Pagkasalingkapaw Giyagyag!
Kapitulo Desinuybe
Pagkasalingkapaw Giyagyag!
1. Unsay pag-isip ni Jesus ug ni Jehova sa pagkasalingkapaw, ug unsa ang dagway niini sa adlaw ni Isaias?
“SA PANGGAWAS, [kamo] matarong tan-awon sa mga tawo,” giingnan ni Jesus ang relihiyosong mga pangulo sa iyang adlaw, “apan sa sulod kamo puno sa pagkasalingkapaw ug kalapasan.” (Mateo 23:28) Ang publikong pagsaway ni Jesus sa pagkasalingkapaw nagpabanaag sa punto de bista sa iyang langitnong Amahan. Ang Kapitulo 58 sa tagna ni Isaias tino nga nagpunting sa pagkasalingkapaw nga kaylap sa Juda. Kasagaran na ang away, pagdaogdaog, ug kabangisan, ug ang pagtuman sa Igpapahulay nahimo na lang nga way-kahulogang rituwal. Ang katawhan naghimog aron-ingnong pag-alagad kang Jehova ug naghimog mapagawalong pasundayag sa pagkabalaan pinaagig sinalingkapaw nga pagpuasa. Dili katingad-an nga giyagyag ni Jehova kon unsa gayod sila!
‘Isulti sa Katawhan ang Ilang mga Sala’
2. Unsang espiritu ang gipakita ni Isaias samtang nagpahayag siya sa mensahe ni Jehova, ug kinsa ang sama kaniya karong adlawa?
2 Bisan pag si Jehova nayugot sa panggawi sa Juda, ang Iyang mga pulong naglakip sa kinasingkasing nga paghangyo nga maghinulsol ang nasod. Bisan pa niana, dili buot ni Jehova nga ang iyang pagbadlong mahimong dili tin-aw. Busa, iyang gisugo si Isaias: “Tawag sa makusog; ayaw pagpugong. Ipatugbaw ang imong tingog sama gayod sa usa ka budyong, ug sultihi ang akong katawhan sa ilang pag-alsa, ug ang balay ni Jacob sa ilang mga sala.” (Isaias 58:1) Ang maisogong pagmantala sa mga pulong ni Jehova tingali makapasuko sa mga tawo kang Isaias, apan wala siya mosibog. Siya nakabaton gihapon sa samang espiritu sa nagsakripisyo-sa-kaugalingon nga pagkamahinalaron nga iyang gipakita sa dihang siya miingon: “Ania ako! Ipadala ako.” (Isaias 6:8) Pagkatalagsaong panig-ingnan sa pag-agwanta si Isaias alang sa modernong-adlawng mga Saksi ni Jehova, kinsa gisugo usab nga isangyaw ang Pulong sa Diyos ug iyagyag ang relihiyosong pagkasalingkapaw!—Salmo 118:6; 2 Timoteo 4:1-5.
3, 4. (a) Unsang pagpakaaron-ingnon ang gihimo sa katawhan sa adlaw ni Isaias? (b) Unsa ang matuod nga kahimtang sa Juda?
3 Dayag, ang katawhan sa adlaw ni Isaias nangita kang Jehova ug nagpahayag ug kahimuot sa iyang matarong nga mga paghukom. Atong mabasa ang mga pulong ni Jehova: “Sa adlaw-adlaw ako mao ang ilang ginapangita, ug diha sa kahibalo sa akong mga dalan nga sila magpahayag ug kahimuot, sama sa usa ka nasod nga nagbuhat sa pagkamatarong ug wala mobiya sa mismong hustisya sa ilang Diyos, sa pagkaagi nga sila nagsigeg pangayo kanako ug matarong nga mga paghukom, nga nagpaduol sa Diyos nga ilang gikahimut-an.” (Isaias 58:2) Tiunay ba ang maong giangkon nga pagkahimuot sa mga dalan ni Jehova? Dili. Sila “sama sa usa ka nasod nga nagbuhat sa pagkamatarong,” apan ang kaamgiran maoy taphaw lamang. Sa pagkatinuod, kanang nasora ‘nagbiya sa mismong hustisya sa ilang Diyos.’
