilang kaugalingon, dili panahon sa Milenyo, kondili panahon sa kataposang mga adlaw niining sistema sa mga butang. Ngano man? Tungod kay si Jesus mihatag sa sambingay ingong bahin sa iyang tubag sa pangutana: “Kanus-a man mahitabo kining mga butanga, ug unsa man unya ang ilhanan sa imong presensiya ug sa kataposan sa sistema sa mga butang?”—Mateo 24:3.
14, 15. Sa unsang paagi may pag-uswag sa pagsabot sa baroganan sa ubang mga karnero sa panahon sa kataposan?
14 Sa katuigang 1920, ang pipila ka tawo nga nakig-uban sa mga Estudyante sa Bibliya mibati nga ang espiritu ni Jehova wala magsaksi kanila nga sila may langitnong pagkatinawag. Bisan pa niana, sila madasigong mga alagad sa Labing Hataas nga Diyos. Sa 1931 ang ilang baroganan mas nasabtan sa dihang napatik ang librong Vindication. Ingong bahin sa bersikulo-por-bersikulo nga paghisgot sa basahong Ezequiel sa Bibliya, ang Vindication nagpatin-aw sa panan-awon bahin sa “tawo” nga may tintiro sa tigsulat. (Ezequiel 9:1-11) Ang maong “tawo” makitang naglakaw latas sa Jerusalem ug nagmarka sa mga agtang niadtong nanghupaw ug nag-agulo tungod sa dulumtanang mga butang nga gihimo didto. Ang “tawo” naghawas sa mga igsoon ni Jesus, ang nahibilin sa dinihogang mga Kristohanon nga buhi sa yuta panahon sa paghukom sa antitipikong Jerusalem, ang Kakristiyanohan. Kadtong gimarkahan mao ang ubang mga karnero nga buhi pa nianang panahona. Sa panan-awon sila naluwas sa dihang ang mga tiglaglag ni Jehova manimalos sa maong apostatang siyudad.
15 Niadtong 1932 ang mas lalom nga pagsabot sa matagnaong drama ni Haring Jehu sa Israel ug ni Jonadab, usa ka dili-Israelinhong tigpaluyo, nagpaila kon sa unsang paagi kining ubang mga karnero magagawi sa pagpaluyo sa dinihogang mga igsoon ni Kristo—maingon nga si Jonadab mikuyog ug nagpaluyo kang Jehu sa iyang paglaglag sa pagsimba ni Baal. Sa kataposan, niadtong 1935 ang ubang mga karnero nga buhi pa panahon sa kataposan niining sistema sa mga butang nailhan nga mao ang dakong panon nga nakita ni apostol Juan diha sa panan-awon. Una kining gipatin-aw sa nahisgotan nang kombensiyon sa Washington, D.C., sa dihang si Joseph F. Rutherford nagpunting kanilang may yutan-ong paglaom ingong “ang dakong panon.”
16. Unsang mga pribilehiyo ug mga responsabilidad ang gipahimuslan sa “mga langyaw”?
16 Busa sa anam-anam nasabtan nga “ang mga langyaw” adunay usa ka dakong bahin nga pagatumanon diha sa mga katuyoan ni Jehova niining kataposang mga adlaw. Sila moduol sa Israel sa Diyos aron sa pagsimba kang Jehova. (Zacarias 8:23) Duyog sa maong espirituwal nga nasod, sila motanyag ug dalawatong mga halad ngadto sa Diyos ug mosulod sa pagpahulay sa igpapahulay. (Hebreohanon 13:15, 16) Dugang pa, sila nagsimba diha sa espirituwal nga templo sa Diyos, nga, sama sa templo sa Jerusalem, maoy usa ka “balay nga ampoanan alang sa tanang kanasoran.” (Marcos 11:17) Sila nagpasundayag ug pagtuo sa halad lukat ni Jesu-Kristo, nga ‘naglaba sa ilang tag-as nga mga besti ug nagpaputi niana sa dugo sa Kordero.’ Ug sila nag-alagad kang Jehova nga makanunayon, nga “nagahatag kaniya ug sagradong pag-alagad adlaw ug gabii.”—Pinadayag 7:14, 15.
17. Sa unsang paagi ang modernong-adlawng mga langyaw nangupot sa bag-ong pakigsaad?
17 Kining modernong-adlawng mga langyaw nangupot sa bag-ong pakigsaad sa diwa nga pinaagi sa pagpakig-uban sa Israel sa Diyos, sila nagpahimulos sa mga kaayohan ug mga panalangin nga moabot pinaagi sa bag-ong pakigsaad. Bisan pag sila dili mga sumasalmot nianang maong pakigsaad, sa bug-os nga kasingkasing sila nagpailalom sa mga balaod nga nalangkit niana. Busa ang balaod ni Jehova anaa sa sulod sa ilang mga kasingkasing, ug sila nakaila kang Jehova ingong ilang langitnong Amahan ug ang labawng Soberano.—Jeremias 31:33, 34; Mateo 6:9; Juan 17:3.