4 Ang kahimtang sama kaayo sa gipadayag sa ulahi ngadto sa manalagnang Ezequiel. Giingnan ni Jehova si Ezequiel nga ang mga Hudiyo nagsultihanay sa usag usa: “Ngari kamo, palihog, ug patalinghogi ang pulong nga nagagula gikan kang Jehova.” Apan ang Diyos nagpasidaan kang Ezequiel bahin sa ilang pagkadili-sinsero: “Sila manganha kanimo, . . . ug sila mamati gayod sa imong mga pulong apan kini dili nila buhaton, kay sa ilang baba sila nagapahayag ug hilabihang kaibog ug ang ilang kasingkasing nagapangagpas sa ilang dili-minatarong nga kinitaan. Ug, tan-awa! alang kanila ikaw sama sa usa ka awit sa makilawasnong gugma, sama sa usa nga nindot ug tingog ug maayong motokar sa usa ka kinuldasan nga tulonggon. Ug sila mamati gayod sa imong mga pulong, apan walay usa nga mobuhat niini.” (Ezequiel 33:30-32) Ang mga katalirongan ni Isaias nangangkon usab nga nangita kanunay kang Jehova, apan dili sila masinugtanon sa iyang mga pulong.
Sinalingkapaw nga Pagpuasa
5. Sa unsang paagi gipaninguha sa mga Hudiyo nga mabatonan ang pag-uyon sa Diyos, ug unsa ang sanong ni Jehova?
5 Sa paningkamot nga mabatonan ang pag-uyon sa Diyos, ang mga Hudiyo nagtuman sa mga lagda sa pagpuasa, apan ang ilang aron-ingnong pagkabalaan nagpalayo lang kanila gikan ni Jehova. Sa dayag nga kalibog sila nangutana: “Unsay hinungdan nga kami nagpuasa ug wala nimo makita, ug kami nagsakit sa among kalag ug wala nimo matikdi?” Si Jehova prangkang mitubag, nga nag-ingon: “Sa pagkatinuod kamo nakakaplag ug kahimuot sa adlaw mismo sa inyong pagpuasa, sa dihang dinha ang tanan ninyong mga mamumuo nga padayon ninyong gipugos sa pagtrabaho. Sa pagkatinuod kamo nagpuasa alang sa panag-away ug panagbisogay, ug alang sa pagdapat pinaagi sa kumo sa pagkadaotan. Wala ba kamo magpuasa ingon sa adlaw nga alang sa pagpadungog sa inyong tingog sa hataas nga dapit? Ang pagpuasa ba nga akong gipili mahimong sama niini, ingon nga usa ka adlaw alang sa yutan-ong tawo sa pagsakit sa iyang kalag? Alang sa pagduko sa iyang ulo sama sa usa ka tikog, ug nga siya magbukhad ug sakong panapton lamang ug mga abo ingong iyang higdaanan? Mao ba kini ang imong gitawag nga puasa ug adlaw nga dalawaton kang Jehova?”—Isaias 58:3-5.
6. Unsang mga buhat sa mga Hudiyo ang nagpadayag nga ang ilang pagpuasa maoy sinalingkapaw?
6 Samtang nagpuasa, nga nagpakaaron-ingnong matarong, ug nangayo pa sa matarong nga mga paghukom ni Jehova, ang katawhan nangagpas sa hinakog nga mga kalingawan ug sa mga interes sa negosyo. Sila nagpatuyang sa away, pagdaogdaog, ug kabangisan. Sa tinguha nga matabonan ang kangil-aran sa ilang daotang panggawi, sila naghimo sa mapagawalong mga pasundayag sa pagbangotan—pagduko sa ilang mga ulo nga sama sa tikog ug paglingkod diha sa sakong panapton ug mga abo—diha sa paghinulsol konohay sa ilang mga sala. Unsay kapuslanan niining tanan kon magpadayon sila sa pagrebelde? Wala sila magpakitag diyosnong kasubo ug paghinulsol nga angayng nalangkit sa sinserong mga pagpuasa. Ang ilang pagdanguyngoy—bisan pag saba—dili madungog sa langit.