18. Unsang buluhatong pagtigom ang ginahimo sa panahon sa kataposan?
18 Ang tagna ni Isaias nagpadayon: “Ang pulong sa Soberanong Ginoong Jehova, nga nagtapok sa mga nangatibulaag sa Israel, mao: ‘Akong tapokon ngadto kaniya ang uban gawas pa niadtong mga iyaha nga nangatapok na.’” (Isaias 56:8) Sulod sa panahon sa kataposan, gitapok ni Jehova ang “mga nangatibulaag sa Israel,” kadtong sakop sa dinihogang nahibilin. Dugang pa, siya nagatapok sa uban pa, kadtong sakop sa dakong panon. Magkauban sila nga nagsimba diha sa kalinaw ug panag-uyon ilalom sa pagdumala ni Jehova ug sa iyang naentrono na nga Hari, si Kristo Jesus. Tungod sa ilang pagkamaunongon sa kagamhanan ni Jehova pinaagi ni Kristo, ang Maayong Magbalantay naghimo kanila nga usa ka nahiusa, malipayong panon.
Buta nga mga Tigbantay, Amang nga mga Iro
19. Unsang pagdapit ang gipadangat ngadto sa ihalas nga mga hayop sa kapatagan ug sa kalasangan?
19 Ang nahisgotan nang madasigon, makapalig-ong mga pulong gisundan ug talagsaon, halos makapakurat nga katugbang. Si Jehova andam nga molihok uban ang kaluoy bahin sa mga langyaw ug mga eunuko. Apan daghan nga nangangkong mga membro sa kongregasyon sa Diyos dayag nga gisaway ug gitagana sa paghukom. Labaw pa niana, sila dili gani takos sa desenteng paglubong ug angay lamang nga kaonon sa manunukob nga mga hayop. Busa, atong mabasa: “Kamong tanang ihalas nga mga hayop sa kapatagan, umari kamo aron mangaon, kamong tanang ihalas nga mga hayop sa lasang.” (Isaias 56:9) Unsay kombirahan sa maong ihalas nga mga hayop? Ang tagna mopatin-aw. Sa pagbuhat niana, kini makapahinumdom kanato sa dulnganan nga naghulat niadtong nagsupak sa Diyos sa umaabot nga gubat sa Armagedon, kansang patayng mga lawas pasagdan aron kaonon sa mga langgam sa kalangitan.—Pinadayag 19:17, 18.
20, 21. Unsang mga kapakyasan ang naghimo sa relihiyosong mga pangulo nga walay kapuslanan ingong espirituwal nga mga tiggiya?
20 Ang tagna nagpadayon: “Ang iyang mga tigbantay maoy mga buta. Walay usa kanila nga nagtagad. Silang tanan maoy amang nga mga iro; dili sila makapaghot, naghalhal, naglubog, mahigugmaon sa pagkatulog. Sila mga iro nga hilabihan ang tinguha sa kalag; sila wala makailag pagkatagbaw. Sila usab mga magbalantay nga dili makasabot. Silang tanan miliso ngadto sa ilang kaugalingong dalan, ang matag usa tungod sa iyang dili-minatarong nga kinitaan gikan sa iyang kaugalingong utlanan: ‘Umari, kamong mga lalaki! Magkuha akog bino; ug mag-inom kitag makahubog nga ilimnon kutob sa maarangan. Ug ugma tinong mahisama gayod niining adlawa, nga labaw pa gayod kaayo.’”—Isaias 56:10-12.
21 Ang relihiyosong mga pangulo sa Juda nag-angkon nga nagsimba kang Jehova. Sila nangangkon nga maoy “iyang mga tigbantay.” Apan sila sa espirituwal maoy buta, amang, ug katulogon. Kon sila dili makapadayon sa pagbantay ug makapalanog sa pasidaan bahin sa umaabot nga kapeligrohan, unsay kapuslanan nila? Ang maong relihiyosong mga tigbantay maoy walay salabotan, walay katakos sa paghatag ug espirituwal nga pagtultol sa mga tawong karnerohon. Dugang pa, sila maoy hiwi. Sila adunay dili-matagbawng hakog nga mga pangandoy. Inay sundon ang pagtultol ni Jehova, sila nagsunod sa ilang kaugalingong dalan, nga nagtinguhag dili-minatarong nga ganansiya, nagpahutak sa makahubog nga ilimnon, ug nagdasig sa uban sa pagbuhat sa ingon. Dili gayod sila matinagdanon sa umaabot nga paghukom sa Diyos nga sila nagsulti sa katawhan nga magmaayo ra ang kahimtang.