7. Sa unsang paagi ang mga Hudiyo sa panahon ni Jesus naglihok nga sinalingkapaw, ug sa unsang paagi ang daghan nagbuhat sa samang butang karong adlawa?
7 Ang mga Hudiyo sa adlaw ni Jesus naghimo sa susamang pasundayag sa seremonyal nga pagpuasa, nga nagbuhat niana kaduha sa usa ka semana! (Mateo 6:16-18; Lucas 18:11, 12) Daghang relihiyosong mga pangulo nagsundog usab sa kaliwatan ni Isaias pinaagi sa pagkahimong mapintason ug hariharion. Busa, si Jesus maisogong nagyagyag sa maong relihiyosong mga salingkapaw, nga nagsulti kanila nga ang ilang matang sa pagsimba walay kapuslanan. (Mateo 15:7-9) Karong adlawa, usab, milyonmilyon “nagpahayag sa dayag nga sila nakaila sa Diyos, apan sila naglimod kaniya pinaagi sa ilang mga buhat, tungod kay sila dulumtanan ug dili-masinugtanon ug dili-inuyonan alang sa bisan unsang matang sa maayong buhat.” (Tito 1:16) Ang maong mga tawo mahimong naglaom sa kaluoy sa Diyos, apan ang ilang panggawi nagpadayag sa ilang pagkadili-sinsero. Sa katugbang, ang mga Saksi ni Jehova nagpasundayag ug matuod nga diyosnong pagkamahinalaron ug tiunayng inigsoong gugma.—Juan 13:35.
Kon Unsay Nalangkit sa Tinuod nga Paghinulsol
8, 9. Unsang positibong mga lihok ang kinahanglang moduyog sa sinserong paghinulsol?
8 Buot ni Jehova nga ang iyang katawhan dili lang kay magpuasa tungod sa ilang mga sala; buot niya nga maghinulsol sila. Unya makabaton sila sa iyang pag-uyon. (Ezequiel 18:23, 32) Iyang gipatin-aw nga aron may kahulogan, ang pagpuasa kinahanglang duyogan sa pagtul-id sa nangaging mga sala. Tagda ang nagasusi-sa-kasingkasing nga mga pangutana ni Jehova: “Dili ba kini mao ang puasa nga akong gipili? Aron badbaron ang mga talikala sa pagkadaotan, aron tangtangon ang mga bugkos sa yugo, ug sa pagpagawas sa mga dinaogdaog, ug aron inyong balion ang tanang yugo?”—Isaias 58:6.
9 Ang mga talikala ug mga yugo maoy haom nga mga simbolo sa mapintasong pagpangulipon. Busa inay magpuasa ug sa samang panahon magdaogdaog sa mga isigkamagtutuo, ang katawhan angayng magsugot sa sugo: “Higugmaon mo ang imong isigkatawo sama sa imong kaugalingon.” (Levitico 19:18) Angay nilang pagawson ang tanang ilang gidaogdaog ug giulipon nga dili-makataronganon. a Ang mapagawalong mga relihiyosong buhat, sama sa pagpuasa, dili kapuli sa tiunayng diyosnong pagkamahinalaron ug mga buhat nga nagpasundayag sa inigsoong gugma. Usa ka katalirongan ni Isaias, ang manalagnang Miqueas, nagsulat: “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?”—Miqueas 6:8.
10, 11. (a) Alang sa mga Hudiyo, unsa ang mas maayo kay sa pagpuasa? (b) Sa unsang paagi ang mga Kristohanon karong adlawa makapadapat sa tambag ni Jehova sa mga Hudiyo?
10 Ang hustisya, kalulot, ug pagkamakasaranganon nagkinahanglan sa pagbuhat ug maayo ngadto sa uban, nga mao ang diwa sa Balaod ni Jehova. (Mateo 7:12) Mas maayo kay sa pagpuasa mao ang pagpaambit sa ilang bahandi uban sa kabos. Si Jehova nangutana: “Dili ba [ang puasa nga akong gipili] ang pakigbahin sa imong tinapay ngadto sa gigutom, ug nga imong dad-on ang sinakit, mga tawong walay puloy-anan ngadto sa imong balay? Nga, kon pananglit ikaw makakita sa usa nga hubo, imo siyang pagabestihan, ug nga dili ka magtago gikan sa imong kaugalingong unod?” (Isaias 58:7) Oo, inay nga magpagawal sa pagpuasa, kadtong may kahinguhaan sa paghimo niana angayng mohatag ug pagkaon, besti, o puy-anan ngadto sa kabos nga kaubang mga molupyo sa Juda—ang ilang kabanay.