22. Sa unsang paagi ang relihiyosong mga pangulo sa adlaw ni Jesus sama niadtong sa karaang Juda?
22 Sayosayo sa iyang tagna, gigamit ni Isaias ang susamang hulagway aron sa pagbatbat sa dili-matinumanong relihiyosong mga pangulo sa Juda—sa espirituwal nga paagi hubog, katulogon, ug kulang sa salabotan. Sila nagpabug-at sa katawhan sa mga tradisyon sa mga tawo, nanultig relihiyosong kabakakan, ug nagsalig sa Asirya alang sa tabang inay mosalig sa Diyos. (2 Hari 16:5-9; Isaias 29:1, 9-14) Tin-aw nga sila wala makakat-on. Ikasubo, ang samang matang sa mga pangulo presente sa unang siglo. Inay dawaton ang maayong balita nga gidala kanila sa kaugalingong Anak sa Diyos, sila nagsalikway kang Jesus ug nagsabotsabot nga ipapatay siya. Si Jesus prangkang nagtawag kanilang “mga buta nga tiggiya,” nga midugang nga kon “ang usa ka buta nga tawo magagiya sa usa ka buta nga tawo, silang duha mangahulog sa gahong.”—Mateo 15:14.
Mga Tigbantay Karong Adlawa
23. Unsang tagna ni Pedro mahitungod sa relihiyosong mga pangulo ang natuman?
23 Si apostol Pedro nagpasidaan nga ang mini nga mga magtutudlo motungha usab aron sa pagpahisalaag sa mga Kristohanon. Misulat siya: “Dihay mini usab nga mga manalagna taliwala sa katawhan [sa Israel], ingon nga aduna unyay mini usab nga mga magtutudlo taliwala kaninyo. Kini sila sa hilom magpasulod ug malaglagong mga sekta ug magalimod pa gani sa tag-iya nga nagpalit kanila, nga magpahinabog hinanali nga kalaglagan sa ilang kaugalingon.” (2 Pedro 2:1) Unsa ba ang resulta sa bakak nga mga pagtulon-an ug sektaryanismo sa maong mini nga mga magtutudlo? Ang Kakristiyanohan, kansang relihiyosong mga pangulo karong adlawa magaampo alang sa panalangin sa Diyos diha sa ilang politikong mga higala ug unya magsaad ug masanagong umaabot. Ang relihiyosong mga pangulo sa Kakristiyanohan napamatud-ang buta, amang, ug nahikatulog kon bahin sa espirituwal nga mga butang.
24. Unsang panaghiusa ang naglungtad tali sa espirituwal nga Israel ug sa mga langyaw?
24 Bisan pa niana, si Jehova nagadalag milyonmilyong langyaw aron sa pagsimba duyog sa mga nahibilin sa Israel sa Diyos diha sa iyang dakong espirituwal nga balay nga ampoanan. Ang maong mga langyaw, bisan pag gikan sa daghang nasod, mga rasa, ug mga pinulongan, nagkahiusa sa usag usa ug uban sa Israel sa Diyos. Kombinsido sila nga ang kaluwasan magagikan lamang kang Jehova nga Diyos pinaagi ni Jesu-Kristo. Kay natukmod sa gugma alang kang Jehova, sila miduyog sa dinihogang mga igsoon ni Kristo sa pagpahayag sa ilang pagtuo. Ug sila dulot nga nahupayan sa mga pulong sa inspiradong apostol nga misulat: “Kon imong ipahayag sa dayag kanang ‘pulong sa imong kaugalingong baba,’ nga si Jesus maoy Ginoo, ug magpasundayag ug pagtuo sa imong kasingkasing nga ang Diyos nagbangon kaniya gikan sa mga patay, ikaw maluwas.”—Roma 10:9.
[Mga footnote]
a Ang terminong “eunuko” nagtumong usab sa usa ka opisyal sa palasyo, nga wala magtumong sa pagkapon sa seksuwal nga paagi. Sanglit ang Etiopianhon nga gibawtismohan ni Felipe daw usa ka proselita—siya gibawtismohan sa wala pa buksi ang dalan alang sa dili-tinuling mga dili-Hudiyo—siya maoy usa ka eunuko gayod sa maong diwa.—Buhat 8:27-39.
b Si Ebed-melek, kinsa mitabang kang Jeremias ug direktang makaduol kang Haring Zedekias, gitawag nga usa ka eunuko. Kini mopatim-aw nga nagtumong sa iyang pagkaopisyal sa palasyo inay kay sa iyang pagkakinapnan sa seksuwal nga paagi.—Jeremias 38:7-13.
[Mga Pangutana sa Pagtuon]
[Hulagway sa panid 251]
Ang Igpapahulay maghatag ug higayon alang sa pag-ampo, pagtuon, ug pagpamalandong
[Mga hulagway sa panid 256]
Ang baroganan sa ubang mga karnero gipatin-aw panahon sa usa ka kombensiyon sa Washington, D.C., sa 1935 (letrato sa bawtismo sa ubos, programa sa tuo)
[Hulagway sa panid 259]
Ang ihalas nga mga hayop gidapit nga mangombira
[Mga hulagway sa panid 261]
Ang mga langyaw ug ang Israel sa Diyos may panaghiusa