11 Kining maanindot nga mga prinsipyo sa inigsoong gugma ug kahangawa nga gipahayag ni Jehova dili lang mapadapat sa mga Hudiyo sa panahon ni Isaias. Kini magagiya usab sa mga Kristohanon. Busa, si apostol Pablo misulat: “Nan, sa pagkatinuod, samtang kita may kahigayonan alang niini, buhaton nato ang maayo ngadto sa tanan, apan ilabina kanila nga atong kabanay sa pagtuo.” (Galacia 6:10) Ang Kristohanong kongregasyon kinahanglang usa ka dangpanan nga may gugma ug inigsoong pagbati, ilabina tungod sa nagakalisod nga mga panahon nga atong gikinabuhian.—2 Timoteo 3:1; Santiago 1:27.
Pagkamasinugtanon Magadalag Daghang Panalangin
12. Unsay buhaton ni Jehova kon ang iyang katawhan magmasinugtanon kaniya?
12 Kon ang katawhan ni Jehova nakabaton unta ug hait nga pagsabot aron mamati sa iyang mahigugmaong pagbadlong! Si Jehova nag-ingon: “Nianang kahimtanga ang imong kahayag mosidlak sama gayod sa kaadlawon; ug ang imong pagkaayo motungha sa madali. Ug ang imong pagkamatarong tinong maglakaw nga una kanimo; ang mismong himaya ni Jehova mahimong imong magbalantay sa luyo. Nianang kahimtanga ikaw motawag, ug si Jehova motubag; ikaw motuaw alang sa tabang, ug siya moingon, ‘Ania ako!’” (Isaias 58:8, 9a) Pagkamabination, pagkamadanihong mga pulong! Si Jehova magpanalangin ug magpanalipod niadtong nahimuot sa mahigugmaong-kalulot ug pagkamatarong. Kon ang katawhan ni Jehova maghinulsol sa ilang kapintasan ug kasalingkapaw ug magmasinugtanon kaniya, ang kahimtang mas magmasanagon alang kanila. Itugot ni Jehova ang “pagkaayo,” usa ka espirituwal ug lawasnong pagkaayo alang sa nasod. Iyang pagabantayan usab sila, sama sa iyang gibuhat sa ilang mga katigulangan sa dihang sila nanggawas sa Ehipto. Ug siya mosanong dayon sa ilang mga pagtuaw alang sa tabang.—Exodo 14:19, 20, 31.
13. Unsang mga panalangin ang nagpaabot sa mga Hudiyo kon mosanong sila sa tambag ni Jehova?
13 Si Jehova karon nagdugang sa iyang sayosayong tambag, nga nag-ingon: “Kon imong kuhaon sa imong taliwala ang yugo [sa mapintason, dili-makataronganong pagpangulipon], ang pagtulisok sa tudlo [lagmit sa matamayon o bakak nga sumbong] ug ang pagsulti kon unsay makadaot; ug imong ihatag sa gigutom ang tinguha sa imong kalag, ug imong tagbawon ang kalag nga ginasakit, ang imong kahayag usab tinong mokidlap bisan diha sa kangitngit, ug ang imong kangiob mahisama sa kaudtohon.” (Isaias 58:9b, 10) Ang kahakog ug kapintasan makadaot sa kaugalingon ug magpahinabo sa kapungot ni Jehova. Hinunoa, ang kalulot ug kamanggihatagon ilabina kon ipasundayag ngadto sa gigutom ug sa sinakit, magpahinabo sa tugob nga panalangin sa Diyos. Kon itisok unta sa mga Hudiyo ang maong mga kamatuoran sa kasingkasing! Unya ang ilang espirituwal nga kasanag ug kadagaya magpasidlak kanila nga sama sa adlaw sa kaudtohon, nga magpapas sa bisan unsang pagkamasub-anon. Labaw sa tanan, ilang ihatag ang kadungganan ug pagdayeg kang Jehova, ang Tinubdan sa ilang himaya ug mga panalangin.—1 Hari 8:41-43.
Usa ka Nasod Napasig-uli
14. (a) Unsay sanong sa mga katalirongan ni Isaias sa iyang mga pulong? (b) Unsay gipadayon sa pagtanyag ni Jehova?
14 Ikasubo, ang nasod wala manumbaling sa hangyo ni Jehova ug miunlod nga mas lalom sa pagkadaotan. Sa kadugayan, si Jehova wala nay kapaingnan gawas ang pagdestiyero kanila, sumala sa iyang gipasidaan. (Deuteronomio 28:15, 36, 37, 64, 65) Bisan pa niana, ang sunod nga mga pulong ni Jehova pinaagi ni Isaias nagpadayon sa pagtanyag ug paglaom. Gitagna sa Diyos nga ang nadisiplina na, mahinulsolong nahibilin malipayong mobalik ngadto sa yuta sa Juda, bisan pag kana nahimong kamingawan.
15. Unsang malipayong pagpasig-uli ang gitagna ni Jehova?
15 Sa pagpunting sa pagpasig-uli sa iyang katawhan sa 537 W.K.P., si Jehova, pinaagi ni Isaias, nag-ingon: “Si Jehova magtultol kanimo sa kanunay ug magtagbaw sa imong kalag bisan diha sa napagbang yuta, ug iyang pabaskogon ang imong kabukogan; ug ikaw mahisama sa usa ka maayong pagkatubig nga tanaman, ug sama sa tuboran sa tubig [“tubod,” The New English Bible], nga ang katubigan niini dili mohubas [“mapakyas,” NE].” (Isaias 58:11) Ipasig-uli ni Jehova ang napagbang yutang-natawhan sa Israel ngadto sa malamboong pagkamabungahon. Mas kahibulongan pa, iyang panalanginan ang iyang mahinulsolong katawhan, nga pabaskogon ang ilang “kabukogan” gikan sa pagkapatay sa espirituwal ngadto sa bug-os nga pagkamaabtikon. (Ezequiel 37:1-14) Ang katawhan mismo mahisama sa “usa ka maayong pagkatubig nga tanaman” nga punog espirituwal nga mga bunga.
16. Sa unsang paagi ang yuta mapasig-uli?
16 Ang pagpasig-uli maglakip sa pagtukod pag-usab sa mga siyudad nga gilaglag sa Babilonyanhong mga manunulong sa 607 W.K.P. “Sa imong pag-aghat tinong tukoron sa mga tawo ang mga dapit nga nagun-ob sa dugay nga panahon; imong patindogon bisan ang mga patukoranan sa nagpadayong mga kaliwatan. Ug ikaw pagatawgon gayod nga mag-aayo sa kal-ang, ang tigpasig-uli sa mga dalan nga pagapuy-an.” (Isaias 58:12) Ang susamang mga pamulong “ang mga dapit nga nagun-ob sa dugay nga panahon” ug “ang mga patukoranan sa nagpadayong mga kaliwatan” (o, ang mga patukoranan nga nagpabiling gun-ob sulod sa mga kaliwatan) nagpakitang tukoron pag-usab sa nahibalik nga nahibilin ang nagun-ob nga mga siyudad sa Juda, ilabina ang Jerusalem. (Nehemias 2:5; 12:27; Isaias 44:28) Ilang ayohon ang “kal-ang”—usa ka malangkobon nga termino nga nagtumong sa mga guba sa mga paril sa Jerusalem ug sa walay duhaduha sa ubang mga siyudad usab.—Jeremias 31:38-40; Amos 9:14.
Mga Panalangin Gumikan sa Matinumanong Pagtuman sa Igpapahulay
17. Sa unsang paagi si Jehova mihangyo sa iyang katawhan nga sundon ang mga balaod sa Igpapahulay?
17 Ang Igpapahulay maoy usa ka pagpahayag sa dulot nga kabalaka sa Diyos alang sa lawasnon ug espirituwal nga kaayohan sa iyang katawhan. Si Jesus miingon: “Ang igpapahulay gibuhat alang sa tawo.” (Marcos 2:27) Kining adlawa nga gibalaan ni Jehova mihatag sa mga Israelinhon ug linaing kahigayonan aron ipakita ang ilang gugma alang sa Diyos. Ikasubo, sa panahon ni Isaias kadto nahimo na lang nga adlaw sa pagtuman sa way-kahulogang mga rituwal ug sa pagpatuyang sa hakog nga mga tinguha. Busa sa makausa pa, gibadlong ni Jehova ang iyang katawhan. Ug dugang pa, gipaninguha niyang matandog ang ilang mga kasingkasing. Siya nag-ingon: “Kon tungod sa igpapahulay imong ilikay ang imong tiil kon bahin sa pagbuhat sa imong kaugalingong mga gikahimut-an diha sa akong balaang adlaw, ug pagatawgon gayod ang igpapahulay nga tumang kalipay, usa ka balaang adlaw ni Jehova, usa nga ginahimaya, ug pagahimayaon gayod kini inay nga buhaton ang imong kaugalingong mga paagi, inay nga mangita sa kon unsay makapahimuot kanimo ug magasultig pulong; sa ingon ikaw makakaplag sa imong tumang kalipay diha kang Jehova, ug pasakyon ko ikaw ibabaw sa hatag-as nga mga dapit sa yuta; ug pakan-on ko ikaw gikan sa kabilin ni Jacob nga imong katigulangan, kay ang baba ni Jehova nagsulti niini.”—Isaias 58:13, 14.
18. Unsay sangpotanan sa pagkapakyas sa Juda sa pagtahod sa Igpapahulay?
18 Ang Igpapahulay maoy usa ka adlaw sa espirituwal nga pagpamalandong, pag-ampo, ug pamilyahanong pagsimba. Kini angay motabang sa mga Hudiyo sa pagpalandong bahin sa kahibulongang mga buhat ni Jehova alang kanila ug bahin sa hustisya ug gugma nga gipadayag diha sa iyang Balaod. Busa, ang matinumanong pagtuman niining balaang adlaw angay motabang sa mga tawo nga mahimong mas suod sa ilang Diyos. Sa kapulihay, sila nagtuis sa diwa sa Igpapahulay ug busa nameligrong mahikawan sa panalangin ni Jehova.—Levitico 26:34; 2 Cronicas 36:21.
19. Unsang dagayang panalangin ang gitagana alang sa katawhan sa Diyos kon sila moliso sa pagtuman sa Igpapahulay?
19 Bisan pa niana, kon ang mga Hudiyo makatuon gikan sa disiplina ug moliso sa pagtahod sa kahikayan sa Igpapahulay, gitagana ang dagayang panalangin. Ang maayong mga epekto sa matuod nga pagsimba ug pagtahod alang sa Igpapahulay moawas ug mokaylap ngadto sa tanang bahin sa ilang mga kinabuhi. (Deuteronomio 28:1-13; Salmo 19:7-11) Pananglitan, si Jehova ‘magpasakay [sa iyang katawhan] ibabaw sa hatag-as nga mga dapit sa yuta.’ Kining maong pamulong nagpasabot sa kasegurohan ug pagbihag sa mga kaaway sa usa. Bisan kinsay nagagahom sa hatag-as nga mga dapit—ang kabungtoran ug ang kabukiran—mao ang nagagahom sa yuta. (Deuteronomio 32:13; 33:29) Sa usa ka panahon ang Israel nagsugot kang Jehova, ug ang nasod nagtagamtam sa iyang panalipod ug gitahod, gikahadlokan pa sa ubang mga nasod. (Josue 2:9-11; 1 Hari 4:20, 21) Kon sa makausa pa sila moliso kang Jehova diha sa pagkamasinugtanon, ipasig-uli ang bahin nianang kanhing kahimayaan. Ihatag ni Jehova sa iyang katawhan ang bug-os nga bahin sa “kabilin ni Jacob”—ang mga panalangin nga gisaad pinaagi sa Iyang pakigsaad uban sa ilang mga katigulangan, ilabina ang panalangin sa may-kasegurohang pagpanag-iya sa Yutang Saad.—Salmo 105:8-11.
20. Unsang “pagpahulay sa igpapahulay” ang anaa alang sa mga Kristohanon?
20 Aduna bay leksiyon niini alang sa mga Kristohanon? Sa pagkamatay ni Jesu-Kristo, ang Moisesnong Balaod napapas na, lakip ang mga kinahanglanon sa Igpapahulay. (Colosas 2:16, 17) Bisan pa niana, ang nagpahiping diwa nga angay idasig sa pagtuman sa Igpapahulay sa Juda—ang pag-una sa espirituwal nga intereses ug pagpakigsuod kang Jehova—hinungdanon gihapon alang sa mga magsisimba ni Jehova. (Mateo 6:33; Santiago 4:8) Dugang pa, si Pablo, sa iyang sulat ngadto sa mga Hebreohanon, nag-ingon: “Adunay nagpabilin nga usa ka pagpahulay sa igpapahulay alang sa katawhan sa Diyos.” Ang mga Kristohanon mosulod niining “pagpahulay sa igpapahulay” pinaagi sa pagkamasinugtanon kang Jehova ug pagsunod sa pagkamatarong nga gipasukad sa pagtuo diha sa inula nga dugo ni Jesu-Kristo. (Hebreohanon 3:12, 18, 19; 4:6, 9-11, 14-16) Alang sa mga Kristohanon, kining matanga sa pagtuman sa igpapahulay gituman, dili lang usa ka adlaw sa usa ka semana, kondili sa matag adlaw.—Colosas 3:23, 24.
Ang Espirituwal nga Israel ‘Nagsakay Ibabaw sa Hatag-as nga mga Dapit sa Yuta’
21, 22. Sa unsang paagi si Jehova ‘nagpasakay [sa Israel sa Diyos] ibabaw sa hatag-as nga mga dapit sa yuta’?
21 Sukad sa ilang pagkagawas sa Babilonyanhong pagkabihag niadtong 1919, ang dinihogang mga Kristohanon matinumanong nagtuman sa gilandongan sa Igpapahulay. Ingong resulta, si Jehova ‘nagpasakay [kanila] ibabaw sa hatag-as nga mga dapit sa yuta.’ Sa unsang diwa? Balik sa 1513 W.K.P., si Jehova mihimog usa ka pakigsaad uban sa mga kaliwat ni Abraham nga kon sila magmasinugtanon, sila mahimong usa ka gingharian sa mga saserdote ug usa ka balaang nasod. (Exodo 19:5, 6) Sa katibuk-ang 40 ka tuig sa kamingawan, si Jehova luwas nga nagdala kanila, sama sa pagdala sa agila sa mga kuyabog niini, ug gipanalanginan silag daghang tagana. (Deuteronomio 32:10-12) Ugaling lang, ang nasod nawad-an ug pagtuo, ug sa kataposan nawad-an sa tanang pribilehiyo nga ila untang mabatonan. Bisan pa niana, si Jehova adunay usa ka gingharian sa mga saserdote karong adlawa. Kini mao ang espirituwal nga Israel sa Diyos.—Galacia 6:16; 1 Pedro 2:9.
22 Sulod sa “panahon sa kataposan,” kining espirituwal nga nasod nagbuhat kon unsay wala buhata sa karaang Israel. Sila nagpadayon sa pagtuo kang Jehova. (Daniel 8:17) Samtang ang mga membro niini mapig-otong magtuman sa hatag-as nga mga sukdanan ug sa halangdong mga dalan ni Jehova, sa espirituwal nga diwa si Jehova magbayaw kanila. (Proverbio 4:4, 5, 8; Pinadayag 11:12) Nga sinalipdan gikan sa kahugawan nga nag-alirong kanila, sila nagpahimulos ug hataas nga estilo-sa-kinabuhi, ug inay mamugos nga sundon ang ilang kaugalingong mga dalan, sila nakakaplag sa “tumang kalipay diha kang Jehova” ug sa iyang Pulong. (Salmo 37:4) Si Jehova naghupot kanila nga luwas sa espirituwal bisan pa sa hugot nga pagsupak sa tibuok kalibotan. Sukad sa 1919 ang ilang espirituwal nga “yuta” wala mabungkag. Sila nagpadayong usa ka katawhan alang sa iyang halangdong ngalan, nga ilang malipayong gimantala sa tibuok kalibotan. (Deuteronomio 32:3; Buhat 15:14) Dugang pa, ang nagkadaghang mga maaghop gikan sa tanang nasod karon nagpakig-ambit uban kanila sa talagsaong pribilehiyo sa pagkatinudloan sa mga dalan ni Jehova ug natabangan sa pagsubay sa iyang mga agianan.
23. Sa unsang paagi si Jehova nagpahinabo nga ang iyang dinihogang mga alagad ‘makakaon gikan sa kabilin ni Jacob’?
23 Si Jehova nagpahinabo nga ang iyang dinihogang mga alagad ‘makakaon gikan sa kabilin ni Jacob.’ Sa dihang si Isaac nagpanalangin kang Jacob inay kang Esau, ang mga pulong sa patriarka mitagnag mga panalangin alang sa tanang magpasundayag ug pagtuo diha sa sinaad nga Binhi ni Abraham. (Genesis 27:27-29; Galacia 3:16, 17) Sama kang Jacob—ug lahi kang Esau—ang dinihogang mga Kristohanon ug ilang mga kauban ‘nagpabili sa sagradong mga butang,’ ilabina ang espirituwal nga pagkaon nga madagayaong gitagana sa Diyos. (Hebreohanon 12:16, 17; Mateo 4:4) Kining espirituwal nga pagkaon—nga naglakip sa kahibalo bahin sa ginapalampos ni Jehova pinaagi sa sinaad nga Binhi ug sa mga kauban sa maong Binhi—nagapalig-on, nagapabaskog, ug mahinungdanon alang sa ilang espirituwal nga kinabuhi. Busa, hinungdanon kaayo nga kanunay silang mokaon sa espirituwal pinaagi sa pagbasa ug pagpalandong sa Pulong sa Diyos. (Salmo 1:1-3) Kinahanglang sila makig-uban sa isigkamagtutuo panahon sa Kristohanong mga tigom. Ug kinahanglanon kaayo nga sila magtuboy sa hatag-as nga mga sukdanan sa maputling pagsimba samtang sila malipayong makig-ambit sa maong pagkaon sa uban.
24. Sa unsang paagi magagawi ang matuod nga mga Kristohanon karong adlawa?
24 Samtang maikagong nagpaabot sa katumanan sa mga saad ni Jehova, hinaot ang matuod nga mga Kristohanon magpadayon sa pagsalikway sa tanang matang sa pagkasalingkapaw. Kay nagkaon sa “kabilin ni Jacob,” hinaot magpadayon sila sa pagpahimulos ug espirituwal nga kasegurohan diha sa “hatag-as nga mga dapit sa yuta.”
[Footnote]
a Si Jehova naglagda nga kadtong sakop sa iyang katawhan nga nakautang magbaligya sa ilang kaugalingon sa pagkaulipon—sa diwa mahimong sinuholang mga mamumuo—aron makabayad sa ilang utang. (Levitico 25:39-43) Bisan pa niana, gibaod sa Balaod nga ang mga ulipon pagatratahon sa malulotong paagi. Kadtong gitratar nga mabangison angayng hatagan ug kagawasan.—Exodo 21:2, 3, 26, 27; Deuteronomio 15:12-15.
[Mga Pangutana sa Pagtuon]
[Hulagway sa panid 278]
Ang mga Hudiyo nagpuasa ug nagduko sa ilang mga ulo diha sa aron-ingnong paghinulsol—apan wala sila mag-usob sa ilang mga dalan
[Hulagway sa panid 283]
Kadtong adunay kahinguhaan sa paghimo niana mohatag ug puy-anan, besti, o mga pagkaon niadtong anaa sa kawalad-on
[Hulagway sa panid 286]
Kon maghinulsol ang Juda, iyang tukoron pag-usab ang iyang nagun-ob nga mga siyudad
